गिनती 19
19
शुद्धिकरन की विधि
1फिर परमेश्वर न मूसा अऊर हारून सी कह्यो, 2“व्यवस्था की जो विधि की आज्ञा परमेश्वर देवय हय वा या आय : तय इस्राएलियों सी कह्य कि मोरो जवर एक लाल निर्दोष गोरी ले आवो, जेको म कोयी भी दोष नहीं होना, अऊर ओख कभी जोत्यो नहीं गयो होना। 3तब ओख एलीआज़ार याजक ख देवो, अऊर ऊ ओख छावनी सी बाहेर लिजाये, अऊर कोयी ओख याजक को सामने बलिदान करे; 4तब एलीआज़ार याजक अपनो बोट सी ओको कुछ खून ले क मिलाप वालो तम्बू को सामने को तरफ सात बार छिड़क दे। 5तब कोयी वा गोरी ख खाल, मांस, खून, अऊर गोबर सहीत याजक को सामने जलायेंन; 6अऊर याजक देवदारु की लकड़ी, जूफा, अऊर लाल रंग को कपड़ा ले क वा आगी म डाल दे जेको म वा गोरी जल रह्यी हय। 7तब याजक अपनो कपड़ा धोय क आंग धोये, येको बाद छावनी म आये, पर शाम तक अशुद्ध रहे। 8अऊर जो आदमी गोरी ख जलायेंन ऊ भी पानी सी अपनो कपड़ा धोयेंन अऊर आंग धोयेंन, अऊर शाम तक अशुद्ध रहेंन। 9#इब्रानियों ९:१३फिर कोयी शुद्ध आदमी वा गोरी की राख जमा कर क् छावनी को बाहेर कोयी शुद्ध जागा म रख दे; अऊर वा राख इस्राएलियों की मण्डली लायी अशुद्धता सी छुड़ावन वालो पानी लायी रखी रहे; वा पापबलि आय। 10अऊर जो आदमी गोरी की राख जमा करे ऊ अपनो कपड़ा धोये, अऊर शाम तक अशुद्ध रहे। अऊर या इस्राएलियों लायी, अऊर उन्को बीच रहन वालो परदेशियों लायी भी हमेशा की विधि ठहरेंन।”
शव ख छूवन सी अशुद्धता
11“जो कोयी आदमी को शव छुये ऊ सात दिन तक अशुद्ध रहे; 12असो आदमी तीसरो दिन ऊ पानी सी पाप छुड़ाय क अपनो ख शुद्ध करे, अऊर सातवों दिन शुद्ध ठहरे; पर यदि ऊ तीसरो दिन अपनो आप ख पाप छुड़ाय क शुद्ध नहीं करय, त सातवों दिन शुद्ध नहीं होयेंन। 13जो कोयी आदमी को शव छुय क पाप छुड़ाय क अपनो आप ख शुद्ध नहीं करे, ऊ परमेश्वर को निवास स्थान ख अशुद्ध करन वालो ठहरेंन, अऊर ऊ प्रानी इस्राएल म सी नाश करयो जायेंन; अशुद्धता सी छुड़ावन वालो पानी ओको पर नहीं छिड़क्यो गयो होना, त ऊ अशुद्ध ठहरेंन, ओकी अशुद्धता ओको म बनी रहेंन।
14“यदि कोयी आदमी छावनी म मर जाये त व्यवस्था या हय : जितनो ऊ डेरा म रहेंन, या ओको म जायेंन, हि सब सात दिन तक अशुद्ध रहेंन। 15अऊर हर एक खुल्यो हुयो बर्तन, जेको पर कोयी झकन नहीं लग्यो होना, त ऊ अशुद्ध ठहरेंन। 16अऊर जो कोयी मैदान म तलवार सी मरयो हुयो ख, यां अपनी मृत्यु सी मरयो हुयो ख, यां आदमी की हड्डी ख, या कोयी कब्र ख छुये, त ऊ सात दिन तक अशुद्ध रहे।
17“अशुद्ध आदमी लायी जलायो हुयो पापबलि की राख म सी कुछ ले क बर्तन म डाल क ओको पर झरना को पानी डाल्यो जाये; 18तब कोयी शुद्ध आदमी जूफा ले क ऊ पानी म डुबाय क पानी ख ऊ डेरा पर, अऊर जितनो बर्तन अऊर आदमी ओको म हो, उन्को पर छिड़के, अऊर हड्डी को, यां अपनी मृत्यु सी मरयो हुयो ख, यां कब्र को छुवन वालो पर छिड़क दे; 19अऊर शुद्ध आदमी तीसरो दिन अऊर सातवों दिन ऊ अशुद्ध आदमी पर छिड़के; अऊर सातवों दिन ऊ ओको पाप छुड़ाय क ओख शुद्ध करेंन, तब ऊ अपनो कपड़ा ख धोय क अऊर पानी सी आंग धोय क शाम ख शुद्ध ठहरेंन।
20“जो कोयी अशुद्ध होय क अपनो पाप छुड़ाय क अपनो आप ख शुद्ध नहीं कराये, ऊ मनुष्य परमेश्वर को पवित्र स्थान ख अशुद्ध करन वालो ठहरेंन, यो कारन ऊ मण्डली को बीच म सी अलग करयो जायेंन; अशुद्धता सी छुड़ान वालो पानी ओको पर छिड़क्यो नहीं गयो, यो वजह सी ऊ अशुद्ध ठहरेंन। 21अऊर या उन्को लायी हमेशा की विधि ठहरेंन। जो अशुद्धता सी छुड़ावन वालो पानी छिड़के ऊ अपनो कपड़ा ख धोये; अऊर जो कोयी ऊ अशुद्धता सी छुड़ावन वालो पानी ख छुये ऊ भी शाम तक अशुद्ध रहेंन। 22अऊर जो कुछ ऊ अशुद्ध आदमी छुये ऊ भी अशुद्ध ठहरे; अऊर जो आदमी वा चिज ख छुये ऊ भी शाम तक अशुद्ध रहेंन।”
The Lodhi Bible © The Word for the World International and Lodhi Translation Samithi, Gondia, Maharashtra 2025