ମୂଲୁ 41
41
ଜସେପ ରାଜାତି ହାପାନା ୱେହ୍ନାୟି
1ରୀ ବାର୍ସା ରା଼ହାଲିଏ, ପା଼ର ଈ ହାପାନା ହେ଼ଟେସି; ଏ଼ୱାସି ନିଲ କାଡା ଗାଟୁତା ନିଚାମାନେସି। 2ମେହ୍ଦୁ କାଡା ବିତ୍ରାଟି ସା଼ତାଗଟା ଆଙ୍ଗାଆ଼ତି ଅ଼ଜିତି କ଼ଡିୟାଁ ନିଙ୍ଗାହାଁ ହାରା ମେୟାଁଲି ମା଼ଟ୍ହୁ। 3ଏ଼ୱାସିକା ଜେ଼ଚ ଅ଼ଡ଼େ ଏଟ୍କାତି ସା଼ତାଗଟା ଆଙ୍ଗା ହିଲାଆ ଡାହିତି କ଼ଡିୟାଁ କାଡାଟି ନିଙ୍ଗାହାଁ କାଡା ଗାଟୁତା ଏ଼ କ଼ଡିୟାଁ ଟଟ ନିତୁ। 4ଏଚେଟିଏ ଏ଼ ଆଙ୍ଗା ହିଲାଆ ଡାହିତି କ଼ଡିୟାଁ ଏ଼ ସା଼ତାଗଟା ଆଙ୍ଗାଆ଼ତି କ଼ଡିୟାଁଣି ତିଚୁ। ଏଚିବେ଼ଲାତା ପା଼ର ଇଦାଟି ତେଃଏଲିତେସି। 5ଏଚେଟିଏ ଏ଼ୱାସି ଅ଼ଡ଼େ ୱେଣ୍ତେ ଇଦା କିହାଁ ଅ଼ଡ଼େ ୱେଣ୍ତେ ହାପାନା ହେ଼ଟେସି; ର଼ ଗେଲାତା ସା଼ତାଗଟା ନେଞ୍ଜାମାନି ନେହିଁ ଜେ଼ଙ୍ଗୁ ହ଼ତେ। 6ଏ଼ଦାଆଁ ଜେ଼ଚ ୱେ଼ଡ଼ା ହ଼ପୁ ଗା଼ଲିତା ୱା଼ୟିତି ସା଼ତାଗଟା ଊଣା ଜେ଼ଙ୍ଗୁ ହ଼ତୁ। 7ଇଞ୍ଜାଁ ଏ଼ ସା଼ତାଗଟା ଊଣା ଜେ଼ଙ୍ଗୁ ଈ ସା଼ତାଗଟା ନେଞ୍ଜାମାନି ବାରେ ଜେ଼ଙ୍ଗୁତି ନା଼ସା କିତୁ। ଏଚିବେ଼ଲାତା ପା଼ର ଇଦାଟି ତେଃଏଲିତେସି। 8ଇଞ୍ଜାଁ ଲା଼ଇ ଏ଼ୱାଣି ମ଼ନ କିଲିବିଲି ଆ଼ତେ, ଏ଼ଦାଆଁତାକି ଏ଼ୱାସି ମିସର ଦେ଼ସାତି ଲ଼କୁଣି ପାଣ୍ତାହାଁ ଗୂର୍କା ଅ଼ଡ଼େ ବୁଦି ପୁନାରାଇଁ ବାରେତି ହା଼ଟିକିତେସି; ସାମା ପା଼ର ଏ଼ୱାରି ନ଼କିତା ତାନି ହାପାନା ୱେସ୍ତେସି, ଏ଼ୱାରି ବିତ୍ରାଟି ଆମ୍ବାଆରି ପା଼ରଇଁ ଏମ୍ବାତି ଅର୍ତ ୱେସାଲି ଆ଼ଡାଆତେରି।
9ଏଚିବେ଼ଲା ଅଙ୍ଗୁରି ରାସା ହୀନାରି କାଜାସି ପା଼ରଇଁ ଏଲେଇଚେସି, “ନୀଞ୍ଜୁ ନା଼ନୁ ନା଼ ଦ଼ହତି ଅଣ୍ପିମାଇଁ। 10ପା଼ର ତାନି ହ଼ଲେଏସି ନାଙ୍ଗେ ଅ଼ଡ଼େ କା଼ଦି ହୀନାରି କାଜାଣାଇଁ କାର୍ବି ଆ଼ହାଁ ମାଙ୍ଗେ କାଜା କ଼ସ୍କାତି କାୟିଦି ଇଲୁତା ସୁଣ୍ତାତେସି 11ଏଚେଟିଏ ମା଼ମ୍ବୁ ରିଆତମି ର଼ ଲା଼ଆଁୟାଁ ହାପାନା ହେ଼ଟମି; ଅ଼ଡ଼େ ରିଆତମି ମା଼ ହାପାନା ଏଟ୍କା ଏଟ୍କା ରୀ ୱା଼ଣାତି ଅର୍ତ ମାଚେ। 12ଏମ୍ବାଆଁ ମା଼ ତଲେ କାୟିଦି ଇଲୁତି କାଜାଣି ହ଼ଲେଏସି ର଼ ଏବ୍ରି ଦାଂଗ୍ଣେଏସି ମା଼ ତଲେ ମାଚେସି; ମା଼ମ୍ବୁ ଏ଼ୱାଣାଇଁ ହାପାନାତି କାତା ୱେସାଲିଏ, ଏ଼ୱାସି ମାଙ୍ଗେ ଏମ୍ବାତି ଅର୍ତ ୱେସ୍ତାତେସି, ବାରେ ଜା଼ଣାତି ହାପାନାତି ଲେହେଁ ଅର୍ତ ୱେସ୍ତାତେସି। 13ଏଚେଟିଏ ଏ଼ୱାସି ମାଙ୍ଗେ ଏ଼ନିକିଁ ୱେସାମାଞ୍ଜାତେସି, ଏଲେକିହିଁଏ ଆ଼ତେ; ନା଼ନୁ ତଲିତି ପା଼ଣାତା ଡ଼ୟିତେଏଁ ଅ଼ଡ଼େ ଏ଼ୱାଣାଇଁ ଜିଲା ଲେତି।”
14ଏଚିବେ଼ଲା ପା଼ର ଜସେପଇଁ ହା଼ଟିକିହାଲିଏ, ଲ଼କୁ କାୟିଦିଟି ଏ଼ୱାଣାଇଁ ତବେ ତାତେରି; ଏ଼ୱାସି ହ଼ଡ଼ାୟାଁ ହିସାହାଁ ନେହିଁ ବାସ୍ତେରି ତୁର୍ହାଁ ପା଼ର ତା଼ଣା ୱା଼ତେସି। 15ଏଚେଟିଏ ପା଼ର ଜସେପଇଁ ଏଲେଇଚେସି, “ନା଼ନୁ ର଼ ହାପାନା ହେ଼ଟେଏଁ, ଆମ୍ବାଆରି ଏମ୍ବାତି କାତା ୱେସାଲି ଆ଼ଡିହିଲଅରି; ସାମା ନା଼ନୁ ନୀ କାତା ୱେଞ୍ଜାମାଇଁ, ଇଚିହିଁ ନୀନୁ ହାପାନା ୱେଚିହିଁ ଏମ୍ବାତି ଅର୍ତ ୱେସାଲି ଆ଼ଡିଦି।”
16ଏଚେଟିଏ ଜସେପ ଏଲେଇଚେସି, “ଏ଼ଦି ନା଼ ତା଼ଣା ହିଲେଏ ସାମା ମାହାପୂରୁ ପା଼ରଇଁ ନେହିଁ କାତା ୱେହ୍ନେସି।”
17ପା଼ର ଜସେପଇଁ ଏଲେଇଚେସି, “ମେହ୍ମୁ ହାପାନାତା ନା଼ନୁ ନିଲ କାଡା ଗିଚୁତା ନିଚା ମାଚେଏଁ। 18ଏଚେ଼ଟିଏ କାଡା ବିତ୍ରାଟି ସା଼ତାଗଟା ଆଙ୍ଗାଆ଼ତି ଅ଼ଜିତି କ଼ଡିୟାଁ ନିଙ୍ଗାହାଁ ହାରା ମେୟାଁଲି ମା଼ଟ୍ହୁ। 19ଏଚେ଼ଟିଏ ଏ଼ୱାସିକା ଜେ଼ଚ ସା଼ତାଗଟା ଆଙ୍ଗା ହିଲାଆ ଡାହିତି କ଼ଡିୟାଁ ନିଙ୍ଗା ୱା଼ତୁ; ନା଼ନୁ ଇଲେତି ଡାହିତି କ଼ଡିୟାଁ ମିସର ଦେ଼ସାତା ମେସାହିଲଅଁ। 20ଇଞ୍ଜାଁ ଏ଼ ଆଙ୍ଗା ହିଲାଆ ଡାହିତି କ଼ଡିୟାଁ ଆଙ୍ଗାଆ଼ତି ଏ଼ ସା଼ତାଗଟା କ଼ଡିୟାଁଇଁ ତିଞ୍ଜାତୁସ୍ତୁ। 21ସାମା ତିଚି ଡା଼ୟୁ ଏ଼ୱାସିକା ବାଣ୍ତି ତିଚି ଲେହେଁ ତ଼ଞ୍ଜା ଆ଼ଆତେ; ଏ଼ୱି ତଲିତି ଲେହେଁ ଡାହିତାଇ ଡ଼ୟିତୁ। ଏଚିବେ଼ଲା ନା଼ନୁ ଇଦାଟି ତେଃଏଲିତେଏଁ। 22ଏଚେଟିଏ ନା଼ନୁ ହାପାନା ମେସ୍ତେଏଁ, ର଼ ଗେଲାତା ସା଼ତାଗଟା ନେଞ୍ଜାମାନି ନେହିଁ ଜେ଼ଙ୍ଗୁ ହ଼ତେ। 23ଏଚେଟିଏ ଡା଼ୟୁ ୱେ଼ଡ଼ା ହ଼ପୁ ୱାକିତି ଗା଼ଲିତା ୱା଼ୟିତି ଊଣା ୱା଼ଡ଼ିତି ଜେ଼ଙ୍ଗୁ ହ଼ତେ। 24ଅ଼ଡ଼େ, ଏ଼ ଊଣା ଜେ଼ଙ୍ଗୁ, ଏ଼ ନେହିଁ ସା଼ତାଗଟା ଜେ଼ଙ୍ଗୁତି ନା଼ସା କିତେ। ଈ ହାପାନା ନା଼ନୁ ଗୂର୍କାଣି ୱେସ୍ତେଏଁ, ସାମା ଆମ୍ବାଆରି ଏମ୍ବାତି ଅର୍ତ ୱେସାଲି ଆ଼ଡାଆତେରି।”
25ଏଚେଟିଏ ଜସେପ ପା଼ରଇଁ ଏଲେଇଚେସି, “ପା଼ରତି ରୀ ହାପାନା ରଣ୍ତିଏ; ମାହାପୂରୁ ଏ଼ନାଆଁ କିହାଲି ହାଜିମାନେସି ଏ଼ଦାଆଁ ପା଼ରଇଁ ୱେସାମାନେସି। 26ଏ଼ ସା଼ତାଗଟା ଆଙ୍ଗାଆ଼ତି କ଼ଡିୟାଁ ସା଼ତା ବାର୍ସା ସମାନା, ଅ଼ଡ଼େ ସା଼ତାଗଟା ଜେ଼ଙ୍ଗୁ ଜିକେଏ ସା଼ତା ବାର୍ସା ସମାନା; ଏ଼ ରୀ ହାପାନାତି ଅର୍ତ ରଣ୍ତିଏ। 27ଏ଼ ଡା଼ୟୁତି ସା଼ତାଗଟା ଆଙ୍ଗା ହିଲାଆ କ଼ଡିୟାଁ; ଅ଼ଡ଼େ ୱେ଼ଡ଼ା ହ଼ପୁ ଗା଼ଲିତା ୱା଼ୟିତି ସା଼ତାଗଟା ଜେ଼ଙ୍ଗୁ ସା଼ତା ବାର୍ସାତି କାର୍ୱୁ ସମାନା। 28ନା଼ନୁ ପା଼ରଇଁ ୱେସାମାଇଁ, ମାହାପୂରୁ ଏ଼ନାଆଁ କିହାଲି ଅଣ୍ପାମାନେସି, ଏ଼ଦାଆଁ ପା଼ରଇଁ ତ଼ସାମାନେସି। 29ମେହ୍ଦୁ, ବାରେ ମିସର ଦେ଼ସାତା ସା଼ତା ବାର୍ସା ନେହିଁ ବାର୍ସା ଆ଼ନେ। 30ଏ଼ଦାଆଁ ଡା଼ୟୁ, ସା଼ତା ବାର୍ସା ତାକି କାର୍ୱୁ ଆ଼ନେ; ଅ଼ଡ଼େ ବାରେ ନେହିଁ ବାର୍ସା ମିସର ଦେ଼ସା ବା଼ଣାଆ଼ନେ, ଇଚିହିଁ କାର୍ୱୁତା ଦେ଼ସାତି ନା଼ସା କିନେ। 31ଅ଼ଡ଼େ, ଡା଼ୟୁ ୱା଼ନି କାର୍ୱୁ ତାକି ଦେ଼ସାତା ନେହିଁ ବାର୍ସା ତ଼ଞ୍ଜାଆ଼ଏ; ଇଚିହିଁ ଏ଼ଦି ହା଼ରେକା ଗାଡି ଆ଼ନେ। 32ପା଼ର ରୀ ପା଼ଲି ହାପାନାତା ମେହ୍ନାୟି ଆ଼ହିମାନେ ମାହାପୂରୁ ତା଼ଣାଟି ଏ଼ଦି ସାତେଏ ଆ଼ହାମାନେ, ଇଞ୍ଜାଁ ମାହାପୂରୁ ଏ଼ଦାଆଁ ତବେ କିନେସି।”
33“ଏ଼ଦାଆଁତାକି ନୀଏଁ ପା଼ର ର଼ ବୁଦି ଅ଼ଡ଼େ ବାରେ ପୁଚି ମାଣ୍ସିଇଁ ସିନିକିହାଁ ମିସର ଦେ଼ସାତା ଇଟାପେସି। 34ନୀଏଁ ପା଼ର ଇଲେ କିପେସି, ଦେ଼ସାତା କାଜାରାଇଁ ଆ଼ଚାହାଁ ସା଼ତା ବାର୍ସାତି ନେହିଁ ବାର୍ସାତା ମିସର ଦେ଼ସାଟି ଆର୍ନା ପା଼ସା ବା଼ଗାଟି ର଼ ବା଼ଗା ଇଟାପେସି। 35ଇଚିହିଁ, ଏ଼ୱାରି ଏ଼ ୱା଼ହିମାନି ନେହିଁ ବାର୍ସାତି ବାରେ କା଼ଦି କୂଡ଼ି କିପେରି, ଅ଼ଡ଼େ, ବାରେ ଗା଼ଡ଼ାତା କା଼ଦି ତାକି ପା଼ରତି କେୟୁତା ଆର୍ନା କୂଡ଼ିକିହାଁ ଇଟାପେରି। 36ଇଲେକିଁ ମିସର ଦେ଼ସାତା ୱା଼ହିମାନି କାର୍ୱୁତି ସା଼ତା ବାର୍ସା ତାକି ଦେ଼ସାତା ନୀଡାଲି ତାକି ଏ଼ ଆର୍ନା କୂଡ଼ି ଆ଼ହାମାଚିସାରେ, କାର୍ୱୁତା ଦେ଼ସା ନା଼ସା ଆ଼ଏ।”
ଜସେପ ମିସରତି ସା଼ଲୱି କିନାସି
37ଏଚିବେ଼ଲା ପା଼ର ଅ଼ଡ଼େ ତାନି ହ଼ଲିୟାଙ୍ଗା ତା଼ଣା ଈ କାତା ନେହିଁ ତ଼ଞ୍ଜାଆ଼ତେ। 38ଏଚେଟିଏ ପା଼ର ତାନି ହ଼ଲିୟାଙ୍ଗାଇଁ ଏଲେଇଚେସି, “ମା଼ର ଇଲେତି ନେହିଁ ମାଣ୍ସି ବେଟାଆ଼ହାଲି ଆ଼ଡାଆୟି ? ଈୱାଣି ତା଼ଣା ମାହାପୂରୁତି ଜୀୱୁ ମାନେ।” 39ଏଚେଟିଏ ପା଼ର ଜସେପଇଁ ଏଲେଇଚେସି, “ମାହାପୂରୁ ନିଙ୍ଗେ ଈ ବାରେ ତ଼ସାମାଞ୍ଜାନେସି, ଏ଼ଦାଆଁତାକି ନୀ ଲେହେଁତି ବୁଦି ଅ଼ଡ଼େ ତେଲ୍ହିନାସି ଆମ୍ବାଆସି ହିଲଅସି; 40ନୀନୁ ନା଼ ଦେ଼ସାତି ଗୁମୁସ୍ତା ଆ଼ମୁ; ଅ଼ଡ଼େ ନା଼ ବାରେ ଲ଼କୁ ନୀ କାତା ଆହ୍ନେରି। ୱାର୍ଇ ସିଂଗାସାଣିତା ନା଼ନୁ ନୀ କିହାଁ କାଜାତେଏଁ ଡ଼ୟିଇଁ।” 41ପା଼ର ଜସେପଇଁ ଅ଼ଡ଼େ ଏଲେଇଚେସି, “ମେହ୍ମୁ ନା଼ନୁ ନିଙ୍ଗେ ବାରେ ମିସର ଦେ଼ସା ଲାକ ସା଼ଲୱି କିହାଲି ହେର୍ପାତେଏଁ।” 42ଏଚେଟିଏ ପା଼ର ତାନି କେୟୁଟି ତାନି ସନ୍ତକି କିନି ମୁଦି ହୁକ୍ହାଁ ଜସେପ କେୟୁତା ହୀହାଁ ଦବ୍ଲା ହିମ୍ବରି ହୁଚି କିହାଁ ତାନି ହେର୍କିତା ବାଂଗାରା ହିକ୍ଣିୟାଁ ତୁର୍ୱି କିତେସି। 43ଇଞ୍ଜାଁ ଏ଼ୱାସି ଏ଼ୱାଣାଇଁ ତାନି ଅ଼ର ରାତାତା ହ଼ପ୍ହେସି ଅ଼ଡ଼େ ଲ଼କୁ ତାନି ନ଼କି ନ଼କିତା “ମେଣ୍ତା କୁତାଦୁ ମେଣ୍ତା କୁତାଦୁ” ଇଞ୍ଜିହିଁ ଏଲେଇଚେରି। ଇଲେକିହିଁ ଏ଼ୱାଣାଇଁ ବାରେ ମିସର ଦେ଼ସା ଲାକ ହେର୍ପିତେସି। 44ଏଚେଟିଏ ପା଼ର ଜସେପଇଁ ଏଲେଇଚେସି, “ନା଼ନୁ ପା଼ର ରାଜାତେଏଁ, ଏ଼ଦାଆଁତାକି ନୀ ହୁକୁମି ପିସ୍ପେ ବାରେ ମିସର ଦେ଼ସାତା ଏମିନି ଲ଼କୁ କେୟୁ କା଼ଲୁ ନିକ୍ହାଲି ଆ଼ଡଅରି।” 45ଇଞ୍ଜାଁ ପା଼ର ଜସେପ ଦ଼ରୁ ଜାପନତ୍-ପାନେହ ଇଟିତେସି; ଅ଼ଡ଼େ, ଅନ୍ ଗା଼ଡ଼ାତା ମାନି ପଟିପେର ଇନି ପୂଜେରାତି ଆସନତ୍ ଇନି ମା଼ଙ୍ଗା ତଲେ ତାନି ବୀହା କିତେସି। ଏଚେ଼ଟିଏ ଜସେପ ବାରେ ମିସର ଦେ଼ସାତା ରେ଼ଜାଲି ମା଼ଟ୍ହେସି।
46ଜସେପ କଡ଼େ ଦସ ବାର୍ସା ବେ଼ଲାତା ମିସରତି ରାଜା ପା଼ର ନ଼କିତା ନିଚାମାଚେସି; ଏଚେ଼ଟିଏ ଜସେପ ପା଼ର ତା଼ଣାଟି ହାଜାହାଁ ମିସର ଦେ଼ସାତି ବାରେୱାକି ରେ଼ଜିହିଁ ସିନିକିତେସି। 47ଏଚେଟିଏ ଏ଼ ନେହିଁ ବାର୍ସାତି ସା଼ତା ବାର୍ସା ବୂମିତା ହା଼ରେକା ଆର୍ନା କାମ୍ବିତେ। 48ଜସେପ ଏ଼ ସା଼ତା ବାର୍ସା ମିସର ଦେ଼ସାତା କାମ୍ବିତି ବାରେ ଆର୍ନା ଗା଼ଡ଼ାତା କୂଡ଼ି କିତେସି; ଅ଼ଡ଼େ, ଏମି ଏମିନି ଗା଼ଡ଼ାତି ସା଼ରିୱାକି ବୂମିତା ଏଚେକା ଆର୍ନା କାମ୍ବିତେ, ଏ଼ ବାରେ ଏ଼ ଗା଼ଡ଼ାତା କୂଡ଼ି କିତେସି। 49ଇଲେକିଁ ଜସେପ ସାମ୍ଦୁରିତି ବାଃଲି ସମାନା ହା଼ରେକା ଆର୍ନା କୂଡ଼ି କିତେସି, ଏ଼ଦାଆଁ ଅ଼ଡ଼େ ଲାଚାଆତେସି; ଇଚିହିଁ ଏ଼ଦି ଏଜିକିହାଲି ଆ଼ଡାଆ ଗାଟାୟି ମାଚେ।
50ଅ଼ଡ଼େ କାର୍ୱୁତି ବାର୍ସା ନ଼କେଏ ଜସେପକି ରୀ ମୀର୍କା ଜାର୍ନା ଆ଼ହାମାଚେରି, ଅନ୍ ଗା଼ଡ଼ାତା ମାନି ପଟିପେର ପୂଜେରା ଆସନତ୍ ଇନି ମା଼ଙ୍ଗା ଏ଼ୱାରାଇଁ ଜାର୍ନି କିହାମାଚେ। 51ଏଚେଟିଏ ଜସେପ ପା଼ଣ୍ୱା ମୀର୍ଏଣା ଦ଼ରୁ ମନଃସି#41:51 ବା଼ଣି କିନାସି ଇଟିତେସି, “ମାହାପୂରୁ ନା଼ କସ୍ତତା ଅ଼ଡ଼େ ନା଼ ତାଞ୍ଜି ଇଜତି ବା଼ଣାଆ଼ୱି କିହାମାଞ୍ଜାନେସି।” 52ଇଞ୍ଜାଁ ଜେ଼ଚତାଣା ଦ଼ରୁ, ଇପ୍ରୟିମ#41:52 ପା଼ଡ଼େୟି କାମ୍ବି କିନାସି ଇଟିତେସି, ଇଚିହିଁ ଏ଼ୱାସି ଏଲେଇଚେସି, “ନା଼ ଦୁକୁତି ଦେ଼ସାତା ମାହାପୂରୁ ନାଙ୍ଗେ ପା଼ଡ଼େୟି ହୀହାମାଞ୍ଜାନେସି।”
53ଏଚେଟିଏ ମିସର ଦେ଼ସାତି ନେହିଁ ବାର୍ସାତି ସା଼ତା ବାର୍ସା ରା଼ତେ। 54ଅ଼ଡ଼େ ଜସେପତି କାତା ଲେହେଁ କାର୍ୱୁତି ସା଼ତା ବାର୍ସା ମା଼ଟ୍ହେ; ଏଚେଟିଏ ଏଟ୍କା ବାରେ ଦେ଼ସାତା କାର୍ୱୁ ଆ଼ତେ, ସାମା ବାରେ ମିସର ଦେ଼ସାତା କା଼ଦି ମାଚେ। 55ଇଞ୍ଜାଁ, ବାରେ ମିସର ଦେ଼ସାତା କାର୍ୱୁ ଆ଼ହାଲିଏ, ଲ଼କୁ କା଼ଦି ତାକି ପା଼ର ତା଼ଣା କା଼ଲୱି ଆ଼ତେରି; ଏଚେ଼ଟିଏ ପା଼ର ବାରେ ମିସରତି ଲ଼କୁଣି ଏଲେଇଚେସି, ମୀରୁ ଜସେପ ତା଼ଣା ହାଜୁ; ଏ଼ୱାସି ଏ଼ନାଆଁ ୱେସ୍ତାନେସି, ଏ଼ଦାଆଁ କିଦୁ। 56ଏଚିବେ଼ଲା ବାରେ ଦେ଼ସାତା କାର୍ୱୁ ଆୟାଲିଏ, ଜସେପ ବାରେ କା଼ଦି ମାଚି ଗା଼ଦେୟିକା ଦେଚାହାଁ ମିସରତି ଲ଼କୁକି ଆର୍ନା ପାର୍ତେସି; ଇଚିହିଁ ମିସର ଦେ଼ସାତା କାର୍ୱୁ ହା଼ରେକା ଆ଼ତେ। 57ଇଞ୍ଜାଁ ବାରେ ଦେ଼ସାତି ଲ଼କୁ ମିସରତା ଜସେପ ତା଼ଣା ଆର୍ନା କଡାଲି ୱା଼ତେରି, ଇଚିହିଁ ବାରେ ଦେ଼ସାତା କାର୍ୱୁ ହା଼ରେକା ମାଚେ।
Currently Selected:
ମୂଲୁ 41: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
