ମୂଲୁ 42
42
ମିସରତା ଜସେପତି ତାୟିୟାଁ ହାନାୟି
1ଅ଼ଡ଼େ ମିସର ଦେ଼ସାତା କା଼ଦି ମାନେ ଈ କାତା ୱେଞ୍ଜାହାଁ ଜାକୁବ ତାନି ମୀର୍କାଣି ଏଲେଇଚେସି, “ମୀରୁ ଏ଼ନାଆଁତାକି ରଅତେରି ରଅଣାଇଁ ସିନିକିହି ମାଞ୍ଜେରି ?” 2ଏ଼ୱାସି ଅ଼ଡ଼େ ଏଲେଇଚେସି, “ମେହ୍ଦୁ ନା଼ନୁ ୱେଞ୍ଜାମାଇଁ, ମିସରତା ଦେ଼ସାତା ଆର୍ନା ମାନେ; ଏ଼ଦାଆଁତାକି ମୀରୁ ଏମ୍ବାଆଁ ହାଜାହାଁ ମାଙ୍ଗେ ତାକି ଆର୍ନା କଡା ତାଦୁ; ଆତିହିଁ ମା଼ର ହା଼ଆନା ନୀଡିନାୟି।” 3ଏଚେଟିଏ ଜସେପତି ଦସ ଜା଼ଣା ତାୟିୟାଁ ଆର୍ନା କଡାଲି ମିସର ଦେ଼ସାତା ହାଚେରି। 4ସାମା ଜାକୁବ ଜସେପତି ତାୟି ବିନ୍ୟାମିନ୍ଇଁ ତାୟିୟାଁ ତଲେ ପାଣ୍ତାଆତେସି; ଇଚିହିଁ ଏ଼ୱାସି ଏଲେଇଚେସି, ଈୱାଣାକି ଏ଼ନାଆଁ ଜିକେଏ ଆ଼ନେ ଇଞ୍ଜିଁ ଆଜିତେସି।
5ଏଚିବେ଼ଲା ଏମ୍ବାଆଁ ହାନି ଲ଼କୁ ତଲେ ଜାକୁବତି ମୀର୍କା ଆର୍ନା କଡାଲି ହାଚେରି, ଇଚିହିଁ କିଣାନ ଦେ଼ସାତା ଜିକେଏ କାର୍ୱୁ ମାଚେ। 6ଏଚିବେ଼ଲାତା ଜସେପ, ମିସର ଦେ଼ସାତି କାଜାସି ମାଚାକି ବାରେ ଦେ଼ସାତି ଲ଼କୁକି ଆର୍ନା ପା଼ର୍ଚି ମାଚେସି; ଏ଼ଦାଆଁତାକି ଜସେପତି ତାୟିୟାଁ ଏ଼ୱାଣି ନ଼କିତା ୱା଼ହାଁ ମୁନୁ କୁତାହାଁ ଜହରା କିତେରି। 7ଏଚେ଼ତା ଜସେପ ତାନି ତାୟିୟାଁଣି ମେସାହାଁ ପୁଚେସି, ସାମା ଏ଼ୱାରି ନ଼କିତା ପୁନାଆତି ଲେହେଁ ଆ଼ହାଁ ଏ଼ୱାରାଇଁ ଆ଼ଟ୍ୱା ତଲେ ଏଲେଇଚେସି, “ମୀରୁ ଏମ୍ବିଟି ୱା଼ହାମାଞ୍ଜେରି ?” ଏ଼ୱାରି ଏଲେଇଚେରି, “ମା଼ମ୍ବୁ କିଣାନ ଦେ଼ସାଟି କା଼ଦି କଡାଲି ୱା଼ହାମାନମି।”
8ସାମା ଜସେପ ତାନି ତାୟିୟାଁଣି ପୁଚେସି, ସାମା ଏ଼ୱାରି ଏ଼ୱାଣାଇଁ ପୁନାଆତେରି। 9ଏଚେଟିଏ ଜସେପ ଏ଼ୱାରି କାତା ହାପାନା ହେ଼ଣ୍ତାମାଚେସି, ଏ଼ଦାଆଁ ଅଣ୍ପାହାଁ ଏ଼ୱାରାଇଁ ଏଲେଇଚେସି, “ମୀରୁ ସ଼ର୍କାତେରି; ମୀରୁ ଦେ଼ସାତି ପାରୁ ପାରାଲି ୱା଼ହାମାଞ୍ଜେରି।”
10ଏ଼ୱାରି ଏଲେଇଚେରି, “ଆ଼ଏ ସା଼ୱୁକାରି, ଏଲେକିଁ ଆ଼ଏ, ନୀ ହ଼ଲିୟାଙ୍ଗା କା଼ଦି କଡାଲି ୱା଼ହାମାନେରି। 11ମା଼ମ୍ବୁ ବାରେ ରଣ୍ତିଏ ମାଣ୍ସିତି ମୀର୍କା, ମା଼ମ୍ବୁ ସ଼ଜେତି ଲ଼କୁତମି, ଈ ନୀ ହ଼ଲିୟାଙ୍ଗା ସ଼ର୍କା ଆ଼ଏ।”
12ଜସେପ ଏ଼ୱାରାଇଁ ଏଲେଇଚେସି, “ଆ଼ଏ, ମୀରୁ ଦେ଼ସାତି ପାରୁ ପାରାଲି ୱା଼ହାମାଞ୍ଜେରି।”
13ଏ଼ୱାରି ଏଲେଇଚେରି, “ମା଼ମ୍ବୁ ବାରେ ବା଼ର ଜା଼ଣା ତାୟିୟାଁ, କିଣାନ ଦେ଼ସାତି ରଅଣି ମୀର୍କା; ଅ଼ଡ଼େ ମେହ୍ଦୁ ମା଼ ଊଣା ତାୟି ତାଞ୍ଜି ତଲେ ମାନେସି, ଇଞ୍ଜାଁ ରଅସି ହିଲଅସି।”
14ଏଚେ଼ଟିଏ ଜସେପ ଏ଼ୱାରାଇଁ ଏଲେଇଚେସି, “ନା଼ନୁ ମିଙ୍ଗେ ସ଼ର୍କା ଇଞ୍ଜିଁ ଏ଼ନାଆଁ ୱେସ୍ତାତେଏଁ, ମୀରୁଏ ଏମ୍ବାତି ପାର୍ମାଣା।” 15ଈଦାଆଁ ତଲେ ମିଙ୍ଗେ ତାୟିପାରି କିୱିଆ଼ନେ; ନା଼ନୁ ପା଼ର ଦ଼ରୁ ତଲେ ମା଼ନି କିହିମାଇଁ, ମୀ ଊଣା ତାୟି ଇମ୍ବାଆଁ ୱା଼ଆସାରେ ମୀରୁ ଇମ୍ବାଟି ହାଜାଲି ଆ଼ଡଅତେରି। 16ମୀ ବିତ୍ରାଟି ରଅଣାଇଁ ପାଣ୍ତାଦୁ, ଏ଼ୱାସି ମୀ ତାୟିଇଁ ତାପେସି, ମୀରୁ କାୟିଦିତା ଡ଼ୟାଦୁ; ମୀ କାତା ସାତା କି ଆ଼ଏ, ତାୟିପାରି କିୱିଆ଼ତିସାରେ ପୁଣ୍ମ୍ବି ଆ଼ନେ; ଆ଼ଆତି ନା଼ନୁ ପା଼ର ଦ଼ରୁଟି ତଲେ ମା଼ନି କିହାଁ ୱେସିମାଇଁ, ମୀରୁ ସାତେଏ ସ଼ର୍କାତେରି। 17ଏଚେ଼ଟିଏ ଜସେପ ଏ଼ୱାରାଇଁ ତୀନି ଦିନା କାୟିଦିତା ସୁଣ୍ତାହାଁ ଇଟିତେସି।
18ତୀନି ଦିନାତା ଜସେପ ଏ଼ୱାରାଇଁ ଏଲେଇଚେସି, “ନା଼ନୁ ମାହାପୂରୁଇଁ ଆଜିନି ମାଣ୍ସିତେଏଁ, ମୀରୁ ଈ କାମା କିଦୁ ଆତିହିଁ ନୀଡିଦେରି। 19ମୀରୁ ସ଼ଜେତି ଲ଼କୁତେରି, ଆତିହିଁ ମୀ ବିତ୍ରାଟି ର଼ ତାୟିଇଁ ଈ କାୟିଦିତା ଇଟାହାଁ କାର୍ୱୁ ତାକି ଇଜ ଆର୍ନା ଅ଼ହିଁ ହାଜୁ। 20ସାମା ମୀରୁ ମୀ ଊଣା ତାୟିଇଁ ନା଼ ତା଼ଣା ତାଦୁ, ଏଚେଟିଏ ମୀ କାତା ସାତା ଆ଼ନେ, ଆତିହିଁ, ମୀରୁ ହା଼ଅତେରି।” ଏଚେଟିଏ ଏ଼ୱାରି ଏଲେକିତେରି।
21ଏଚେଟିଏ ଏ଼ୱାରି ତା଼ମ୍ବୁ ତା଼ମ୍ବୁ ୱେସ୍ପି ଆ଼ତେରି, “ମା଼ର ମା଼ ତାୟି ତାକି ସାତେଏ ଦ଼ହ ଗାଟାତାୟି; ଏ଼ୱାସି ମାଙ୍ଗେ ବାତିମା଼ଲାତି ବେ଼ଲା ମା଼ର ତାନି ଜୀୱୁତି କିଲିବିଲି ମେସାହାଁ ଜିକେଏ ଏ଼ୱାଣାଇଁ କାର୍ମା ଆ଼ଆତାୟି, ଏ଼ଦାଆଁତାକି ମାଙ୍ଗେ ଈ ସା଼ସ୍ତି ଆ଼ହିମାଞ୍ଜାନେ।”
22ଏଚିବେ଼ଲା ରୁବେନ୍ ଏଲେଇଚେସି, “ମୀରୁ ଏ଼ କକାଣି ତାକି ପା଼ପୁ କିଆଦୁ, ଈ କାତା ନା଼ନୁ ମିଙ୍ଗେ ୱେସ୍ତାଆତେଏଁ କି ? ଆ଼ତିଜିକେଏ ମୀରୁ ୱେନାଆତେରି; ଏ଼ଦାଆଁତାକି ମେହ୍ଦୁ, ନୀଏଁ ତାନି ନେତେରିତି ବାଦୁଲି ଅ଼ୱି ଆ଼ହିମାଞ୍ଜାନେ।” 23ସାମା ଜସେପ ଏ଼ୱାରି କାତା ତେଲ୍ହିତେସି, ଈଦାଆଁ ଏ଼ୱାରି ପୁଞ୍ଜାଲି ଆ଼ଡାଆତେରି; ଇଚିହିଁ ଏ଼ୱାସି ରୀ ହା଼ଡା ପୁଚାଣାତଲେ ଏ଼ୱାରାଇଁ କାତା ଆ଼ହିମାଚେସି। 24ଏଚେ଼ଟିଏ ଜସେପ ଏ଼ୱାରି ତା଼ଣାଟି ହାଜାହାଁ ଡ଼ୀତେସି; ଅ଼ଡ଼େ ୱେଣ୍ତେ ୱା଼ହାଁ ଏ଼ୱାରି ତଲେ ହା଼ଡାକାତା ଆ଼ହାଁ ଏ଼ୱାରି ବିତ୍ରାଟି ସିମିୟନଇଁ ଆସାହାଁ ଏ଼ୱାରି ନ଼କିତା ଦସ୍ତେସି।
ଜସେପତି ତାୟିୟାଁ କିଣାନ ଦେ଼ସାତା ୱେଣ୍ତିନାୟି
25ଏଚେଟିଏ ଜସେପ ଏ଼ୱାରି ଗ଼ଣିତା ଆର୍ନା ନେଞ୍ଜି କିହାଲି, ବାରେ ଜା଼ଣାତି ଜାହାରା ଟାକାୟାଁ ତାମି ଗ଼ଣିତା ଇଟାଲି, ଅ଼ଡ଼େ ହାନାଟି ଜିରୁତା ତିଞ୍ଜାଲି କା଼ଦି ହୀହାଲି ହୁକୁମି ହୀତେସି; ଏଚେଟିଏ ଏଲେକିହିଁଏ କିତେରି। 26ଏଚେଟିଏ ଏ଼ୱାରି ଜାହା ଜାହାରା ଗା଼ଡ଼୍ଦେ ଲାକ ଆର୍ନା ଏକ୍ହାଁ ଏମ୍ବାଟି ହାଚେରି। 27ସାମା ଜିରୁତା ଏ଼ୱାରି ବିତ୍ରାଟି ରଅସି ଜ଼ମିତି ତା଼ଣା ଗା଼ଡ଼୍ଦେଇଁ ତୀସାଲି ଗ଼ଣି ଦେତେସି ଅ଼ଡ଼େ ତାନି ଟାକାୟାଁ ଗ଼ଣି ବିତ୍ରା ବେଟାଆ଼ତେସି। 28ଏଚେଟିଏ ଏ଼ୱାସି ତାୟିୟାଁଇଁ ଏଲେଇଚେସି, “ନା଼ ଟାକାୟାଁ ୱେଟ୍ପି ଆ଼ହାମାନୁ, ଈୱି ମେହ୍ଦୁ ଏ଼ୱି ନା଼ ଗ଼ଣିତା ମାନୁ।” ଏଚେଟିଏ ତାମି ହିୟାଁ ଜାଗ୍ଲା ଆ଼ତେ, ଅ଼ଡ଼େ ଏ଼ୱାରି ଆଜିତଲେ ତା଼ମ୍ବୁ ତା଼ମ୍ବୁ ଏଲେଇଣ୍ମ୍ବି ଆ଼ତେରି, “ମାହାପୂରୁ ଏ଼ନାଆଁତାକି ମାଙ୍ଗେ ଇଲେତି କାମା କିୟାତେସି ?”
29ଏଚେଟିଏ ଏ଼ୱାରି କିଣାନ ଦେ଼ସାତା ତାମି ଆ଼ବା ଜାକୁବ ତା଼ଣା ୱା଼ହାଁ, ତାମ୍ଙ୍ଗେ ତାକି ଏ଼ନା ଏ଼ନାୟି ଆ଼ହାମାଚେ, ଏ଼ ବାରେ ଏ଼ୱାଣାଇଁ ୱେସ୍ତେରି। 30“ଏମିନି ମାଣ୍ସି ଏ଼ ଦେ଼ସାତି କାଜାସି ମାଙ୍ଗେ ଦେ଼ସାତି ସ଼ର୍କା ଅଣ୍ପାହାଁ, କାର୍ବି ତଲେ କାତା ଜ଼ଲାତେସି।” 31ଏଚେଟିଏ ମା଼ମ୍ବୁ ଏ଼ୱାଣାଇଁ ଏଲେଇଚମି “ମା଼ମ୍ବୁ ସ଼ଜେତି ଲ଼କୁତମି, ସ଼ର୍କା ଆ଼ଏ; 32ମା଼ମ୍ବୁ ବା଼ର ଜା଼ଣା ତାୟିୟାଁ, ରଣ୍ତିଏ ତାଞ୍ଜିତି ମୀର୍କା; ମା଼ ବିତ୍ରା ରଅସି ହିଲଅସି, ଅ଼ଡ଼େ କିଣାନ ଦେ଼ସାତା ତାଞ୍ଜି ତଲେ ର଼ ଊଣା ତାୟି ମାନେସି।” 33ଏଚିବେ଼ଲା ଏ଼ ଦେ଼ସାତି କାଜାସି ଏ଼ ମାଣ୍ସି ମାଙ୍ଗେ ଏଲେଇଞ୍ଜାତେସି, “ଇଲେ କିତିହିଁ ମୀରୁ ମା଼ନିଗାଟି ଲ଼କୁ ଇଞ୍ଜିଁ ପୁଞ୍ଜାଇଁ; ମୀରୁ ମୀ ର଼ ତାୟିଇଁ ମା଼ ତା଼ଣା ଇଟାହାଁ ମୀ ଇଜ କାର୍ୱୁ ତାକି ଆର୍ନା ଅ଼ଦୁ। 34ଇଞ୍ଜାଁ ମୀ ଊଣା ତାୟିଇଁ ନା଼ ତା଼ଣା ତାଦୁ, ଆତିହିଁ ମୀରୁ ସଜେତି ଲ଼କୁତେରି, ସ଼ର୍କା ଆ଼ଏ, ଈଦାଆଁ ତେଲ୍ହିଇଁ; ଏଚେ଼ଟିଏ ମୀ ତାୟିଇଁ ମିଙ୍ଗେ ହେର୍ପାଇଁ, ଅ଼ଡ଼େ ମୀରୁ ଈ ଦେ଼ସାତା ବେ଼ବାରା କିହାଲି ଆ଼ଡିଦେରି।”
35ଏଚେଟିଏ ଏଚେ଼ତା ଏ଼ୱାରି ତାମି ଗ଼ଣିୟାଁ ଦେଚାଲିଏ ବାରେଜା଼ଣା ଜାହା ଜାହାରା ଗ଼ଣି ବିତ୍ରାଟି ଟାକାୟାଁ ମ଼ଣା ବେଟାଆ଼ତେରି ଏଚେଟିଏ ଏ଼ ଟାକାୟାଁ ମ଼ଣା ମେସାହାଁ ଏ଼ୱାରି ଅ଼ଡ଼େ ତାମି ଆ଼ବା ଆଜିତେରି। 36ଏଚେଟିଏ ତାମି ଆ଼ବା ଜାକୁବ ଏଲେଇଚେସି, “ମୀରୁ ନାଙ୍ଗେ ମୀର୍କା ହିଲାଆଗାଟାସି କିହିମାଞ୍ଜାଦେରି; ଜସେପ ହିଲଅସି; ସିମିୟନ ହିଲଅସି; ଅ଼ଡ଼େ ନୀଏଁ ବିନ୍ୟାମିନ୍ଇଁ ଜିକେଏ ଅ଼ହାଲି ଅଣ୍ପା ମାଞ୍ଜେରି, ଈ ବାରେସାଁ ନାଙ୍ଗେ ତାକି ଆ଼ହିମାନେ।”
37ଏଚେଟିଏ ରୁବେନ୍ ଆ଼ବାଇଁ ଏଲେଇଚେସି, “ନା଼ନୁ ବିନ୍ୟାମିନ୍ଇଁ ନୀ ତା଼ଣା ତାଆସାରେ, ନୀନୁ ନା଼ ରୀ ମୀର୍କାଣି ପା଼ୟାମୁ; ନା଼ କେୟୁତା ଏ଼ୱାଣାଇଁ ହେର୍ପାମୁ; ନା଼ନୁ ୱେଣ୍ତେ ଏ଼ୱାଣାଇଁ ନୀ ତା଼ଣା ତାଚାହିୟାଇଁ।”
38ଏଚେଟିଏ ଜାକୁବ ଏଲେଇଚେସି, “ନା଼ ମୀର୍ଏସି ମୀ ତଲେ ହାଲଅସି; ତାନି ତାୟି ହା଼ହାମାନେସି, ଅ଼ଡ଼େ ଏ଼ୱାସି ରଅସି ମାନେସି; ମୀରୁ ଏମିନି ଜିରୁତା ହାଜିମାଞ୍ଜେରି, ଏ଼ ଜିରୁତା ଏ଼ୱାଣାକି ଏ଼ନାୟି ଆ଼ତିହିଁ ମୀରୁ ନାଙ୍ଗେ ଦୁକୁତଲେ ଈ କାମ୍ବିତି ତା଼ର୍ୟୁଁତଲେ ମାହ୍ଣି ମାଣ୍ତାତା ପାଣ୍ତାଦେରି।”
Currently Selected:
ମୂଲୁ 42: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
