ମୂଲୁ 26
26
ଇସାହାକ ଗେରାରତା ବାସା କିନାୟି
1ତଲି କା଼ଲା ଅବ୍ରାହାମ ବେ଼ଲାତା ଏ଼ନିକିହିଁ କାର୍ୱୁ ଆ଼ହାମାଚେ ଏ଼ ଦେ଼ସାତା ଅ଼ଡ଼େ ୱେଣ୍ତେ କାର୍ୱୁ ଆ଼ହାଲିଏ। ଇସାହାକ ଗରାରତା ପାଲେସ୍ତିୟ ଲ଼କୁତି ରାଜା ଅବିମେଲକ ତା଼ଣା ହାଚେସି। 2ଏଚିବେ଼ଲା ପ୍ରବୁ ଇସାହାକଇଁ ତ଼ଞ୍ଜାଆ଼ହାଁ ଏଲେଇଚେସି, “ନୀନୁ ମିସର ଦେ଼ସାତା ହାଲାଆନି; ନା଼ନୁ ନିଙ୍ଗେ ଏମିନି ଦେ଼ସା ଏଲେଇଞ୍ଜାଇଁ, ଏ଼ ଦେ଼ସାତା ଡ଼ୟାମୁ। 3ନୀନୁ ଈ ଦେ଼ସାତା ଡ଼ୟାମୁ, ଏଚେଟିଏ ନା଼ନୁ ନୀ ସା଼ୟେମି ଆ଼ହାଁ ନିଙ୍ଗେ ବ଼ର ହିୟାଇଁ, ଇଞ୍ଜାଁ ନିଙ୍ଗେ ଅ଼ଡ଼େ ନୀ କୂଲୁ ତାକି ଈ ବାରେ ଦେ଼ସାତି ହିୟାଇଁ, ଅ଼ଡ଼େ ନୀ ଆ଼ବା ଅବ୍ରାହାମ ତା଼ଣା ଆ଼ଞ୍ଜାମାନାଣି ପୂରା କିଇଁ। 4ନା଼ନୁ ହା଼ଗୁତି ହୁକାୟାଁ ଲେହେଁ ନୀ କୂଲୁତି ପାଡିକିହାଁ, ଏ଼ୱାରାକି ଈ ବାରେ ଦେ଼ସା ହୀଇଁ, ଅ଼ଡ଼େ ନୀ କୂଲୁଟି ଦାର୍ତିତି ବାରେ ଜା଼ତି ବ଼ର ବେଟାଆ଼ନେରି। 5ନା଼ନୁ ନିଙ୍ଗେ ବ଼ର ହିୟାଇଁ, ଏ଼ନାଆଁତାକି ଇଚିହିଁ ଅବ୍ରାହାମ ନା଼ ବ଼ଲୁ ମା଼ନୱି ଆ଼ହାଁ ନା଼ ହୀହାମାନି ହୁକୁମି ଅ଼ଡ଼େ ମେ଼ରା ମା଼ନୱି ଆ଼ହାମାନେସି।”
6ଏ଼ଦାଆଁତାକି ଇସାହାକ ଗରାରତା ବାସା କିତେସି। 7ଏଚେଟିଏ ଏ଼ ଟା଼ୟୁତି ଲ଼କୁ ତାନି ଡକ୍ରିନି ଆମ୍ବାଆୟି ଇଞ୍ଜିଁ ୱେଞ୍ଜାଲିଏ, ଏ଼ୱାସି ଏଲେଇଚେସି “ଏ଼ଦି ନା଼ ତାଙ୍ଗି।” ଇଚିହିଁ ଏ଼ ଟା଼ୟୁତି ଲ଼କୁ ରିବିକା ତାକି ନାଙ୍ଗେ ପା଼ୟାନେରି ଇଞ୍ଜିହିଁ ଅଣ୍ପାହାଁ ନା଼ ଡକ୍ରି ଇଞ୍ଜାଲି ଆଜିତେସି; ଇଚିହିଁ ରିବିକା ହା଼ରେକା ଅ଼ଜିତାୟି ମାଚେ। 8ଇଞ୍ଜାଁ ଏ଼ ଟା଼ୟୁତା ହା଼ରେକା ବାର୍ସା ବାସାକିତି ଡା଼ୟୁ ର଼ ଦିନା ପାଲେସ୍ତିୟ ରାଜା ଅବିମେଲକ କିଡ଼୍କି ୱାକିଟି ସିନିକିହାଁ ଇସାହାକ ତାନି ଡକ୍ରି ରିବିକା ତଲେ ଡୂରାମାଚାଣି ମେସ୍ତେସି। 9ଏ଼ଦାଆଁତାକି ଅବିମେଲକ ଇସାହାକଇଁ ହା଼ଟି କିହାଁ ଏଲେଇଚେସି, “ଏ଼ ଆୟାଟି ନୀ ଡକ୍ରି। ଏ଼ନାଆଁତାକି ନା଼ ତାଙ୍ଗି ଇଞ୍ଜାତି ?” ଏଚିବେ଼ଲା ଇସାହାକ ଏଲେଇଚେସି, “ନା଼ନୁ ଅଣ୍ପିତେଏଁ ଏଚେ଼ତା ଏ଼ଦାଣି ତାକି ନା଼ ଜୀୱୁ ଜିକେଏ ହାନେ।”
10ଏଚେଟିଏ ଅବିମେଲକ ଏଲେଇଚେସି, “ନୀନୁ ମା଼ ତଲେ ଏ଼ନାଆଁତାକି ଇଲେ କିୟାତି ? ଆମ୍ବାଆସି ନୀ ଡକ୍ରି ତଲେ ବାଲାମାତମି କିହିଁ ଦ଼ହ କିତିହିଁ, ଏଚେଟିଏ ନୀନୁ ମାଙ୍ଗେ ଦ଼ହ କିୟାତିମା।” 11ଏଚେଟିଏ ଅବିମେଲକ ବାରେ ଲ଼କୁଣି ହୁକୁମି ହୀତେସି, “ଆମ୍ବାଆସି ଈ ମାଣ୍ସିଇଁ ଆ଼ଆତିଁ ତାନି ଡକ୍ରିନି ଡୀଗିନେସି ଏ଼ୱାସି ସାତା ତଲେ ପା଼ୟ୍ୱି ଆ଼ନେସି।”
12ଏଚେଟିଏ ଇସାହାକ ବୂମିତା ବିଚା ମାଟିତେସି, ଅ଼ଡ଼େ ଏ଼ ବାର୍ସା ପା଼ସାକ଼ଡ଼ି ଗୂଣୁ ଲା଼ବା କିତେସି, ଇଚିହିଁ ପ୍ରବୁ ଏ଼ୱାଣାକି ବ଼ର ହୀତେସି। 13ଏ଼ଦାଆଁତାକି ଏ଼ୱାସି ବାତ୍କୁତା ପାଡା ଆ଼ତେସି ଅ଼ଡ଼େ ଏ଼ୱାସି ହା଼ରେକା ବାତ୍କୁତା ପାଡା ଆ଼ହାଁ ହା଼ରେକା କାଜାସି ଆ଼ତେସି। 14ଇଚିହିଁ ଏ଼ୱାଣାକି ମେ଼ଣ୍ତାୟାଁ, କ଼ଡିୟାଁ ଅ଼ଡ଼େ ହା଼ରେକା ହ଼ଲିୟାଙ୍ଗା, ହ଼ଲେଣିସିକା ଆ଼ତେରି, ଏ଼ଦାଆଁତାକି ପାଲେସ୍ତିୟ ଲ଼କୁ ଡା଼ହାରା ଆ଼ତେରି। 15ଏ଼ଦାଆଁତାକି ତାମି ଆ଼ବା ଅବ୍ରାହାମ ବେ଼ଲାତା ତାମି ଆ଼ବାତି ହ଼ଲିୟାଙ୍ଗା ଏମି ଏମିନି କୁହି କା଼ର୍ହା ମାଚେରି, ପାଲେସ୍ତିୟ ଲ଼କୁ ଏ଼ ବାରେ ଇର୍ଆ ତଲେ ମୁସ୍ତେରି।
16ଏଚେଟିଏ ଅବିମେଲକ ଇସାହାକଇଁ ଏଲେଇଚେସି, “ନୀନୁ ମା଼ ଦେ଼ସା ପିସା ହାଲାମୁ, ଇଚିହିଁ ନୀନୁ ମା଼ କିହାଁ ହା଼ରେକା ବା଼ଡ଼୍ୟୁ ଆ଼ହାମାଞ୍ଜି।” 17ଏଚେଟିଏ ଇସାହାକ ଏ଼ ଟା଼ୟୁ ପିସା ହାଜାହାଁ ଗରାର ହ଼ର୍କାଣା ତୂମୁ କେ଼ପାହାଁ, ଏମ୍ବାଆଁ ବାସା କିତେସି। 18ଇଞ୍ଜାଁ ତାମି ଆ଼ବା ଅବ୍ରାହାମ ବେ଼ଲାତା ଏମି ଏମିନି କୁହି କା଼ର୍ହା ମାଚେରି, ଅବ୍ରାହାମ ହା଼ତି ଡା଼ୟୁ ପାଲେସ୍ତିୟ ଲ଼କୁ ମୁସାମାଚେରି, ଏ଼ ବାରେ ଇସାହାକ ଅ଼ଡ଼େ ୱେଣ୍ତେ କା଼ର୍ହାଁ ତାମି ଆ଼ବା ହୀତି ଦ଼ରୁ ୱେଣ୍ତେ ଇଟିତେସି।
19ଅ଼ଡ଼େ ଇସାହାକତି ହ଼ଲିୟାଙ୍ଗା ଏ଼ ଗେରାରତି ବାଟାତା କା଼ର୍ହାଁ ଏ଼ୟୁ ହ଼ତି କୁହି ବେଟାଆ଼ତେରି। 20ଏଚେଟିଏ ଗରାର ଦେ଼ସାତି ଗ଼ଡ଼୍କା ଇସାହାକତି ଗ଼ଡ଼୍କା ତଲେ ବା଼ଦ୍ରି ଆ଼ହାଁ ଏଲେଇଚେରି, “ଈ ଏ଼ୟୁ ମା଼ୱି” ଏ଼ଦାଆଁତାକି ଏ଼ୱାସି ଏ଼ କୁହିତି ଦ଼ରୁ ଏସକ#26:20 ବା଼ଦ୍ରି ଇଞ୍ଜିହିଁ ଇଟିତେସି, ଇଚିହିଁ ଏ଼ୱାରି ତାମି ତଲେ ଗଡ଼୍ହା ଆ଼ତେରି।
21ଏଚେଟିଏ ଇସାହାକତି ହ଼ଲିୟାଙ୍ଗା ଅ଼ଡ଼େ ର଼ କୁହି କା଼ର୍ହେରି, ଏ଼ୱାରି ଏ଼ଦାଆଁତାକି ଜିକେଏ ଗଡ଼୍ହା ଆ଼ତେରି, ଏ଼ଦାଆଁତାକି ଇସାହାକ ଏ଼ଦାନି ଦ଼ରୁ ସିଟ୍ନା#26:21 ସାତ୍ରୁ ଇଞ୍ଜିହିଁ ଇଟିତେସି। 22ଇଞ୍ଜାଁ ଏ଼ୱାସି ଏମ୍ବାଟିଏ ହାଜାହାଁ ଅ଼ଡ଼େ ର଼ କୁହି କା଼ର୍ହେସି। ଏ଼ଦାଣିତାକି ଏ଼ୱାରି ଗଡ଼୍ହା ଆ଼ଆତାକି, ଏ଼ଦାଣି ଦ଼ରୁ ରହବତ୍#26:22 ଅ଼ସାରା ଟା଼ୟୁ ଇଟିତେସି, ଇଚିହିଁ ଏ଼ୱାସି ଏଲେଇଚେସି, “ନୀଏଁ ପ୍ରବୁ ମାଙ୍ଗେ ଟା଼ୟୁ ହିୟାତେସି, ମା଼ର ଦେ଼ସାତା ଏ଼ପା ଆ଼ନ।”
23ଏଚେଟିଏ ଇସାହାକ ଏ଼ ଟା଼ୟୁଟିଏ ବେର୍ସେବାତା ହାଚେସି। 24ଏ଼ ଲା଼ଆଁୟାଁ ପ୍ରବୁ ତ଼ଞ୍ଜାଆ଼ହାଁ ଏଲେଇଚେସି, “ନା଼ନୁ ମୀ ଆ଼ବା ଅବ୍ରାହାମତି ମାହାପୂରୁତେଏଁ; ଆଜାଆନି, ଇଚିହିଁ ନା଼ନୁ ନା଼ ହ଼ଲେଏସି ଅବ୍ରାହାମ କ଼ସମି ନୀ ସା଼ୟେମି ମାଇଁ, ଅ଼ଡ଼େ ନିଙ୍ଗେ ବ଼ର ହୀହାଁ ନୀ କୂଡ଼ା ଏ଼ପା କିୟାଇଁ।” 25ଏଚେଟିଏ ଇସାହାକ ଏ଼ ଟା଼ୟୁତା ପୂଜାପିଣ୍ତା କିହାଁ ପ୍ରବୁ ଦ଼ରୁତା ପ୍ରା଼ତାନା କିତେସି। ଏଚେଟିଏ ଏ଼ୱାସି ଏମ୍ବାଆଁ ତୂମୁ କିହାଲିଏ ତାମି ହ଼ଲିୟାଙ୍ଗା ର଼ କୁହି କା଼ର୍ହେରି।
ଇସାହାକ ଅ଼ଡ଼େ ଅବିମେଲକ ବିତ୍ରା ରା଼ଜିମା଼ନା
26ଏଚେଟିଏ ଅବିମେଲକ ଅହୁସତ୍ ତାନି ତ଼ଣେ ଅ଼ଡ଼େ ପିକଲ ଦ଼ରୁତି ପା଼ସାକ଼ଡ଼ି ମୁହେଁ କାଜାଣି ତଲେ ଗରାରଟିଏ ଇସାହାକ ତା଼ଣା ୱା଼ତେରି। 27ଏଚେଟିଏ ଇସାହାକ ଏ଼ୱାରାଇଁ ଏଲେଇଚେସି, “ମୀରୁ ନାଙ୍ଗେ ଅ଼ପିମାଞ୍ଜଅତେରି, ଇଞ୍ଜାଁ ମୀ ତା଼ଣାଟି ନାଙ୍ଗେ ଏଟ୍କା କିହାମାଞ୍ଜାଦେରି, ନୀଏଁ ଏ଼ନାଆଁତାକି ନା଼ ତା଼ଣା ୱା଼ହାମାଞ୍ଜେରି ?”
28ଏଚେଟିଏ ଏ଼ୱାରି ଏଲେଇଚେରି, “ପ୍ରବୁ ନୀ ତଲେ ମାନେସି, ଈଦାଆଁ ମା଼ମ୍ବୁ ସାତେଏ ପୁଚମି; ଏ଼ଦାଆଁତାକି ମା଼ମ୍ବୁ ଏଲେଇଚମି ମା଼ ବିତ୍ରା ର଼ ମା଼ନି ମାଣ୍ମ୍ବେ, ଅ଼ଡ଼େ ମା଼ ତଲେ ନୀ ର଼ ରା଼ଜିମା଼ନା ଆ଼ପେ; 29ମା଼ମ୍ବୁ ଏ଼ନିକିଁ ନିଙ୍ଗେ ଡୀଗା ମାଞ୍ଜଅମି ଅ଼ଡ଼େ ନୀ ନେହେଁ ପିସ୍ପେ ଅ଼ଡ଼େ ଏ଼ନାଆଁ କିହାହିଲଅମି, ସାମା ମା଼ମ୍ବୁ ନିଙ୍ଗେ ହିତ୍ଡ଼ି ତଲେ ପାଣ୍ତାତମି, ଏଲେକିହିଁ ନୀନୁ ମାଙ୍ଗେ କ଼ପା ଆୟାଆନି; ନୀନୁ ପ୍ରବୁତି ବ଼ର ବେଟାଆ଼ନାତି।” 30ଏଚିବେ଼ଲା ଇସାହାକ ଏ଼ୱାରି ତାକି ବ଼ଜି କିତେସି, ଅ଼ଡ଼େ ଏ଼ୱାରି ତିଚେରି। 31ଏଚେଟିଏ ଲା଼ଇ ତବେ ନିଙ୍ଗାହାଁ ବାରେ ଜା଼ଣା ପାର୍ମାଣା କିତେରି, ଇଞ୍ଜାଁ ଇସାହାକ ଏ଼ୱାରାଇଁ ହେଲ ହୀହାଲିଏ, ଏ଼ୱାରି ରା଼ହାଁ ତଲେ ଏ଼ୱାଣି ତା଼ଣାଟି ହାଚେରି।
32ଏ଼ ଦିନା ଇସାହାକତି ହ଼ଲିୟାଙ୍ଗା ୱା଼ହାଁ ଏମିନି କୁହି କା଼ର୍ହେରି ଏ଼ କାତା ଏ଼ୱାଣାଇଁ ୱେସ୍ତେରି। “ମା଼ମ୍ବୁ ଏ଼ୟୁ ବେଟାଆ଼ହାମାନମି।” 33ଏ଼ଦାଆଁତାକି ଏ଼ୱାସି ଏ଼ କୁହିତି ଦ଼ରୁ “ସିବା#26:33 ପାର୍ମାଣା” ଇଟିତେସି, ଇଞ୍ଜାଁ ନୀଞ୍ଜୁ ପାତେକା ଏ଼ ଟା଼ୟୁ ବେର୍ସେବା ଗା଼ଡ଼ା ଦ଼ରୁ ତଲେ ୱେ଼ଙ୍ଗାମାନେ।
ଏସୱୁତି ଏଟ୍କା ଦେ଼ସାତି ଡକ୍ରିସିକା
34ଏଚେଟିଏ ଏସୱୁ ଦୁଇ କ଼ଡ଼ି ବାର୍ସା ଆୟାଲିଏ, ଏ଼ୱାସି ହୀତିୟ ବେରିତି ଜିହୁଦିତ୍ ଦ଼ରୁତି ମା଼ଙ୍ଗା ଅ଼ଡ଼େ ହୀତିୟ ଏଲନତି ବାସମତ୍ ଦ଼ରୁତି ମା଼ଙ୍ଗା ବୀହା ଆ଼ତେସି। 35ସାମା ଏ଼ୱି ଇସାହାକ ଅ଼ଡ଼େ ରିବିକା ମ଼ନତି ଦୁକୁ ହୀନାଇ ଆ଼ତୁ।
Currently Selected:
ମୂଲୁ 26: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
