ମୂଲୁ 27
27
ଜାକୁବଇଁ ଇସାହାକତି ବ଼ର
1ଏଚେଟିଏ ଇସାହାକ ବୁଡ଼୍ହା ଆ଼ହାଲିଏ, କାଣ୍କା ଉଜେଡ଼ି ଆ଼ଆତାକି ମେସାଲି ଆ଼ଡାଆତେସି; ଏଚିବେ଼ଲା ଏ଼ୱାସି ତାନି ପା଼ଣ୍ୱା ମୀର୍ଏସି ଏସୱୁଇଁ ହା଼ଟାହାଁ ଏଲେଇଚେସି, “ମୀର୍ଏଣା” ଏଚେଟିଏ ଏ଼ୱାସି ଏଲେଇଚେସି “ମେହ୍ମୁ ନା଼ନୁ ଇମ୍ବାଆଁ ମାଇଁ।”
2ଏଚେଟିଏ ଇସାହାକ ଏଲେଇଚେସି, “ସିନିକିମୁ ନା଼ନୁ ବୁଡ଼୍ହା ଆ଼ତେଏଁ, ଏମିନି ଦିନା ନା଼ ହା଼କି ଆ଼ନେ ଏ଼ଦାଆଁ ନା଼ନୁ ପୁଞ୍ଜାହିଲଅଁ। 3ନୀଏଁ ନୀନୁ ନୀ ଆପ୍କା ଅ଼ଡ଼େ ୱେଲ୍କା ଅ଼ହିଁ ଜା଼ଡ଼ାତା ହାଜାହାଁ ନାଙ୍ଗେ ତାକି ର଼ କୂର୍ହୁ ପା଼ୟା ତାମୁ। 4ଇଞ୍ଜାଁ ନା଼ନୁ ଏ଼ନିକିଁ କା଼ଦି ରା଼ହାଁ ଆ଼ଇଁ, ଏଲେତି ହେନି କା଼ଦି ୱାଜାହାଁ ତିଞ୍ଜାଲି ନା଼ ତା଼ଣା ତାମୁ; ଏଚେଟିଏ ନା଼ ଜୀୱୁ ହା଼ନି ନ଼କେଏ ନିଙ୍ଗେ ବ଼ର ହିୟାଇଁ।”
5ଇସାହାକ ତାନି ମୀର୍ଏସି ଏସୱୁଇଁ ଈ କାତା ୱେସ୍ତି ବେ଼ଲାତା, ରିବିକା ୱେଚେ। ଏଚେ଼ତା ଏସୱୁ କୂର୍ହୁ ଊଙ୍ଗା ତାଚାଲି ଜା଼ଡ଼ାତା ହାଜାଲିଏ, 6ରିବିକା ତାନି ମୀର୍ଏସି ଜାକୁବଇଁ ଏଲେଇଚେ, “ମେହ୍ମୁ ମୀ ଆ଼ବା ନୀ ତାୟି ଏସୱୁ ତଲେ କାତା ଆ଼ତାଣି ନା଼ନୁ ୱେଚେଏଁ, 7ଏ଼ୱାସି ଏ଼ୱାଣାଇଁ ଏଲେଇଚେସି, ‘ନୀନୁ କୂର୍ହୁ ଊଙ୍ଗା ତାଚାହାଁ ନେହିଁ ହେନି କା଼ଦି ୱାଜାମୁ, ଏଚେଟିଏ ନା଼ନୁ ତିଞ୍ଜାହାଁ ହାନି ନ଼କେଏ ପ୍ରବୁ ନ଼କିତା ନିଙ୍ଗେ ବ଼ର ହିୟାଇଁ।’ 8ଏ଼ଦାଆଁତାକି ମୀର୍ଏଣା, ନୀଏଁ, ନା଼ନୁ ନିଙ୍ଗେ ଏମିନି ହୁକୁମି ହିୟାଇଁ ନା଼ ଏ଼ କାତା ୱେନାମୁ। 9ନୀଏଁ ନୀନୁ ମାନ୍ଦାତା ହାଜାହାଁ ଏମ୍ବାଟି ରୀ ନେହିଁ ଗରି ଡା଼ଲ୍କା ତାମୁ; ଏଚେଟିଏ ମୀ ଆ଼ବା ଏ଼ନିକିଁ ରା଼ହାଁ ଆ଼ନେସି, ଏଲେକିଁ ନେହିଁ କା଼ଦି ନା଼ନୁ ୱାଜା ହିୟାଇଁ। 10ନୀନୁ ଏ଼ଦାଆଁ ଅ଼ହିଁ ଆ଼ବା ତା଼ଣା ହାଲାମୁ; ଏଚେଟିଏ ଏ଼ୱାସି ଏ଼ଦାଆଁ ତିଞ୍ଜାହାଁ ହା଼ନି ନ଼କେଏ ନିଙ୍ଗେ ବ଼ର ହିୟାନେସି।”
11ଏଚିବେ଼ଲା ଜାକୁବ ତାମି ଇୟାନି ଏଲେଇଚେସି, “ମେହ୍ମୁ ନା଼ ତାୟି ଏସୱୁ ବା଼ଣାୟାଁ ଗାଟାସି, ସାମା ନା଼ନୁ ବା଼ଣାୟାଁ ହିଲାଆ ଗାଟାତେଏଁ। 12ଇଞ୍ଜାଁ ଆ଼ବା ନାଙ୍ଗେ ଡୀଗାନେସି, ଆତିହିଁ ନା଼ନୁ ଏ଼ୱାଣି ନ଼କିତା ନା଼ଡ଼ି କିନାତେଏଁ ତ଼ଞ୍ଜାଆ଼ଇଁ; ଏଲେଆ଼ତିହିଁ ନା଼ନୁ ନା଼ ମୁହେଁ ବ଼ର ବେଟାଆ଼ଆନା ବା଼କା ବେଟାଆ଼ଇଁ।”
13ସାମା ତାମି ଇୟା ଏଲେଇଚେ, “ମୀର୍ଏଣା ଏ଼ ବା଼କା ନାଙ୍ଗେ ଆୟାପେ, ୱାର୍ଇ ନା଼ କାତା ମା଼ନୱି ଆ଼ମୁ, ଅ଼ଡ଼େ ହାଜାହାଁ ରୀ ଗରି ଡା଼ଲ୍କା ତାମୁ।” 14ଏଚେଟିଏ ଜାକୁବ ହାଜାହାଁ ଏ଼ୱାଆଁ ତାଚାହାଁ ତାମି ଇୟା ତା଼ଣା ୱା଼ହାଲିଏ, ତାମି ଇୟା ତାମି ଆ଼ବା ରା଼ହାଁ ଆ଼ନିଲେହେଁ ହେନି କା଼ଦି ୱାଜିତେ। 15ଏଚେଟିଏ ରିବିକା, ଇଜ ମାନି କାଜା ମୀର୍ଏଣା ଏସୱୁତି ନେହିଁ ସକା ତାଚାହାଁ, ଊଣା ମୀର୍ଏସି ଜାକୁବଇଁ ତୁର୍ୱି କିତେ। 16ଇଞ୍ଜାଁ ଗରି ଡା଼ଲୁତି ତ଼ଲୁ ଅ଼ହାଁ ଏ଼ୱାଣି କେୟୁତା ଅ଼ଡ଼େ ବା଼ଣାୟାଁ ହିଲାଆ ହେର୍କିତା ରୂପିତେ। 17ଅ଼ଡ଼େ ଏ଼ ୱାଜିତି ହେତି ରା଼ନ୍ଦା ଅ଼ଡ଼େ ରୂଟି ଜାକୁବ କେୟୁତା ହୀତେ।
18ଏଚେଟିଏ ଜାକୁବ ତାମି ଆ଼ବା ତା଼ଣା ହାଜାହାଁ ଏଲେଇଚେସି, “ଆ଼ବା” ଇସାହାକ ଏଲେଇଚେସି, “ମେହ୍ମୁ ନା଼ନୁ ଇମ୍ବାଆଁ ମାଇଁ, ମୀର୍ଏଣା ନୀନୁ ଆମ୍ବାଆତି ?”
19ଜାକୁବ ତାମି ଆ଼ବାଇଁ ଏଲେଇଚେସି, “ନା଼ନୁ ନୀ ପା଼ଣ୍ୱା ମୀର୍ଏଣା ଏସୱୁତେଏଁ; ନୀନୁ ଏ଼ନାଆଁ ହୁକୁମି ହୀହାମାଞ୍ଜାତି ନା଼ନୁ ଏ଼ଦାଆଁ କିହାମାଇଁ, ଏ଼ଦାଆଁତାକି ବାତିମା଼ଲି ମାଞ୍ଜାଇଁ ନୀନୁ ନିଙ୍ଗାମୁ, ଇଞ୍ଜାଁ କୁଗାହାଁ ନା଼ ତାଚାମାନି କୂର୍ହୁ ଊଙ୍ଗା ତିନାମୁ, ଏଚେଟିଏ ନୀନୁ ନାଙ୍ଗେ ବ଼ର ହିୟାମୁ।”
20ଏଚେଟିଏ ଇସାହାକ ତାନି ମୀର୍ଏଣାଇଁ ଏଲେଇଚେସି, “ମୀର୍ଏଣା ନୀନୁ ଇଚେକା ଜିକି ଏ଼ନିକିଁ ବେଟାଆ଼ତି ?” ଏ଼ୱାସି ଏଲେଇଚେସି, “ନୀ ପ୍ରବୁ ମାହାପୂରୁ ନାଙ୍ଗେ ମେଡ଼ି କିୟାତେସି।”
21ଇସାହାକ ଜାକୁବଇଁ ଅ଼ଡ଼େ ଏଲେଇଚେସି, “ମୀର୍ଏଣା ନା଼ ଡାଗେ ୱା଼ମୁ, ନୀନୁ ସାତେଏ ନା଼ ମୀର୍ଏସି ଏସୱୁତି କି ଆ଼ଏ ? ନିଙ୍ଗେ ଡୀଗାହାଁ ପୁଞ୍ଜାଲି ଆ଼ଡାଇଁ।” 22ଏଚେଟିଏ ଜାକୁବ ତାମି ଆ଼ବା ଇସାହାକ ଡାଗେ ହାଜାଲିଏ, ଏ଼ୱାସି ଏ଼ୱାଣାଇଁ ଡୀଗାହାଁ ଏଲେଇଚେସି, “ଈ ଗିୟାଁ ଜାକୁବ ଗିୟାଁ, ସାମା କେୟୁ ଏସୱୁତି କେୟୁ।” 23ଇଲେକିଁ ଏ଼ୱାସି ଜାକୁବଇଁ ପୁଞ୍ଜାଲି ଆ଼ଡାଆତେସି, ଇଚିହିଁ ଏ଼ୱାସି ତାମି ତାୟି ଏସୱୁ ଲେହେଁ କେସ୍କା ବା଼ଣାୟାଁ କିହାମାଚେସି; ଏଚେଟିଏ ଏ଼ୱାସି ଏ଼ୱାଣାଇଁ ବ଼ର ହୀତେସି, 24ଏଚେଟିଏ ଏ଼ୱାସି ଏଲେଇଚେସି, “ନୀନୁ କି ସାତେଏ ନା଼ ମୀର୍ଏସି ଏସୱୁତି ?” ଏ଼ୱାସି ଏଲେଇଚେସି, “ହାଅ ନା଼ନୁ ଏ଼ୱାତେଏଁ।”
25ଏଚିବେ଼ଲା ଇସାହାକ ଏଲେଇଚେସି, “ଏ଼ଦାଆଁ ନା଼ ତା଼ଣା ତାମୁ; ନା଼ନୁ ନା଼ ମୀର୍ଏସି ତାଚାମାନି କୂର୍ହୁ ଊଙ୍ଗା ତିଇଁ, ଏଚେଟିଏ ନା଼ନୁ ନିଙ୍ଗ ବ଼ର ହିୟାଇଁ।” ଏଚେଟିଏ ଏ଼ୱାସି ଡାଗେ ତାଚା ହିୟାଲିଏ, ଇସାହାକ ଏ଼ୱାଆଁ ତିଚେସି; ଇଞ୍ଜାଁ ଅଙ୍ଗୁରି ରାସା ତାଚା ହିୟାଲିଏ ଏ଼ଦାଆଁ ଗସ୍ତେସି। 26ଏଚେଟିଏ ତାମି ଆ଼ବା ଇସାହାକ ଏଲେଇଚେସି, “ମୀର୍ଏଣା, ନୀଏଁ ନା଼ ଡାଗେ ୱା଼ହାଁ ନାଙ୍ଗେ ନଣ୍ତାମୁ।” 27ଏଚିବେ଼ଲା ଏ଼ୱାସି ଡାଗେ ହାଜାହାଁ ନଣ୍ତାଲିଏ, ଇସାହାକ ତାନି ବାସ୍ତେରିତି ଗାନ୍ଦା ୱେଞ୍ଜାହାଁ ଏ଼ୱାଣାଇଁ ବ଼ର ହୀହାଁ ଏଲେଇଚେସି, “ମେହ୍ମୁ, ପ୍ରବୁତି ବ଼ର ବେଟାଆ଼ନାତି ଜା଼ଡ଼ାତି ନେହିଁ ଗାନ୍ଦା ଲେହେଁ ନା଼ ମୀର୍ଏଣିତି ନେହିଁ ଗାନ୍ଦା। 28ମାହାପୂରୁ ହା଼ଗୁ ଲାକତି ମାଚୁ ଅ଼ଡ଼େ ବୂମିତା ଆ଼ୟିନି ପା଼ଡ଼େୟି ଅ଼ଡ଼େ ହା଼ରେକା ଆର୍ନା ଅ଼ଡ଼େ ଅଙ୍ଗୁରି ରାସା ନିଙ୍ଗେ ହିୟାପେସି। 29ଲ଼କୁ ନିଙ୍ଗେ ସେ଼ବା କିୟାପେରି ଅ଼ଡ଼େ ବାରେ କୂଡ଼ାତି ଲ଼କୁ ନିଙ୍ଗେ ଜହରା କିୟାପେରି; ନୀନୁ ନୀ ତାୟିୟାଁତି ସା଼ୱୁକାରି ଆ଼ମୁ, ଇଞ୍ଜାଁ, ନୀ ତାଲିନି ମୀର୍କା ନିଙ୍ଗେ ଜହରା କିୟାପେରି; ଆମ୍ବାଆସି ନିଙ୍ଗେ ବା଼କା ହିୟାନେସି, ଏ଼ୱାସି ବା଼କା ବେଟାଆ଼ପେସି, ଅ଼ଡ଼େ, ଆମ୍ବାଆସି ନିଙ୍ଗେ ବ଼ର ହିୟାନେସି, ଏ଼ୱାସି ବ଼ର ବେଟାଆ଼ପେସି।”
ଏସୱୁ ବ଼ର ରୀହ୍ନାୟି
30ଇଲେକିହିଁ ଇସାହାକ ଜାକୁବଇଁ ବ଼ର ହୀତି ଡା଼ୟୁ ଜାକୁବ ତାମି ଆ଼ବା ଇସାହାକ ତା଼ଣାଟି ହାଚି ଦେବୁଣିଏ ତାମି ତାୟି ଏସୱୁ ବେ଼ଟାଟି ୱା଼ତେସି। 31ଇଞ୍ଜାଁ ଏ଼ୱାସି ଜିକେଏ ହେନି ରା଼ନ୍ଦା ୱାଜାହାଁ ତାମି ଆ଼ବା ତା଼ଣା ତାଚାହାଁ ଏଲେଇଚେସି, “ଆ଼ବା, ନୀନୁ ନିଙ୍ଗା କୁଗାହାଁ ନୀ ମୀର୍ଏସି ତାଚାମାନି କୂର୍ହୁ ଊଙ୍ଗା ତିନାମୁ, ଏଚେଟିଏ ନୀନୁ ନାଙ୍ଗେ ବ଼ର ହିୟାମୁ।” 32ଏଚେଟିଏ ତାମି ଆ଼ବା ଇସାହାକ ଏଲେଇଚେସି, “ନୀନୁ ଆମ୍ବାଆତି ?” ଏ଼ୱାସି ଏଲେଇଚେସି, “ନା଼ନୁ ନୀ ପା଼ଣ୍ୱା ମୀର୍ଏସି ଏସୱୁତେଏଁ।”
33ଏଚିବେ଼ଲା ଇସାହାକ ହା଼ରେକା ତୀର୍ଗିହିଁ ଏଲେଇଚେସି, “ଆତିହିଁ ଆମ୍ବାଆସି ନା଼ ତା଼ଣା କୂର୍ହୁ ଊଙ୍ଗା ତାଚାମାଚେସି, ଏ଼ୱାସି ଆମ୍ବାଆସି ? ନୀନୁ ୱା଼ନି ନ଼କେଏ ନା଼ନୁ ଏ଼ୱାଆଁ ତିଞ୍ଜାହାଁ ଏ଼ୱାଣାକି ବ଼ର ହୀତେଏଁ, ଅ଼ଡ଼େ ଏ଼ୱାସି ବ଼ର ବେଟାଆ଼ନେସି।”
34ଏସୱୁ ଆ଼ବାତି ଈ କାତା ୱେଣ୍ମ୍ବନିଏ ହା଼ରେକା କିଲିବିଲି ଆ଼ହାଁ କାଜା ଗିୟାଁ ତଲେ କା଼ଲୱି ଆ଼ତେସି, ଇଞ୍ଜାଁ ତାମି ଆ଼ବାଇଁ ଏଲେଇଚେସି, “ନାଙ୍ଗେ, ନାଙ୍ଗେ ଜିକେଏ ବ଼ର ହିୟାମୁ।”
35ଏଚେଟିଏ ଇସାହାକ ଏଲେଇଚେସି, “ନୀ ତାୟି ୱା଼ହାଁ ନା଼ଡ଼ିକିହାଁ ନୀ ବେଟାଆ଼ନି ବ଼ର ମୀଞ୍ଜା ଅୟାତେସି।”
36ଏଚେଟିଏ ଏସୱୁ ଏଲେଇଚେସି, “ଏ଼ୱାଣି ଦ଼ରୁ ଜାକୁବ ଆ଼ଏକି ? ଇଚିହିଁ ଏ଼ୱାସି ରୀ ଦେବା ନାଙ୍ଗେ ନା଼ଡ଼ି କିୟାତେସି, ଏ଼ୱାସି ତଲି ନା଼ କାଜା ପା଼ଣାତି ଅଦିକାରା ମୀଞ୍ଜାତେସି ଇଞ୍ଜାଁ ମେହ୍ମୁ ନୀଏଁ ନା଼ ବେଟାଆ଼ନି ବ଼ରତି ଜିକେଏ ମୀଞ୍ଜା ଅୟାତେସି।” ଏ଼ୱାସି ଅ଼ଡ଼େ ୱେଣ୍ତେ ଏଲେଇଚେସି, “ଆ଼ବା ନା଼ ତାକି ରଣ୍ତାଆଁ ଜିକେଏ ବ଼ର ଇଟା ହିଲଅତି କି ?”
37ଏଚେଟିଏ ଇସାହାକ ଏସୱୁଇଁ ଏଲେଇଚେସି, “ମେହ୍ମୁ ନା଼ନୁ ଏ଼ୱାଣାଇଁ ନୀ ସା଼ୱୁକାରି କିତେଏଁ, ଅ଼ଡ଼େ ତାନି ଲ଼କୁଣି ହ଼ଲିୟାଙ୍ଗା କିତେଏଁ, ଆର୍ନା ଅ଼ଡ଼େ ଅଙ୍ଗୁରି ରାସା ତଲେ ଏ଼ୱାଣାକି ବା଼ଡ଼୍ୟୁ କିତେଏଁ। ଏ଼ଦାଆଁତାକି ନା଼ ମୀର୍ଏଣା, ନୀଏଁ ନିଙ୍ଗେ ତାକି ଏ଼ନାଆଁ କିହାଲି ଆ଼ଡିଇଁ ?”
38ଏଚେଟିଏ ଏସୱୁ ଅ଼ଡ଼େ ୱେଣ୍ତେ ତାମି ଆ଼ବାଇଁ ଏଲେଇଚେସି, “ଆ଼ବା ନୀ ତା଼ଣା ୱାର୍ଇ ରଣ୍ତିଏ ବ଼ର ମାଚେ କି ? ହେ଼ ଆ଼ବା ନାଙ୍ଗେ ଜିକେଏ ବ଼ର ହିୟାମୁ।” ଏଲେଇଞ୍ଜାହାଁ କାଜା ଗିୟାଁ ତଲେ ଡ଼ୀତେସି।
39ଏଚେଟିଏ ତାମି ଆ଼ବା ଇସାହାକ ଏ଼ୱାଣାଇଁ ଏଲେଇଚେସି, “ମେହ୍ମୁ ନୀ ବାସା ଟା଼ୟୁ ଗାତା ହିଲାଆ ବୂମି ଅ଼ଡ଼େ ହା଼ଗୁ ଲାକତି ମାଚୁ ହିଲାଆ ଗାଟାୟି ଆ଼ନେ।
40ନୀନୁ ନୀ କାଣ୍ତା ତଲେ ନୀଡିଦି, ଅ଼ଡ଼େ ନୀ ତାୟିତି ହ଼ଲେଏଣା ଆ଼ଦି, ସାମା ନୀନୁ ଏଚେ଼ତା ଏ଼ୱାଣି ପା଼ନ୍ଦା ଡାପ୍ଦି ଏଚେ଼ତା ତାମି ବମିଟି ଜୁୱେଡ଼ି ହୁକ୍ଦି।”
41ଇଲେକିହିଁ ଜାକୁବ ତାମି ତାଞ୍ଜି ତା଼ଣାଟି ବ଼ର ବେଟାଆ଼ତାକି ଏସୱୁ ତାନି ତାୟିଇଁ ଡା଼ହାରା ଆ଼ହାଁ ମ଼ନ ମ଼ନତା ଅଣ୍ପିତେସି, “ମା଼ ତାଞ୍ଜିତି ହା଼ନି କା଼ଲମି ୱା଼ହିମାନେ, ଏଚେଟିଏ ନା଼ନୁ ନା଼ ତାୟି ଜାକୁବଇଁ ପା଼ୟିଇଁ।”
42ସାମା, ପା଼ଣ୍ୱା ମୀର୍ଏଣା ଏସୱୁତି ଇଲେତି କାତା ରିବିକା କିର୍ୟୁଁତା ୱା଼ତେ; ଏଚେଟିଏ ଏ଼ଦି ଲ଼କୁଣି ପାଣ୍ତାହାଁ ଜାକୁବଇଁ ହା଼ଟିକିହାଁ ଏଲେଇଚେ, “ମେହ୍ମୁ, ନୀ ତାୟି ଏସୱୁ ନିଙ୍ଗେ ପା଼ୟାଲି ଅଣ୍ପିମାନେସି। 43ଏ଼ଦାଆଁତାକି ମୀର୍ଏଣା, ନୀଏଁ ନା଼ କାତା ୱେନାମୁ; ନୀନୁ ହାରଣ ଗା଼ଡ଼ାତା ନା଼ ତାୟି ଲାବନ ତା଼ଣା ହାଲାମୁ। 44ଇଞ୍ଜାଁ ଏଚର ଦିନା ନୀ ତାୟିତି କାର୍ବି ଊଣା ଆ଼ଏ, ଏଚର ଦିନା ପାତେକା ଏମ୍ବାଆଁ ଡ଼ୟାମୁ; 45ଏଚେଟିଏ ନିଙ୍ଗେ ତାକି ନୀ ତାୟିତି କାର୍ବି ଊଣା ଆ଼ତିସାରେ ଅ଼ଡ଼େ ନୀନୁ ଏ଼ୱାଣାଇଁ ଏ଼ନାଆଁ କିହାମାଞ୍ଜି ଏ଼ଦାଆଁ ବା଼ଣା ଆ଼ତିସାରେ, ନା଼ନୁ ଲ଼କୁଣି ପାଣ୍ତାହାଁ ନିଙ୍ଗେ ତାପି କିୟାଇଁ; ରଣ୍ତିଏ ଦିନା ରିଆତେରି ମିଙ୍ଗେ ଏ଼ନାଆଁତାକି ଜା଼କ୍ହାଇଁ ?”
46ଏଚେଟିଏ ରିବିକା ଇସାହାକଇଁ ଏଲେଇଚେ, “ଈ ହୀତିୟ ମା଼ସ୍କା ତାକି ନା଼ ମ଼ନତା କିଲିବିଲି ହ଼ଚିମାଞ୍ଜାନେ; ଜାକୁବ ଈୱାରି ଲେହେଁ ଏମିନି ହୀତିୟ ମା଼ସ୍କାଣି ଇଚିହିଁ, ଈ ଦେ଼ସାତି ମା଼ସ୍କାଣି ବୀହା ଆ଼ତିସାରେ, ନା଼ ଜୀୱୁ ମାଞ୍ଜାହାଁ ଏ଼ନି ସୁକୁ।”
Currently Selected:
ମୂଲୁ 27: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
