ମୂଲୁ 25
25
ଅବ୍ରାହାମତି ଅ଼ର କୂଡ଼ା
(୧କୂଡ଼ା ୧:୩୨-୩୩)
1ଅବ୍ରାହାମ କଟୁରା ଦ଼ରୁଗାଟି ଅ଼ଡ଼େ ର଼ ଆୟାନି ବୀହା ଆ଼ତେସି। 2ଏ଼ଦି ଅବ୍ରାହାମ ତାକି ସିମ୍ରନ୍, ଜକ୍ସନ୍, ମଦାନ୍, ମିଦିୟନ, ଜିସ୍ବକ ଅ଼ଡ଼େ ସୁହ, ଈୱାରାଇଁ ଜାର୍ନି କିତେ। 3ଏ଼ ଜକ୍ସନ୍ ସିବା ଦଦାନଇଁ ଜାର୍ନି କିତେସି। ଦଦାନ ଅସୁରିୟ, ଲତୁସିୟ ଅ଼ଡ଼େ ଲିୟମିୟ ଲ଼କୁତି ଆକୁ। 4ମିଦିୟନତି ମୀର୍କା ଅୟିପା, ଏପର, ହନକ, ଅବିଦ ଅ଼ଡ଼େ ଇଲଦାୟା; ଈୱାରି ବାରେ କଟୁରାତି ମୀର୍କା।
5ଏଚେଟିଏ ଅବ୍ରାହାମ ଇସାହାକକି ତାନି ବାରେ ଦ଼ନ ହୀତେସି; 6ସାମା ଅବ୍ରାହାମ ଅ଼ର ଡକ୍ରିସିକା ମୀର୍କାକି ରଚାଣି ଲାକା ହୀହାଁ ଜୀୱୁ ମାଚାଟି ଇସାହାକ ତା଼ଣାଟି ଏ଼ୱାରାଇଁ ୱେ଼ଡ଼ା ହ଼ପୁ ୱାକି ଦେ଼ସାତା ଡ଼ୟାଲି ପାଣ୍ତିତେସି।
ଅବ୍ରାହାମତି ହା଼କି
7ଅବ୍ରାହାମ ଆ଼ଟା କ଼ଡ଼ି ପନ୍ଦର ବାର୍ସା ନୀଡିତେସି। 8ଏଚେଟିଏ ଅବ୍ରାହାମ ଦୂତି ବୁଡ଼୍ହା ଆ଼ହାଁ ହା଼ତେସି; ଅ଼ଡ଼େ, ତଲି ହା଼ହାମାନି ତାମି ଆକୁ ଆ଼ବାୟାଁ ତଲେ ଆଣ୍ତିତେସି। 9ଅ଼ଡ଼େ ତାନି ମୀର୍କା ଇସାହାକ ଅ଼ଡ଼େ ଇସ୍ମାୟେଲ ମମ୍ରିତି ନ଼କିତା ହୀତିୟ ସହର ମୀର୍ଏସି ଇପ୍ରଣତି ବୂମିତା ମକ୍ପେଲା ଇନି ପା଼ୱୁତା ଏ଼ୱାଣାଇଁ ମୁସ୍ତେରି। 10ଇଚିହିଁ ଅବ୍ରାହାମ ହୀତିୟ ମୀର୍କା ତା଼ଣାଟି ଏ଼ ବୂମି କଡାମାଚେସି। ଏ଼ ଟା଼ୟୁତା ଅବ୍ରାହାମ ଅ଼ଡ଼େ ତାନି ଡକ୍ରି ସାରାନି ମୁସ୍ପି ଆ଼ତେ। 11ଅବ୍ରାହାମ ହା଼ତି ଡା଼ୟୁ ମାହାପୂରୁ ତାନି ମୀର୍ଏସି ଇସାହାକକି ବ଼ର ହୀତେସି; ଇଞ୍ଜାଁ ଇସାହାକ ବେର-ଲହୟ-ରୟି#25:11 ନେଗେବ୍ ଇନି ଟା଼ୟୁତା ବାସା କିତେସି।
ଇସ୍ମାୟେଲ କୂଡ଼ା
(୧କୂଡ଼ା ୧:୨୮-୩୧)
12ସାରାତି ହ଼ଲେଣି ମିସରତି ହାଗାର ଅବ୍ରାହାମ ତାକି ଏମିନି ଗାଟାଣାଇଁ ଜାର୍ନି କିହାମାଚେ, ଅବ୍ରାହାମ ମୀର୍ଏସି ଇସ୍ମାୟେଲ କୂଡ଼ା। 13ଦ଼ରୁ ଅ଼ଡ଼େ କୂଲୁତି ଲେକା ତଲେ ଇସ୍ମାୟେଲ ମୀର୍କାତି କୂଡ଼ା ଈଦି; ଇସ୍ମାୟେଲ ପା଼ଣ୍ୱା ମୀର୍ଏସି ନବାୟତ୍; ତାନି ଡା଼ୟୁ କେଦାର, ଅଦ୍ବେଲ ଅ଼ଡ଼େ ମିବ୍ସମ୍, 14ମିସ୍ମା, ଦୁମା, ମସା, 15ହଦଦ୍, ତେମା, ଜିଟୁର, ନାପିସ୍ ଅ଼ଡ଼େ କେଦମା। 16ଈୱାରି ବାରେ ଇସ୍ମାୟେଲ ମୀର୍କା, ଇଞ୍ଜାଁ ଏ଼ୱାରି ଦ଼ରୁ ତଲେ ଏ଼ୱାରି ନା଼ୟୁଁ ଅ଼ଡ଼େ ସାହ୍ଡ଼ା ମାଚେ; ଅ଼ଡ଼େ ଏ଼ୱାରି ଜାହା ଜାହାରା କୂଲୁ ତଲେ ବା଼ର ଜା଼ଣା ସା଼ଲୱି କିନାରି ମାଚେରି। 17ଇସ୍ମାୟେଲ ସ଼କ଼ଡ଼ି ସତର ବାର୍ସା ନୀଡିତେସି; ଏଚେଟିଏ ଏ଼ୱାସି ହା଼ତେସି ଅ଼ଡ଼େ ତାମି ଲ଼କୁ ତଲେ ଆଣ୍ତିତେସି। 18ଏଚେଟିଏ ତାନି ମୀର୍କା ହବିଲାଟିଏ ସୁର ପାତେକା, ମିସରତି ୱେ଼ଡ଼ା ହ଼ପୁୱାକି ଅସୁରିୟ ହାନି ଜିରୁ ମାଦି ବାସା କିତେରି। ଇଲେକିହିଁ ଏ଼ୱାସି ତାମି ବାରେ ତାୟିୟାଁ ନ଼କିତା ବାସା ଟା଼ୟୁ ବେଟାଆ଼ତେସି।
ଏସୱୁ ଅ଼ଡ଼େ ଜାକୁବତି ଜାର୍ନା
19ଅବ୍ରାହାମ ମୀର୍ଏସି ଇସାହାକ କୂଡ଼ା। 20ଏ଼ ଇସାହାକ ରୀ କ଼ଡ଼ି ବାର୍ସା ବେ଼ଲାତା ପଦନ୍ ଅରାମିୟ ବତୁୟେଲତି ମା଼ଙ୍ଗା, ଇଚିହିଁ, ଅରାମିୟ ଲାବନତି ତାଙ୍ଗି ରିବିକାନି ବୀହା ଆ଼ତେସି। 21ଇସାହାକ ଡକ୍ରି ବା଼ଞ୍ଜେଣି ଆ଼ତାକି, ଏ଼ୱାସି ଏ଼ଦାନି ତାକି ପ୍ରବୁ ତା଼ଣା ପ୍ରା଼ତାନା କିତେସି; ଏଚେଟିଏ ପ୍ରବୁ ତାନି ପ୍ରା଼ତାନା ୱେଚେସି, ଅ଼ଡ଼େ ତାନି ଡକ୍ରି ରିବିକା ପୂରାମା଼ସା ଆ଼ତେ। 22ଏଚେଟିଏ ଏ଼ଦାନି ବାଣ୍ତିତା କକାରି ୱୀଡାଲିଏ, ନାଙ୍ଗେ ଏ଼ନାଆଁତାକି ଇଲେକିଁ ଆ଼ହିମାନେ ? ଇଲେକିଁ ଆ଼ନେକି ? ଈଦାଆଁ ଅଣ୍ପାହାଁ ଏ଼ଦି ପ୍ରବୁ ତା଼ଣା ୱେଞ୍ଜାଲି ହାଚେ। 23ଏଚେଟିଏ ପ୍ରବୁ ଏ଼ଦାନି ଏଲେଇଚେସି,
“ରୀ କୂଲୁ ନୀ ତା଼ଣା ମାନେରି;
ରୀ କୂଲୁ ନୀ ବାଣ୍ତିଟି ଏଟ୍କା ଆ଼ନେରି;
ରଅସି ଅ଼ର ରଅଣି କିହାଁ ବା଼ଡ଼୍ୟୁ ଗାଟାସି ଆ଼ନେସି;
କାଜା ତାୟି ଊଣା ତାୟିତି ସେ଼ବା କିନେସି।”
24ଏଚେଟିଏ ଜାର୍ନା କିନି କା଼ଲମି ଆ଼ହାଲିଏ, ତାନି ବାଣ୍ତିଟି ଜା଼ଣ୍ୱା ମୀର୍କା ଜାର୍ନା ଆ଼ତେରି। 25ପା଼ଣ୍ୱା ମୀର୍ଏସି ନେତେରି ୱା଼ଣା ଗାଟାସି ଅ଼ଡ଼େ ଗୂଡ଼ା ଆଙ୍ଗା ବାସ୍ତେରି ଲେହେଁ ବା଼ଣାୟାଁ ମାଚୁ, ଏ଼ଦାଆଁତାକି ଏ଼ୱାଣି ଦ଼ରୁ ଏସୱୁ#25:25 ବା଼ଣାୟାଁ ଗାଟି ମାଣ୍ସି ହୀପ୍କିଆ଼ତେ। 26ଏଚେଟିଏ ଏସୱୁତି ପାଃଆନା ଆସାହାଁ ତାନି ତାୟି ଜାର୍ନା ଆ଼ତେସି; ଏ଼ଦାଆଁତାକି ଏ଼ୱାଣି ଦ଼ରୁ ଜାକୁବ#25:26 ପା଼ୱୁଲି ଆସ୍ତାସି ଆ଼ତେ। ଇସାହାକକି ତୀନିକ଼ଡ଼ି ବାର୍ସା ଆ଼ହାମାଚାଟି ଈ ଜା଼ଣ୍ୱା ମୀର୍କା ଜାର୍ନା ଆ଼ତେରି।
ଏସୱୁ କାଜା ପା଼ଣା ପା଼ର୍ନାୟି
27ଏଚେଟିଏ କକାରି ପାଡା ଆ଼ତେରି, ଅ଼ଡ଼େ ଏସୱୁ ବାଣ୍ମିୟା ଅ଼ଡ଼େ ଜା଼ଡ଼ାତା ବାସା କିନାସି ଆ଼ତେସି, ସାମା ଜାକୁବ ସ଼ଜେତାସି ଅ଼ଡ଼େ ତୂମୁତା ଡ଼ୟିନାସି ଆ଼ତେସି। 28ଇସାହାକ ଏସୱୁଇଁ ଜୀୱୁ ନ଼ତେସି, ଏ଼ନାଆଁତାକି ଇଚିହିଁ ବେ଼ଟା ଊଙ୍ଗା ଏ଼ୱାଣାକି ନେହିଁ ହ଼ତୁ, ସାମା ରିବିକା ଜାକୁବଇଁ ଜୀୱୁ ନ଼ତେ।
29ର଼ ଦିନା ଜାକୁବ ପାପୁ ଜା଼ୟୁ ୱାଜିମାଚେସି, ଏଚିବେ଼ଲା ଏସୱୁ ବେ଼ଟା ଜା଼ଡ଼ାଟି ୱା଼ହା ହାଜାହାଁ ୱା଼ତେସି; 30ଅ଼ଡ଼େ ଏ଼ୱାସି ଜାକୁବଇଁ ଏଲେଇଚେସି, “ନା଼ନୁ ୱା଼ହା ହାଜାମାଇଁ, ବାତିମା଼ଲି ମାଞ୍ଜାଇଁ, ଏ଼ ଗାଦ୍ଗା ପାପୁ ଜା଼ୟୁ ହୀହାଁ ନାଙ୍ଗେ ତୀସ୍ତାମୁ।” ଏ଼ଦାଆଁତାକି ତାନି ଦ଼ରୁ ଇଦମ#25:30 ଗାଦ୍ଗା ଇଞ୍ଜିହିଁ ୱେ଼ଙ୍ଗିତେ।
31ଏଚିବେ଼ଲା ଜାକୁବ ଏଲେଇଚେସି, “ନୀଞ୍ଜୁ ନୀନୁ ନାଙ୍ଗେ ନୀ କାଜା ପା଼ଣା ପା଼ର୍ତାମୁ, ଆତିହିଁ ନା଼ନୁ ହିୟାଇଁ।”
32ଏସୱୁ ଏଲେଇଚେସି, “ମେହ୍ମୁ, ନା଼ନୁ ହା଼ତି ଲେହେଁ, କାଜା ପା଼ଣାତା ନା଼ ଏ଼ନି ଲା଼ବା ?”
33ଜାକୁବ ଏଲେଇଚେସି, “ନୀନୁ ନା଼ ନ଼କିତା ପାର୍ମାଣା କିମୁ।” ଏଚେଟିଏ ଏ଼ୱାସି ଏ଼ୱାଣି ନ଼କିତା ପାର୍ମାଣା କିତେସି। ଇଲେକିଁ ଏ଼ୱାସି ତାନି କାଜା ପା଼ଣା ଜାକୁବକି ପା଼ର୍ତେସି। 34ଏଚେଟିଏ ଜାକୁବ ଏସୱୁକି ରୂଟି ଅ଼ଡ଼େ ୱାଜିତି ପାପୁ ଜା଼ୟୁ ହୀହାଲିଏ, ଏ଼ୱାସି ତିଞ୍ଜା ଉଣ୍ତାହାଁ ହାଚେସି। ଇଲେକିଁ ଏସୱୁ ତାନି କାଜା ପା଼ଣା ହୀଣି କିତେସି।
Currently Selected:
ମୂଲୁ 25: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
