ମୂଲୁ 24
24
ଇସାହାକକି ଡକ୍ରି
1ଏଚିବେ଼ଲା ଅବ୍ରାହାମ ହା଼ରେକା ବୁଡ଼୍ହା ଆ଼ହାମାଚେସି, ଇଞ୍ଜାଁ ପ୍ରବୁ ଅବ୍ରାହାମଇଁ ବାରେ ୱାକିଟି ବ଼ର ହୀହାମାଚେସି। 2ଏ଼ଦାଆଁତାକି ଅବ୍ରାହାମ ତାନି ଇଲୁତି ବାରେ କାମାତି କାଜା ବୁଡ଼୍ହା ହ଼ଲେଏଣାଇଁ ଏଲେଇଚେସି, “ନା଼ କୁଦ୍ଗୁତା ନୀ କେୟୁ ଇଟାହାଁ ପାର୍ମାଣା କିମୁ। 3ନା଼ନୁ ଲାକପୂରୁ ଅ଼ଡ଼େ ଦାର୍ତି ଗା଼ଡ଼ି କିହାମାନି ପ୍ରବୁ ମାହାପୂରୁ ଦ଼ରୁତଲେ ପାର୍ମାଣା କିୱି କିୟାଇଁ, ଏମିନି କିଣାନ ଲ଼କୁ ତା଼ଣା ନା଼ନୁ ବାସା କିହାମାଇଁ, ନୀନୁ ଏ଼ୱାରି ବିତ୍ରାଟି ନା଼ ମୀର୍ଏଣାକି ବୀହା କିହାଲି ଏମିନି ମା଼ଙ୍ଗାନି ତାଅତି। 4ସାମା ନୀନୁ ନା଼ କୂଲୁତି ଲ଼କୁ ଦେ଼ସାତା ହାଜାହାଁ ନା଼ ମୀର୍ଏସି ଇସାହାକ ତାକି ମା଼ଙ୍ଗାନି ତାଦି।”
5ଏଚିବେ଼ଲା ଏ଼ ହ଼ଲେଏସି ଏ଼ୱାଣାଇଁ ଏଲେଇଚେସି, “ଏମିନି ଡ଼ାଆ ମା଼ଙ୍ଗା ନା଼ ତଲେ ଈ ଦେ଼ସାତା ୱା଼ହାଲି କୁତିସାରେ, ନୀନୁ ଆମିନି ଦେ଼ସାଟି ୱା଼ହାମାଞ୍ଜି, ଏ଼ ଦେ଼ସାତା ନୀ ମୀର୍ଏଣାଇଁ ଅ଼ଇଁକି ?”
6ଏଚେଟିଏ ଅବ୍ରାହାମ ଏଲେଇଚେସି, “ଜାଗ୍ରାତା ନା଼ ମୀର୍ଏଣାଇଁ ଏମ୍ବାଆଁ ଏଚେଲା ଅ଼ହିଁ ହାଲଅତି। 7ଇଚିହିଁ ଏମିନି ଲାକପୂରୁ ଗା଼ଡ଼ିକିତି ପ୍ରବୁ ମାହାପୂରୁ, ନା଼ ଆ଼ବା ଇଲୁ ଅ଼ଡ଼େ ନା଼ ଜାର୍ନା ଦେ଼ସାଟି ତାଚାମାଞ୍ଜାନେସି, ଅ଼ଡ଼େ ନା଼ ତଲେ କାତା ଆ଼ହାମାଞ୍ଜାନେସି, ଇଞ୍ଜାଁ ନା଼ନୁ ନୀ କୂଲୁ ତାକି ଈ ଦେ଼ସା ହିୟାଇଁ ଇଞ୍ଜିଁ ପାର୍ମାଣା କିହାମାଞ୍ଜାନେସି, ଏ଼ୱାସି ନୀ ନ଼କିତା ତାନି ଦୂତୁଇଁ ପାଣ୍ତିନେସି; ଏଚେଟିଏ ନୀନୁ ନା଼ ମୀର୍ଏଣାକି ବୀହା କିହାଲି ଏମ୍ବାଟି ର଼ ମା଼ଙ୍ଗାନି ତାଦି। 8ଏ଼ ଦେ଼ସାଟି ଏମିନି ଡ଼ାଆ ମା଼ଙ୍ଗା ୱା଼ହାଲି କୂନେ, ଆତିହିଁ ଈ ନା଼ ପାର୍ମାଣାଟି ଗେଲ୍ପି ଆ଼ଦି; ସାମା ନୀନୁ ନା଼ ମୀର୍ଏଣାଇଁ ଏ଼ ଦେ଼ସାତା ଅ଼ହିଁ ହାଲଅତି।” 9ଏଚେଟିଏ ଏ଼ ହ଼ଲେଏସି ତାନି ସା଼ୱୁକାରି ଅବ୍ରାହାମ କୁଦ୍ଗୁତା କେୟୁ ଇଟାହାଁ ଏ଼ କାତା ତାକି ପାର୍ମାଣା କିତେସି।
10ଏଚେଟିଏ ଏ଼ ହ଼ଲେଏସି ତାନି ସା଼ୱୁକାରିତି ଊଟୁୟାଁ ବିତ୍ରାଟି ଦସଗଟା ଊଟୁ ଅ଼ଡ଼େ ତାନି ବାରେ ନେହିଁ ଦିଣ୍ସୁ କେୟୁତା ଆସାଁ ଅରାମନହରୟିମ୍#24:10 ମେସପଟାମିୟାଁ ଦେ଼ସାତି ନାହ଼ର ଗା଼ଡ଼ାତା ହାଚେସି। 11ଏଚେଟିଏ ମିଡ଼୍ଅଲା ବେ଼ଲା, ଏଚିବେ଼ଲା ଡ଼ାଆ ପ଼ଦାୟାଁ ଏ଼ୟୁ ଅ଼ହାଲି ୱା଼ନୁ, ଏଚିବେ଼ଲା ଏ଼ୱାସି ଗା଼ଡ଼ା ପାଙ୍ଗାତା କୁହି ଡାଗେ ଊଟୁୟାଁଣି ମେଣ୍ତା କୁତି କିହାଁ କୁଗି କିତେସି। 12ଇଞ୍ଜାଁ ଏ଼ୱାସି ଈ ପ୍ରା଼ତାନା କିତେସି, “ହେ଼ ନା଼ ସା଼ୱୁକାରି ଅବ୍ରାହାମତି ପ୍ରବୁ ମାହାପୂରୁତି, ନୀଞ୍ଜୁ ନା଼ ନ଼କିତା ନେହିଁ କାମା କିୟାମୁ ନା଼ ସା଼ୱୁକାରି ଅବ୍ରାହାମଇଁ କାର୍ମା ମେହ୍ମୁ। 13ମେହ୍ମୁ ନା଼ନୁ ଈ କୁହି ଡାଗେ ନିଚାମାଇଁ, ଅ଼ଡ଼େ ଈ ଗା଼ଡ଼ାତି ଡ଼ାଆ ପ଼ଦାୟାଁ ଏ଼ୟୁ ତାକି ୱା଼ହିମାନୁ; 14ଏ଼ୱାସିକା ବିତ୍ରା ଏମିନି ଡ଼ାଆ ମା଼ଙ୍ଗାନି, ‘ନୀନୁ ନକି ଟେଟ୍ହାଁ ନାଙ୍ଗେ ଏ଼ୟୁ ଊଟ୍ହାମୁ’ ଇଚିସାରେ ଏ଼ ପ଼ଦା ଏଲେଇଞ୍ଜାନେ, ‘ଗହ୍ମୁ, ନା଼ନୁ ନୀ ଊଟୁୟାଁଣି ଜିକେଏ ଊଟ୍ଇଁ,’ ଆତିହିଁ ଏ଼ଦି ନୀ ହ଼ଲେଏସି ଇସାହାକ ତାକି ନୀନୁ ତୀରି କିହାମାନି ମା଼ଙ୍ଗା ଆ଼ପେ; ଏଚେଟିଏ ନୀନୁ ନା଼ ସା଼ୱୁକାରିଇଁ କାର୍ମା ମେସାମାଞ୍ଜି, ଈ କାତା ନା଼ନୁ ପୁଇଁ।”
15ଈ କାତା ଏଲେଇଞ୍ଜି ମାଚାଟିଏ ଅବ୍ରାହାମତି ନାହ଼ର ଇନି ତାୟି ଡକ୍ରି ମିଲ୍କାନି ମୀର୍ଏସି ଆମ୍ବାଆସି ବତୁୟେଲ, ତାନି ମା଼ଙ୍ଗା ରିବିକା ବମିତା ନକି ଡେ଼କାହାଁ ପାଙ୍ଗାତା ୱା଼ତେ। 16ଏ଼ ମା଼ଙ୍ଗା ହା଼ରେକା ଅ଼ଜିତାୟି, ଅ଼ଡ଼େ ବୀହା ଆ଼ଆତାୟି ଇଞ୍ଜାଁ ଏମିନି କକାଣାକି ରୀସ୍ପି ଆ଼ହା ହିଲାଆତେ, ଏ଼ଦି କୁହି ବିତ୍ରା ହାଜାହାଁ ନ଼କିତା ଏ଼ୟୁ ନେଞ୍ଜି କିହାଁ ୱା଼ହିମାନେ। 17ଏଚିବେ଼ଲାତା ଏ଼ ହ଼ଲେଏସି ତବେ ହାଜାହାଁ ଏ଼ଦାନି ଏଲେଇଚେସି, “ନା଼ନୁ ବାତିମା଼ଲି ମାଞ୍ଜାଇଁ ନୀ ନ଼କିଟି ନାଙ୍ଗେ ଇଚରା ଏ଼ୟୁ ଗସାଲି ହିୟାମୁ।”
18ଏଚେଟିଏ ରିବିକା ଏଲେଇଚେ, “ବା଼ବୁ ଗହ୍ମୁ।” ତବେ ନକି ଡ଼଼କି କିହାଁ ଗସାଲି ହୀତେ। 19ଇଞ୍ଜାଁ ଏ଼ୱାସି ଗସାଲି ଆ଼ଡିତି ଡା଼ୟୁ, ଏ଼ଦି ଏଲେଇଚେ, “ନୀ ଊଟୁୟାଁ ବାରେ ଏ଼ୟୁ ଗସାଲି ଆ଼ଡେତାକି ନା଼ନୁ ଏ଼ୟୁ ତାଚା ହୀଇଁ।” 20ଏଚେଟିଏ ଏ଼ଦି ତବେ ଦ଼ନିତା ନକିତି ଏ଼ୟୁ ୱା଼କ୍ହାଁ ଅ଼ଡ଼େ ୱେଣ୍ତେ ଏ଼ୟୁ ତାଚାଲି କୁହି ବିତ୍ରା ହାଚେ ଇଞ୍ଜାଁ ବାରେ ଊଟୁୟାଁଣି ଊଟ୍ହେ। 21ଏଚେଟିଏ ଏ଼ ହ଼ଲେଏସି ଏ଼ଦାନି ଗୁରିକିହାଁ ସିନିକିତେସି; ଇଞ୍ଜାଁ ପ୍ରବୁ ତାନି ୱା଼ତି ଜିରୁତି ପୂରା କିନେସି କି ଆ଼ଏ, ଏ଼ଦାଆଁ ପୁଞ୍ଜାଲି ସାପି ଆ଼ହାଁ ଡ଼ୟିତେସି।
22ଇଞ୍ଜାଁ ଊଟୁୟାଁ ଏ଼ୟୁ ଗସ୍ତି ଡା଼ୟୁ, ଏ଼ ମାଣ୍ସି ଏ଼ ପ଼ଦାନାକି ଆଦା ତୂଲା ବାଂଗାରା ମୁର୍କା ଅ଼ଡ଼େ ଏ଼ଦାନି କେୟୁତା ଦସ ତୂଲା ରୀ ବାଂଗାରା ଗା଼ଜୁୟାଁ ତୁର୍ୱି କିହାଁ ଏଲେଇଚେସି, 23“ନୀନୁ ଆମ୍ବାଆରି ମା଼ଙ୍ଗା, ନାଙ୍ଗେ ୱେସ୍ତାମୁ, ମୀ ଆ଼ବା ଇଜ ନୀଞ୍ଜୁ ଲା଼ଆଁୟାଁ ମା଼ମ୍ବୁ ଡ଼ୟାଲି ବାସା ଟା଼ୟୁ ମାନେକି ?”
24ଏଚେଟିଏ ଏ଼ଦି ଏଲେଇଚେ, “ନାହ଼ର ଅ଼ଡ଼େ ମିଲ୍କା ତା଼ଣାଟି ଜାର୍ନାଆ଼ତି ମୀର୍ଏସି ବତୁୟେଲ, ନା଼ନୁ ଏ଼ୱାଣି ମା଼ଙ୍ଗାତେଏଁ।” 25ଅ଼ଡ଼େ ଏଲେଇଚେ, “ମା଼ ଇଜ ହା଼ରେକା ପୀଚୁ ଅ଼ଡ଼େ କା଼ଦି ମାନେ, ଅ଼ଡ଼େ ଲା଼ଆଁୟାଁ ଡ଼ୟାଲି ଜିକେଏ ମିଙ୍ଗେ ତାକି ଟା଼ୟୁ ମାନେ।”
26ଏଚିବେ଼ଲା ଏ଼ ମାଣ୍ସି ମୁନୁ କୁତାହାଁ ପ୍ରବୁଇଁ ଜହରା କିତେସି। 27ଏ଼ୱାସି ଏଲେଇଚେସି, “ନା଼ ସା଼ୱୁକାରି ଅବ୍ରାହାମତି ପ୍ରବୁ ମାହାପୂରୁକି ଜହରା ଆ଼ପେ, ଇଚିହିଁ ଏ଼ୱାସି ନା଼ ସା଼ୱୁକାରିଇଁ କାର୍ମା ଆ଼ହାଁ ସାତା ତଲେ ଲେ଼ମ୍ବା ମାନେସି; ଇଞ୍ଜାଁ ପ୍ରବୁ ନାଙ୍ଗେ ନା଼ ସା଼ୱୁକାରି ଲ଼କୁ ତା଼ଣା ତାଚାମାଞ୍ଜାନେସି।”
28ଅ଼ଡ଼େ ଏ଼ ଡ଼ାଆ ପ଼ଦା ହଟିହିଁ ହାଜାହାଁ ତାମି ଇୟା ଇଜତି ଲ଼କୁଣି ଈ ବାରେ କାତା ୱେସ୍ତେ। 29ଅ଼ଡ଼େ ରିବିକାକି ର଼ ତାୟି ମାଚେସି ଏ଼ୱାଣି ଦ଼ରୁ ଲାବନ; ଏ଼ ଲାବନ ଅବ୍ରାହାମତି ହ଼ଲେଏଣା ତାକି କୁହିତା ହାଚେସି। 30ଇଞ୍ଜାଁ ଏ଼ ମାଣ୍ସି ନାଙ୍ଗେ ଈ କାତା ୱେସ୍ତାତେସି, ତାନି ତାଙ୍ଗି ରିବିକା ଗୂତିଟି ଏ଼ କାତା ୱେଞ୍ଜାହାଁ ଅ଼ଡ଼େ ତାଙ୍ଗିନି ମୁର୍କା ଅ଼ଡ଼େ କେୟୁତି ଗା଼ଜୁୟାଁ ମେସାହାଁ ଏ଼ ମାଣ୍ସି ତା଼ଣା ହାଚେସି। ଅ଼ଡ଼େ, ଏ଼ୱାଣାଇଁ କୁହି ଟଟ ଊଟୁୟାଁ ତଲେ ନିଚାମାନାଣି ମେସାହାଁ ଏଲେଇଚେସି, 31“ହେ଼ ମାହାପୂରୁତି ବ଼ର ବେଟାଆ଼ତାତି ବିତ୍ରା ୱା଼ମୁ, ନୀନୁ ଏ଼ନାଆଁତାକି ପାଙ୍ଗାତା ନିଚାମାଞ୍ଜି ? ନା଼ନୁ ନୀ ଇଲୁ ଅ଼ଡ଼େ ଊଟୁୟାଁ ତାକି ବାସା ଟା଼ୟୁ ତିୟାରା କିହାମାଇଁ।”
32ଏଚେଟିଏ ଏ଼ ମାଣ୍ସି ଇଜ ହ଼ଡାହାଁ ଊଟୁୟାଁଟି ଦିଣ୍ସୁ ରେ଼ପ୍ହାଲିଏ, ଏ଼ୱାସି ଊଟୁୟାଁକି ପୀଚୁ ଅ଼ଡ଼େ ହାରା ହୀତେସି। ଇଞ୍ଜାଁ ଏ଼ୱାଣାକି ଅ଼ଡ଼େ ଏ଼ୱାଣି ତ଼ଣେସିଙ୍ଗାକି କଡାୟାଁ ନର୍ହାଲି ଏ଼ୟୁ ହୀତେସି। 33ଏଚେଟିଏ ଏ଼ୱାଣି ନ଼କିତା କା଼ଦି ତିଞ୍ଜାଲି ତାଚାଲିଏ, ଏ଼ ମାଣ୍ସି ଏଲେଇଚେସି, “ନା଼ନୁ ଏ଼ନାଆଁ ୱେହ୍ନାଇ ମାନେ ଏ଼ଦାଆଁ ୱେହ୍ଆ ପାତେକା ତିନଅଁ।” ଏଚେଟିଏ ଲାବନ ଏଲେଇଚେସି “ୱେସ୍ତାମୁ।” 34ଏ଼ୱାସି ଏଲେଇଚେସି, “ନା଼ନୁ ଅବ୍ରାହାମତି ହ଼ଲେଏଣାତେଏଁ। 35ପ୍ରବୁ ନା଼ ସା଼ୱୁକାରିଇଁ ହା଼ରେକା ବ଼ର ହୀହାମାନେସି ଏ଼ଦାଆଁତାକି ଏ଼ୱାସି ହା଼ରେକା ବାତ୍କା ମାନେସି; ପ୍ରବୁ ଏ଼ୱାଣାଇଁ କ଼ଡି, ଗରି, ମେ଼ଣ୍ତାୟାଁ, ଅ଼ଡ଼େ ବାଂଗାରା, ୱେଣ୍ତି, ହ଼ଲିୟା ଅ଼ଡ଼େ ହ଼ଲେଣିସିକା, ଊଟୁୟାଁ ଅ଼ଡ଼େ ଗା଼ଡ଼୍ଦେୟାଁ ହୀହାମାନେସି। 36ଇଞ୍ଜାଁ ନା଼ ସା଼ୱୁକାରି ଡକ୍ରି, ସାରା, ବୁଡ଼୍ହି ବେ଼ଲାତା ଏ଼ୱାଣାକି ର଼ ମୀର୍ଏଣାଇଁ ବେଟାଆ଼ହାମାନେ, ଅ଼ଡ଼େ ନା଼ ସା଼ୱୁକାରି ଏ଼ୱାଣାକି ବାରେ ହୀହାମାନେସି। 37ଇଞ୍ଜାଁ ନା଼ ସା଼ୱୁକାରି ନାଙ୍ଗେ ପାର୍ମାଣା କିୱି କିହାଁ ଏଲେଇଞ୍ଜାତେସି, ‘ମା଼ର ଆମ୍ବାଆରି ତା଼ଣା ବାସା କିହିମାନାୟି, ନୀନୁ ନା଼ ମୀର୍ଏଣି ବୀହା ତାକି ଏ଼ କିଣାନ ଦେ଼ସାତି ଲ଼କୁ ତା଼ଣାଟି ଏମିନି ମା଼ଙ୍ଗାନି ତାଅତି। 38ସାମା ନା଼ ତାଞ୍ଜି କୂଲୁତି ଲ଼କୁତା଼ଣା ହାଜାହାଁ ନା଼ ମୀର୍ଏଣାକି ମା଼ଙ୍ଗାନି ତାମୁ।’ 39ଏଚିବେ଼ଲା ନା଼ନୁ ନା଼ ସା଼ୱୁକାରିଇଁ ୱେଚେଏଁ, ‘ଏଚେ଼ତା ଏମିନି ଡ଼ାଆ ମା଼ଙ୍ଗା ନା଼ ତଲେ ୱା଼ଏ।’ 40ଏଚେଟିଏ ଏ଼ୱାସି ଏଲେଇଞ୍ଜାତେସି, ‘ନା଼ନୁ ଏମିନି ପ୍ରବୁଇଁ ମା଼ନୱି ଆ଼ହାମାଇଁ, ଏ଼ୱାସି ନୀ ତଲେ ତାନି ଦୂତୁଇଁ ପାଣ୍ତାହାଁ ନୀ କାମା ପୂରା କିୟାନେସି; ଏଚେଟିଏ ନୀନୁ ନା଼ ମୀର୍ଏଣାକି ନା଼ ଲ଼କୁ ତା଼ଣାଟି, ମା଼ ତାଞ୍ଜି କୂଡ଼ାଟି ମା଼ଙ୍ଗା ତାଦି। 41ଅ଼ଡ଼େ ନୀନୁ ନା଼ କୂଡ଼ାତି ଲ଼କୁ ତା଼ଣା ହାଚିସାରେ ଈ ପାର୍ମାଣାଟି ଗେଲ୍ପି ଆ଼ଦି; ଏ଼ୱାରି ମା଼ଙ୍ଗା ହିୟଅରି ଆ଼ତି ଜିକେଏ ନା଼ ପାର୍ମାଣାଟି ଗେଲ୍ପି ଆ଼ଦି।’”
42“ଏ଼ଦାଆଁତାକି ନୀଞ୍ଜୁ ନା଼ନୁ କୁହି ଦାରିତା ଏଜାହାଁ ପ୍ରା଼ତାନା କିତେଏଁ, ‘ହେ଼ ନା଼ ସା଼ୱୁକାରି ଅବ୍ରାହାମତି ପ୍ରବୁ, ନୀନୁ ନା଼ ୱା଼ହାମାନି କାମା ପୂରା କିମୁ। 43ମେହ୍ଦୁ ନା଼ନୁ ନୀଏଁ ଈ କୁହି ଡାଗେ ନିଚାମାଇଁ। ଏଚେଟିଏ ଏ଼ୟୁ ତାକି ୱା଼ନି ଏମିନି ଡ଼ାଆ ପ଼ଦାଇଁ ନା଼ନୁ ଏଲେଇଇଁ, ନୀ ନ଼କିତି ଇଚରା ଏ଼ୟୁ ଗସାଲି ହିୟାମୁ। 44ଇଞ୍ଜାଁ ଏ଼ ପ଼ଦା ଏଲେଇଞ୍ଜାନେ, ନୀନୁ ଗହ୍ମୁ ଅ଼ଡ଼େ ନୀ ଊଟୁୟାଁ ତାକି ଜିକେଏ ଏ଼ୟୁ ତାଚା ହିୟାଇଁ; ଆ଼ତିହିଁ ଏ଼ଦି ନା଼ ସା଼ୱୁକାରିତି ମୀର୍ଏଣାକି ପ୍ରବୁ ତା଼ଣାଟି ତୀରି କିହାମାନି ମା଼ଙ୍ଗା ଆ଼ପେ।’ 45ଈ କାତା ନା଼ ମ଼ନ ମ଼ନତା ଜ଼ଲି ମାଚେଏଁ, ଏଚିବେ଼ଲାତା ରିବିକା ଏ଼ୟୁ ନକି ବମିତା ଆସାହାଁ ପାଙ୍ଗାତା ୱା଼ତେ, ଇଞ୍ଜାଁ ଏ଼ଦି କୁହି ବିତ୍ରାଟି ଏ଼ୟୁ ତାଚାଲିଏ ନା଼ନୁ ଏ଼ଦାନି ଏଲେଇଚେଏଁ, ‘ବାତିମା଼ଲି ମାଞ୍ଜାଇଁ ଇଚରା ଏ଼ୟୁ ନାଙ୍ଗେ ଗସାଲି ହିୟାମୁ।’ 46ଏଚେଟିଏ ଏ଼ଦି ତବେ ତାନି ବମିଟି ନକି ଟେଟ୍ହାଁ ଏଲେଇଞ୍ଜାତେ, ‘ଗହ୍ମୁ, ଅ଼ଡ଼େ ନୀ ଊଟୁୟାଁଣି ଜିକେଏ ଏ଼ୟୁ ଊଟ୍ଇଁ।’ ଏଚେଟିଏ ନା଼ନୁ ଗସ୍ତେଏଁ, ଅ଼ଡ଼େ ଏ଼ଦି ଊଟୁୟାଁଣି ଏ଼ୟୁ ଊଟ୍ହେ। 47ଏଚେଟିଏ ନା଼ନୁ ଏ଼ଦାନି ୱେଚେଏଁ, ‘ନୀନୁ ଆମ୍ବାଆରି ମା଼ଙ୍ଗାତି ?’ ଏଚେଟିଏ ଏ଼ଦି ଏଲେଇଞ୍ଜାତେ, ‘ନାହ଼ର ତା଼ଣାଟି ମିଲ୍କାନି ମୀର୍ଏସି ଆମ୍ବାଆସି ବତୁୟେଲ, ନା଼ନୁ ଏ଼ୱାଣି ମା଼ଙ୍ଗାତେଏଁ।’ ଏଚେଟିଏ ନା଼ନୁ ତାନି ମୁଙ୍ଗେଲିତା ମୁର୍ମୁ ଅ଼ଡ଼େ କେୟୁତା ବାଂଗାରା ଗା଼ଜୁୟାଁ ତୁର୍ୱି କିତେଏଁ। 48ଏଚେଟିଏ ନା଼ନୁ ମେଣ୍ତା କୁତାହାଁ ପ୍ରବୁତି ଜହରା କିତେଏଁ। ଇଞ୍ଜାଁ ଆମ୍ବାଆୟି ନା଼ ସା଼ୱୁକାରି ମୀର୍ଏଣା ତାକି, ତାୟି ମା଼ଙ୍ଗାନି ଅ଼ହାଲି ତାକି ନାଙ୍ଗେ ସାତା ଜିରୁତା ତାତାତେସି, ନା଼ ସା଼ୱୁକାରି ଅବ୍ରାହାମତି ଏ଼ ପ୍ରବୁ ମାହାପୂରୁଇଁ ଜହରା କିତେଏଁ। 49ଏ଼ଦାଆଁତାକି ମୀରୁ ନା଼ ସା଼ୱୁକାରିଇଁ କାର୍ମା ଅ଼ଡ଼େ ସାତା ଲେ଼ମ୍ବାଲି ମ଼ନ କିଦେରି, ଆତିହିଁ ଏ଼ଦାଆଁ ୱେସ୍ତାଦୁ; ଆ଼ଆସାରେ ଜିକେଏ ୱେସ୍ତାଦୁ, ଏଚେଟିଏ ନା଼ନୁ ଟିଃନି ଆ଼ଆତି ଟେ଼ବ୍ରି ୱାକିଟି ୱେଣ୍ତା ହାଇଁ।”
50ଏଚିବେ଼ଲା ଲାବନ ଅ଼ଡ଼େ ବତୁୟେଲ ଏଲେଇଚେରି, “ପ୍ରବୁ ତା଼ଣାଟି ଈଦି ଆ଼ହାମନେ, ଇମ୍ବାଆଁ ମା଼ମ୍ବୁ ନେହାଣି କି ଲାଗେଏତାଣି ୱେସାଲି ଆ଼ଡଅମି। 51ମେହ୍ମୁ ରିବିକା ନୀ ନ଼କିତା ମାନେ; ଏ଼ଦାଣି ଅ଼ହିଁ ହାଲାମୁ, ପ୍ରବୁ ୱେସ୍ତିଲେହେଁ ଏ଼ଦି ନୀ ସା଼ୱୁକାରି ମୀର୍ଏଣାକି ଡକ୍ରି ଆ଼ପେ।” 52ଏଚିବେ଼ଲା ଅବ୍ରାହାମତି ହ଼ଲେଏସି ଏ଼ୱାରି ତା଼ଣାଟି ଈ କାତା ୱେଣ୍ମ୍ବନିଏ, ପ୍ରବୁ ନ଼କିତା ମୁନୁ କୁତାହାଁ ଜହରା କିତେସି। 53ଏଚେଟିଏ ଏ଼ ହ଼ଲେଏସି ବାଂଗାରା ଅ଼ଡ଼େ ୱେଣ୍ତିତି ଆ଼ସ୍ତି ଅ଼ଡ଼େ ବାସ୍ତେରି ରିବିକାକି ହୀତେସି; ଇଞ୍ଜାଁ ତାନି ତାୟି ଅ଼ଡ଼େ ତାନି ଇୟାନାକି ଜିକେଏ ହା଼ରେକା ଦାରାତି ଦା଼ନା ହୀତେସି।
54ଏଚେଟିଏ ଅବ୍ରାହାମତି ହ଼ଲେଏସି ଅ଼ଡ଼େ ତାନି ତ଼ଡ଼ୁ ଲ଼କୁ ତିଞ୍ଜା ଉଣ୍ତାହାଁ ଲା଼ଆଁୟାଁ ବାସା କିତେରି। ଏଚେଟିଏ ଏ଼ୱାରି ଲା଼ଇ ନିଙ୍ଗାଲିଏ ଏ଼ ହ଼ଲେଏସି ଏଲେଇଚେସି, “ନା଼ ସା଼ୱୁକାରି ତା଼ଣା ହାଜାଲି ନାଙ୍ଗେ ହେଲ ହିୟାଦୁ।”
55ଏଚେଟିଏ ରିବିକାନି ତାୟି ଅ଼ଡ଼େ ଇୟା ଏଲେଇଚୁ, “ଈ ମା଼ଙ୍ଗା ମା଼ ତା଼ଣା ୱା଼ରେକା ଆ଼ଆତିଁ ଦସ ଦିନା ଡ଼ୟାପେ, ଏଚେଟିଏ ଏ଼ଦି ହାଲାପେ।”
56ସାମା ଏ଼ୱାସି ଏ଼ୱାରାଇଁ ଏଲେଇଚେସି, “ନାଙ୍ଗେ ହେଲା କିୟାଆଦୁ। ଇଚିହିଁ ପ୍ରବୁ ନା଼ ଜିରୁତି କାମା ପୂରା କିହାମାନେସି; ନୀଏଁ ନା଼ ସା଼ୱୁକାରି ତା଼ଣା ହାଜାଲି ହେଲ ହିୟାଦୁ।”
57ଏଚେଟିଏ ଏ଼ୱାରି ଏଲେଇଚେରି, “ମା଼ମ୍ବୁ ମା଼ଙ୍ଗାନି ହା଼ଟାହାଁ ନୀ ନ଼କିତା ୱେନ।” 58ଏଚେଟିଏ ଏ଼ୱାରି ରିବିକାନି ହା଼ଟାହାଁ ୱେଚେରି, “ନୀନୁ ଈ ମାଣ୍ସି ତଲେ ହାଜି ?” ଏଚେଟିଏ ଏ଼ଦି ଏଲେଇଚେ, “ନା଼ନୁ ହାଇଁ।”
59ଏଚିବେ଼ଲା ଏ଼ୱାରି ତାମି ତାଙ୍ଗି ରିବିକା ଅ଼ଡ଼େ ତାନି ହ଼ଲେଣିଇଁ, ଇଞ୍ଜାଁ ଅବ୍ରାହାମତି ହ଼ଲେଏଣାଇଁ ଅ଼ଡ଼େ ତାନି ଲ଼କୁଣି ହେଲ ହୀତେରି। 60ଇଞ୍ଜାଁ, ରିବିକାନି ବ଼ର ହୀହାଁ ଏଲେଇଚେରି, “ନୀନୁ ମା଼ ତାଙ୍ଗି, ମା଼ଣା ମା଼ଣା ଲ଼କୁତି ତାଲି ଆ଼ମୁ; ନୀ କୂଡ଼ା ତାନି ସାତ୍ରୁୟାଁ ଗା଼ଡ଼ା ଅଦିକାରା କିପେରି।” 61ଏଚେଟିଏ ରିବିକା ଅ଼ଡ଼େ ତାନି ହ଼ଲେଣିସିକା ଊଟୁ ଲାକ ହ଼ଚାହାଁ ଏ଼ ମାଣ୍ସି ଜେ଼ଚ ଜେ଼ଚ ହାଚୁ। ଇଲେକିହିଁ ଏ଼ ହ଼ଲେଏସି ରିବିକାନି ଅ଼ହିଁ ହାଚେସି।
62ଏଚିବେ଼ଲାତା ଇସାହାକ ୱେ଼ଡ଼ା ହ଼ପୁ ଟିଃନି ୱାକି ନେଗେବତା ବାସା କିହିମାଚାଟି, “ବେର-ଲହୟ-ରୟି” ଟା଼ୟୁତା ହାଜାହାଁ ୱେଣ୍ତା ୱା଼ହିମାଚେସି। 63ଅ଼ଡ଼େ ମିଡ଼୍ଅଲା ବେ଼ଲା ରେ଼ଜାଲି ବୂମିତା ହାଜାମାଚେସି; ଏଚେଟିଏ ଊଟୁୟାଁ ୱା଼ହିନାଣି ମେସ୍ତେସି। 64ଏଚିବେ଼ଲା ରିବିକା ଇସାହାକଇଁ ମେସାହାଁ, ଊଟୁ ଲାକଟି ଡ଼଼ଇ ରେ଼ତେ। 65ଇଞ୍ଜାଁ ଏ଼ଦି ଅବ୍ରାହାମତି ହ଼ଲେଏଣାଇଁ ୱେଚେ, “ଗୁଡିୟା ବିତ୍ରାଟି ମା଼ ୱାକି ୱା଼ହିମାନି ମାଣ୍ସି ଆମ୍ବାଆସି ?” ଏଚେଟିଏ ଏ଼ ହ଼ଲେଏସି ଏଲେଇଚେସି, “ଏ଼ୱାସି ନା଼ ସା଼ୱୁକାରି” ଏଚେଟିଏ ଏ଼ଦି ମୂମ୍ବୁ ପିଡ଼୍କ୍ହା କଡିତେ।
66ଏଚେଟିଏ ଏ଼ ହ଼ଲେଏସି ଇସାହାକଇଁ ତାନି କିତି ବାରେ କାମାତି କାତା ୱେସ୍ତେସି। 67ଇସାହାକ ରିବିକାନି ତାନି ଇୟା ସାରାନି ତୂମୁତା ଅ଼ହାଁ ବୀହା ଆ଼ତେସି; ଇଞ୍ଜାଁ, ଏ଼ୱାସି ଏ଼ଦାନି ଜୀୱୁ ନ଼ତେସି। ଏଚେଟିଏ ଇସାହାକ ତାଲି ହା଼କିତି ଦୁକୁ ଡୂକ୍ହା କଡିତେସି।
Currently Selected:
ମୂଲୁ 24: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
