ହାନାୟି 28
28
ପୂଜେରାତି ସକାୟାଁ
(ହାନାୟି ୩୯:୧-୭)
1ଅ଼ଡ଼େ ନା଼ କ଼ସମି ପୂଜେରା କାମା କିୟାଲି ନୀନୁ ଇସ୍ରାୟେଲ ଲ଼କୁ ତା଼ଣାଟି ନୀ ତାୟି ହାରଣଇଁ ଅ଼ଡ଼େ ତାନି ମୀର୍କାଣି ଇଚିହିଁ ହାରଣ, ନାଦବ, ଅବିହୁ, ଇଲିୟାସର ଅ଼ଡ଼େ ଇତାମରଇଁ ନା଼ ତା଼ଣା ତାଦି 2ନୀ ତାୟି ହାରଣତି ଅ଼ଜୁ ଅ଼ଡ଼େ ମା଼ନି ତାକି ସୁଦୁଗାଟି ସକାୟାଁ ତିୟାରା କିଦି। 3ଅ଼ଡ଼େ ଆମ୍ବାଆରି ହିୟାଁତା ବୁଦି ହୀନି ଜୀୱୁ ନେଞ୍ଜି କିହାମାଇଁ, ଏ଼ ବାରେ ବୁଦି ଗାଟାରାଇଁ ହୁକୁମି ହୀମୁ; ନା଼ କ଼ସମି ପୂଜେରା କାମା କିହାଲି ତାକି ହାରଣଇଁ ସୁଦୁ କିହାଲି ତାକି ଏ଼ୱାରି ସକାୟାଁ ତିୟାରା କିନେରି। 4ଇଚିହିଁ, ବକପା଼ଟା, ଏପଦ#28:4 ଏପଦ/ବମିଟିଏ କୁଦ୍ଗୁ ପାତେକା ପୂଜେରାଙ୍ଗା ତୁର୍ନି ଲାକତି ସକା, ଡ଼଼ଇତି ନୀଲିୟା ସକା, ଲାମ୍ବା ସକା ଟ଼ପେରି ଅ଼ଡ଼େ ଟେଡେଲିତା ଦସାକଡିନି ପାଚିୟା, ଈ ବାରେ ସକାୟାଁ ତିୟାରା କିନେରି; ନା଼ କ଼ସମି ପୂଜେରା କାମା କିହାଲି ତାକି ନୀ ତାୟି ହାରଣ ଅ଼ଡ଼େ ତାନି ମୀର୍କା ତାକି ଏ଼ୱାରି ସୁଦୁ ସକାୟାଁ ତିୟାରା କିନେରି। 5ଏ଼ୱାରି ବାଂଗାରା, ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ଅ଼ନେରି।
6ଇଞ୍ଜାଁ, ଏ଼ୱାରି ଏ଼ ବାଂଗାରା, ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ତଲେ ନେହିକିଁ ତିୟାରା କିହାଲି ପୁନାରି କାମା ତଲେ ଏପଦ ସକାୟାଁ ତିୟାରା କିନେରି। 7ଏମ୍ବାତି ରୀ ତା଼ର୍ପୁ ୱାକି ରଣ୍ତି ରଣ୍ତାଣି ତା଼ଣା ବମିୟାଁ ଆଣ୍ତ୍ୱି ଆ଼ହିଁ ଡ଼ୟିନୁ; ଇଲେକିହିଁ ଏ଼ଦି ଆଣ୍ତ୍ୱି ଆ଼ନେ। 8ଇଞ୍ଜାଁ, ଏପଦତି ଏମିନି ସିତ୍ରା କା଼ବ୍ରା ପା଼ଟା ମୁହେଁ ଡ଼ୟିନେ, ଏମ୍ବାତି ସିତ୍ରା କା଼ବ୍ରାତି କାମା ଏ଼ ହିମ୍ବରିକା ସମାନା ଆ଼ନେ; ଇଚିହିଁ, ବାଂଗାରା, ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା କିୱିଆ଼ନେ। 9ଏଚେଟିଏ ନୀନୁ ରୀ ଗମେଦକ ମଣି#28:9 ଗମେଦକ ମଣି/ଦାରାଗାଟି ୱାଲି ଅ଼ହାଁ ଏ଼ଦାଆଁ ଲାକ ଇସ୍ରାୟେଲ ମୀର୍କାତି ଦ଼ର୍କା ରା଼ଚିଦି। 10ଇଚିହିଁ, ଏ଼ୱାରି କୂଡ଼ାତି ଲେକା ତଲେ ସ଼ଗଟା ଦ଼ର୍କା ର଼ ଗମେଦକ ମଣି ଲାକ ଅ଼ଡ଼େ ଅ଼ର ସ଼ଗଟା ଦ଼ର୍କା ଏଟ୍କାତି ଗମେଦକ ମଣି ଲାକ ରା଼ଚିଦି। 11ଲେକୁଣି ତଲେ ପତ୍ହାମାନି ବୁଟୁ ମୁଦ୍ରା ଲେହେଁ ଏ଼ ରୀ ମଣି#28:11 ୱାଲି ଲାକ ଇସ୍ରାୟେଲ ମୀର୍କାତି ଦ଼ର୍କା ରା଼ଚିଦି, ଇଞ୍ଜାଁ, ଏ଼ଦାଆଁ ରୀ ବାଂଗାରା ହିକ୍ଣିୟାଁ ତଲେ ଦହ୍ଦି। 12ଇଞ୍ଜାଁ, ଇସ୍ରାୟେଲ ମୀର୍କାଣି ଅଣ୍ପାଲି ତାକି ନୀନୁ ଏ଼ ରୀ ମଣି ଏପଦତି ରୀ ବମିତା ଇଟିଦି; ଏଚେଟିଏ ହାରଣ ଅଣ୍ପାଲି ପ୍ରବୁତି ନ଼କିତା ତାନି ରୀ ବମିତା ଏ଼ୱାରି ଦ଼ର୍କା ଡେ଼କିନେସି। 13ଅ଼ଡ଼େ ନୀନୁ ରୀ ବାଂଗାରା ହିକ୍ଣିୟାଁ କିଦି। 14ଅ଼ଡ଼େ ସୁଦୁ ବାଂଗାରା ତଲେ ରୀ ମାଡ଼୍ତା ହିକ୍ଣିୟାଁ କିହାଁ ଏ଼ ମାଡ଼୍ତା ହିକ୍ଣିୟାଁ ରୀ ତା଼ଣା ଆଣ୍ତ୍ୱି କିଦି।
ବକପା଼ଟା
(ହାନାୟି ୩୯:୮-୨୧)
15ଇଞ୍ଜାଁ ନେହିକିଁ ତୀର୍ସିନି କାମା ତଲେ ନୀହାଁୟିତି ବକପା଼ଟା ତିୟାରା କିଦି, ଇଚିହିଁ, ଏପଦ କିୱିଆ଼ହାମାନି ଲେହେଁ ବାଂଗାରା ତଲେ, ନୀଲି, ହେୟାଁ, ନେତେରି ୱା଼ଣା ଅ଼ଡ଼େ ରୁତି ଦବ୍ଲା ପା଼ତାଡ଼ା ଲୂଲୁ ତଲେ ନେହିକିଁ କାମା କିନାଣି କାମା ତଲେ ଏ଼ଦାଆଁ ତିୟାରା କିଦି। 16ଏ଼ଦି ସା଼ରି କନ ଅ଼ଡ଼େ ରୀ ମାଡ଼୍ତା ଆ଼ନେ; ଏ଼ଦାଣିତି ଲାମ୍ବା ର଼ ବିତା ଅ଼ଡ଼େ ଅ଼ସାରା ର଼ ବିତା ଆ଼ନେ। 17ଇଞ୍ଜାଁ ଏ଼ଦାଣି ସା଼ରି ଦା଼ଡ଼ି ମଣି ତଲେ ଆଟି କିଦି, ଏମ୍ବାତି ମୂଲୁ ଦା଼ଡ଼ିତା ଚୁଣି, ପିତମଣି ଅ଼ଡ଼େ ମରକତ। 18ରୀ ଲମ୍ବର ଦା଼ଡ଼ିତା ପଦ୍ମରାଗ, ନିଲକାନ୍ତ ଅ଼ଡ଼େ ହିରକ; 19ତୀନି ଲମ୍ବର ଦା଼ଡ଼ିତା ପେରଜ, ଜିସ୍ମ ଅ଼ଡ଼େ ଇନ୍ଦ୍ରନିଲମଣି। 20ଇଞ୍ଜାଁ, ସା଼ରି ଦା଼ଡ଼ିତା ବଦୁର୍ଯ୍ୟ, ଗମେଦକ, ସୁର୍ଯ୍ୟକାନ୍ତ ମଣି ଈ ବାରେ ବାଂଗାରା ତଲେ ଜାହାରା ଦା଼ଡ଼ିତା ଆଟିକିୱି ଆ଼ନୁ। 21ଈ ମଣି ଇସ୍ରାୟେଲ ମୀର୍କାତି ଦ଼ରୁ ତାକି ଏ଼ୱାରି ଦ଼ର୍କା ତଲେ ବା଼ରଗଟା ଆ଼ନୁ; ବୁଟୁ ମୁଦ୍ରା ଲେହେଁ ରା଼ଚାମାନି ଏ଼ ବାରେ ୱାଲ୍କାଣା ଏ଼ ବା଼ର କୂଡ଼ା ତାକି ବାରେ ମୀର୍କାତି ଦ଼ରୁ ଡ଼ୟିନେ। 22ନୀନୁ ସୁଦୁ ବାଂଗାରା ତଲେ ବକପା଼ଟା ତାକି ମା଼ଡ଼ା ସମାନା ରୀ ହିକ୍ଣିୟାଁ ତିୟାରା କିଦି। 23ଇଞ୍ଜାଁ, ବକପା଼ଟା ଲାକ ବାଂଗାରାତି ରୀ ମୁଦିୟାଁ କିଦି ଅ଼ଡ଼େ ବକପା଼ଟାତି ରିକୱାକିତି କନୟାଁଣା ଏ଼ ରୀ ଜେଏଃଲାୟାଁ ଆଟି କିଦି। 24ଅ଼ଡ଼େ ବକପା଼ଟାତି ରିକୱାକିତି ରୀ ମୁଦିୟାଁ ମାଦି ଏ଼ ରୀ ବାଂଗାରା ହିକ୍ଣିୟାଁ ପେନ୍ଦିଦି। 25ଇଞ୍ଜାଁ, ମାଡ଼୍ତା କିତି ହିକ୍ଣିୟାଁ ରିକୱାକି ସୁଣ୍ତାହାଁ ଏପଦ ସକା ନ଼କିତି ରୀ ବମି ଲାକ ଇଟିଦି। 26ନୀନୁ ବାଂଗାରାତି ରୀ ମୁଦିୟାଁ କେ଼ପାହାଁ ବକପା଼ଟାତି ରିକୱାକିତି ମାଦିଏ ଏପଦ ସକା ନ଼କିତି ବିତ୍ରାୱାକି ଇଟିଦି। 27ଅ଼ଡ଼େ ବାଂଗାରାତି ରୀ ମୁଦିୟାଁ କିହାଁ ଏପଦ ସକାତି ରୀ ବମିୟାଁ ଡ଼଼ଇ ତାନି ନ଼କିତି ଆଣ୍ତ୍ୱି ଆ଼ନି ଟା଼ୟୁତି ଏପଦତି କିହାମାନି ପା଼ଟା ଲାକ ଏ଼ଦାଆଁ ଇଟିଦି। 28ଏଚେଟିଏ ବକପା଼ଟା ଏ଼ନିକିଁ ଏପଦତି କିହାମାନି ପା଼ଟା ଲାକ ମାଞ୍ଜାହାଁ ଏପଦଟି ହୁଙ୍ଗେଏ, ଏ଼ଦାଆଁତାକି ଏ଼ୱାରି ବକପା଼ଟାତି ମୁଦିୟାଁଣା ନୀଲି ଲୂଲୁ ତଲେ ଏପଦତି ମୁଦିୟାଁ ତଲେ ଦସା ଇଟିଦି।
29ଏଚିବେ଼ଲା ହାରଣ ସୁଦୁ ଟା଼ୟୁତା ହ଼ଡ଼୍ନେସି, ଏଚିବେ଼ଲା ପ୍ରବୁ ନ଼କିତା କା଼ଲେଏ ଅଣ୍ପାଲି ତାକି ଏ଼ ନୀହାଁୟିତି ବକପା଼ଟାତା ଇସ୍ରାୟେଲ ମୀର୍କାତି ଦ଼ର୍କା ବାରେ ତାନି ହିୟାଁତା ଡେ଼କିନେସି। 30ଏ଼ ନୀହାଁୟିତି ବକପା଼ଟାତା ନୀନୁ ଉରିମ୍ ଅ଼ଡ଼େ ତୁମିମ୍ ଇଚିହିଁ ଉଜେଡ଼ି ଅ଼ଡ଼େ ମା଼ନି ଇଟିଦି; ଏଚେଟିଏ ହାରଣ ଏଚିବେ଼ଲା ପ୍ରବୁତି ନ଼କିତା ହାନେସି, ଏଚିବେ଼ଲା ହାରଣ ହିୟାଁ ଲାକ ଏ଼ଦି ଡ଼ୟିନେ, ଇଞ୍ଜାଁ, ହାରଣ ପ୍ରବୁ ତା଼ଣା କା଼ଲେଏ ଇସ୍ରାୟେଲ ଲ଼କୁତି ବିଚାରାଣା ତାନି ହିୟାଁ ଲାକ ଡେ଼କିନେସି।
ଏଟ୍କା ପୂଜେରାଙ୍ଗା ସକାୟାଁ
(ହାନାୟି ୩୯:୨୨-୩୧)
31ନୀନୁ ଏପଦ ଡ଼଼ଇତି ସକା ବାରେ ନୀଲି ୱା଼ଣା ତଲେ କେ଼ପିଦି। 32ଏ଼ଦାଣି ମାଦିଏ ତା଼ର୍ୟୁଁ ହ଼ଡାଲି ର଼ କା଼ଣି ଡ଼ୟିନେ; ଏ଼ ହେର୍କିତି କା଼ଣି ସା଼ରିୱାକି ଆଲ୍ୱିଆ଼ନେ, ଆତିହିଁ ଏ଼ଦି ଡାମ୍ବେଏ। 33ଇଞ୍ଜାଁ, ନୀନୁ ଏ଼ଦାଣି ଡ଼଼ଇ ତ଼ରତି ସା଼ରିୱାକି ନୀଲି, ହେୟାଁ ଅ଼ଡ଼େ ନେତେରି ୱା଼ଣାତି ଡାଲିମ୍ବ କେ଼ପିଦି; ଅ଼ଡ଼େ ତାନି ସା଼ରିୱାକି ମାଦି ମାଦିଏ ବାଂଗାରା ଜିଣ୍ଙ୍ଗାୟାଁ ଡ଼ୟିନୁ। 34ଏ଼ ଏପଦ ଡ଼଼ଇତି ସକା ତ଼ରତା ର଼ ବାଂଗାରା ଜିଣ୍ଙ୍ଗା ଅ଼ଡ଼େ ର଼ ଡାଲିମ୍ବ ପା଼ଡ଼େୟି, ଇଞ୍ଜାଁ, ର଼ ବାଂଗାରା ଜିଣ୍ଙ୍ଗା ଅ଼ଡ଼େ ର଼ ଡାଲିମ୍ବ ପା଼ଡ଼େୟି ଡ଼ୟିନେ। 35ଅ଼ଡ଼େ ହାରଣ ସେ଼ବା କିନି ବେ଼ଲାତା ଏ଼ଦାଣି ତୁର୍ନେସି; ଏଚେଟିଏ ଏ଼ୱାସି ଏଚିବେ଼ଲା ପ୍ରବୁତି ନ଼କିତା ସୁଦୁ ଟା଼ୟୁତା ହ଼ଡ଼୍ନେସି ଅ଼ଡ଼େ ଏଚିବେ଼ଲା ଏ଼ୱାସି ଏମ୍ବାଟି ହ଼ଚା ୱା଼ନେସି ଏଚିବେ଼ଲା ଏ଼ଦାଣି ହା଼ଡା ୱେ଼ଙ୍ଗିନେ; ଆତିହିଁ ଏ଼ୱାସି ହା଼ଅସି।
36ଅ଼ଡ଼େ ନୀନୁ ସୁଦୁ ବାଂଗାରା ପାଟେ ତିୟାରା କିହାଁ ବୁଟୁ ମୁଦ୍ରା ସମାନା ଏ଼ଦାଣି ମୁହେଁ ରା଼ଚିଦି, “ପ୍ରବୁତି କ଼ସମି ସୁଦୁଗାଟାୟି।” 37ଇଞ୍ଜାଁ, ଟ଼ପେରି ମୁହେଁ ଡ଼ୟାଲି ତାକି ଏ଼ଦାଣି ନୀଲି ଲୂଲୁ ତଲେ ଦସାହାଁ ଟ଼ପେରି ନ଼କିୱାକି ଇଟିଦି। 38ଏ଼ ପାଟେ ହାରଣ ମୁଞ୍ଜୁ ଲାକ ଡ଼ୟିନେ, ଏଚେଟିଏ ସୁଦୁ ଆ଼ସ୍ତି ଗଟୱି ଆ଼ହାମାନି ଦ଼ହ, ଇଚିହିଁ, ଇସ୍ରାୟେଲ ମୀର୍କା ତାମି ସୁଦୁ କିହାମାନି ସୁଦୁ ଦା଼ନାତି ବାରେ ଆ଼ସ୍ତି ତାକି ଏମିନି ଦ଼ହ କିନେରି, ଏ଼ଦାଆଁ ହାରଣ ଡେ଼କିନେସି ଅ଼ଡ଼େ ପ୍ରବୁ ଏ଼ନିକିଁ ତାନି ନ଼କିତା ଏ଼ୱାରାଇଁ ଆବିନେସି, ଏ଼ଦାଆଁତାକି ଏ଼ଦି କା଼ଲେଏ ତାନି ମୁଞ୍ଜୁତା ଡ଼ୟିନେ।
39ନୀନୁ ସକାତି ଅତୁ ଦବ୍ଲା ଆଲିତି ହିମ୍ବରି ତଲେ ଅ଼ଡ଼େ ଟ଼ପେରି ଦବ୍ଲା ପା଼ତାଡ଼ା ଲୂଲୁ ତଲେ ତିୟାରା କିଦି; ଇଞ୍ଜାଁ, ଟେଡେଲିତା ଦସା କଡିନାଣି ଜିକେଏ ସୁଦୁ କାମା ତଲେ କା଼ବ୍ରା ସିତ୍ରା କେ଼ପିଦି।
40ଅ଼ଡ଼େ ହାରଣ ମୀର୍କା ତାକି ସକାୟାଁ ଅ଼ଡ଼େ ଟେଡେଲିତା ରୂପାକଡିନାଣି ତିୟାରା କିଦି, ଇଞ୍ଜାଁ ଏ଼ୱାରି ମା଼ନି ଅ଼ଡ଼େ ଅ଼ଜୁ ତାକି ତା଼ର୍ୟୁଁତି ଟ଼ପେରି କିଦି। 41ଇଞ୍ଜାଁ, ନୀ ତାୟି ହାରଣ ଅ଼ଡ଼େ ତାନି ମୀର୍କାଣି ଏ଼ ବାରେ ତୁର୍ୱିକିଦି; ଇଞ୍ଜାଁ, ଏ଼ୱାରାଇଁ ତା଼ର୍ୟୁଁତା ନିୟୁଁ ୱା଼କ୍ହାଁ ପା଼ଣାତା ହେର୍ପିଦି, ଏଚେଟିଏ ଏ଼ୱାରି ନା଼ ପୂଜେରା କାମା କିନେରି। 42ନୀନୁ ଏ଼ୱାରି ଆଙ୍ଗାତି ନା଼ଗ୍ଡ଼ା ପ୍ଡିକ୍ହାଲି ତାକି ଏ଼ୱାରି ଟେଡେଲିଟିଏ କୁଦ୍ଗୁ ପାତେକା ଦବ୍ଲା ସେଡି ତୁର୍ୱିକିଦି। 43ଇଞ୍ଜାଁ ଏଚିବେ଼ଲା ହାରଣ ଅ଼ଡ଼େ ତାନି ମୀର୍କା ଆଣ୍ତ୍ୱିଆ଼ନି ତୂମୁତା ହ଼ଡ଼୍ନେରି, କି ସୁଦୁ ଟା଼ୟୁତା ସେ଼ବା କିହାଲି ପୂଜା ପିଣ୍ତା ଦାରି ୱା଼ନେରି, ଏଚିବେ଼ଲା ଏ଼ୱାରି ଏ଼ନିକିଁ ଦ଼ହ କିହାଁ ହା଼ଅରି, ଏ଼ଦାଣିତାକି ଏ଼ୱାରି ଈ ସକାୟାଁ ତୁର୍ନେରି; ଈଦି ହାରଣ ଅ଼ଡ଼େ ତାନି ଡା଼ୟୁତି କୂଡ଼ା ତାକି ମା଼ନୱିଆ଼ନି କା଼ଲାକା଼ଲାତି ମେ଼ରା ଆ଼ନେ।
Currently Selected:
ହାନାୟି 28: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
