ହାନାୟି 29
29
ପୂଜେରା ପା଼ଣା ହେର୍ପିନି ମେ଼ରା
(ଲେବି ୮:୧-୩୬)
1ଅ଼ଡ଼େ ନା଼ କ଼ସମି ପୂଜେରା କାମା କିହାଲି ତାକି ଏ଼ୱାରାଇଁ ସୁଦୁ କିହାଲି ନୀନୁ ଏ଼ୱାରି ତାକି ଈ ବାରେ କାମା କିଦି; ଏ଼ନି ଗାରି ହିଲାଆଗାଟି ର଼ ବାଚା କ଼ଡି ଅ଼ଡ଼େ ରୀ ମେ଼ଣ୍ତାୟାଁ ଅ଼ଦି। 2ଇଞ୍ଜାଁ, ପୁଲା ଆଣ୍ତାଆତି ରୂଟି, ପୁଲା ଆଣ୍ତାଆତି ନିୟୁଁ ତଲେତି ପିଟା ଅ଼ଡ଼େ ନିୟୁଁ ତଲେତି ପା଼ତାଡ଼ା ହେଃଏରା ଗ଼ହଁ ଗୁଣ୍ତା ତଲେ ତିୟାରା କିଦି। 3ଇଞ୍ଜାଁ, ର଼ ଡାଲିତା ଏ଼ୱାଆଁ ଇଟିଦି, ଏ଼ ବାଚା କ଼ଡି ଅ଼ଡ଼େ ରୀ ମେ଼ଣ୍ତାୟାଁ ତଲେ ଏ଼ ଡାଲି ତାଦି।
4ଅ଼ଡ଼େ ହାରଣଇଁ ଇଞ୍ଜାଁ ତାନି ମୀର୍କାଣି ଆଣ୍ତ୍ୱିଆ଼ନି ତୂମୁ ଦୁୱେରି ଦାରି ତାଚାହାଁ ଏ଼ୱାରାଇଁ ଏ଼ୟୁ ମୀତ୍ଦି। 5ତାନି ଡା଼ୟୁ ଏ଼ ବାରେ ସକାୟାଁ ଅ଼ହାଁ ହାରଣଇଁ ଏପଦ ଡ଼଼ଇତି ସକା, ଏପଦ, ବକପା଼ଟା ତୁର୍ୱି କିଦି, ଅ଼ଡ଼େ ଏପଦତି ସିତ୍ରା କା଼ବ୍ରା ପାଚିୟା ତଲେ ତାନି ଟେଡେଲିତା ଦହ୍ଦି। 6ତାନି ତା଼ର୍ୟୁଁତା ଟ଼ପେରି ଦସାହାଁ ମୁହେଁ ସୁଦୁ ମୁକୁଟି ତୁର୍ୱି କିଦି। 7ଏଚେଟିଏ ପା଼ଣା ହେର୍ପିନି ନିୟୁଁ ଅ଼ହାଁ ତାନି ତା଼ର୍ୟୁଁ ଲାକ ୱା଼କ୍ହାଁ ପା଼ଣା ହେର୍ପିଦି।
8ଏଚେଟିଏ ନୀନୁ ହାରଣ ମୀର୍କାଣି ତାଚାହାଁ ସକାୟାଁ ତୁର୍ୱି କିଦି। 9ଇଞ୍ଜାଁ, ହାରଣ ଅ଼ଡ଼େ ତାନି ମୀର୍କାଣି ଟେଡେଲି ଦସାକଡିନାଣି ତୁର୍ୱି କିଦି ଅ଼ଡ଼େ ଏ଼ୱାରି ତା଼ର୍ୟୁଁତା ଟ଼ପେରି ଦହ୍ଦି; ଏଚେଟିଏ ଏ଼ୱାରି କା଼ଲାକା଼ଲାତି ମେ଼ରା ତଲେ ପୂଜେରା ପା଼ଣା ବେଟାଆ଼ନେରି। ଇଲେକିହିଁ ନୀନୁ ହାରଣଇଁ ଅ଼ଡ଼େ ତାନି ମୀର୍କାଣି ହେର୍ପିଦି।
10ଏଚେଟିଏ ନୀନୁ ଆଣ୍ତ୍ୱିଆ଼ନି ତୂମୁ ନ଼କିତା ଏ଼ ବାଚା କ଼ଡି ତାପି କିଦି, ଇଞ୍ଜାଁ, ହାରଣ ଅ଼ଡ଼େ ତାନି ମୀର୍କା ଏ଼ ବାଚା କ଼ଡିତି ତା଼ର୍ୟୁଁତା ତାମି କେସ୍କା ଇଟିନେରି। 11ଏଚେଟିଏ ନୀନୁ ଆଣ୍ତ୍ୱିଆ଼ନି ତୂମୁ ଦୁୱେରି ନ଼କିତା ପ୍ରବୁତି ନ଼କିତା ଏ଼ ବାଚା କ଼ଡିତି ପା଼ୟିଦି। 12ଏଚେଟିଏ ଏ଼ ବାଚା କ଼ଡିତି ନେତେରି ଇଚାଣି ଅ଼ହାଁ ୱାଞ୍ଜୁ ତଲେ ପୂଜା ପିଣ୍ତାତି କମ୍କାଣା ରୁବିଦି ଇଞ୍ଜାଁ ପୂଜା ପିଣ୍ତା ଡାକିତା ଏ଼ ବାରେ ନେତେରି ୱା଼କ୍ଦି। 13ଅ଼ଡ଼େ ତାନି ୱାହିଁୟାଁ ଲାକତି କଡ଼୍ୱା ଅ଼ଡ଼େ ପସ୍ପାୟାଁ ଅ଼ଡ଼େ ତ୍ରାଃଆନାୟାଁ ରୀ ଟା଼କୁୟାଁ ଅ଼ଡ଼େ ତାନି ଲାକତି କଡ଼୍ୱା ଅ଼ହାଁ ପୂଜା ପିଣ୍ତାତା ହୂଡିଦି। 14ସାମା ବାଚା କ଼ଡିତି ଊଙ୍ଗା, ତ଼ଲୁ ଅ଼ଡ଼େ ଡ଼ା଼ପି ତୂମୁତି ପାଙ୍ଗାତା ହିଚୁତା ହୂଡିଦେରି; ଈଦି ପା଼ପୁତି ପୂଜା।
15ଏଚେଟିଏ ନୀନୁ ର଼ ମେ଼ଣ୍ତା ଅ଼ଦି; ଇଞ୍ଜାଁ, ହାରଣ ଅ଼ଡ଼େ ତାନି ମୀର୍କା ଏ଼ ମେ଼ଣ୍ତା ତା଼ର୍ୟୁଁ ଲାକ ତାମି କେସ୍କା ଇଟିନେରି। 16ଏଚେଟିଏ ନୀନୁ ଏ଼ ମେ଼ଣ୍ତାତି ପା଼ୟାହାଁ ତାନି ନେତେରି ଅ଼ହାଁ ପୂଜା ପିଣ୍ତା ଲାକ ସା଼ରିୱାକି ଡ଼ାଞ୍ଜିଦି। 17ଏଚେଟିଏ ଏ଼ ମେ଼ଣ୍ତାତି କାଣ୍ତା ମୁକା କିହାଁ ତାନି ୱାହିଁୟାଁ ଅ଼ଡ଼େ କଡାୟାଁ ନର୍ହାଁ ଏ଼ କାଣ୍ତା ମୁକା କିତାଆଁ ଅ଼ଡ଼େ ତା଼ର୍ୟୁଁ ରହେଁଏ ଇଟିଦି। 18ଇଞ୍ଜାଁ, ନୀନୁ ବାରେ ମେ଼ଣ୍ତାତି ପୂଜା ପିଣ୍ତା ଲାକ ହୂଡିଦି; ଈଦି ପ୍ରବୁ ତାକି ହିଚୁତା ହୂଡିନି ପୂଜା ଅ଼ଡ଼େ ରା଼ହାଁତି ନେହିଁ ଗାନ୍ଦା ପ୍ରବୁତି କ଼ସମି ହୂଡିନି ପୂଜାତି ଦା଼ନା ଆ଼ନେ।
19ଏଚେଟିଏ ନୀନୁ ଅ଼ର ମେ଼ଣ୍ତାତି ଅ଼ଦି, ଇଞ୍ଜାଁ, ହାରଣ ଅ଼ଡ଼େ ତାନି ମୀର୍କା ଏ଼ ମେ଼ଣ୍ତାତି ତା଼ର୍ୟୁଁ ଲାକ ତାମି କେସ୍କା ଇଟିନେରି। 20ଏଚେଟିଏ ନୀନୁ ଏ଼ ମେ଼ଣ୍ତାତି ପା଼ୟାହାଁ ତାନି ନେତେରି ଇଚାଣି ଅ଼ହାଁ ହାରଣତି ଟିଃନି କିର୍ୟୁଁ ଦୁପାତା ଅ଼ଡ଼େ ତାନି ମୀର୍କାତି ଟିଃନି କିର୍ୟୁଁ ଦୁପାତା, ଏ଼ୱାରି ଟିଃନି କେୟୁତି ତାଲି ୱାଞ୍ଜୁ ଲାକ ଅ଼ଡ଼େ ଟିଃନି କଡାତି ତାଲି ୱାଞ୍ଜୁ ଲାକ ରୁବିଦି, ଇଞ୍ଜାଁ, ପୂଜା ପିଣ୍ତା ସା଼ରି ୱାକି ଏ଼ ନେତେରି ଡ଼ାଞ୍ଜିଦି। 21ଏଚେଟିଏ ପୂଜା ପିଣ୍ତା ଲାକତି ନେତେରି ଅ଼ଡ଼େ ପା଼ଣା ହେର୍ପିନି ନିୟୁଁ ଇଚାଣି ଅ଼ହାଁ ହାରଣ ଲାକ ଅ଼ଡ଼େ ତାନି ସକାୟାଁ ଲାକ, ଇଞ୍ଜାଁ, ତାନି ମୀର୍କା ଲାକ ଅ଼ଡ଼େ ତାନି ମୀର୍କାତି ସକାୟାଁ ଲାକ ଡ଼ାଞ୍ଜିଦି; ଏଚେଟିଏ ଏ଼ୱାସି ଅ଼ଡ଼େ ଏ଼ଦାଣି ତଲେ ତାନି ସକାୟାଁ, ଇଞ୍ଜାଁ, ତାନି ମୀର୍କା ଅ଼ଡ଼େ ତାମି ସକାୟାଁ ସୁଦୁ ଆ଼ନୁ।
22ଅ଼ଡ଼େ ନୀନୁ ଏ଼ ମେ଼ଣ୍ଡାତି କଡ଼୍ୱା, କଡ଼୍ୱାଗାଟି ଲେଂଗୁଣି, ଅ଼ଡ଼େ ୱାହିଁ ଲାକତି କଡ଼୍ୱା, ଇଞ୍ଜାଁ ତ୍ରାଃଆନା ପସ୍ପାୟାଁ ଜା଼ଲି, ରୀ ଟା଼କୁୟାଁ, ଏ଼ଦାନି ଲାକତି କଡ଼୍ୱା ଅ଼ଡ଼େ ଟିଃନି କୁଦ୍ଗୁ ଅ଼ଦି, ଇଚିହିଁ ଏ଼ଦି ହେର୍ପିଆ଼ତି ମେ଼ଣ୍ତା। 23ଇଞ୍ଜାଁ, ପ୍ରବୁତି ନ଼କିତା ମାନି ପୁଲା ଆଣ୍ତାଆତି ରୂଟି ଡାଲିଟି ର଼ ରୂଟି, ନିୟୁଁ ଆଣ୍ତିତି ର଼ ପିଟା ଅ଼ଡ଼େ ର଼ ପା଼ତାଡ଼ା ହେଃଏରା ଅ଼ହାଁ, 24ଏ଼ ବାରେ ହାରଣ କେୟୁତା ଅ଼ଡ଼େ ତାନି ମୀର୍କା କେସ୍କାଣା ହୀହାଁ ଦା଼କ୍ନି ଦା଼ନା ତାକି ପ୍ରବୁତି ନ଼କିତା ଏ଼ଦାଆଁ ଦା଼କ୍ନେରି। 25ଏଚେଟିଏ ନୀନୁ ଏ଼ୱାରି କେୟୁଟି ଏ଼ ବାରେ ଅ଼ହାଁ ରା଼ହାଁତି ନେହିଁ ଗାନ୍ଦା ପ୍ରବୁତି ନ଼କିତା ପୂଜା ପିଣ୍ତା ଲାକ ହୂଡିଦି। ଈଦି ପ୍ରବୁତି କ଼ସମି ହିଚୁତା ହୂଡିନି ଦା଼ନା।
26ଏଚେଟିଏ ନୀନୁ ହାରଣ ହେର୍ପାମାନି ମେ଼ଣ୍ତାତି ବକ ଅ଼ହାଁ ଦା଼କ୍ନି ଦା଼ନା ତାକି ପ୍ରବୁତି ନ଼କିତା ଦା଼କ୍ଦି; ଏ଼ଦି ନୀ ବା଼ଗା ଆ଼ନେ।
27ଅ଼ଡ଼େ ହାରଣ ଇଞ୍ଜାଁ ତାନି ମୀର୍କା ପା଼ଣା ହେର୍ପାଲି ତାକି ମେ଼ଣ୍ତାତି ଏମିନି ବକ ଦା଼କ୍ନି ଦା଼ନା ଦା଼କ୍ହାୟି ଅ଼ଡ଼େ ଇମିନି କୁଦ୍ଗୁ ପେର୍ୱିଆ଼ନି ଦା଼ନା ପେର୍ୱି ଆ଼ତେ, ଏ଼ଦାଆଁ ନୀନୁ ସୁଦୁ କିଦି। 28ଏଚେଟିଏ କା଼ଲେଏତି ମେ଼ରା ତଲେ ଇସ୍ରାୟେଲ ମୀର୍କା ତା଼ଣାଟି ହାରଣ ଅ଼ଡ଼େ ତାନି ମୀର୍କାତି ଅଦିକାରା ଆ଼ନେ, ଏ଼ନିଇଚିହିଁ ଏ଼ଦି ପେର୍ୱିଆ଼ତି ଦା଼ନା; ଇସ୍ରାୟେଲ ଲ଼କୁତି ଈ ପେର୍ୱିଆ଼ତି ଦା଼ନା ଏ଼ୱାରି ନେହିଁ ଦା଼ନା ହୀନାୟି ଆ଼ନେ; ଈଦି ପ୍ରବୁତି କ଼ସମି ଏ଼ୱାରି ପେର୍ହାମାନି ଦା଼ନା।
29ଇଞ୍ଜାଁ, ହାରଣ ହା଼ତି ଡା଼ୟୁ ଏ଼ୱାଣି ସୁଦୁ ସକାୟାଁ ବାରେ ତାନି ମୀର୍କାୱାଇ ଆ଼ନୁ; ସୁଦୁ କିନାଟି ଅ଼ଡ଼େ ପା଼ଣା ହେର୍ପିନି ବେ଼ଲାତା ଏ଼ୱାରି ଏ଼ ସକାୟାଁ ତୁର୍ନେରି। 30ତାନି ମୀର୍କା ବିତ୍ରାଟି ଏମିନିଗାଟାସି ତାନି ପା଼ଣାତା ପୂଜେରା ଆ଼ହାଁ ସୁଦୁ ଟା଼ୟୁତା ସେ଼ବା କିହାଲି ଆଣ୍ତ୍ୱିଆ଼ନି ତୂମୁତା ୱା଼ନେସି, ଏ଼ୱାସି ଏ଼ ସକାୟାଁ ସା଼ତା ଦିନା ତୁର୍ନେସି।
31ଏଚେଟିଏ ନୀନୁ ଏ଼ ହେର୍ପିତି ମେ଼ଣ୍ତା ଊଙ୍ଗା ଅ଼ହାଁ ର଼ ସୁଦୁ ଟା଼ୟୁତା ୱାଜିଦି। 32ଇଞ୍ଜାଁ, ହାରଣ ଅ଼ଡ଼େ ତାନି ମୀର୍କା ଆଣ୍ତ୍ୱିଆ଼ନି ତୂମୁ ଦୁୱେରି ଦାରି ଏ଼ ମେ଼ଣ୍ତା ଊଙ୍ଗା ଅ଼ଡ଼େ ଡାଲିତି ଏ଼ ରୂଟି ତିନେରି। 33ଅ଼ଡ଼େ ଏ଼ୱାରାଇଁ ପା଼ଣାତା ଆ଼ଚାଲି ଅ଼ଡ଼େ ସୁଦୁ କିହାଲି ଏ଼ନାଆଁ ତଲେ ହେର୍ପି ଆ଼ତେ, ଏ଼ଦାଆଁ ଏ଼ୱାରି ତିନେରି; ସାମା ଏ଼ନି ଏଟ୍କା କୂଡ଼ାତି ଲ଼କୁ ଏ଼ଦାଆଁ ତିନଅସି, ଇଚିହିଁ ଏ଼ୱି ବାରେ ସୁଦୁ ଆ଼ସ୍ତି। 34ଅ଼ଡ଼େ ଏ଼ ପା଼ଣା ହେର୍ପିଆ଼ତି ଊଙ୍ଗା ଅ଼ଡ଼େ ରୂଟି ଲା଼ଇ ପାତେକା ଇଚାୟି ଡ଼ୟିନେ, ଆତିହିଁ ଏ଼ ବାରେ ହିଚୁତା ହୂଡିଦି, ଆମ୍ବାଆସି ଏ଼ଦାଆଁ ତିନଅସି; ଇଚିହିଁ ଏ଼ଦି ସୁଦୁ ଆ଼ସ୍ତି।
35ନା଼ନୁ ନିଙ୍ଗେ ଏ଼ନିକିଁ ହୁକୁମି ହୀହାମାଞ୍ଜାଇଁ, ଏଲେକିହିଁ ନୀନୁ ହାରଣ ଅ଼ଡ଼େ ତାନି ମୀର୍କା ତାକି କିଦି; ଏ଼ୱାରାଇଁ ହେର୍ପାଲି ସା଼ତା ଦିନା ଲାଗିନେ। 36ଅ଼ଡ଼େ ନୀନୁ ହେର୍ପାଲି ତାକି ବାରେ ଦିନା ପା଼ପୁତି ପୂଜା ଲେହେଁ ର଼ ବାଚା କ଼ଡି ହେର୍ପିଦି, ଇଞ୍ଜାଁ, ପିଣ୍ତା ତାକି ହେର୍ପାହାଁ ଏ଼ଦାଆଁ ପା଼ପୁ ହିଲାଆଗାଟାଣି କିଦି ଅ଼ଡ଼େ ଏ଼ଦାଆଁ ସୁଦୁ କିହାଲି ନିୟୁଁ ୱା଼କ୍ଦି। 37ନୀନୁ ପିଣ୍ତା ତାକି ସା଼ତା ଦିନା ହେର୍ପାହାଁ ଏ଼ଦାଣି ସୁଦୁ କିଦି, ଏଚେଟିଏ ପିଣ୍ତା ହା଼ରେକା ସୁଦୁ ଆ଼ନେ, ଇଞ୍ଜାଁ, ଏ଼ନାୟି ପିଣ୍ତା ଡୀଗିନେ ଏ଼ ବାରେ ସୁଦୁ ଆ଼ନେ।
ବାରେ ଦିନାତି ପୂଜା
(ଏଜି ୨୮:୧-୮)
38ଏ଼ ପିଣ୍ତା ଲାକ ନୀନୁ ଈ ପୂଜା ହେର୍ପିଦି; ନୀନୁ ମେ଼ରା ତଲେ ବାରେ ଦିନା ର଼ ବାର୍ସାତି ରୀ ମେ଼ଣ୍ତା ଡା଼ଲ୍କା, 39ଇଚିହିଁ, ର଼ ମେ଼ଣ୍ତା ଡା଼ଲୁତି ଲା଼ଇ ହେର୍ପିଦି ଅ଼ର ମେ଼ଣ୍ତା ଡା଼ଲୁତି ମିଡ଼୍ଅଲା ହେର୍ପିଦି। 40ଇଞ୍ଜାଁ, ତଲିତି ମେ଼ଣ୍ତା ଡା଼ଲୁ ତଲେ ହିନ୍ଗା଼ଜୁତି#29:40 ହିନ୍/ଏ଼ୟୁ, ନିୟୁଁ ଲା଼ଚାଲି ଇସ୍ରାୟେଲ ଦେ଼ସାତା ଲେ଼ମ୍ବିମାଚି ଆ଼ସ୍ତି । ସା଼ରି ବା଼ଗାଟି ର଼ ବା଼ଗା ପୀଡ଼ିକିତି ଅଡିତି ନିୟୁଁତଲେ କାଲ୍ହାମାନି ର଼ ଏପାତି#29:40 ଏପା/ୱା଼ୟା ଦିଣ୍ସୁ ଲା଼ଚାଲି ଇସ୍ରାୟେଲ ଦେ଼ସାତା ଲେ଼ମ୍ବିମାଚି ଆ଼ସ୍ତି । ଦସ ବା଼ଗାଟି ର଼ ବା଼ଗା ଗ଼ହଁ ଗୁଣ୍ତା ଅ଼ଡ଼େ ଗହ୍ନି ଦା଼ନା ତାକି ହିନ୍ତି ସା଼ରି ବା଼ଗାଟି ର଼ ବା଼ଗା ଅଙ୍ଗୁରି ରାସା ହୀଦି। 41ଅ଼ଡ଼େ ମିଡ଼୍ଅଲା ବେ଼ଲା ଅ଼ର ମେ଼ଣ୍ତା ଡା଼ଲୁ ହେର୍ପିଦି; ଇଞ୍ଜାଁ, ଲା଼ଇତି କା଼ଦିତି ପୂଜା ଅ଼ଡ଼େ ଗହ୍ନି ଦା଼ନାତି ପୂଜା ଲେହେଁ ରା଼ହାଁତି ନେହିଁ ଗାନ୍ଦା ପ୍ରବୁତି ନ଼କିତା ହିଚୁତା ହୂଡିନି ଦା଼ନା ଲେହେଁ ଏ଼ଦାଆଁ ହେର୍ପିଦି। 42ଈଦି ଆଣ୍ତ୍ୱିଆ଼ନି ତୂମୁ ଦୁୱେରି ଦାରି ପ୍ରବୁତି ନ଼କିତା ମୀ ଆକୁ ଆ଼ବାୟାଁ ଲେକା ତଲେ କା଼ଲେଏ ହିଚୁତା ହୂଡିନି ପୂଜା ଆ଼ନେ; ଏ଼ ଟା଼ୟୁତା ନା଼ନୁ ନୀ ତଲେ କାତା ଆୟାଲି ତାକି ମୀ ତଲେ କାତା ଆୟାଇଁ। 43ଅ଼ଡ଼େ ଏ଼ ଟା଼ୟୁତା ନା଼ନୁ ଇସ୍ରାୟେଲ ଲ଼କୁ ତଲେ କାତା ଆ଼ଇଁ; ଅ଼ଡ଼େ ନା଼ ତ୍ରାହାଣା ତଲେ ତୂମୁ ସୁଦୁ ଆ଼ନେ। 44ଅ଼ଡ଼େ ନା଼ନୁ ଆଣ୍ତ୍ୱିଆ଼ନି ତୂମୁ ଅ଼ଡ଼େ ପିଣ୍ତାତି ସୁଦୁ କିଇଁ, ଇଞ୍ଜାଁ, ନା଼ ପୂଜେରା କାମା କିୟାଲି ହାରଣଇଁ ଅ଼ଡ଼େ ତାନି ମୀର୍କାଣି ସୁଦୁ କିଇଁ। 45ନା଼ନୁ ଇସ୍ରାୟେଲ ମୀର୍କା ତା଼ଣା ବାସାଆ଼ହାଁ ଏ଼ୱାରି ମାହାପୂରୁ ଆ଼ଇଁ। 46ଏଚେଟିଏ ନା଼ନୁ ଏ଼ୱାରି ପ୍ରବୁ ମାହାପୂରୁ, ଏ଼ୱାରି ତା଼ଣା ବାସା ଆୟାଲି ମିସର ଦେ଼ସାଟି ଏ଼ୱାରାଇଁ ହ଼ପ୍ହା ତାଚାମାଇଁ, ଏ଼ଦାଆଁ ଏ଼ୱାରି ପୁନେରି; ନା଼ନୁ ଏ଼ୱାରି ପ୍ରବୁ ମାହାପୂରୁତେଏଁ।
Currently Selected:
ହାନାୟି 29: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
