ହାନାୟି 21
21
କଡିତି ହ଼ଲେଏଣା ମେ଼ରା
(ୱେ ମେ଼ରା ୧୫:୧୨-୧୮)
1ଅ଼ଡ଼େ ନୀନୁ ଈ ବାରେ ମେ଼ରା ଏ଼ୱାରାଇଁ ଅଣ୍ପି କିଦି। 2ମୀରୁ ଏବ୍ରିୟ ହ଼ଲିୟାଙ୍ଗାଣି କଡିତିହିଁ, ଏ଼ୱାସି ସ଼ବାର୍ସା ପାତେକା ମୀ ସେ଼ବା କିୟାନେସି; ଇଞ୍ଜାଁ ସା଼ତା ବାର୍ସାତା ଏ଼ୱାସି ଉଜେଏ ମୁକ୍ଲୱି ଆ଼ନେସି। 3ଏ଼ୱାସି ରଅସିଏ ୱା଼ହାମାନେସି, ଆତିହିଁ ରଅସିଏ ହାନେସି; ଅ଼ଡ଼େ ଏ଼ୱାସି ବୀହା ଆ଼ହାଁ ୱା଼ହାମାନେସି, ଆତିହିଁ ତାନି ଡକ୍ରି ତାନି ତଲେ ହାନେ। 4ଅ଼ଡ଼େ ତାନି ସା଼ୱୁକାରି ଏ଼ୱାଣାଇଁ ବୀହା କିହାମାନେସି ଇଞ୍ଜାଁ ଏ଼ ଇୟାନି ତା଼ଣାଟି କକାରି ପ଼ଦାୟାଁ ଜାର୍ନା ଆ଼ହାମାନେରି, ଆତିହିଁ ଏ଼ ଇୟା ଅ଼ଡ଼େ ତାନି ମୀର୍କା ମା଼ସ୍କାତି ମୁହେଁ ତାନି ସା଼ୱୁକାରିତି ଅଦିକାରା ମାନେ, ଅ଼ଡ଼େ ଏ଼ୱାସି ରଅସିଏ ହ଼ଚା ହାନେସି। 5ସାମା ନା଼ନୁ ନା଼ ସା଼ୱୁକାରିଇଁ, ଇଞ୍ଜାଁ ନା଼ ଡକ୍ରିନି ଅ଼ଡ଼େ ନା଼ ମୀର୍କା ମା଼ସ୍କାଣି ଜୀୱୁ ନ଼ହିମାଇଁ, ଏ଼ଦାଆଁତାକି ନା଼ନୁ ମୁକ୍ଲୱି ଆ଼ହାଁ ହାଲଅଁ, ଇଲେକିଁ ଏ଼ ହ଼ଲେଏସି ଆ଼ଟ୍ୱା ତଲେ ଏଲେଇନେସି, 6ଆ଼ତିହିଁ ତାନି ସା଼ୱୁକାରି ଏ଼ୱାଣାଇଁ ମାହାପୂରୁ ତା଼ଣା ଅ଼ହିଁ ହାନେସି, ଇଞ୍ଜାଁ ଏ଼ୱାଣାଇଁ ଦା଼ରା କି ଦୁୱେରି ବନ୍ଦୁ ଦାରି ତାଚାହାଁ ତାନି ସା଼ୱୁକାରି ବୀନ୍ଦ୍ଣା ତଲେ ଏ଼ୱାଣି କିର୍ୟୁଁ ତୁତ୍ନେସି; ଏଚେଟିଏ ଏ଼ୱାସି କା଼ଲେଏ ତାନି ସେ଼ବା କିନେସି।
7ଅ଼ଡ଼େ ଆମ୍ବାଆସି ତାନି ମା଼ଙ୍ଗାନି ହ଼ଲେଣି ଲେହେଁ ପା଼ର୍ନେସି, ଆତିହିଁ ଏ଼ଦି ହ଼ଲିୟାଙ୍ଗା ଲେହେଁ ମୁକ୍ଲୱି ଆ଼ଏ। 8ତାନି ସା଼ୱୁକାରି ଏ଼ଦାନି ବୀହା ଆ଼ତି ଜିକେଏ, ଏ଼ୱାସି ଏ଼ଦାଣି ତାକି ମ଼ନ ଆ଼ଅସି, ଆତିହିଁ ଏ଼ୱାସି ଏ଼ଦାଣି ମୁକ୍ଲୱି ଆ଼ହାଲି ହୀନେସି; ଏ଼ଦାଣି ନା଼ଡ଼ି କିହାମାନାକି ଏଟ୍କା ଦେ଼ସାତାରାକି ପା଼ର୍ଚାଲି ଆ଼ଡଅସି। 9ଏ଼ ସା଼ୱୁକାରି ତାନି ମୀର୍ଏଣାକି ଏ଼ଦାଣି ତୀରି କିହାମାନେସି, ଆତିହିଁ ଏ଼ୱାସି ଏ଼ଦାଣି ମା଼ଙ୍ଗା ଲେହେଁ ଲେ଼ମ୍ବିନେସି। 10ଏ଼ୱାସି ଅ଼ର ଇୟାନି ତଲେ ବୀହା ଆ଼ନେସି, ଆ଼ତି ଜିକେଏ ଏ଼ଦାଣି ତିନି ଟିଣ୍ଡି, ହୁଚିନି ହିମ୍ବରି, ଅ଼ଡ଼େ ଏ଼ଦାଣି ତଲେ ଆଣ୍ତାଲି କୂଉଁ ଇନାଆପେସି। 11ଏ଼ୱାସି ଈ ତୀନିଗଟା କାମା କିଆତିହିଁ ଏ଼ଦି ଏ଼ୱାଣି ତା଼ଣାଟି ର଼ ୱେଣ୍ତି ଟାକା ହୀଆନା ମୁକ୍ଲୱି ଆ଼ନେ।
ରୀକି ତଲେ କିନି କାମାତି ମେ଼ରା
12ଆମ୍ବାଆସି ଏମିନି ମାଣ୍ସିଇଁ ଇଲେକିହିଁ ୱେ଼ନେସି କି ଏ଼ୱାସି ହା଼ହା ହାନେସି, ଆତିହିଁ ଏ଼ୱାସି ସାତେଏ ହା଼କିତି ଡଣ୍ତ ବେଟାଆ଼ନେସି। 13ଏମିନି ମାଣ୍ସି ଆମ୍ବାଆରାଇଁ ପା଼ୟାଲି ଅଣ୍ପଅସି, ସାମା ମାହାପୂରୁ ମ଼ନ ତଲେ ତାନି କେୟୁତା ଏ଼ୱାଣି ହା଼କି ଆ଼ନେ, ଆତିହିଁ ଏମିନି ଟା଼ୟୁତା ଏ଼ୱାସି ହଟାଲି ଆ଼ଡିନେସି ଇଲେତି ଟା଼ୟୁ ନା଼ନୁ ମିଙ୍ଗେ ତାକି ତୀରି କିଇଁ। 14ସାମା ଆମ୍ବାଆସି ସୁତରି ତଲେ ତାନି ପା଼ଡ଼ିତାଣାଇଁ ପା଼ୟାଲି ସା଼ସା କିନେସି; ଆତିହିଁ ମୀରୁ ଏ଼ୱାଣି ହା଼କି ଡଣ୍ତ ହୀହାଲି ଏ଼ୱାଣାଇଁ ନା଼ ପୂଜା ପିଣ୍ତା ଡାଗେ ଅ଼ଦୁ।
15ଇଞ୍ଜାଁ ଆମ୍ବାଆସି ତାମି ଇୟା କି ଆ଼ବାଇଁ ୱେ଼ନେସି, ଏ଼ୱାସି ସାତେଏ ହା଼ନି ଡଣ୍ତ ବେଟାଆ଼ନେସି।
16ଅ଼ଡ଼େ ଆମ୍ବାଆସି ମାଣ୍ସିଇଁ ସ଼ରୁ ଆ଼ହାଁ ପା଼ର୍ନେସି, ଏ଼ୱାସି ଏ଼ୱାଣି ତା଼ଣା ବେଟାଆ଼ୱି ଆ଼ନେସି, ଆତିହିଁ ସାତେଏ ଏ଼ୱାଣି ହା଼କି ଡଣ୍ତ ଆ଼ନେ।
17ଆମ୍ବାଆସି ଜାହାରା ତାଲି କି ତାଞ୍ଜିଇଁ ବା଼କା ଇଟିନେସି, ଏ଼ୱାସି ସାତେଏ ହା଼ନି ଡଣ୍ତ ବେଟାଆ଼ନେସି।
18ଅ଼ଡ଼େ ଲ଼କୁ ତା଼ମ୍ବୁ ତା଼ମ୍ବୁଏ ଗଡ଼୍ହା ଆ଼ହାଁ ରଅସି ରଅଣାଇଁ ୱାଲି ତଲେ କି ମୁଟି ତଲେ ୱେ଼ତିହିଁ, ଏ଼ୱାସି ହା଼ଆନା କସ୍ତ ତଲେ ଡୂରିନେସି; 19ଅ଼ଡ଼େ ଡା଼ୟୁ ନିଙ୍ଗାହାଁ ବାଡ଼୍ଗା ଆସାହାଁ ପାଙ୍ଗାତା ରେ଼ନେସି, ଆତିହିଁ ଏ଼ ୱେ଼ତାସି ଦ଼ହଗାଟାସି ଆ଼ଅସି; ୱାର୍ଇ ତାନି କାମା ଅ଼ଡ଼େ ଅସ କାର୍ଚୁ ଏ଼ୱାଣାକି ହୀନେସି।
20ଅ଼ଡ଼େ ଆମ୍ବାଆସି ତାନି ହ଼ଲେଏଣାଇଁ କି ହ଼ଲେଣିନି ବାଡ଼୍ଗା ତଲେ ୱେ଼ନେସି, ଏଚିବେ଼ଲା ଏ଼ୱାସି କି ଏ଼ଦି ତାନି କେୟୁତା ଏ଼ ଦେବୁଣିଏ ହା଼ନେ, ଆତିହିଁ ଏ଼ୱାସି ସାତେଏ ହା଼ନି ଡଣ୍ତ ବେଟାଆ଼ନେସି। 21ସାମା ଏ଼ୱାସି ର଼ ଦିନା କି ରୀ ଦିନା ନୀଡିନେସି, ଆତିହିଁ ଏ଼ୱାସି ଡଣ୍ତ ବେଟାଆ଼ଅସି; ଇଚିହିଁ ଏ଼ୱାସି ତାନି ବାତ୍କୁ ସମାନା।
22ଅ଼ଡ଼େ ଆ଼ବା ଆ଼ବାୟାଁ ତା଼ମ୍ବୁ ତା଼ମ୍ବୁଏ ଗଡ଼୍ହା ଆ଼ହାଁ ର଼ ପୂରାମା଼ସା ମାନି ଇୟାନି ୱେ଼ନେରି ଏଚିବେ଼ଲା ତାନି ବାଣ୍ଡିତାମାନି ଡା଼ଲୁ ନସ୍ତ ଆ଼ନେ; ସାମା ଡା଼ୟୁ ଏ଼ନି କସ୍ତ ଆ଼ଏ, ଆତିହିଁ ଏ଼ ଇୟାନି ଡକ୍ରା ଏଚିବେ଼ଲା ଏ଼ନିକିଁ ରୀହ୍ନେସି, ଏଲେକିହିଁ ଟାକାୟାଁ ହୀନେସି; ଇଞ୍ଜାଁ ଏ଼ୱାସି ନୀହାଁୟି କିନାରି ତୀରି କିହାମାନି ଲେକା ତଲେ ଏଚେକା ହୀନେସି। 23ସାମା ଏ଼ନି ଡଣ୍ତ ଗଟୱି ଆ଼ତିହିଁ ତାନି ଜୀୱୁ ବାଦୁଲି ଜୀୱୁ ହିୟାଲି ଆ଼ନେ, 24କାନୁତି ବାଦୁଲି କାନୁ, ପାଲୁତି ବାଦୁଲି ପାଲୁ, କେୟୁତି ବାଦୁଲି କେୟୁ, ପାଃଆନା ବାଦୁଲି ପାଃଆନା, 25ହୂଡିନାଣି ବାଦୁଲି ହୂଡିନାୟି, ଗା଼ହାଁ ବାଦୁଲି ଗା଼ହାଁ, ବାଡ଼୍ଗାତି ବାଦୁଲି ବାଡ଼୍ଗା, ଇଲେତି ଡଣ୍ତ ଆ଼ନେ।
26ଅ଼ଡ଼େ ଆମ୍ବାଆସି ତାନି ହ଼ଲେଏଣାଇଁ କି ହ଼ଲେଣିନି କାନୁତା ୱେ଼ତିହିଁ ଏ଼ କାନୁ ନସ୍ତ ଆ଼ନେ, ଆତିହିଁ ଏ଼ କାନୁ ବାଦୁଲି ଏ଼ୱାଣାଇଁ ଏ଼ ହ଼ଲିୟା କାମାଟି ମୁକ୍ଲୱି କିନେସି। 27ତାନି ୱେ଼ନି ତା଼ଣାଟି ହ଼ଲେଏସି କି ହ଼ଲେଣିନି ପାଲୁ ଡୀତିହିଁ, ଏ଼ୱାସି ପାଲୁ ବାଦୁଲି ଏ଼ୱାଣାଇଁ ମୁକ୍ଲୱି କିନେସି।
ସା଼ୱୁକାରିୟାଁ ଦାୟିପତି
28ଅ଼ଡ଼େ କ଼ଡି ଏମିନି ଆ଼ବା କି ଇୟାନି ଉର୍ହିସାରେ ଏ଼ୱାସି ହା଼ନେସି, ଆତିହିଁ ଏ଼ କ଼ଡି ୱାଲ୍କା ତଲେ ପା଼ୟ୍ୱି ଆ଼ନେ, ଇଞ୍ଜାଁ ତାନି ଊଙ୍ଗା ତିଞ୍ଜାଲି ଆ଼ଏ; ସାମା ସା଼ୱୁକାରି ଡଣ୍ତ ବେଟାଆ଼ଅସି। 29ସାମା ଏ଼ କ଼ଡି ତଲିଟିଏ ଉର୍ହିମାନେ, ଈ କାତା ଏ଼ କ଼ଡି ଗାଟାଣାଇଁ ୱେସ୍ତିହିଁ ଜିକେଏ ଏ଼ୱାସି ଏ଼ଦାନି ଦହ୍ଆତାକି ଏ଼ଦି ଏମିନି ଆ଼ବା କି ଇୟାନି ଉର୍ହାଁ ପା଼ୟିନେ, ଆତିହିଁ ଏ଼ କ଼ଡି ୱାଲ୍କା ତଲେ ପା଼ୟ୍ୱି ଆ଼ନେ; ଇଞ୍ଜାଁ କ଼ଡି ଗାଟାଣାକି ଜିକେଏ ହା଼ନି ଡଣ୍ତ ଆ଼ନେ। 30ଏ଼ କ଼ଡି ଗାଟାଣି ଜୀୱୁତି ମୁକ୍ଲୱି ଆ଼ହାଲି ଆ଼ନେ, ଆତିହିଁ ପୂଜା ତାକି ଏଚେକା କାର୍ଚୁ ଆ଼ନେ ଏ଼ ବାରେ କାର୍ଚୁ ହିୟାଲି ଆ଼ନେ। 31ଏ଼ କ଼ଡି କକାଣାଇଁ କି ପ଼ଦାନି ଉର୍ତିହିଁ, ଏ଼ କ଼ଡି ଗାଟାସି ଈ ମେ଼ରା ଲେହେଁ ଡଣ୍ତ ବେଟାଆ଼ନେସି। 32ଆମ୍ବାଆରି କ଼ଡି ଆମ୍ବାଆରି ହ଼ଲେଏଣାଇଁ କି ହ଼ଲେଣିନି ଉର୍ନେ, ଆତିହିଁ ଏ଼ କ଼ଡି ଗାଟାସି ଏ଼ ହ଼ଲେଏସି କି ହ଼ଲେଣିକି କଡ଼େ ଦସ ସେକଲ ୱେଣ୍ତି ହୀନେସି; ଅ଼ଡ଼େ କ଼ଡି ୱାଲ୍କା ତଲେ ପା଼ୟ୍ୱି ଆ଼ନେ।
33ଅ଼ଡ଼େ ଆମ୍ବାଆସି କୁହି କା଼ର୍ୱି କିହାଁ ପ୍ଡିକ୍ଅସି, ଆତିହିଁ ଏ଼ କୁହି ବିତ୍ରା କ଼ଡି କି ଗା଼ଡ଼୍ଦେ ରିତିହିଁ, 34ଏ଼ କୁହିତି ସା଼ୱୁକାରି ଏ଼ଦାନି ହୀନେସି; ଏ଼ କୁହିତି ସା଼ୱୁକାରି ଏ଼ କ଼ଡିତି ସା଼ୱୁକାରିକି ୱେଣ୍ତିତି ମୂଲୁ ହୀନେସି, ସାମା ହା଼ତି ଜ଼ନ୍ତ ତାନିୱାୟି ଆ଼ନେ। 35ଅ଼ଡ଼େ ରଅଣି କ଼ଡି ଅ଼ର ରଅଣି କ଼ଡିତି ଉର୍ତିହିଁ ଏ଼ କ଼ଡି ହା଼ହାହାନେ, ଆତିହିଁ ଜୀୱୁ ତଲେ ମାନି କ଼ଡିତି ପା଼ର୍ଚାହାଁ ଏ଼ ଟାକାୟାଁ ରୀ ବା଼ଗା କିନେରି; ଅ଼ଡ଼େ ହା଼ତି କ଼ଡିତି ଜିକେଏ ରୀ ବା଼ଗା କିହାଁ ଅ଼ନେରି। 36ସାମା ଏ଼ କ଼ଡି ତଲିଟିଏ ଉର୍ହିମାନଣି ପୁଞ୍ଜାହାଁ ଏ଼ କ଼ଡିତି ସା଼ୱୁକାରି ଜାଗ୍ରାତା କିହିଁ ଇଟଅସି, 37ଆତିହିଁ ଏ଼ ହା଼ତି କ଼ଡି ବାଦୁଲି ର଼ କ଼ଡି ଏ଼ୱାଣାକି ହୀନେସି ସାମା ହା଼ତି କ଼ଡି ଏ଼ୱାଣାୱାୟି ଆ଼ନେ।
Currently Selected:
ହାନାୟି 21: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
