ହାନାୟି 20
20
ଦସ ହୁକୁମି
(ୱେ ମେ଼ରା ୫:୧-୨୧)
1ଏଚେଟିଏ ମାହାପୂରୁ ଈ ବାରେ କାତା ଏଲେଇଚେସି, 2“ଆମ୍ବାଆସି ମିଙ୍ଗେ ହ଼ଲିୟାଙ୍ଗା ସମାନା ମିସର ଦେ଼ସାଟି ହ଼ପ୍ହା ତାଚାମାଞ୍ଜାନେସି, ନା଼ନୁ ମୀ ଏ଼ ପ୍ରବୁ ମାହାପୂରୁତେଏଁ।”
3ନା଼ ନ଼କିତା ମୀ ଏ଼ନି ପେ଼ନୁ ପିତାରା ମାହାପୂରୁ ଡ଼ୟାଆପେ।
4ମୀରୁ ମିଙ୍ଗେ ତାକି ଏ଼ନି ତୀର୍ସିତି ବମାୟାଁ କେ଼ପାଆଦୁ; ହା଼ଗୁ ଲାକ କି ଦାର୍ତିତା କି ଦାର୍ତିତି ଏ଼ୟୁଣା ମାନି ଏ଼ନି ଆ଼ସ୍ତିତି ବମାୟାଁ କେ଼ପାଆଦୁ। 5ମୀରୁ ଏ଼ୱାଆଁତି ଜହରା କିଆଦୁ, କି ଏ଼ୱାସିକା ସେ଼ବା କିଆଦୁ; ଇଚିହିଁ ନା଼ନୁ ମୀ ପ୍ରବୁ ମାହାପୂରୁତେଏଁ, ଜାହାରା ଗା଼ୱୁରମି ଗେଲ୍ପାଲି ରା଼ହାଁତି ମାହାପୂରୁତେଏଁ, ଇଞ୍ଜାଁ, ଆମ୍ବାଆରି ନାଙ୍ଗେ ଅ଼ପଅରି, ନା଼ନୁ ଏ଼ୱାରି ତୀନି, ସା଼ରି ପା଼ଟୁତି କକାରି ପ଼ଦାୟାଁଣି ଆକୁ ଆ଼ବାୟାଁ ଦ଼ହତି ଡଣ୍ତ ହୀନାତେଏଁ; 6ସାମା ଆମ୍ବାଆରି ନାଙ୍ଗେ ଜୀୱୁ ନୟାଁନେରି ଅ଼ଡ଼େ ନା଼ ହୁକୁମି ମା଼ନୱି ଆ଼ନେରି, ନା଼ନୁ ଏ଼ୱାରି ମା଼ଣା ମା଼ଣା ଆକୁ ଆ଼ବାୟାଁ ପାତେକା କାର୍ମା ମେହ୍ନାତେଏଁ।
7ମୀରୁ ମୀ ପ୍ରବୁ ମାହାପୂରୁ ଦ଼ରୁ ମିଚିତଲେ ଆହ୍ଆଦୁ; ଏ଼ନିଇଚିହିଁ ଆମ୍ବାଆସି ଏ଼ୱାଣି ଦ଼ରୁ ମିଚିତଲେ ଆହ୍ନେସି, ପ୍ରବୁ ଏ଼ୱାଣାଇଁ ଦ଼ହ ହିଲାଆଗାଟାସି ଇଞ୍ଜିଁ ଲେକା କିନେସି।
8ଜ଼ମିନି ଦିନାତି ସୁଦୁ ତଲେ ମା଼ନୱି ଆ଼ହାଲି ଅଣ୍ପାଦୁ। 9ସ଼ଦିନା କସ୍ତ ଅ଼ଡ଼େ ମୀ ବାରେ କାମା କିଦେରି; 10ସାମା ସା଼ତା ଦିନା ମୀ ପ୍ରବୁ ମାହାପୂରୁତି ଜ଼ମିନି ଦିନା; ଏ଼ ଦିନା ମୀରୁ କି ମୀ ମୀର୍କା ମା଼ସ୍କା, ମୀ ହ଼ଲିୟାଙ୍ଗା, ମୀ ହ଼ଲେଣିସିକା, ମୀ କ଼ଡି ଗରି କି ମୀ ଜ଼ନ୍ତ ଜୀୱେଡ଼ି, କି ମୀ ଗା଼ଡ଼ାତା ମାନି ଏଟ୍କା ଦେ଼ସାତାରି ଆମ୍ବାଆସି ଏ଼ନି କାମା କିଅସି। 11ଏ଼ନିଇଚିହିଁ ପ୍ରବୁ ହା଼ଗୁପା଼କା ଅ଼ଡ଼େ ଦାର୍ତି ଇଞ୍ଜାଁ ସାମ୍ଦୁରି ଅ଼ଡ଼େ ଏମ୍ବାଆଁ ମାନି ବାରେ ଆ଼ସ୍ତିତି ସ଼ଦିନାତା ଗା଼ଡ଼ି କିହାଁ ସା଼ତା ଦିନାତା ଜ଼ମିତେସି; ଏ଼ଦାଆଁତାକି ପ୍ରବୁ ଜ଼ମିନି ଦିନାତି ବ଼ର ହୀହାଁ ସୁଦୁ କିହାମାନେସି।
12ମୀରୁ ମୀ ତାଲି ଅ଼ଡ଼େ ତାଞ୍ଜିଇଁ ମା଼ନି କିଦୁ; ଆତିହିଁ ମୀ ପ୍ରବୁ ମାହାପୂରୁ ମିଙ୍ଗେ ଏମିନି ଦେ଼ସା ହିୟାନେସି, ଏ଼ ଦେ଼ସାତା ମୀରୁ ହା଼ରେକା ବାର୍ସା ନୀଡିଦେରି।
13ମୀରୁ ଲ଼କୁଣି ପା଼ୟାଆଦୁ।
14ମୀରୁ ଦା଼ରି କିଆଦୁ।
15ମୀରୁ ସ଼ରୁ କିଆଦୁ।
16ମୀରୁ ମୀ ପା଼ଡ଼ିତି ଲ଼କୁ କ଼ପାଟି ମିଚି ସା଼କି ଜ଼ଲାଆଦୁ।
17ମୀରୁ ମୀ ପା଼ଡ଼ିତାଣା ଇଲୁତି ଜୂପ୍କା ଆ଼ଆଦୁ, ମୀରୁ ମୀ ପା଼ଡ଼ିତାଣା ଡକ୍ରି କି ହ଼ଲେଏଣାଇଁ କି ହ଼ଲେଣିନି କି ତାନି କ଼ଡି ଗରିତି କି ଗା଼ଡ଼୍ଦେ କି ମୀ ପା଼ଡ଼ିତାଣା ଏ଼ନି ଆ଼ସ୍ତି ଜୂପ୍କା ଆ଼ଆଦୁ।
ଲ଼କୁତି ଆଜି
(ୱେ ମେ଼ରା ୫:୨୨-୩୩)
18ଏଚିବେ଼ଲା ବାରେ ଲ଼କୁ ହା଼ଗୁ ଗୂଣ୍ନାଣି ଅ଼ଡ଼େ ମ୍ଣିହ୍ନାଣି ଇଞ୍ଜାଁ ତୀତ୍ରି ହା଼ଡା ଅ଼ଡ଼େ ବ଼ୟିଁ ନିଙ୍ଗିମାନି ହ଼ରୁ ମେସ୍ତେରି; ଇଞ୍ଜାଁ, ଏ଼ଦାଆଁ ମେସାହାଁ ଆଜିତାକି ତୀର୍ଗିହିଁ ହେକ ନିତେରି। 19ଅ଼ଡ଼େ ଏ଼ୱାରି ମ଼ସାଇଁ ଏଲେଇଚେରି, “ନୀନୁ ମା଼ ତଲେ କାତା ଆୟାମୁ, ମା଼ମ୍ବୁ ୱେନମି, ସାମା ମାହାପୂରୁ ମା଼ ତଲେ କାତା ଆୟାଆପେସି, ଆ଼ଆତିହିଁ ମା଼ମ୍ବୁ ହା଼ହାହାନମି।”
20ଏଚେଟିଏ ମ଼ସା ଲ଼କୁଣି ଏଲେଇଚେସି, “ଆଜାଆଦୁ; ଇଚିହିଁ ମିଙ୍ଗେ ତାୟିପାରି କିହାଲି ଅ଼ଡ଼େ ମୀରୁ ଏ଼ନିକିଁ ପା଼ପୁ କିଅତେରି, ଏ଼ଦାଆଁତାକି ତାନି ଆଜି ମିଙ୍ଗେ ତ଼ସାଲି ମାହାପୂରୁ ୱା଼ହାମାନେସି।” 21ଏ଼ଦାଆଁତାକି ଲ଼କୁ ହେକ ନିଚା ଡ଼ୟିତେରି; ସାମା ଏମିନି ଟା଼ୟୁତା ମାହାପୂରୁ ମାଚେସି, ମ଼ସା ଏ଼ ଗାଡି ଆନ୍ଦେରି ଟା଼ୟୁତା ହାଚେସି।
ପୂଜା ପିଣ୍ତାତି ମେ଼ରା
22ଏଚେଟିଏ ପ୍ରବୁ ମ଼ସାଇଁ ଏଲେଇଚେସି, “ନୀନୁ ଇସ୍ରାୟେଲ ଲ଼କୁଣି ଈ କାତା ୱେହ୍ମୁ, ‘ନା଼ନୁ ହା଼ଗୁ ଲାକ ମାଞ୍ଜାହାଁ ମୀ ତଲେ କାତା ଆୟାତେଏଁ, ଈଦାଆଁ ମୀରୁ ମେସାମାଞ୍ଜେରି। 23ଈଦାଆଁତାକି ମୀରୁ ନା଼ ସମାନା ଏ଼ନି ମାହାପୂରୁଇଁ ଆଟ୍ଆଦୁ, ଅ଼ଡ଼େ ଏଟ୍କାତି ପେ଼ଣ୍କାତି ମାହାପୂରୁ ତିୟାରା କିଆଦୁ; ମିଙ୍ଗେ ତାକି ବାଂଗାରା କି ୱେଣ୍ତିତି ପେ଼ଣ୍କା ବମାୟାଁ କେ଼ପାଆଦୁ। 24ମୀରୁ ନା଼ କ଼ସମି ର଼ ଇର୍ଆତି ପିଣ୍ତା କେ଼ପିଦେରି, ଇଞ୍ଜାଁ, ଏ଼ଦାଣି ଲାକ ମୀ କ଼ଡି ଗରି ହିଚୁତା ହୂଡିନି ପୂଜା ଅ଼ଡ଼େ ନେହେଁତି ପୂଜା ହେର୍ପିଦେରି; ନା଼ନୁ ଏମିନି ବାରେ ଟା଼ୟୁତା ନା଼ ଦ଼ରୁ ଅଣ୍ପି କିୟାଇଁ, ଏ଼ ବାରେ ଟା଼ୟୁତା ନା଼ନୁ ମୀ ତା଼ଣା ୱା଼ହାଁ ମିଙ୍ଗେ ବ଼ର ହିୟାଇଁ। 25ମୀରୁ ନା଼ କ଼ସମି ୱାଲ୍କାତି ପିଣ୍ତା କେ଼ପିଦେରି, ଆତିହିଁ ତୀର୍ସିତି ୱାଲି ତଲେ କେ଼ପଅତେରି; ଇଚିହିଁ ଏ଼ଦାଣି ଲାକ ମୀରୁ ମୀ ସାଜୁ ଡୀଗି କିତିହିଁ ଏ଼ଦାଣି ସୁଦୁ କିହି ହିଲଅତେରି। 26ଅ଼ଡ଼େ ମୀ ନା଼ଗ୍ଡ଼ା ଏ଼ନିକିଁ ନା଼ ପିଣ୍ତା ଲାକ ତ଼ଞ୍ଜା ଆ଼ଏ, ଏ଼ଦାଆଁତାକି ମୀରୁ ପା଼ୱୁଜି ୱିସାହାଁ ନା଼ ପିଣ୍ତା ଲାକ ହାଲଅତେରି।’”
Currently Selected:
ହାନାୟି 20: Kii25
Highlight
Copy
Compare
Share
Want to have your highlights saved across all your devices? Sign up or sign in
The Kuvi Bible © The Word for the World International and Kuvi Translation Samithi, Semiliguda, Koraput, Odisha 2025
