ପର୍ତମ୍ମୁ 9
9
ନୋଅନ୍ ବାତ୍ତେ ଇସ୍ୱରନ୍ ଆ ସନିବ୍ଡେୟ୍ବରନ୍
1ନୋଅନ୍ ଡ ଆ ଡାଙ୍ଗାଡ଼ାଅନଞ୍ଜି ଇସ୍ୱରନ୍ ଆସିର୍ବାଦଲେ ବରେଞ୍ଜି, “ଅମ୍ବେଞ୍ଜି ଗୋଗୋୟ୍ବେନ୍ତୋ#9:1 ଗୋଗୋୟ୍ପସିଜନ୍ କୋଡ୍ବା ଆରି କେଜ୍ଜାବେନ୍ ସମ୍ପରା ପୁର୍ତିନ୍ ବରିୟ୍ଡେଏତଜି । 2ପୁର୍ତିଲୋଙନ୍ ଡକୋନ୍ ଅଡ଼୍କୋ ଅନ୍ତିଡଞ୍ଜି, ଜନ୍ତୁଜି, କିମ୍ପୋଙନ୍ ବାତ୍ତେ ଆତ୍ରଙିୟ୍ତଞ୍ଜି ଆଜନ୍ତୁଜି, ଡ ଅୟଞ୍ଜି ଆମ୍ବେଞ୍ଜିଆଡଙ୍ ବତଙ୍ତଜି । ଇନିଆସନ୍ଗାମେଣ୍ଡେନ୍ କେନ୍ ଅଡ଼୍କୋନ୍ ଆଜନ୍ତୁଜି ଅସିଲୋଙ୍ବେନ୍ ସନୋରୋପ୍ପାୟନ୍ ଡେଏନ୍ । 3ଏଙ୍ଗାଲେ ଅଆବନ୍ ଜନୋମନ୍ ଆସନ୍ ତିୟ୍ଲବେନ୍ ଏତ୍ତେଲେ କେନ୍ ଆ ପରାନ୍ନାଞ୍ଜି ନିୟ୍ ଜନୋମ୍ବେନ୍ ଆସନ୍ ଞେନ୍ ଆମ୍ବେଞ୍ଜିଆଡଙ୍ ତିୟ୍ଲବେନ୍ । 4ବନ୍ଡ ଆମ୍ବେଞ୍ଜି ସମ୍ପରାମିଞାମ୍ ଜେଲୁନ୍ ଏଜୋମ୍ଡଙ୍; ଇନିଆସନ୍ଗାମେଣ୍ଡେନ୍ ମିଞାମ୍ଲୋଙନ୍ ପରାନ୍ନାନ୍#9:4 ଜନ୍ତୁନ୍ ଆ ଅନମେଙନ୍ ଡକୋ । 5ଆରି ମନ୍ରାନ୍ଆଡଙ୍ ଏରବ୍ବୁଏଣ୍ଡେନ୍, ଆନିନ୍ ଡନଣ୍ଡାୟନ୍ ଞାଙ୍ତେ । ଜନ୍ତୁ ବାତ୍ତେ ଡେଏତୋ କି ମନ୍ରା ବାତ୍ତେ ଡେଏତୋ ଆନାଜାକିଁୟ୍ ଡେଏତୋ ଞେନ୍ ଡୁଲ୍ତନାୟ୍ । 6ଆନା ମନ୍ରାନ୍ ସମ୍ବୋବ୍ତେ ଆନିନ୍ ନିୟ୍ ମନ୍ରାନ୍ ବାତ୍ତେ ସନମ୍ବବନ୍ ଡେତେ, ଇନିଆସନ୍ଗାମେଣ୍ଡେନ୍ ଇସ୍ୱରନ୍ ଆଗୁନଡମନ୍#9:6 ଆନିନ୍ଡମ୍ ଅନ୍ତମ୍ ଅନ୍ତମ୍ ମନ୍ରାନ୍ ଗଡ଼େଏନ୍ ।
7ପସିୟ୍ବେଞ୍ଜି ଗୋଗୋଜେତଜି, ଆରି ସମ୍ପରା ପୁର୍ତିନ୍ କେଜ୍ଜାବେଞ୍ଜି ବରିୟ୍ଡେଏତଜି ।”
8ଇସ୍ୱରନ୍ ନୋଅନ୍ ଡ ଆ ଡାଙ୍ଗାଡ଼ାଅନଞ୍ଜିଆଡଙ୍ ବରେଞ୍ଜି, 9“ଆମ୍ବେଞ୍ଜି ସରିନ୍, ପୁର୍ବାଃତେ କେଜ୍ଜାବେଞ୍ଜି ସରିନ୍ ଆରି ଆମ୍ବେଞ୍ଜି ସରିନ୍ ଆଡ୍ରକୋଲଞ୍ଜି ଆ ଜନ୍ତୁଜି ଅଡ଼୍କୋନ୍ ସରିନ୍, 10ଆରି ଜାଜ୍ଜଲୋଙନ୍ ସିଲଡ୍ ଆମ୍ବେଞ୍ଜି ସରିନ୍ ଆଡ୍ରୁଙ୍ଲନାଞଞ୍ଜି ଅଡ଼୍କୋନ୍ ଆ ପରାନ୍ନାନ୍, ଅଡ଼୍କୋନ୍ ଆ ଅନ୍ତିଜି ଡ ଅଡ଼୍କୋନ୍ ଆ ଜନ୍ତୁଜି ସରିନ୍ ଞେନ୍ ସିବ୍ଡେୟ୍ ବର୍ରନ୍ ଗବ୍ରିତାୟ୍ । 11ଞେନ୍ ସିବ୍ଡେୟ୍ ବର୍ରନାୟ୍ ଡ ଅଡ଼୍କୋ ଆ ପରାନ୍ନା ବୁବ୍ଡାଡାଲେ ଅଃରବ୍ବୁଆଜି; ଆଙ୍ଗିୟ୍ ଆରି ପୁର୍ତିନ୍ ଅଃବୁବ୍ଡାଏ । 12ଇସ୍ୱରନ୍ ଗାମେନ୍ ଞେନ୍ ଆମ୍ବେଞ୍ଜି ଡ ଆମ୍ବେଞ୍ଜି ସରିନ୍ ଡକୋନ୍ ଆ ପରାନ୍ନା ଅଡ଼୍କୋନ୍ ପୁର୍ବାଃତେ ନିୟ୍ #9:12 ଆ ଅନଞ୍ଜି ସିଲଡ୍ ଆ ଅନଞ୍ଜି ନିୟ୍ ଅଡ଼୍କୋ ଡିନା ଆସନ୍ ଅଙ୍ଗା ଆ ସନିବ୍ଡେୟ୍ବର୍ ଗବ୍ରିଲାୟ୍ ତି ଅରମ୍ମଡନ୍ ଅକେନ୍, 13ଞେନ୍ ମେଗଲୋଙନ୍ ସୁସୁରୁଆଙନ୍ ଅବ୍ରାଙ୍ଡାତାୟ୍ । ତିଆତେ ଞେନ୍ ଡ ପୁର୍ତିନ୍ ଆସନ୍ ଅନଗଡ୍ ଅରମ୍ମଡନ୍ ଡେତେ । 14ଞେନ୍ ଅଙ୍ଗାଆଡିଡ୍ ମେଗଲୋଙନ୍ ସିଲଡ୍ ତରୁବନ୍ ପୁର୍ତିଲୋଙନ୍ ପତ୍ତାୟ୍ତାୟ୍ ତିଆଡିଡ୍ ରୁଆଙ୍ଲୋଙନ୍ ସୁସ୍ରୁଆଙ୍ ରାଙ୍ଡାତେ, 15ଆମ୍ବେଞ୍ଜି ସରିନ୍ ଞେନ୍ ସରିବ୍ଡେୟ୍ ବର୍ରନାଞନ୍ ଆତେ ଞେନ୍ ମନ୍ନେତାୟ୍ ତିଆସନ୍ ଆମ୍ବେନ୍ ସରିନ୍ ଡ ଅଡ଼୍କୋ ଜନ୍ତୁଜି ଆରି ଆଙ୍ଗିୟ୍ ବୁବ୍ଡାଡାଲେ ଅଃରବୁଆଜି । 16ସୁସୁରୁଆଙନ୍ ମେଗଲୋଙନ୍ ରାଙ୍ଡାଏଣ୍ଡେନ୍, ପୁର୍ତିଲୋଙନ୍ ଡକୋନ୍ ଅଡ଼୍କୋନ୍ ଆ ପରାନ୍ନା ସରିନ୍ ଅଡ଼୍କୋ ଡିନାନ୍ ଆସନ୍ ଅଙ୍ଗା ଆ ଅନଗଡ୍ ଆ ସନିବ୍ଡେୟ୍ବର୍ ଡକୋ ତିଆତେ ଞେନ୍ ଏମନ୍ନେତାୟ୍ । 17ଇସ୍ୱରନ୍ ନୋଅନ୍ଆଡଙ୍ ବରେନ୍ ପୁର୍ତିଲୋଙନ୍ ଅଡ଼୍କୋନ୍ ଆ ପରାନ୍ନାଜି ସରିନ୍ ଅଙ୍ଗା ଆ ସନିବ୍ଡେୟ୍ବର୍ ଆନଗଡ୍ ଞେନ୍ ଗବ୍ରିଲାୟ୍ କେନ୍ଆତେ ତି ଅରମ୍ମଡନ୍ ଡେତେ ।”
ନୋଅନ୍ ଡ ଆ ଡାଙ୍ଗାଡ଼ାଅନଞ୍ଜି
18ନୋଅନ୍ ଆ ଡାଙ୍ଗାଡ଼ାଅନଞ୍ଜି ଆନାଜି ଜାଜ୍ଜଲୋଙନ୍ ସିଲଡ୍ ଡୁଙ୍ଲନାଜି ଆଞୁମଞ୍ଜି ସେମ, ଆମ ଡ ଜେପତ । କିଣାନନ୍ ଆପ୍ପେୟ୍ ଆମନନ୍ । 19କେନ୍ ୟାଗି ନୋଅନ୍ ଆ ଡାଙ୍ଗାଡ଼ଅନଞ୍ଜି କେନ୍ ଆ ପୁର୍ତିଲୋଙ୍ ଆକେଜ୍ଜାଞ୍ଜି ତୁମ୍ ଡେଏଞ୍ଜି ।
20ନୋଅନ୍ ଅବୟ୍ ଅର୍ରମର୍ ଡକୋଏନ୍, ଆରି ଆନିନ୍ ଆପର୍ତମ୍ମୁନ୍ ଦ୍ରାକ୍ୟାକୋତାନ୍ ତୁବେନ୍ । 21ବଡିନା ଆନିନ୍ ଦ୍ରାକ୍ୟାଡାନ୍ ଗାଲେ ଆନିନ୍ ବନ୍ନୁଲେନ୍, ଆରି ତମ୍ବୁସିଂଲୋଙନ୍ ଆଉର୍ଡିଜନ୍ ଆଲୁଡ୍ଲୁଡ୍ ଡକୋଲନ୍ । 22ତି ଆଡିଡ୍ କିଣାନନ୍ ଆପ୍ପେୟ୍ ଆମନନ୍, ଆପ୍ପେୟନ୍ଆଡଙ୍ ଆଉର୍ଡିଜନ୍ ଗିୟ୍ଲେ କେନ୍ ଆବର୍ନେ ବାଗୁବ୍ ଆବୋଞାଙଞ୍ଜିଆଡଙ୍ ଇୟ୍ଲେ ବରେଜି । 23ତିଆଡିଡ୍ ସେମନ୍ ଡ ଜେପତନ୍ ଆତାରଙ୍ଲୋଙଞ୍ଜି ସିନ୍ରିନ୍ ରାଙ୍କୁଡେଞ୍ଜି ଆରି ମଡ଼୍କୁଣ୍ଡୋଙ୍ ତଙିୟ୍ଲନ୍ ଆପ୍ପେୟଞ୍ଜି ଆଉର୍ଡିଜୟ୍ ଏର୍ଗନିୟ୍ ସିନ୍ରିନ୍ ୟୁମେଞ୍ଜି, ଆନିଞ୍ଜି ମଡ଼କୁଣ୍ଡୋଙ୍ ଆଜିର୍ରେଞ୍ଜି ଆସନ୍ ଆ ଆପ୍ପେୟଞ୍ଜି ଆଉର୍ଡିଜୟ୍ ଅଃଗିୟ୍ଲଜି । 24ନୋଅନ୍ ଆତ୍ରବ୍ବୁଲେନ୍ ସିଲଡ୍ ଡୋଲନେ ଆ ସନ୍ନା ଡାଙ୍ଗଡ଼ାଅନନ୍ ଆଞନର୍ରମ୍ ଆପ୍ପେୟନ୍ ଜନାଏନ୍, 25ତିଆସନ୍ ନଅନ୍ ଗାମେନ୍,
“କିଣାନନ୍ ସନୟ୍ପନ୍ ଞାଙେତୋ ।
ଆନିନ୍ ଆ ବୋଞାଙଞ୍ଜି ଆକମ୍ବାରିମର୍ ଡେଏତୋ ।
26ଆରି ଆନିନ୍ ଗାମେନ୍ ସେମନ୍ ଆ ଇସ୍ୱରନ୍ ସନେନ୍ସେନ୍ ଡେଏତୋ !
କିଣାନନ୍ ସେମନ୍ ଆ କମ୍ବାରିମର୍ ଡେଏତୋ ।
27ଇସ୍ୱରନ୍ ଜେପତନ୍ଆଡଙ୍ ଗଃମାଙେନ୍ !
ଆରି ଆନିନ୍ ସେମନ୍ ଆତମ୍ବୁସିଂଲୋଙନ୍ ଡକୋନେତୋ !
କିଣାନନ୍ ଜେପତନ୍ ଆକମ୍ବାରିମରନ୍ ଡେଏତୋ ।”
28ପୁର୍ତିନ୍ ଆବ୍ରୁବ୍ଡାଏନ୍ ସିଲଡ୍ ନୋଅନ୍ ଆରି ୟାଗିସଅ ପଚାସ ବର୍ସେଙ୍ ଜାୟ୍ ଡକୋଲନ୍ 29ଆରି ନସଅ ପଚାସ ବର୍ସେଙ୍ ଡକୋଡାଲନ୍ ରବୁଏନ୍ ।
Currently Selected:
ପର୍ତମ୍ମୁ 9: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
Videos for ପର୍ତମ୍ମୁ 9
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show