ପର୍ତମ୍ମୁ 8
8
ଡାଆନ୍ ଆନସୋୟ୍
1ଇସ୍ୱରନ୍ ନୋଅନ୍ ଡ ଆନିନ୍ ସରିନ୍ ଜାଜ୍ଜଲୋଙନ୍ ଆଡ୍ରକୋଲଞ୍ଜି ଜାଡ଼ିଆନ୍ ଡ ଅସିଅଙ୍ ଆଜନ୍ତୁଜି ଅଃକରୋଡାଲୋ; ତିଆସନ୍ ଇସ୍ୱରନ୍ ରିଙ୍ଗେନ୍ ଆପ୍ପାୟ୍ଲେ#8:1 ପତ୍ତାୟେନ୍, ଆରି ଡାଆନ୍ ଅବ୍ସୋଜେନ୍ । 2ପୁର୍ତିଲୋଙନ୍ ସିଲଡ୍ ଆଡ୍ରୁଙ୍ଲନାଞନ୍ ଆ ଡାଆ ଡ ରୁଆଙନ୍ ସିଲଡ୍ ଆରଡ଼ୋଲାଞନ୍ ଆ ତରୁବ୍ ଅଡ଼୍କୋନ୍ ଡଙ୍ଡଙେନ୍ । ଆରି ତରୁବନ୍ ଆରେଙେନ୍, 3ପୁର୍ତିଲୋଙନ୍ ଗିଙ୍ଲେ ଆଡ୍ରକୋଲନ୍ ଆ ଡାଆ ବସଅ ପଚାସ ଡିନା ଆତିକି ଅସୋୟ୍ଲେ ପାଙେନ୍ । 4ସାତ ଆଙ୍ଗାୟ୍#8:4 ସାତମାସନ୍ ବକୁଡ଼ି ସାତ ଡିନାଲୋଙ୍ ଆରାରାଟ୍ ବରୁଲୋଙନ୍ ଜାଜ୍ଜନ୍ ରଏଏନ୍ । 5ଡାଆନ୍ ଅସୋୟ୍ଲେ ପାଙ୍ଲେ, ଆରି ଦସ ଆଙ୍ଗାୟ୍#8:5 ଦସମାସ ଆପର୍ତମ୍ମୁ ଡିନାଇଙନ୍ ଆବବ୍ ବୁରଞ୍ଜି ରାଙ୍ଡାଏନ୍ ।
6ବାକୁଡ଼ି ଡିନା ଡେଏନ୍ କି ନୋଅନ୍ ଜାଜ୍ଜନ୍ ଆଜର୍କା ରୋଏନ୍ 7ଆରି ଅବୟ୍ କାକାନ୍ ଅବ୍ନେଙେଙେନ୍ । ଆନିନ୍ ଆରି ଅଃୟର୍ରନାୟ୍, ବନ୍ଡ ଡାଆନ୍ ଅନ୍ରଙ୍ ଅଞଡେନ୍ ଜାୟ୍ ଅଡ଼େତେ ଅଡ଼େନେ ଏଙେନ୍ଡାଲନ୍ ଡକୋଲନ୍ । 8ଆରି ବତର ଡାଆନ୍ ଅସୋଜେନ୍ ଅଡ଼େ ଇଜ୍ଜା ଜନନାନ୍ ଆସନ୍ ନୋଅନ୍ ଆରି ଅବୟ୍ କୁକ୍କୁରନ୍ ଅବ୍ନେଙେଙେନ୍, 9ବନ୍ଡ ତି ଆବନେଡ଼ା ଜାୟ୍ ପୁର୍ତିଲୋଙନ୍ ଡାଆନ୍ ତୁମ୍ ଆଡ୍ରକୋଏନ୍ ଆସନ୍, କୁକ୍କୁରନ୍ ତରାର୍ଡୋୟ୍ନେନ୍ ଅଃଞାଙ୍ଲୋ । ତିଆସନ୍ ଜାଜ୍ଜଲୋଙନ୍ ୟର୍ରନାୟ୍, ଆରି ନୋଅନ୍ କୁକ୍କୁରନ୍ ଞମ୍ଲେ ଅମ୍ମ ଜାଜ୍ଜନ୍ ଅମ୍ଗନେନ୍ । 10ଆରି ସାତ ଡିନା ଆଡ୍ରେନ୍ ସିଲଡ୍ ଆରି ବତର କୁକ୍କୁରନ୍ ଅବ୍ନେଙେଙେନ୍ । 11ସାଲ୍ଲୁମ୍ ଆଡିଡ୍ କୁକ୍କୁରନ୍ ଆ ତଅଡ୍ଲୋଙ୍ ଅବୟ୍ ଆଲେଡେଙ୍ ଜିତ ଅଲନ୍ ଞମ୍ଲେ ୟର୍ରନାୟ୍ । ତିଆସନ୍ ପୁର୍ତିନ୍ ଆ ଡାଆ ଅସୋଜେନ୍ ଗାମ୍ଲେ ନୋଅନ୍ ଜନାଏନ୍ । 12ସାତ ଡିନା ଆଡ୍ରେନ୍ ସିଲଡ୍ ନୋଅନ୍ ଆରି କୁକ୍କୁରନ୍ ଅବ୍ନେଙେଙେନ୍; ବନ୍ଡ କୁକ୍କୁରନ୍ ନୋଅନ୍ ଆମଙ୍ବାନ୍ ଅଃୟର୍ରନାୟ୍ ।
13ନୋଅନ୍ ତୁଡ୍ରୁସଅ ବବର୍ସେଙ୍ ଆଡ୍ରେନ୍ ଆଡିଡ୍, ତି ଆବର୍ସେଙ୍ ଆପର୍ତମ୍ମୁ ଆଙ୍ଗାୟ୍ ଆପର୍ତମ୍ମୁ ଡିନାଇଙନ୍ ପୁର୍ତିନ୍ ଆ ଡାଆ ଅଞଡେନ୍, ନୋଅନ୍ ଜାଜ୍ଜନ୍ ଆବିଲେଙ୍ ତେକ୍କେଲେ ଆଗ୍ରିଜେନ୍ ଲବନ୍ ଆସର୍ ରାଙ୍ଡାଏନ୍ । 14ବାଗୁ ଆଙ୍ଗାୟ୍ ବକୁଡ଼ି ସାତ ଡିନା ଆଡ୍ରେନ୍ ସିଲଡ୍ ପୁର୍ତିନ୍ ଅଡ଼୍କୋନ୍ ଅସରେନ୍ ।
15ଇସ୍ୱରନ୍ ନୋଅନ୍ଆଡଙ୍ ବରେନ୍, 16“ଡୁକ୍ରିନମ୍, ଡାଙ୍ଗାଡ଼ାଅନମ୍ଜି ଡ କଉନ୍ନମ୍ଜି ସରିନ୍ ଜାଜ୍ଜଲୋଙନ୍ ସିଲଡ୍ ଡୁଙ୍ନାୟ୍ବା । 17ଆରି ଆମନ୍ ସରିନ୍ ଡକୋନ୍ ଆଜନ୍ତୁଜି, ଅନ୍ତିଡଞ୍ଜି ଡ କିମ୍ପୋଙନ୍ ବାତ୍ତେ ଆତ୍ରଞିୟ୍ତଞ୍ଜି ଅଡ଼୍କୋନ୍ ଆଜନ୍ତୁଜି ଅମ୍ଡୁଙାୟ୍, ପୁର୍ତିଲୋଙନ୍ ଆନିଞ୍ଜି ଗୋଗୋଜେତଜି ଆରି ଆନିଞ୍ଜି ବରିୟ୍ଡେଏତଜି ।” 18ତିଆସନ୍ ନୋଅନ୍ ଆ ଡୁକ୍ରିନ୍, ଆ ଡାଙ୍ଗାଡ଼ାଅନଞ୍ଜି ଡ ଆ କଉନଞ୍ଜି ସରିନ୍ ଜାଜ୍ଜଲୋଙନ୍ ସିଲଡ୍ ଡୁଙ୍ଲନାଜି । 19ଅନ୍ତିଡଞ୍ଜି, ଜନ୍ତୁଜି, କିମ୍ପୋଙନ୍ ବାତ୍ତେ ଆତ୍ରଞିୟ୍ତଞ୍ଜି ଅଡ଼୍କୋନ୍ ଆ ଜନ୍ତୁଜି ଜାଜ୍ଜଲୋଙନ୍ ସିଲଡ୍ ଡୁଙ୍ଲନାଜି ।
ନୋଅନ୍ ଆ ତନୁମ୍ମୋଡ୍ ଆନମଙ୍
20ତିଆସନ୍ ନୋଅନ୍ ଇସ୍ୱରନ୍ ଆସନ୍ ଅବୟ୍ ତନମ୍ପିଲନ୍ ତୁବେନ୍; ଆରି ତି ଆତନମ୍ପିଲ୍ଲୋଙ୍ ଅଡ଼୍କୋନ୍ ମଡ଼ିର୍ ଅନ୍ତିଡନ୍ ଡ ଜନ୍ତୁଜି ଇସ୍ୱରନ୍ ଆଞୁମ୍ଲୋଙ୍ ଅନମଙନ୍ ତିୟେନ୍ । 21ଅନମଙ୍ ତନୁମ୍ମୋଡନ୍ ଆନୁର୍ ବାତ୍ତେ ପ୍ରବୁନ୍ ମଅଁୟ୍ଡାଏନ୍ ଆରି ଆ ଅମ୍ମଲଙନ୍ ଇଃୟମେନ୍, “ମନ୍ରାନ୍ ଆ ପେଲ୍ଲା ଆସନ୍ ଞେନ୍ ଆଙ୍ଗିୟ୍ ଆରି ପୁର୍ତିନ୍ ଅଃସୟ୍ପଆୟ୍ ଇନିଆସନ୍ଗାମେଣ୍ଡେନ୍ ଞେନ୍ ଜନା ଆ ସନ୍ନାଇଙନ୍ ମା ସିଲଡ୍ ମନ୍ରାନ୍ ଆଲନୁମ୍ଜି#8:21 ଆନିଃୟମ୍ଜି ମନଙ୍ତଡ୍; ତିଆସନ୍ ଏନ୍ନେଗନ୍ ଆରି ଆଙ୍ଗିୟ୍ ଅଡ଼୍କୋନ୍ ଆ ପରାନ୍ନା ଅଃରବ୍ବୁଆୟ୍ । 22ଡିଅଙ୍ଗା ଡିନା ଜାୟ୍ ପୁର୍ତିନ୍ ଡକୋ, ଡିୟ୍ତେ ଡିନା ଜାୟ୍ ବୁଡ୍ବୁଡ୍ନେନ୍ ଆରି ଗଡ୍ଗଡ୍ନେନ୍ ଆଡିଡ୍ । ଅଡ଼୍କୋ ଡିନାନ୍ ରଙାନ୍ ଡ ଉଙ୍ରୁଡନ୍, ଡାଗାଗାଜନ୍ ଡ ରଙାଗାଜନ୍, ଡିନାନ୍ ଡ ତଗଲନ୍ ଡକୋତନ୍ ।”
Currently Selected:
ପର୍ତମ୍ମୁ 8: NTJaa20
Highlight
Copy
Compare
Share
Want to have your highlights saved across all your devices? Sign up or sign in
The Juray Soura Bible © The Word for the World International and Juray Soura Translation Samithi, Gajapati, Odisha. 2025
Videos for ପର୍ତମ୍ମୁ 8
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Episode 29: Did a Meteor Really Trigger Noah’s Flood?
Under The Hood
Ep 32. Genesis 6-7: The Flood: A Heartbroken God Brings Justice and Mercy
The Bible Show