रोमियों 11
11
इस्त्राएल मा परमेश्वर उन दया
1 #
फिलिप्पिगोळ ३:५
इदुरसाटी ना अनतीन, येन परमेश्वर तान लॉकुरी त्याग्स बुटुन? यागलु ईला! ना भी रा इस्त्राएली हुईन; अब्राहम उन वंश अदिक बिन्यामीन उन गोत्र दा टु आईन. 2परमेश्वर तान लॉकुरी त्याग्सीदील, यारी आव पयले टु अच निवळुसदुन. येन नीव जान्सालीर कि शास्त्र एलिय्याह अन बारा दा येन अनतद, याग आव इस्त्राएल इन विरोध दा परमेश्वर से विनती माळतान? 3“हे प्रभु, आंदुर नीन भविष्यवक्तागोळ्द घात माळदुर, अदिक नीन वेदीगोळी केळ्द बुटार; अदिक ना अच आबना ऊळदीन, अदिक आंदुर नानी भी कोन्नोर साटी खोज माळेत्यार.” 4लेकीन परमेश्वर से आऊक येन उत्तर सिक्त? “ना तान साटी येळ हजार गंळ्सुरी ईटकु बिटीन, यार ख्वाटा बाअल भगवान उन उपासना माळीदिल.” 5ठीक ईदा रीति देल ई समय भी, अनुग्रह देल निवळुस्द थ्वाळासा लॉकुर मिक्कु आर. 6अगर ईद अनुग्रह देल आग्याद, रा बाक कर्मगोळ देल ईला; ईदारा अनुग्रह बाक अनुग्रह ईतीदील.
7इदुरसाटी परिणाम येन आत? ईद कि इस्त्राएल यार्द खोज दा ईरोर, अद आंदरी सकिदील; लेकीन निवळुस्द लॉकुरी सिक्त, अदिक बाकी लॉकुर कठोर माळकु आदुर. 8ह्यांग शास्त्र दा लिख्सकु आद,
“परमेश्वर आंदुर मन अदिक दिलगोळी चेतना शुन्य माळ बुटान, अदिक हिंग कण्णगोळी कोट्टुन जो नोळबाळुल अदिक हिंग किव जो केळबाळुल.”
9अदिक दाऊद अनतान,
“आंदुर भोजन आंदुर साटी जाल अदिक फासा,
ताकी आंदुर बिळुल अदिक आंदरी दण्ड सिकुल.
10आंदुर कण्णगोळ मा अंधार छासेगुल ताकी नोळ ईला सकुल,
अदिक नी हमेशा आंदुर बेन इक बांग्सकु ईट.”
11इदुरसाटी ना अनतीन येन आंदुर इदुरसाटी ठोकर तिंदुर कि बिदोगुल? यागलु ईला! लेकीन आंदुर बिळोद कारण गैरयहूदीगोळी उद्धार सिक्त, कि आंदरी जलन आगुल. 12इदुरसाटी अगर आंदुर्द बिळोद दुनिया अन साटी धन अदिक आंदुर घटी गैरयहूदीगोळ साटी सम्पत्ति इन कारण आत, रा आंदुर्द भरपुरी देल येन आगतीदील.
गैरयहूदीगोळ्द उद्धार
13ईग ना नीव गैरयहूदीगोळ से ई मातगोळी अनतीन. यागासताका ना विशेष रूप देल गैरयहूदीगोळ साटी प्रेरित आईन, रा ना तान स्यावा अन प्रती बळाई माळतीन, 14ताकी यातोदारा रीति देल ना तान कुटुम्बगोळ दा जलन पैदा माळसुसकु आंदुर दा टु थ्वाळासा लॉकुर्द उद्धार माळसुसाईन. 15यतिकी अगर परमेश्वर उन द्वारा आंदुर नकार माळकु आगोद इदुर देल परमेश्वर उन सांगुळ मेल मिलाप आगतद रा बाक आंदुर अपनुसदुर देल येन सोत्तुर दा टु जित्ता आगोद आगतीदील? 16याग भेंट इन पयला लोई पवित्र ठहरूस्त, रा पुरा काल्सद हीट भी पवित्र आद; अदिक याग मार्र इन जळ पवित्र ठहरूस्त, रा खांदीगोळ भी हिंग अच आव.
17लेकीन अगर थ्वाळासा खांदीगोळ मुरूकु आदव, अदिक नी आळी दाकळोद जैतून आगकु अऊर्दा हचकु आद, अदिक जैतून इन जळ इन चिकनाई इन भागी आग्या, 18रा खांदीगोळ मा घमण्ड माळबाळेत; अदिक अगर नी घमण्ड माळ्या रा जान्स कोम कि नी जळ इक ईला लेकीन जळ नीनी संभाल्सतद. 19बाक नी अंद्या, “खांदीगोळ इदुरसाटी मुरूकु आदव कि ना अल हचकु आगाईन.” 20ठीक आद, अव रा अविश्वास इन कारण मुरूकु आदव, लेकीन नी रा विश्वास देल बन्सकु ईरत्या इदुरसाटी अभिमानी आगबाळ, लेकीन अंज्क मान्स, 21यतिकी परमेश्वर स्वाभाविक खांदीगोळी बिटीदिल रा नीनी भी बिळतीदील. 22इदुरसाटी परमेश्वर उन कृपा अदिक कठोरता अक नोळ! जो बिदोदुर आंदुर मा कठोरता, लेकीन नीन मा कृपा, अगर नी आऊन दा बन्सकु ईत्या, रा ठीक आद ईदारा नी भी कळकु आद्या. 23अगर यहूदी भी अविश्वास दा ईतीदील, रा हचकु मार्र से जोळ्सकु आदार; यतिकी परमेश्वर समर्थ आन अदिक आंदरी मात्त जोळ्स सकतान. 24यतिकी अगर गैरयहूदी आ जैतून देल, जो स्वभाव देल आळी दाकळोद आद, कळकु आत अदिक स्वभाव इन विरूद्ध वळ्लीद जैतून दा जोळ्सकु आत, रा ईव जो यहूदी खांदीगोळ आव, तांद अच जैतून दा येती हचकु आगतीदील.
पुरा इस्त्राएल इन उद्धार
25हे वार्टुरा अदिक आकतींगेरा, ईदारा हिंग आगबाळुल कि नीव तान तान इक बुद्धिमान सम्स कोमी; इदुरसाटी ना चाहासालीन कि नीव ई भेद देल अनजान ईरी कि यागासताका गैरयहूदीगोळ पुरा रीति देल प्रवेश माळ कोमालुर, आगासताका इस्त्राएल इन ऊंद भाग हिंग अच कठोर ईत्तीत. 26अदिक ई रीति देल सप्पा इस्त्राएल इक उद्धार सिक्कीत. ह्यांग शास्त्र दा लिख्सकु आद, “बिळसावाळा सिय्योन टु बंदान, अदिक अभक्ति इक याकूब उन वंशगोळ से दुर माळ्यान;#यशायाह ५९:२०-२१ 27अदिक आंदुर सांगुळ नान ईदा वादा आग आदीत, याग ना आंदुर पापगोळी दुर माळ बुळाईन.” 28यतिकी आंदुर खुशखबरी इक अस्वीकार माळदुर अदिक गैरयहूदीगोळ हेसुर इन कारण यहूदी परमेश्वर उन दुश्मन आगेदुर, लेकीन निवळुस्कु आगदुर देल आंदुर आंदुर्द आप्प दादागोळ्द कारण परमेश्वर उन प्रिय आर. 29यतिकी परमेश्वर तान वरदानगोळ देल यागलु बदलुसालुन अदिक आशीषगोळ अटल आव. 30यतिकी ह्यांग नीव गैरयहूदीगोळ पयले परमेश्वर उन आग्या मान्सीदील, लेकीन हांगा ईग यहूदीगोळ्द आग्या ईला मान्सदुर देल नीम मा दया आत; 31नीम मा जो दया आत अदुर कारण यहूदी ईग परमेश्वर उन आग्या मान्सालुर, इदुरसाटी कि ईग नीम घाई दया आंदुर मा भी आगुल. 32यतिकी परमेश्वर सप्पा मुंदरी आग्या उल्लंघन माळदुर कारण बंदी माळकु ईटदुन, ताकी आव सप्पा मुंदुर मा दया माळुल.
परमेश्वर उन स्तुति
33आहा! परमेश्वर उन धन अदिक दिमाक अदिक ग्यान येन महान आद! आऊन फैसलागोळी याव स्पष्ट माळ सकतान अदिक आऊन हादीगोळी याव सम्स सकतान!
34ह्यांग शास्त्र दा लिख्सकु आद, “प्रभु उन मन इक याव जान्स सकतान? अदिक आऊक याव सलाह कोळ सकतान? 35येन यावारा परमेश्वर उक येनारा कोटान यदरी आव मात्त आऊक वापस कोळुल?”
36 #
१ कुरिन्थि ८:६
यतिकी आऊंदा दी टु, अदिक आऊंदा द्वारा, अदिक आऊंदा साटी सब कुछ माळकु आग्याद. आऊन महिमा हमेशा हमेशा आगतेला ईरूल: आमीन.
Currently Selected:
रोमियों 11: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
