रोमियों 10
10
1हे वार्टुरा अदिक आकतींगेरा, नान मन इन अभिलाषा अदिक आंदुर साटी परमेश्वर से नान प्रार्थना आद कि आंदरी उद्धार सिक्कुल. 2यतिकी ना ई मात देल गवाही कोळतीन आंदुर परमेश्वर दा मगन ईरतार, लेकीन आंदुर भक्ति खरा ग्यान मा आधारित हैलेच. 3यतिकी आंदुर परमेश्वर उन न्यायीपन देल अनजान आगकु, अदिक तान न्यायीपन स्थापित माळोद कोशिश माळकु, परमेश्वर उन न्यायीपन इन हात्ती आगीदील. 4मसीह व्यवस्था अन अन्त माळदुन कि हर ऊंद जो विश्वास माळतान परमेश्वर उन साटी न्यायी आगुल.
उद्धार सप्पा मुंदुर साटी
5यतिकी मूसा ईद लिखस्यान कि जो मंळसा आ न्यायीपन मा जो व्यवस्था देल आद, नळुतान, आव अदुर देला जित्ता ईत्तान. 6लेकीन जो न्यायीपन विश्वास देल आद, अदुर बारा दा शास्त्र ईद अनतद, “नी तान मन दा ईद अनबाळेत कि, मसीह अक ईळ्सकु तरोरसाटी स्वर्ग मा याव येर्यान?” मतलब मसीह अक ल्यालमा तरोरसाटी, 7या “मसीह अक सोत्तुर दा टु जित्ता माळकु म्याकुच तरोरसाटी अधोलोक दा याव ईळदान?” मतलब मसीह अक सोत्तुर बाद्दा म्याकुच ओयोर साटी. 8लेकीन अद येन अनतद? ईद कि “वचन नीन हाती आद, नीन बाय दा अदिक नीन मन दा आद,” ईद अदा विश्वास इन वचन हुन, जो नाव प्रचार माळतेव, 9कि अगर नी तान बाय देल यीशु उक प्रभु जान्सकु अंगीकार माळ्या, अदिक तान मन देल विश्वास माळ्या कि परमेश्वर आऊक सोत्तुर दा टु जित्ता माळदुन, रा नीन जरूर उद्धार आदीत. 10यतिकी विश्वास माळदुर देल नाव परमेश्वर उन सांगुळ सही संबंध दा बरतेव अदिक बाय देल कबुल माळदुर देल नामी मुक्ति सिकतद. 11यतिकी पवित्रशास्त्र ईद अनतद, “जो यावारा आऊन मा विश्वास माळतान आव लज्जित आगतीदील.” 12यहूदीगोळ अदिक गैरयहूदीगोळ दा येनु फरक हैलेच, इदुरसाटी कि आव परमेश्वर सप्पा मुंदुर प्रभु हुन अदिक आव सप्पा मुंदुरी बहूतायत देल आशिषीत माळतान जो आऊक कारूतार. 13यतिकी शास्त्र दा लिख्सकु आद, “जो यावारा प्रभु उक मदत साटी कारूतान, आव ऊळ्सकु आदान.”
14लेकीन यार मा आंदुर विश्वास माळीदील, आंदुर आऊक ह्यांग मदत साटी कारदान? अदिक यार संदेश केळीदील आऊन मा ह्यांग विश्वास माळ्यार? अदिक प्रचारक बिना ह्यांग केळ्यार? 15अदिक अगर संदेश केळसावाळेर कळुकु आगतीदील, रा ह्यांग प्रचार माळ्यार? ह्यांग शास्त्र दा लिख्सकु आद, “आंदुर काल येन सुहावना आव, जो खुशखबरी हुडुकु बरतार#यशायाह ५२:७!” 16लेकीन सप्पा मुंदुर आ खुशखबरी मा किव हचीदिल: यशायाह अनतान, “हे प्रभु, याव नाम समाचार मा विश्वास माळ्यान#यशायाह ५३:१ ?” 17इदुरसाटी विश्वास संदेश इन केळदुर देल अदिक संदेश मसीह अन वचन देल आगतद.
18लेकीन ना अनतीन, येन आंदुर केळीदील? केळोद रा जरूरी आद; यतिकी शास्त्र दा लिख्सकु आद,
“आंदुर स्वर सप्पा पृथ्वी मा,
अदिक आंदुर वचन दुनिया अन आखरी ताका पोहचुसेग्याव.”
19ना मात्त अनतीन, येन इस्त्राएली ईला जानसोर? पयले रा मूसा अनतान,
“ना आंदुर द्वारा जो लॉकुर ईला, नीम मन दा जलन उपजुसाईन;
ना ऊंद मूळ लॉकुर द्वारा नीमी सिट्ट तोर्साईन#व्यवस्थाविवरण ३२:२१.”
20बाक यशायाह हापाळ हिम्मत इन सांगुळ अनतान,
“जो नानी ईला ढुंढसोर, आंदरी ना सिक्केदीन;
अदिक जो नानी केळतोगोर भी ईला, आंदुर मा ना प्रगट आगेदीन#यशायाह ६५:१.”
21लेकीन इस्त्राएल इन बारा दा आव ईद अनतान,
“ना पुरा दिन तान कय ऊंद आग्या ईला मानसावाळेर अदिक झगळा माळावाळेर लॉकुर दी पसरूस्कु ईत्तीन#यशायाह ६५:२ .”
Currently Selected:
रोमियों 10: Haa25
Highlight
Copy
Compare
Share
Want to have your highlights saved across all your devices? Sign up or sign in
The Holiya Bible © The Word for the World International and Holiya Translation Samithi, Kudwa, Gondia, Maharashtra 2025
