SEFELA SA DIFELA 8
8
1Ke eletsa jang
wa bo o ntse jaaka kgaitsadiake,
yo o amuleng mabele a ga mme!
Ke ne ke tlaa re ke go fitlhela
kwa ntle, ke go atle;
ee, mme go tlaa bo go se na ope
yo o ka nnyatsang.
2Ke ne ke tlaa go goga,
ke go isa mo ntlong ya ga mme,
yo o ne a tlaa nthuta;
ke ne ke tlaa go nosa bojalwa
jo bo tswaisitsweng,
jwa matute a garanate wa me.
3Letsogo la gagwe la molema
le ne le tlaa ntshametsa,
letsogo la gagwe le legolo
le ne le tlaa ntlamparela.
4Ke a lo ikanisa,
lona bomorwadia Jerusalema,
gore lo se tlhotlheletse,
le fa e le go tsosa lorato,
go tle go tsamaye go kgatlhege lona
pele.
SEFELA SA BORATARO
Basadi
5E mang yo o tlhatlogang
a tswa kwa nageng,
a ikaegile moratwi wa gagwe?
Sa Mosadi
O le fa tlase ga setlhare
sa moapole ka go tsosa.
Mmaago o ne a ikutlwa
go go belegela teng,
yo o go belegeng
a go elegela teng.
6Mpaya jaaka sekano
mo pelong ya gago,
jaaka sekano
mo letsogong la gago;
gonne lorato lo thata jaaka loso;
lefufa le bolaloma jaaka phupu,
go benya ga lone
ke go benya ga molelo,
kgabo ya ga Jehofa tota.
7Metsi a le mantsi
ga a kake a tima lorato,
le merwalela ga e kake
ya lo hupetsa;
le fa motho a ka bo a ntshetsa lorato
thoto yotlhe ya ntlo ya gagwe,
o ne a tlaa nyalediwa ruri fela.
Sa Bokgaitsadie mosadi
8Re na le kgaitsadia rona
yo mmotlana,
mme ga a na mabele:
re tlaa mo direlang, kgaitsadia rona,
mo tsatsing leo,
motlhang o lopiwang?
9Fa a le lorako,
re tlaa aga mo go ene
kago ya selefera;
fa a le setswalo,
re tlaa mo tsenya gare ga dimati
tsa masetara.
Sa Mosadi
10Nna ke lorako, le mabele a me
a ntse jaaka dikago tse di godileng
tsa lone.
Foo ke ne ke le mo matlhong a
gagwe jaaka mongwe
yo o ne a bona kagiso.
Sa Monna
11Solomone o ne a na le tshimo
ya mafine kwa Baale-hamone;
o ne a adima tshimo ya mafine
balebedi ka tuelo,
mme mongwe le mongwe wa bone
o ne a na le go lere
dipapetlana tsa selefera
di le makgolo a le some,
ka ntlha ya maungo a yone.
12Tshimo ya me ya mafine,
e e leng ya me,
e fa pele ga me:
wena Solomone, o tlaa bona
makgolo a le some,
le ba ba lebelang maungo a yone,
ba tlaa bona makgolo a le mabedi.
13Wena yo o agileng mo masimo,
thaka e reeditse go utlwa lentswe
la gago; e nkutlwise.
Sa Mosadi
14Itlhaganele, moratwa wa me,
mme o nne jaaka tshephe,
kgotsa jaaka kukamana
mo dithabeng tsa malao.
Currently Selected:
SEFELA SA DIFELA 8: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.