Isa 54
54
Wendo ûrîa Ngai-Mûnene endete Isiraeli naguo
1 #
Agal 4.27
Ngai-Mûnene arauga atîrî,
Ina, we mûndûmûka nthata we ûtaanaciara,
ugîrîria na wine na vinya,
we ûtaanegua ruuo rwa gûciara.
Nîûndû ciana cia mûndûmûka ûrîa ûtigîtwe nî nyîngî,
gûkîra cia mûndûmûka ûrîa ûrî na mûrûme!
2Araramia îgema rîaku,
na ûtambûrûkie itambaa cia kûrîa ûtûûraga,
ndûkegue vinya, gucagucia mîkanda,
na ûkindîre nthugî ciarîo.
3Nîûndû nîûgaatamba mîena yonthe,
nacio njiarwa ciaku nîikegwatîra ndûrîrî ituîke ciao,
namo matûûra marîa matiganîrie rîu nîmagecûra andû.
4Ndûgetigîre nîûndû ndûgaaconoka;
ndûkegue nthoni nîûndû ndûgaaconorithua.
Nîûkaariganîrwa nî gîconoko Kîam wîthî waku,
na ndûkaaririkana rûmena rûrîa warî naruo rîrîa warî mwîthî,
vîndî îrîa watûûraga wî wa ndigwa.
5Nîûndû ûrîa wakûmbire nîke mûthuuriguo,
Ngai-Mûnene mwene vinya wonthe nîrîo rîîtwa rîake.
Ûrîa Mûtheru wa Isiraeli nîke Mûkûri waku,
ke etagwa Ngai wa nthî yonthe.
6Jerusalemu, Ngai-Mûnene nîagwîtîte rîngî
ta mûndûmûka aratetwe nî mûrûme na arî na ruuo ngororî,
ta mûndûmûka avikîtue arî mwîthî akînatewa.
Ngai waku arauga atîrî,
7“Nagûtiganîrie kavinda kanini tu,
nwatî nîngaagûcokanîrîria ngîkwîgucagîra ntha nyîngî mûno.
8Nakûthithire ûthiû wakwa gwa kavinda kanini,
nîûndû wa ûrîa natûmbîtwe nî marakara,
nwatî nîngaakwîguîra ntha na wendo ûtathiraga.”
Ûguo nîguo Ngai-Mûnene Mûkûri waku arauga.
9 #
Kîam 9.8-17
“Nîmbîka wata ûrîa nekire vîndî ya Nuhu:
vîndî îo nînevîtire atî,
ndigaakunîka nthî rîngî na mwîcûro wa manjî.
Kwoguo rîu nînîvîtîte atî ndikaarakara nîwe rîngî,
na ndikaagûkûûma rîngî.
10Irîma nwa ithengute vo,
na tûrîma tûkarutwa vo,
nwatî wendo wakwa ûtathiraga ûrîa ngwendete naguo ndûkaathenguta kûrî we,
na kîrîkanîro gîakwa Kîam thayû gîtikaathengutua.”
Ûguo nîguo Ngai-Mûnene ûrîa ûkwîgucagîra ntha arauga.
Jerusalemu njerû
11 #
Kûguû 21.18-21
Ngai-Mûnene arauga atîrî,
“We Jerusalemu îtûûra rîîrî rînyarirîtwe,
we winainîtue nî rûkûngi rûnene,
na ndûrî na wa gûkûvooreria,
nîngaagûtuma rîngî na mathiga marî na marangi maro,
na ndume mûcingi waku na mathiga ma goro.
12Nîngaatuma nyomba ciaku ndaca na mathiga marîa matune,
nacio ivingo ciaku nîitume na mathiga marîa makanaga ta mwaki,
naruo rûthingo rwaku ruonthe rûtumwe na mathiga ma goro.
13 #
Joh 6.45
“Nie Ngai-Mûnene nînie ngathomithia ciana ciaku,
na nîikaagîa na thayû mwîngî.
14Nîûkeevanda ûvororî wa ûthingu.
Ndûkaavinyîrîrua rîngî na ndûkegua guoya;
na ndûkaamaka nîûndû kîmako gîtikaagûkuvîvîria.
15Mûndû wa wonthe angîgaaûka gûkûtharîkîra,
ndakethîrwa atûmîtwe nînie;
ûrîa wonthe ûgaakûtharîkîra, nîûkaamûvoota.
16“Taroria, nînie naûmbire mûturi wa indo cia cuuma,
ûrîa ûvurutaga mwaki wa makara,
agacoka agatura indo cia mbaara naguo.
Na nwanie naûmbire mûndû ûrîa ûcûkangagia akathiria.
17Gûtirî indo cia mbaara irîa irûthîtwe cia gûgûcûkangia ikaavota gwîka guo.
Mûndû ûrîa ûgaakûthitanga îgootirî nîûkaamûvoota.
Rîîrî nîrîo îgai rîa ndungata cia Ngai-Mûnene,
na rîu nîrîo îtua rîakwa kûrî o.”
Nie Ngai-Mûnene nînie nauga ûguo.
Currently Selected:
Isa 54: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
