Isa 5
5
Rwîmbo rwa mûgûnda wa Mîthavibu
1 #
Mat 21.33; Mar 12.1; Luka 20.9 Ta minîre mwendwa wakwa rwîmbo,
mwendwa wakwa aarî na mûgûnda wa mîthavibu,
mûgûnda warî kîrîmarî Kîamrî na mûthetu mûnoru mûno.
2Nîwacimbire mûgûnda ûcio na akîûngania mathiga monthe;
na akîvanda mîthavibu îrîa mîaro mûno.
Nîwatumire nyomba ndaca na îgûrû gatagatî ka mûgûnda ûcio nîûndû wa kûûgitîra,
na akîrûtha vandû va kûvivîra ndivei kûu mûgûndarî.
Nîweterere mîthavibu iciare,
nwatî mîthavibu îo yaciarire thavibu cia kîthaka.
3Kwoguo rîu mûrata wakwa arauga atîrî,
“Mue andû arîa mûtûûraga Jerusalemu na andû a Juda,
nînîramûthaitha mûtue cira gatagatîrî gakwa na mûgûnda wakwa wa mîthavibu.
4Nî ûndû ûrîkû nîngîekire mûgûndarî wakwa,
ûrîa nie naregire gwîka?
Rîrîa netererete ûciare thavibu mbaro,
nîndûî gîatûmire ûciare thavibu cia kîthaka?
5Rîu nîngûmwîra ûrîa ngwîka mûgûnda wakwa wa mîthavibu.
Nîngûthengutia rûgiri rwaguo,
na nîûgûcûkangua;
nîngwomomora rwirigo rwaguo,
na nyamû cia kîthaka nîigaaûkinyanga.
6Nîngaaûrekereria ûcûkangue viû;
ndigacaa mîthavibu ya mûgûnda ûcio na ndîkaamîrîmîra.
Nîûkaamera nthaugû na mîgua;
na nîngaatha matu matikaurithie mbura mûgûndarî ûcio rîngî.”
7Nîûndû mûgûnda wa Ngai-Mûnene mwene vinya wonthe nî nyomba ya Isiraeli.
Andû a Juda nîo mîthavibu mîaro îrîa aavandire;
eevokaga nîmagwîka ûrîa kwagîrîrîte,
nwatî vandû va ûguo, nîmaûraganîte;
eevokaga nîmakwîthîrwa marî athingu,
nwatî vandû va ûguo nîmaatûmire kûgîe na kîrîro.
Mawaganu marîa mekagwa nî andû
8Mue nyomba na mîgûnda kaî mûrî na thîna-î,
mwongagîrîra mîgûnda kûrî îrîa mûgûrîte,
nginya rîrîa gûkethîrwa gûtarî na vandû mûndû wîngî angîtûûra,
na mûgatûûra mûrî muenga.
9Nîmbîguîte Ngai-Mûnene mwene vinya wonthe akiuga atîrî,
“Nama nyomba nyîngî igaatigwa irî ntheri,
nyomba nene na mbaro itarî na andû a gwîkara kuo.
10Mûgûnda wa mîthavibu wa eka îkûmi ûkaaumaga lita inyanya cia ndivei.
Mûndû ûrîa ûkaavanda kilo îgana rîmwe cia mbegû agaaketha kilo îkûmi tu cia ngano.”
11Kaî marî na thîna-î! Arîa maramûkaga kîraûko tene,
nîguo mathiî makanyue ndivei;
arîa matukagîrwa makînyua ndivei,
nginya rîrîa makaarîwa nîyo.
12Methagîrwa marî na ngita, inanda,
tamburini, mîtûrirû na ndivei marugarî mao.
Nwatî matiîciragia maûndû megiî ciîko cia Ngai-Mûnene,
kana mamenya ûrîa ekîte.
13Kwoguo nîngaavira andû akwa îthamîriorî nîûndû wa kwaga ûmenyo.
Atongoria ao nîmagaakua nî yûra,
na andû eengî nîmagaakua nî nyonda.
14Kwoguo kwa arîa akuû nîkûmetererete na vinya,
kwathamîtie kanyua ga kuo nginya mûthiia.
Atongoria na andû arîa engî a Jerusalemu matonyaga kuo marî ikundi,
wa vamwe na andû eengî arîa magûkenagîrîra.
15Andû onthe nîmagaaconorithua,
nao arîa onthe etîi megwithue nthoni.
16Nwatî Ngai-Mûnene mwene vinya wonthe onanagia ûnene wake na njîra ya gûtuîra andû ciira na kîvooto,
na akonania ûtheru wake na njîra ya ûthingu wake.
17Twori twa ng'ondu, twori twa mbûri na tûcaû,
tûkaarîcaga nyaki matûûrarî marîa momomoku.#5.17 Kamûvari gaka na Kîhibirania gatiereekaga.
18Kaî marî na thîna-î! Arîa mekaraga makururîtie mevia,
arîa maguucagia mevia na mîkanda ta mûkokoteni.
19Maugaga atîrî, “Tiga Ngai-Mûnene eke maûndû na îvenya,
nîameke narua, nîguo tûmone.
Tiga mîvango ya Ûrîa Mûtheru wa Isiraeli îvinge, nîguo tûmîmenye.”
20Andû arîa metaga maûndû macûku maro kaî marî na thîna-î,
namo maûndû maro makameta macûku.
Arîa maugaga nduma nî ûtheri,
naguo ûtheri nî nduma.
Arîa maugaga kîndû kîrîa kîrûrû kîrî mûrîo,
nakîo kîrîa kîrî mûrîo nî kîrûrû.
21Andû arîa meyonaga marî aûgî kaî marî na thîna-î,
arîa meyonaga marî na wara mwîngî.
22Mue arîa mwatuîkîte tûnavû twa ndivei kaî mûrî na thîna-î!
njorua cia kûnyua mîthemba mwanyamwanya ya njovi.
23Arîa mavakagwa nîguo marekererie arîa marî na mavîtia,
na makaima arîa athingu kîvooto Kîamo.
24Kwoguo wata ûrîa mwaki ûvîvagia rûûa na nyaki,
nwaguo mîri yao îkoora na maûa mao makaaûma na magûrûkue îgûrû ta rûkûngû;
nîûndû nîmaregete watho wa Ngai-Mûnene mwene vinya wonthe,
nîmanyararîte maûndû marîa Ûrîa Mûtheru wa Isiraeli athomithanîtie.
25Kwoguo Ngai-Mûnene nî mûrakaru nî andû ake,
nîatambarûkîtie njara yake akamaûraga.
Irîma nîithingithîte,
na ciimba cia andû arîa maûragîtwe ciîkariî ta ndagara njîrarî.
Kûnarî ûguo, marakara make matiathira,
nwatî nwa atambarûkîtie njara amaverithie.
26Ngai-Mûnene nîakaamenyithia vûrûri wa kûraca,#5.26 vûrûri wa kûraca: Kîhibirania kiugaga, ‘mavûrûri ma kûraca.’
na augîrie andû mûrûri kuuma mîthiia ya nthî;
nao magaaûka mavinyûrîte.
27Gûtirî wanarî mûndû ûkaanoga kana avîngwa;
gûtirî ûkaagocerera kana amame,
gûtirî mûndû ûkethîrwa na mûcivi mûregerû kîûnûrî;
na gûtirî ûkethîrwa na rûrigi rwa kîratû rûtuîku.
28Mîguî yao nî mîûgî, na mota mao nîmatunge.
Mavûngû ma mbarathi ciao maûmîte ta mathiga,
na magûrû ma ikaari ciao mavinyûraga ta rûkûngi.
29Athigari ao mararamaga ta mînyambû,
mararamaga ta mînyambû mîthî,
înyitîte kîndû na îgakîvira kûndû kûraca,
na gûtirî mûndû ûngîmîcuna.
30Mûthenya ûcio makaararamîra Isiraeli,
ta ûrîa makûmbî ma manjî marurumaga.
Mûndû ûrîa ûkaaroria nthî nyûmû,
akoona nduma na mathîna! Ûtheri nîûgakunîkwa nî matu.
Currently Selected:
Isa 5: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
