Isa 43
43
Ngai nîweranîre nîakaavonokia andû ake
1Ngai-Mûnene ûrîa wamûmbire mue andû a Jakovu, ûrîa watûmire mûgîe kuo mue andû a Isiraeli arauga atîrî,
“Mûtigetigîre nîûndû nie nînie nîmûkûûrîte;
nîmwîtîte na ngamûva rîîtwa, mue mûrî akwa.
2Rîrîa mûkûvîtûkîrîra manjîrî ngethagîrwa nîrî vamwe namue;
na mûkîvîtûkîrîra nyûnjîrî itikaamûkîria vinya.
Rîrîa mûkavîtûkîrîra mwakirî mûtikaavîa,
na rûrîrîmbî rûtikaamûvîvia.
3Nîûndû nie nînie Ngai-Mûnene Ngai wenyu,
Ûrîa Mûtheru wa Isiraeli, mûvonokia wenyu.
Nîngûvecana îrîvi Misiri nîguo ngûkûûre,
nîngûvecana Ethiopia na Seba nîguo mûrekererue.
4Nîûndû mûrî andû a vata mbere yakwa,
na nîmûtîîte na ngamwenda,
nie nîngûnenganîra andû nîûndû wenyu,
nîngûnenganîra mavûrûri nîguo nîmûvonokie.
5Mûtigetigîre nîûndû nîrî vamwe namue!
Nîngaamûretere njiarwa cienyu kuuma mwena wa îrathîro,
na nîmacokanîrîrie kuuma mwena wa îthûîro.
6Nîngera mwena wa rûgûrû, ‘Marekererie mathiî,’
naguo mwena wa îveti nîwîre, ‘Ndûkamavingîrîrie.’
Cokiani andû akwa kuuma mavûrûri ma kûraca,
na mûrete erîtu akwa kuuma mîthiia ya nthî.
7Andû onthe arîa metanagua nanie,
arîa naûmbire nîûndû wa riiri wakwa,
arîa naûmbire na ngîtûma magîe kuo.”
Isiraeli nî mûira wa Ngai-Mûnene
8Ngai arauga atîrî,
“Reteni andû acio wana ethîrwa marî na metho, nî ndumumu,
acio matiîgucaga, wana ethîrwa marî na matû!
9Andû onthe a ndûrîrî nîmacokanîrîre vamwe,
andû onthe nîmagomane vamwe.
Nî ûrîkû gatagatîrî kao ûngîvota kwanîrîra maûndû mama?
Na atwonie maûndû marîa marekîka rîu?
Nîmarete aira ao a kwonania atî nî ûma,
tiga andû arîa makûthikîrîria mauge atî, ‘Ûcio nî ûvoro wa ma.’ ”
10Ngai-Mûnene arauga atîrî,
“Mue Aisiraeli mûrî aira akwa;
namûthuurire mûtuîke ndungata ciakwa,
nîguo mûûmenye na mûmbîtîkie,
gûtirî ngai îngî tiga Nie.
Na mûmenye atî nie nînie Ngai,
gûtirî ngai îngî yarî kuo mbere yakwa na gûtikaagîa.
11“Nie nienga tu, nînie Ngai-Mûnene,
na gûtirî mûvonokia wîngî tiga nie.
12Ngai-Mûnene augîte atî:
Nînaamenyithanirie maûndû marîa magekîka,
ngîanîrîra na ngîvonokania,
gûtiarî na ngai îngî ng'eni gatagatîrî kenyu;
na mue mûrî aira akwa.
13Nie nînie Ngai na nîndûûra nîrî Ngai.
Gûtirî mûndû wanarî ûmwe ûngîîvonokia kuuma njararî ciakwa;
gûtirî mûndû ûngîndigîrîria ngîruta wîra wakwa.”
Gûkûûrwa kuuma Babuloni
14Ngai-Mûnene Mûkûri wenyu Ûrîa Mûtheru wa Isiraeli arauga atîrî,
“Nîngûtûma athigari a mbaara kûu Babuloni nîûndû wenyu,
na nîngaaunanga ivingo cionthe cia îtûûra rîu,
na gîkeno Kîam Akalidei nîgîgaatuîka macakaya.
15Nie nînie Ngai-Mûnene, ûrîa Mûtheru wenyu.
Nînie naûmbire Isiraeli, na nînie Mûthamaki wenyu.”
16Ngai-Mûnene arauga atîrî,
“Nînarûthire njîra îriarî,
na ngîrûtha gacîra manjîrî meengî,
17nînarûire na athigari njamba cia mbaara,
maarî na ikaari cia mbaara na mbarathi.
Mamaamîte nthî, na matingîavotire gûkîra,
makîthira na makîvora ta rûtambi rwa taa!
18“Mûtikaririkane maûndû marîa mavîtûku,
kana mwîciria ûvoro wa maûndû ma tene.
19Taroriani, nîngwîka ûndû mûcerû.
Naguo nîûrekîka rîu, nîkwa mûtarawona!
Nîngûtema njîra werûrî
na ndûme kûu werûrî kûgîe na nyûnjî.
20Nyamû cia kîthaka nîikaandîîa,
ciathi na nyaga nîikaangumia;
nîûndû nîngaatûma werûrî kûgîe na manjî,
werûrî kûgîe na nyûnjî,
nîguo andû akwa arîa athuure monage gîa kûnyua.
21Acio nî andû arîa naûmbire marî akwa nie mwene,
nîguo managîrîre ngumo yakwa!
Wîvia wa Isiraeli
22“Kûnarî ûguo, we Jakovu ndwangooca;
we Isiraeli, nîûnogetue nînie.
23Ndwamindîre ng'ondu yaku ya matega ma kûvîvua,
kana ûndîîa na magongoona maku.
Ndiakûritûvîra ngîgwîtia matega,
kana ngûnogia ngîgwîtia ûbani.
24We ndwangûrîra ûbani,
kana ûmvaithia na nyama irîa noru cia magongoona maku.
Vandû va ûguo we nîûnditûvîrîte na mevia maku,
nîûnogetie na mavîtia marîa wîkîte.
25Nie nînie nakwoveere mevia maku nîûndû wa kwenda gwakwa,
na ndikaaririkana mevia maku.
26“Ta ndirikania, tiga tûciire twî vamwe!
Aria maûndû maku nîguo wonekane atî wî na ûma!
27Îthe waku wa mbere#43.27 Îthe waku wa mbere: ava vorotete Jakovu kana Iburahimu, kana nîûvûthû vethîrwe vorotete Adamu. nîwevirie;
nao arîa maakwaragîrîria nîmaareganire nanie.
28Kwoguo nînaagwatirie atongoria a varîa vatheru mûgiro.
Nînarekererie Isiraeli macûkangue viû;
na ngîtîkîria andû akwa marumwe.”
Currently Selected:
Isa 43: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
