Isa 42
42
Ndungata ya Ngai-Mûnene
1 #
Mat 3.17; 17.5; Mar 1.11; Luka 3.22; 9.35 #Mat 12.18-21 Ngai-Mûnene arauga atîrî,
“Îno nîyo ndungata yakwa, îrîa mbîkagîra vinya,
nîyo nîîthuurîrîte, na nîyo îngenagia,
nînîmwîkîrîte Roho wakwa,
nîyo îkaarete kîvooto mavûrûrirî.
2Ndîkaanîrîra kana yugîrîria,
kana îtûma mûgambo wayo wîguîka njîrarî.
3Ndîkaauna kamûthanje kagondoku,
kana îvoria rûtambi rûtagwakana waro.
Îgaatucanagîra ciira na kîvooto.
4Ndagaakua ngoro kana athirwe nî vinya,
nginya rîrîa agaatûma kîvooto kîîvande gûkû nthî,
andû arîa matûûraga icîgîrîrarî na ndeere cia îria metagîrîra watho wake.”
5 #
Ciîko 17.24-25
Ûguo nîguo Ngai-Mûnene arauga,
ûrîa waûmbire îgûrû na akîrîtambûrûkia,
nîke waûmbire nthî na indo cionthe irîa irî kuo,
nîke ûvecaga andû arîa matûûraga kuo mîvevû,
na akava mwoyo arîa matûûraga kuo.
6 #
Isa 49.6; Luka 2.32; Ciîko 13.47; 26.23 Nînie Ngai-Mûnene ngwîtîte wîke maûndû na kîvooto,
nîngûnyitîte njara na ngakûgitîra.
Na njîra yaku nîndûthîte kîrîkanîro na andû onthe,
we ûgaatuîka ûtheri wa mavûrûri.
7Nîûkaavingûra metho ma itumumu,
nîûkaaruta andû arîa ove njeera,
na ûrete ûtheri kûrî arîa mekaraga ndumarî.
8“Nie nînie Ngai-Mûnene rîu nîrîo rîîtwa rîakwa.
Gûtirî wîngî ngaava riiri wakwa,
kana mvecana ngumo yakwa kûrî mîvuanano ya kumua.
9Taroria maûndû marîa naarathire rîu nîmavingu.
Rîu nîngûratha maûndû macerû,
nîngwîra mo mbere ya mekîke.”
Rwîmbo rwa gûkumia Ngai
10Inîrani Ngai-Mûnene rwîmbo rûcerû,
nthî yonthe nîîmwinîre nyîmbo cia kûmûkumia!
Îria na nyamû cionthe irîa itûûraga kuo,
icîgîrîra na ndeererî cia îria na andû arîa matûûraga kuo!
11Werû na matûûra marîa marî kuo nîmaugîrîrie,
andû a icagi cia Kedari nîmamûkumie!
Andû arîa matûûraga Sela nîmaine makenete,
nîmaugîrîrie marî îgûrû rîa irîma!
12Arîa onthe matûûraga ndeererî cia îria,
nîmakumie Ngai-Mûnene na mamûgooce.
13Ngai-Mûnene aumagarîte ta njamba îrî vinya,
evarîrîtie kûrûa ta mûthigari arî mbaararî.
Nîaraugîrîria, aranîrîra na mûgambo mûnene,
na nîareyonania arî na vinya gûkîra nthû ciake.
Ngai nîweranîre gûtethia andû ake
14Ngai arauga atîrî,
“Nîngirîrîrîtie kavinda karaca,
ngakira kivi na ngevinga gwîka wanarî ûndû.
Nwatî rîu nîngûrîra ta mûndûmûka arî na ûrûrû wa gûciara,
nî ndeva na mbevûkîrîre na vinya.
15Nîngaacûkangia irîma na tûrîma,
na nyûmithie tûmîtî tuonthe twa kuo.
Nîngaavûîthia nyûnjî ituîke nthî nyûmû,
na mvûîthie manjî marîa marî mariarî.
16“Nîngaatongoreria itumumu njîrarî irîa mataicî.
Ngaamatongoreria tûcîrarî tûrîa matamenyete.
Nîngaagarûra nduma îrîa îrî mbere yao îtuîke ûtheri,
na kûndû kûrîa gûtarî kwaraganu nîkwaraganie.
Mama nîmo maûndû marîa ngeeka,
na ndikaamatiganîria.
17Arîa onthe mevokete mîvuanano,
arîa metaga mîvuanano ya kumua ngai ciao,
nîmagaacokithua na maconorithue.”
Isiraeli nîmaaregire kûthoma
18Ngai-Mûnene arauga atîrî,
“Tathikîrîriani mue mûtegucaga!
Mue itumumu roriani waro,
nîguo mûvote kwona!
19Nû mûtumumu tiga ndungata yakwa,
kana gîtaigua ta mûnjaama ûrîa ndûmaga?
Nû mûtumumu ta mûndû ûrîa nîyamûrîrîte,
kana ta mûtumumu ndungata ya Ngai-Mûnene?
20Mue nîmwonete maûndû meengî,
nwatî mûtitaûkagîrwa nî ûndû.
Matû menyu nî mavingûre,
nwatî mûtiîgucaga.”
21Nîûndû wa wîvokeku wa Ngai-Mûnene,
nîwendire gûtûgîria watho wake na kûûva riiri.
22Nwatî aya nî andû aîe indo na magatavwa,
onthe nîanyitîre marimarî nî mûtego na makathithwa njeera.
Mekariî ta nyamû iguîmîtwe matarî na mûndû wa kûmavonokia,
Nî atave na gûtirî wa kuga atî:
“Nîmacokue kwao!”
23Nû gatagatîrî kenyu ûgûtegera ûndû ûyû gûtû?
Nû ûkaathikîrîria waro maûndû marîa magekîka?
24Nû wanenganîre Jakovu kûrî acunani?
Nîûrîkû wanenganîre Isiraeli kûrî aîi?
Nî Ngai-Mûnene ûrîa twevîîrie!
Na methe metû makîrega kûrûmîrîra njîra ciake,
kana kwathîkîra mawatho make.
25Kwoguo nîwametûrûrîre marakara make,
na akîmarekereria matharîkîrwe na mbaara.
Marakara make maamathiûrûrûkîrie mîena yonthe ta mwaki,
nwatî matiataûkîrwa nî gîtûmi;
marakara mau maamavîvirie nwatî matiethomithia ûndû.
Currently Selected:
Isa 42: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
