Isa 35
35
Njîra ya Ûtheru
1Kûndû kûrîa gûtakûraga irio na kûndû kûrîa kûnyaru nîgûgaacanjamûka,
werû nîûgaakena na kûmere maûa.
2Nîgûkaamera maûa meengî,
na kwine gûcanjamûkîte na gîkeno.
Werû nîûkaavewa riiri wa Lebanoni,
ûthaka wa kîrîma gîa Karimeli na wa Kîamnda gîa Sharoni.
Nîmakoona riiri wa Ngai-Mûnene,
nîmakoona ûnene wa Ngai wetû.
3 #
Ahib 12.12
Ongererani vinya njara icio icunjurîte,
na mwongerere vinya maru mau maregerû.
4Îrani arîa marî na guoya ngoro atîrî,
“Îyûmîrîrieni, tigani gwîtigîra!
Taroriani Ngai wenyu nîagaaûka kûmûrîvîrîria,
nîagaaûka kûverithia nthû cienyu,
ke mwene nîagaaûka kûmûvonokia.”
5 #
Mat 11.5; Luka 7.22 Itumumu nîikaavota kwona,
na itaigua nîikaavota kwîgua.
6Cionje nîikaarûgarûga ta ngûrûngû,
nao andû arîa matarî ûvoti wa kwaria nîmakaaina makenete.
Manjî nîmakaatherûka werûrî,
natuo tûrûnjî nîtûkaanyûrûrûka werûrî;
7mûthanga ûrîa ûvenavenagia ta mwaki werûrî nîûgaatuîka îria rîa manjî,
nayo nthî nyûmû nîkaatherûka manjî.
Kûrîa ciathi itûûraga nîgûgecûra manjî,
nyaki nîkaamera na îkûre îkare ta mûthanje na marura.
8Kûu werûrî nîgûkaagîa varavara nene, nayo nîgetwa, “Njîra Ntheru.” Gûtirî mûndû mwîvia ûkaavîtûkîrîra varavararî îo,#35.8 Mûvari ûyû na Kîhibirania ndwereekaga. na irimû itikaavîtia njîra îo.
9Gûtirî mînyambû îkethîrwa njîrarî îo,
kana nyamû wa yonthe mbaganu îvîtûkîrîra varavararî îo.
Nyamû icio itikooneka varavararî îo,
nwatî andû arîa akûre nîo makaavîtûkîrîra kuo.
10Arîa maakûûrirwe nî Ngai-Mûnene nîmagaacoka,
magaaûka Zayuni magîkûngûagîra,
makethîrwa marî na gîkeno gîa tene na tene.
Nîmakethîrwa marî na gîkeno na marî acanjamûku,
kîeva na kîrîro nîikaathira viû.
Currently Selected:
Isa 35: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
