Isa 34
34
Ngai nîakaaverithia nthû ciake
1Mue andû a mavûrûri monthe ma nthî ûkani vakuvî mwîgue,
mue andû a ndûrîrî cionthe ta thikîrîriani!
Nthî ta nîîthikîrîrie, wana indo cionthe irîa ciîcûrîte kuo;
nthî, wana indo cionthe irîa ciumaga kuo ta nîithikîrîrie.
2Nîûndû Ngai-Mûnene nî mûrakaru nî mavûrûri monthe,
arî na mang'ûrîka nîûndû wa athigari ao onthe a mbaara.
Nîavangîte kûmathiria viû,
akamarekereria maûragwe.
3Ciimba ciao igatewa na kûu nja,
na mûnungo wa ciimba ciao wîcûre vûrûrirî;
nayo nthakame yao îkanyûrûrûka kuuma irîmarî.
4 #
Mat 24.29; Mar 13.25; Luka 21.26; Kûguû 6.13-14 Athigari onthe a îgûrû rîerarî nîmakaathira,
nakuo îgûrû rîerarî nîgûgakûnjwa ta îvuku rîa gîkûnjo.
Indo cionthe irîa irî îgûrû nîikaagwa,
ta ûrîa mathangû ma mûthavibu magûcaga mavoova,
kana ta ûrîa mathangû ma mûkûyû magûcaga mavoova.
5 #
Isa 63.1-6; Jer 49.7-22; Ezek 25.12-14; 35.1-15; Amo 1.11-12; Oba 1-14; Mal 1.2-5 Nîûndû rûviû rwa Ngai nî rûvarîrîrie îgûrû,
taroriani, rûranyûrûrûka rûthiîte kûverithia Edomu,
andû arîa avangîte kûthiria.
6Ngai-Mûnene arî na rûviû na rwîcûrîte nthakame,
nî rûvake maguta,
na rûrî na nthakame ya ng'ondu na ya mbûri,
na maguta ma mbigo cia ndûrûme.
Nîûndû Ngai-Mûnene arî na îgongoona kûu Bozira,
nîakaaûraga andû eengî mûno kûu vûrûrirî wa Edomu.
7Mbogo cia njamba ikaaûraganîrua vamwe nao,
natuo tûregwa tûraganîrue vamwe na ndegwa irîa irî vinya.
Vûrûri wao nîûgecûra nthakame,
naguo mûthetu wao ûnorue nî maguta mao.
8Nîûndû Ngai-Mûnene arî na mûthenya wa kwîrîvîrîria,
mwaka ûrîa akarîvîrîria Zayuni kuuma kûrî nthû ciayo.
9Tûrûnjî twa Edomu nîtûkaagarûrûka tûtuîke rami,
naguo mûthetu wa kuo ûtuîke ûviriti.
Vûrûri wonthe ûgaatuîka ta rami îgûakana mwaki.
10 #
Kûguû 14.11; 19.3 Mwaki ûcio ûgaakanaga ûtukû na mûthenya,
nayo ndogo yaguo îgaatûûra yunûkagia na îgûrû tene na tene.
Vûrûri ûcio ûgaatûûra ûrî werû njiarwa na njiarwa,
gûtirî mûndû ûkaavîtûkîrîra kuo tene na tene.
11Nwatî mvûngû na njege nîcio igatûûra kuo,
ndundu na ikûngûrû nîigaatûûra kuo.
Ngai-Mûnene nîakaamaretere kîvîngîcî,
na arete kîrigicano kûrî anene a kuo.
12Gûtikaagîa na mûthamaki wa kwatha vûrûri ûcio,
na gûtikethîrwa kûrî na anene vûrûrirî ûcio.#34.12 Na Kîhibirania, kamûvari gaka kambîrîrîtie na kiugo gîtereekaga.
13Mîgua nîkaamera kûndû kwao kûrîa kûgitîre,
ria na mîgua nîgaakûra kûndû kûrîa kûrî na nthingo cia vinya.
Kûu nîkuo gûgatûûraga ciathi na nyaga.
14Nyamû cia kîthaka na mviti nîcio ikaaûrûraga kuo,
ngoma nîigetanaga kuo,
naguo ûtukû ûgaatuîka ûtheri kûrî cio,
na nîikonaga gwa kûnogoka.
15Ndundu nîigaatuma ciomba ciacio,
irekerie matumbî kuo,
irumbûrîre kuo na irerere tûcui twacio kûu rungu;
kûu nîkuo tûrwîgî tûkaagomana,
wa karwîgî na karîa kengî.
16Cariani na mûthome kuuma îvukuurî rîa Ngai-Mûnene,
gûtirî kîûmbe wanarî kîmwe gîgaatura,
wa kîmwe gîkethîrwa kîrî na mûnyanya.
Nîûndû Ngai-Mûnene nîke wathanîte ûguo,
na Roho wake nîke ûgaciûngania cionthe.
17Ngai-Mûnene nîagaîrîte wa kîûmbe vandû vakîo,
nîaigaîrîte vûrûri na rûrigi,
nîikegwatîra kûndû kûu tene na tene.
Igaatûûra kuo njiarwa na njiarwa.
Currently Selected:
Isa 34: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
