Isa 32
32
Mûthamaki mûthingu
1Nîgûkaagîa na mûthamaki ûkaathanaga na ûthingu,
na anene mathanage na kîvooto.
2Wa mûndû agaatuîka ta kûndû gwa kwîthitha rûkûngi,
kana ta vandû va kwîthitha rûkûngi rûnene,
kana ta tûrûnjî tûrî kûndû kûnyaru,
kana ta mwîgunyî wa îthiga înene werûrî.
3Metho ma arîa monaga matikaavingwa,
namo matû ma arîa megucaga nîmakaathikîrîria.
4Arîa mavinyûraga gwîka maûndû matambîte gwîciiria,
nîmakaamenya maûndû ma ûûgî,
nao arîa manyenyaga nî makaaria mîario îrûngîrîrîtie.
5Mûndû ûrîa kîrimû ndakagîa na îgweta,
kana kîmaramari kîgathîrîrue.
6Nîûndû irimû ciaragia ûrimû,
na meciria ma cio mavangaga maûndû macûku.
Mekaga maûndû matarî ma ûngai,
maragia maûndû ma gûcambia Ngai-Mûnene.
Matigaga andû arîa avûtu matarî avau,
na makaima arîa anyondu gîa kûnyua.
7Mîthiîre ya mûndû ûrîa mûthunu nî mîcûku;
avangaga maûndû ma waganu
nîguo acûkangie athîni na ciugo ciake cia maveeni,
wana rîrîa athîni maretia kîrîa kîmagîrîrîte.
8Nwatî mûndû mûtîîku ekaga maûndû ma gîtîîo,
na arûngamagîrîra ûma.
Mataaro kûrî aka a Jerusalemu
9Ûkîrani, mue aka aya mûtûûraga mwîganîrîte,
thikîrîriani mûgambo wakwa,
mue erîtu aya mûtarî ûndû mwîtigagîra,
thikîrîriani ûrîa nguuga.
10Kwa îvinda ta rîa mwaka ûmwe,
mue mwîganîrîte ûguo nîmûgaatetema,
nîûndû mûtigaketha kîndû,
na maketha ma thavibu matikoneka.
11Inainani, mue aka aya mwîkaraga mwîganîrîte,
tetemani mue mûtarî ûndû mwîtigagîra;
rutani nguo cienyu, mûtigwe mûrî njaga,
na mwîyove nguo cia macakaya ciûnorî cienyu.
12Îîvûûreni ithûri mûrî na kîeva Kîam mîgûnda yenyu îrîa mîaro,
na nîûndû wa mîthavibu îrîa îciaraga mûno,
13nîûndû wa vûrûri wa andû akwa nîûramera mîgua na nthaugû,
mûrîrîre nyomba cionthe irîa ciecûrîtwe nî gîkeno,
na ciarî îtûûrarî rîrî na gîkeno.
14Nîûndû nyomba ya mûthamaki nîkaathamwa,
na îtûûra rîrî îgweta ûguo rîtiganîrue.
Irîma na nyomba ndaca na îgûrû cia arangîri igaatuîka maganjo tene na tene,
nyûmbû nîigaakenaga irî kuo,
na ng'ondu irîcage kuo.
15Gûkaathiî na mbere gwîkara ûguo nginya rîrîa tûkaanyûrûrûkîrua Roho kuuma îgûrû.
Vîndî îo werû nîûgaatuîka mûgûnda umaga maciaro,
nayo mîgûnda îrîa mînoru îtuîke mûtitû.
16Kîvooto nîgîgaacoka kûonekana werûrî,
naguo ûthingu ûtûûrage mûgûndarî ûrîa uumaga maciaro.
17Naguo ûndû ûrîa ûkaaumana na ûthingu nî thayû,
naguo ûthingu nîûgaatûma kûgîe ûvooreri na wîvokeku tene na tene.
18Andû akwa magaatûûraga kûndû kûrî na thayû,
kûndû kûgitîre na kûndû gûtarî na thîna.
19Naguo mûtitû nîûkaathirua viû,
narîo îtûûra rîcûkangue viû.
20Gûkena nî mue arîa mûvandaga mbegû cienyu ndeererî cia manjî,
ng'ombe na mvunda cienyu ikerîthagia kûndû kuonthe itagwîtigîra.
Currently Selected:
Isa 32: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
