Isa 31
31
Ngai nîakaagitîra îtûûra rîa Jerusalemu
1Kaî arîa mathiîcaga Misiri gûcaria ûtethio marî thînarî-î,
arîa mevokaga mbarathi nîûndû atî nî nyîngî,
arîa mevokaga ikaari ciao cia mbaara nîûndû nî nyîngî,
na athigari arîa mathiîcaga matwîte mbarathi nîûndû marî vinya nyîngî,
nwatî matiîvokaga Ûrîa Mûtheru wa Isiraeli,
kana maûria ûtaaro kûrî Ngai-Mûnene.
2Kûnarî ûguo, Ngai nî mûûgî na nîaretage mûthiro.
Ûrîa augîte ndericûkagwa,
na nîevarîrîtie kûverithia eki naaî,
na averithie arîa matethagîrîria eki naaî.
3Andû a Misiri nî andû tu, na tîo Ngai;
nacio mbarathi ciao nî nyama tu, na tî maroho.
Rîrîa Ngai-Mûnene agaatambûrûkia njara yake,
mûtethania wana mûtethua, gûtirî ûtakaagwa,
na onthe makaathira vamwe.
4Ngai-Mûnene aambîrire atîrî,
“Wata ûrîa mûnyambû kana kaana ka mûnyambû ûraramaga ûnyitîte nyamû,
wana gîkundi Kîam arîthi kîngîtwa kîthiî gîkaûtharîkîre,
ndûngîmakua nî înegene rîao,
kana wîgua guoya nî mîgambo yao.”
Ûguo nîguo Ngai-Mûnene mwene vinya wonthe akaanyûrûrûka kûrûa arî kîrîmarî gîa Zayuni na nîrî karîmarî ga kîo.
5Wata ûrîa gîconi kîreraga îgûrû rîa kîomba gîa kîo,
nwaguo Ngai-Mûnene mwene vinya wonthe
akaagitîra îtûûra rîa Jerusalemu;
nîakaarîgitîra na arîkûûre,
arîmenyerere na arîvonokie.
6Mue andû a Isiraeli, garûrûkîrani ûcio mwaregire na vinya. 7Nîûndû mûthenya ûcio mue muonthe nîmûgaata mîvuanano ya sîlûva na ya thaavu, îrîa mwîrûthîrîte mue ene na njara cienyu îgatûma mwîvie.
8Vîndî îo Asîria makaaûragwa na rûviû na tî rwa mûndû;
makaathirua na rûviû rwa vinya gûkîra rwa mûndû,
nao nîmakaaûra nî rûviû rûu,
na anake ao arîa ethî nîmakaarutithua wîra na vinya.
9Mûthamaki wao nîakaaûra nîûndû wa kûnyitwa nî guoya,
nao atongoria ao matiganîrie vendera ciao nîûndû wa kûmaka.
Ûguo nîguo Ngai-Mûnene arauga,
ûrîa mwaki wake ûrî Zayuni,
ûrîa mwaki wake mûnene ûrî Jerusalemu.
Currently Selected:
Isa 31: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
