Isa 24
24
Ngai-Mûnene nîakaaverithia nthî
1Taroria, Ngai-Mûnene nîakûthiria nthî na îtigwe îrî ntheri.
Akaamîng'aûrania anyaganie arîa matûûraga kuo.
2Andû onthe nîmakaanyitwa nî maûndû mau:
ûrîa gûgekara kûrî andû arîa engî,
nwaguo gûgekara kûrî athînjîri-Ngai;
kûrî ngombo, na kûrî mûmîathi;
kûrî ndungata ya mwîrîtu, na kûrî mûndûmûka mûmîathi;
kûrî mûgûri wa indo, na kûrî mwendia wa indo;
kûrî mûvecani, na kûrî mûvewa;
kûrî mûkovi wa kîndû, na kûrî mûkovithania.
3Nthî nîgaacûkangua yanangîke viû;
nîûndû Ngai-Mûnene nîaugîte guo.
4Nthî nîîkwara indo cionthe ciûme;
mavûrûri ma nthî nîmaratangîka na makathirwa nî vinya;
îgûrû na nthî nî ithirîte vinya.
5Andû arîa matûûraga gûkû nîmagwatîtie nthî mûgiro,
nîûndû nîmaunîte mawatho ma Ngai,
makarega kûrûmîrîra kîrîra gîake,
na makauna kîrîkanîro gîa tene na tene.
6Kwoguo nthî nîîkûthirua nî kîrumi,
andû nao marathînîka nîûndû wa mavîtia mao.
Andû arîa matûûraga nthî nîmarathira,
na nî andû anini tu magaatigara marî mwoyo.
7Mîthavibu nîravova, nayo ndivei îkathira.
Arîa onthe marakenaga rîu marî na kîeva.
8Mîgambo ya tamburini nî mîthiru,
înegene rîa gîkeno nî rîthiru,
mîgambo ya ngita nî mîthiru.
9Gûtirî kwina makînyua ndivei rîngî;
arîa manyunyaga ndivei maregua îrî ndûrû.
10Îtûûrarî gûtirî na thayû na nîgûcûkangie,
nyomba cionthe nî mvinge nîguo gûtigatonye mûndû.
11Kûrî na kîrîro na kûu njîrarî nîûndû wa gûtura ndivei;
gîkeno kîonthe nî kîthiru;
nthî ndîrî na gîkeno.
12Îtûûra rîu rîgaatigwa rîrî maganjo;
ivingo cia rîo nî munange.
13Ûguo nîguo gûgekara mavûrûrirî monthe ma nthî,
wata ûrîa mûtamaiyû wîkaraga maketha mathira,
gûtigaraga ndamaiyû nini cia mûthiia,
nwaguo gûgaatigara andû anini marî mwoyo.
14Andû arîa magaatigara nîmakaugîrîria,
nîmakaaina makenete.
Arîa marî mwena wa îthûîro nîmakaanîrîra ûnene wa Ngai-Mûnene.
15Kwoguo mue mûtûûraga mwena wa îrathîro kumiani Ngai-Mûnene.
Arîa mûtûûraga ndeererî cia îria kumiani Ngai-Mûnene, Ngai wa Isiraeli.
16Nîtûregua nyîmbo cia gûkumia Ngai ûrîa mûthingu,
ikinwa kuuma mîthiia ya nthî.
Nwatî ngoro yakwa nî ndito nî kîeva,
nama, ngoro yakwa nî ndito!
Ndirî na kîîrîgîrîro! Andû arîa acukanîrîri mekaga maûndû ma ûcukanîrîri,
na ûcukanîrîri ûthiîte na mbere kwongerereka.
17Guoya, marima na mîtego,
nîcio imwetererete, mue mûtûûraga nthî.
18Mûndû ûrîa ûkaaûra nî înegene, akaagwa îrimarî rîu;
nake ûrîa ûkaauma îrimarî, akaagwatwa nî mûtego.
Nîûndû ndirica cia îgûrû nî mvingûre,
nayo mîcingi ya nthî nîîrainaina.
19Nthî nî manangîku viû,
nthî nî mbatûkangu,
nthî nîrathingitha na vinya mûno.
20Nthî îratûgûgana ta mûrîu wa njovi,
îrainaina ta îgema.
Mevia mayo nîmamîritûvîrîte mûno;
îkagwa na ndîkaarûngama rîngî.
21Mûthenya ûcio Ngai-Mûnene nîakaaverithia ciûmbe,
ciûmbe cia îgûrû ikaaverithîrua kûu îgûrû,
na athamaki a nthî maverithîrue gûkû nthî.
22Ngai nîakaamaûngania onthe vamwe îrimarî ta mîgwate;
nîmakaavingîrwa njeera mîthenya mîîngî,
na mîthenya îo yathira nîmakaaverithua.
23Mweri nîûgaaconorithua,
narîo riûa rîguithue nthoni,
nîûndû Ngai-Mûnene mwene vinya wonthe nîakaathana,
arî îgûrû rîa Kîrîma gîa Zayuni kûu Jerusalemu,
na nîakoonania riiri wake kûrî atongoria a andû ake.
Currently Selected:
Isa 24: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
