Isa 16

Moabu nîyavoire ûtethio kuuma Jerusalemu

1Nîavirîru mûtongoria wa vûrûri tûgondu,

matûrutîte Sela mavîtûkîrîre werûrî nginya kîrîmarî gîa Zayuni.

2Ta ûrîa iconi ciûrûraga ciomba ciacio itharîtue,

nwaguo aka a Moabu maagagîte marî mariûkorî ma Arinoni.

3Andû a Moabu marera andû a Juda atîrî,

“Tûtaareni, mûtwîre ûrîa tûgwîka.

Tûthitheni mûtûgitîre,

ta ûrîa gûtukaga ûtheri ûkathira.

Tûthitheni tue tûraûrûra;

mûtigatûkunyanîre tue nîkwa tûrîte.

4Tigani andû a Moabu arîa maûrîte matûûre vûrûrirî wenyu,

magitîreni kuuma kûrî arîa marenda kûmacûkangia.

Rîrîa ûrîa ûvinyanagîrîria akethîrwa atarî vo,

na kûûragana kûthire na arîa matharîkagîra maume vûrûrirî,

5mûndû wa rûciaro rwa Daudi nîagaatuîka mûthamaki;

na nîakaatha andû na wîvokeku na wendo ûtathiraga.

Ke agaatucanagîra ciira na kîvooto na waragania na

ekage maûndû ma ûthingu.”

6Andû a Juda maugaga atîrî,

“Nîtwîguîte ûrîa andû a Moabu marî ecaari,

nîtwîcî ûrîa maarî etîi mûno.

Nîtwîcî ûrîa marî rûng'athio, mwîkumio na metûûgagîria;

nwatî mwîtîîo ûcio wao nî wa mana.”

7Kwoguo andû a Moabu nîmararîra,

onthe mararîrîra vûrûri wao.

Cakayani mûno mue andû a Moabu,

nîûndû wa wenye wa îtûûra rîa Kiri-heresethi.

8Mîgûnda ya Heshiboni na mîthavibu ya Sibuma nî mîcûkangie;

ndivei ya thavibu cia mîgûnda îo nîyo yatûmaga athani a mavûrûri marîwe.

Mvûa cia mîtî îo ciakinyîte Jazeri,

na îgatamba nginya werûrî,

na matheûka mayo magakinya mûringo wa Îria rîa Cumbî.

9Kwoguo Jazeri akîrîra wananie nînîrarîra

nîrarîra nîûndû wa mîthavibu ya Sibuna.

Methori makwa maretîka nîûndû wa Heshiboni na Eleale,

nîûndû gîkeno Kîam matunda na maketha ma maku,

na gîkeno Kîam maketha ma ngano nî kîthiru.

10Gûtirî gûkena na gûcanjamûka mûgûndarî ûrîa ûraciaraga mûno.

Gûtirî nyîmbo cinagwa mîgûndarî ya mîthavibu.

Gûtirî mûndû ûvivagîra ndivei kîvivîrorî,

na ngemi nî nthiru.

11Kwoguo nînîracakaya ngoro nîûndû wa Moabu,

na ngegua kîeva nîûndû wa Kiri-heresi.

12Rîrîa andû a Moabu makaathiî kûgooca ngai ciao na menogie makîthiî kûrîa kûgoocagîrwa, macoke mathiî hekarûrî yao kûvoya, matikaathikîrîrua.

13Îno nîyo ndûmîrîri îrîa Ngai-Mûnene aavecanire mbere îgiî Moabu. 14Nwatî rîu Ngai-Mûnene arauga atîrî, “Vuva wa mîaka îthatû, ta îrîa îtaragîrwa mûruti wa wîra, riiri wa Moabu nîûkaathira. Wana ethîrwa andû a kuo nî eengî, nî andû anini tu magaatigara na matarî na vinya.”

Currently Selected:

Isa 16: KKB

Highlight

Copy

Compare