Sil 8
8
Kũtũmĩa Kĩlĩko
1Ndũkasindane na mũndũ wĩ na ũtonyi,
ndũkese kwĩthĩa ũvalũkile ũtonyinĩ wake.
2Ndũkatetany'e na mũndũ mũthwii,
ndakakũsinde aitũmĩa ũthwii wake;
nĩkwĩthĩwa thaavu nũminĩte aingĩ,
na ũkananga masũanĩo ma asumbĩ.
3Ndũkakananĩe na mũndũ ũlonzaa mũno;
wakananĩa nake, nĩ ta kwongela ngũ mwakinĩ.
4Ndũkavũe ngũĩ na mũndũ ũte mwĩkalo mũseo,
ndakaume aaũmae maku.
5Ndũkaneenee mũndũ naĩ yĩla ũendee kwĩthyũũa atie naĩ syake,
lilikana kana ithyonthe twĩ na mavĩtyo.
6Ndũkavũthye mũndũ nĩkwĩthĩwa nĩ mũkũũ,
nũndũ ithyonthe tũendee kũkũa.
7Ndũkatanĩe kĩkw'ũ kya mũndũ o na wĩva;
lilikana kana ithyonthe no nginya tũkw'e.
8Ndũkavũthye ũneeni wa ala me na ũĩ,
ĩndĩ ĩthangaasye kũmanya nthimo syoo,
nĩkwĩthĩwa kumana nasyo ũkakwata ũmanyĩsyo,
na kũmanya ũndũ ũtonya kũthũkũma anene.
9Ndũkavũthye kĩla atumĩa mekũneena,
nĩkwĩthĩwa mo o namo mamanyĩiw'e nĩ aaĩthe moo,
nũndũ wamethukĩĩsya ũkakwata ũmanyi,
na kũmanya ũndũ ũtonya kũsũngĩa yĩla ve vata wa kũsũngĩa ũndũ.
10Ndũkathangaasye mwĩki wa naĩ eeka naĩ;
kwĩka ũu nĩ ũndũ ũmwe na kũkitanĩĩsya mwaki na ũyĩsa ũkũvĩvya.
11Ndũkokĩle na kũtia mũndũ ũneenaa naĩ,
ndakese ũkũkwatya na ndeto syaku mwene.
12Ndũkaakovethye mũndũ wĩ ũtonyi mbee waku;
wamũkovethya kĩndũ, kĩtale ta wakyasya.
13Ndũkaũngamĩe mũndũ wasye ũkaĩva kĩndũ alea kũĩva,
ethĩwa nĩ kĩndũ mũndũ ũsu ũtaĩvĩkya,
wamũũngamĩa, ĩyũmbany'e kũĩva.
14Ndũkasikate mũsili kotinĩ,
nĩkwĩthĩwa ũtw'ĩo ũla wĩumw'a ũkeethĩwa na wendeesyo kwake nũndũ wa wĩa wake.
15Ndũketĩkĩle kũendany'a kyalo na mũndũ mũtumanu,
ndakese ũkũtw'ĩkĩa mũio,
nĩkwĩthĩwa akeekaa ũndũ ũkwona wĩ waĩlu,
na mwĩ elĩ mũiminwa nĩ ũtumanu wake.
16Ndũkambĩĩe kaũ na mũndũ ũthataa mĩtũkĩ,
o na ndũkaendany'e nake kũndũ kũte andũ,
nĩkwĩthĩwa kwake kwĩta nthakame ti ũndũ,
na vau vate mũndũ ũkũtethya nĩvo wĩkũkũnĩa.
17Ndũkakũlye ndia ũtao,
nĩkwĩthĩwa ndia ndĩtonya kwia kĩmbithĩ.
18Ndũkeke ũndũ wa kĩmbithĩ ve mũeni,
nĩkwĩthĩwa ndwĩsĩ akatavany'a maũndũ meva.
19Ndũkatavye o kĩla mũndũ masũanĩo maku,
ndũkese kwasya ũndũ ũseo ũkwĩsaa ũkũkĩa.
Currently Selected:
Sil 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011