Sil 7
7
Motao me Kĩvathũkany'o
1Ndũkeke ũndũ mũthũku,
na ũthũku ndũkoka kũla ũĩ o na ĩndĩĩ.
2Ĩkala vaasa na mavĩtyo,
namo makakũtia.
3Mwana wakwa, ndũkateme mĩkao ũvande sila ũte wa katĩ,
nĩ kana ndũkaakethe sila ũte wa katĩ mavinda mũonza.
4Ndũkavoye Mwĩai akũnenge kwĩthĩwa mũtongoi ũla mũnene,
kana kũkũlya mũsumbĩ akũnenge kĩvĩla kya ndaĩa.
5Ndũkeyonany'e kwĩthĩwa wĩ mũlũngalu vala ve Mwĩai,
kana kwonany'a ũĩ waku vala ve mũsumbĩ.
6Ndũkamanthe kũtw'ĩka mũsili wa makoani,
ndũkese kũemwa nĩ kũvetanga mavĩtyo,
ndũkese kwonany'a wendeesyo kwa mũndũ wĩ ũtonyi,
na kwa kĩtumi kĩu ũyasya ũlũngalu waku.
7Ndũkavĩtĩsye andũ,
na ndũkeyĩkĩĩthye nthoni andũnĩ.
8Ndũkeke naĩ mavinda elĩ,
o na wĩkĩte naĩ ĩvinda yĩmwe ndũkalea kũkanw'a.
9Ndũkasye, “Ngai akendeew'a nĩ nthembo yakwa mbingĩ,
na namumĩsya Ngai Ũla wĩ Ĩũlũ Mũno nthembo akamĩtĩkĩla.”
10Ndũkaanow'e nĩ kũvoya,
kana ũlee kũnenga ngya ũtethyo.
11Ndũkathekee mũndũ wĩ na woo ngoonĩ,
nĩkwĩthĩwa Ngai ũla ũnyivasya andũ nowe ũmanenevasya.
12Ndũkavange kũkenga mwana-a-asa waku,
o na ndũkeke mũnyanyau ũu.
13Lea vyũ kũkengana,
nĩkwĩthĩwa ũvũngũ nĩ kĩmanyĩo kĩtaetae ũseo.
14Ndũkaneene ndeto mbingĩ sya mana wũmbanonĩ wa atumĩa,
na ndũkaneene ũyĩsyokela yĩla ũkũvoya.
15Ndũkamene wĩa mũito,
kana wĩa wa mũũndanĩ ũla wavangiwe nĩ Ũla wĩ Ĩũlũ Mũno.
16Ndũkekwatany'e na nguthu ya eki ma naĩ,
lilikana kana ũkany'o wa Mwĩai ndũseleawa.
17Ĩnyivye mũno vyũ,
nĩkwĩthĩwa ũkany'o wa ala matena kĩkĩo kya Ngai nĩ mwaki na iinyũ.
Ũndũ Andũ Maĩlĩte Kwĩkalany'a.
18Ndũkakũany'e mũnyanyau na mbesa,
kana ũkũany'e mwana-a-inyia waku wa w'o na thaavu ũla mũseo kuma Ovili.
19Ndũkeyĩime kũtwaa mũndũ mũka mũĩ na mũseo,
nĩkwĩthĩwa mũndũ mũka mũseo e vata mbee wa thaavu.
20Ndũkeke naĩ athũkũmi ala aĩkĩĩku wĩanĩ,
kana athũkũmi ma kĩvalũa ala makũthũkũmaa meyumĩtye.
21 #
Kuma 21.2; Kũt 15.12-15 Enda athũkũmi ala me kĩthito na ngoo yaku,
ndũkavate athũkũmi ma mũthemba ũsu ũthasyo woo.
22Nĩũkũlya, wĩ ng'ombe? Iĩthye!
Ethĩwa syĩ na ũtandĩthyo kwaku, ĩkala nasyo.
23Wĩ syana? Imanyĩsye mwĩkalo mũseo,
na kũitetheesya syĩkale syĩ mbĩwi kuma syĩ nini.
24Wĩ syana sya eĩtu? Mamanyĩsye kwĩkala metheetye,
ĩndĩ ndũkamesũvae mũno.
25Wanengane mwĩĩtu atwawe, wĩĩthĩwa wamina wĩa mũnene,
ĩndĩ mũnengane atwawe nĩ mũndũ-ũme wĩ na ũmanyi.
26Ethĩwa wĩ na kĩveti kyaku kĩkwendeeasya, ndũkakĩeke,
ĩndĩ ethĩwa ndũkyendete, ndũkakĩĩkĩĩe.
27 #
Kuma 20.21
Nenga ĩthe waku ndaĩa na ngoo yaku yonthe,
na ndũkolwe nĩ woo ũla nyinyia waku weewie aikũsyaa.
28Lilikana kana asyai maku nĩmo makũsyaie.
Ũtonya kũmaĩva kyaũ kĩla kĩanene na mũthĩnzĩo ũla makũnengie?
29Mũkĩe Mwĩai na ngoo yaku yonthe,
na ũinenga athembi make ndaĩa.
30Mwende Mũmbi waku na ũtonyi waku w'onthe,
na ndũkaeke athũkũmi make mekale mate na ũtethyo.
31Ĩthĩwa na kĩkĩo kya Mwĩai na ũinenga athembi make ndaĩa.
Nengae Mwĩai kĩlungu kĩla kyake o tondũ wĩaĩwe:
Ũsyao wa mbee, nthembo kwondũ wa ĩvĩtyo,
nyama ya kĩtuo yĩthĩwe mũthĩnzĩo,
nthembo ya kũthesya na ũsyao wa mbee wa syĩndũ ila ntheu.
32Tethasya ngya,
nĩ kana Mwĩai akũathime kwa wingĩ.
33Ĩthĩwa wĩ mũlau kwa andũ onthe,
ĩthĩwa wĩ mũlau o na kwa ala akw'ũ.
34Ndũkakĩĩe ala me na kĩĩo,
ĩndĩ ĩa na ala mekũĩa.
35Ndũkalee kũthi kũsisya ala awau,
nĩkwĩthĩwa ũkendwa nũndũ wa meko ta asu.
36Maũndũnĩ onthe ala ũkwĩka, lilikanaa mũminũkĩlyo wa thayũ waku,
naku ndũkeka naĩ nongi.
Currently Selected:
Sil 7: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011