Sil 36
36
Mboya Kwondũ wa Andũ ma Ĩsilaeli
1Ame Mwĩai, Ngai wa syũmbe syonthe, twĩw'ĩe tei na ũĩtũsisya.
2Tuma mbaĩ syonthe sya andũ ikũkĩa.
3Ũkĩlya kw'oko kwaku ũkũne andũ ma mbaĩ ila ingĩ,
na ũituma mona vinya waku mũnene.
4O tondũ watũtũmĩie ũmony'e ũtheu waku,
yu matũmĩe ũtwony'e ũkumyo waku.
5Tuma makũmanya o tondũ ithyĩ tũkwĩsĩ,
mamanye kana vai Ngai ũngĩ ate o we, Mwĩai.
6Ĩka syama ĩngĩ, na ũyĩka moseng'yo ũtaaĩka;
7tuma kw'oko kwaku kwa aũme kwĩthĩwa na nguma.
8Ũkĩlya ũthatu waku na ũyonosya ũthilĩku waku;
9ananga na ũimina amaitha maitũ.
10Tuma ĩvinda yĩu yĩvika mĩtũkĩ,
na ũililikana ĩvinda yĩla yĩtw'ĩtwe,
na ũituma andũ maweta meko maku manene.
11Mũndũ o na wĩva ũla wĩvonoka nĩaminw'e nĩ ũthatu mwai,
namo ala mekaa andũ maku naĩ nĩmaminwe.
12Vevenza mĩtwe ya atongoi ma amaitha maitũ,
ala maneenaa makasya, “Vai andũ angĩ, no ithyĩ twĩ ithyoka!”
13Ũmbany'a mbaĩ syonthe sya Yakovo,
14-15 # 36.14-15 Nũndũ wa maandĩko ma Kĩkiliki maumiw'e vala maaĩlĩte kwĩthĩwa, mũsoa wa ĩkũmi na inya na wa ĩkũmi na itano ti mĩandĩke, ĩndĩ vai ndeto sya Maandĩko Matheu ite vo.
16winenge ũtiĩwa wasyo, o tondũ syanengetwe mwambĩlĩĩlyonĩ.
17Ame Mwĩai, ĩw'ĩa tei andũ aa metawa maku,
ĩw'ĩa Ĩsilaeli tei, ũla kwaku nĩ ũndũ ũmwe na mwana waku wa mbee.
18Ĩw'ĩa tei ndũa ĩla yĩ Ĩkalũ yaku,
Yelũsalemu, vala nĩvo ũthũmũaa.
19Usũsya Saioni na ũtanu wa meko maku ma kũseng'ya,
na ũyusũsya Ĩkalũ yaku ũkumyo waku.
20Kũsĩĩa andũ maku ala woombie mwambĩlĩĩlyonĩ,
na ũyĩanĩsya maũndũ ala mathaniwe ĩsyĩtwanĩ yaku.
21Meke nesa ala makwĩkwatasya,
na kũtuma andũ maĩkĩĩa athani maku.
22Ame Mwĩai, ĩthukĩĩsye mboya ya athũkũmi maku,
ala maathimaa andũ maku na ũathimo wa Alũni,
na onthe ala me ĩũlũ wa nthĩ makamanya kana nue Mwĩai, Ngai wa tene na tene.
Kũnyuva Mũndũ Mũka ũla Waĩlĩte Kũtwaa
23Mũndũ nũtonya kũya lĩu wa mũthemba o na wĩva,
ĩndĩ ve lĩu ũmwe wĩthĩawa wĩ mũseo kwĩ ũngĩ.
24O tondũ ũĩmĩ ũtonya kũmanya mĩsamo ya nyama sya nyamũ syĩ kĩvathũkany'o,
now'o kĩlĩko kya mũndũ mũĩ kĩmanyaa ndeto sya ũvũngũ.
25Mũndũ wĩ na masũanĩo mathũku aeteae andũ kyeva,
ĩndĩ mũndũ wĩ na ũmanyi akamũĩvanĩsya.
26Mũndũ mũka no etĩkĩle kũtwawa nĩ mũndũ-ũme o na wĩva,
ĩndĩ mũndũ-ũme nũnyuvaa mwĩĩtu ũla mũseo mbee wa ala angĩ.
27Wanake wa mũndũ mũka nũtumaa mũndũ-ũme atana,
na vai kĩndũ kĩngĩ kĩmwendeeasya mbee waw'o.
28Ethĩwa mũndũ mũka aneenaa nesa na wĩnyivyo,
mũũme wake ethĩawa e vaati mbee wa aũme ala angĩ.
29Mũndũ atwaa kĩveti ethĩawa akwata kĩndũ kya vata mũno mbee,
akwataa mũtetheesya ũmwaĩlĩte na kĩtuĩ kya kũmũtw'ĩĩka.
30Ethĩwa vandũ vai wiio syĩndũ nĩsyũyawa;
nake mũndũ atena kĩveti atw'ĩkaa wa kwanganga na kũthĩnĩka.
31Nĩkũlya, ve mũndũ ũtonya kũĩkĩĩa kĩng'ei kyangangaa kũũ na kũũ,
kĩla kĩkĩlanĩlasya kuma ndũa ĩmwe kũthi ĩla ĩngĩ?
Nũũ ĩndĩ ũtonya kũĩkĩĩa mũndũ ũte mũsyĩ wake,
ũla ũkomelaa o vala kwatukĩa?
Currently Selected:
Sil 36: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011