Sil 15
15
1Mũndũ ũla ũmũkĩaa Mwĩai na ũkwataa mĩao yake,
akamantha ũĩ na ayũkwata.
2Ũĩ ũkamũthaũa ta w'o nyinyia wake,
na kũmũthokya ta kĩveti kyake ũnatwaie mĩtũkĩ.
3Ũĩ ũkamũĩthya na ũmanyi ta lĩu,
na kũmũnenga kĩw'ũ kya ũĩ anyw'e.
4Mũndũ ũsu akaaĩĩa ũĩ na ndakavalũka,
na akeekwatya ũĩ na ndakekĩĩthw'a nthoni.
5Ũĩ ũkatuma anengwa ndaĩa mbee wa atũi make onthe,
na ũkamũtonyethya kũneena wũmbanonĩ.
6Mũndũ ũsu akeethĩwa na mũyo na ngovia ya ũtanu,
na ĩsyĩtwa yake yĩkalilikanawa tene na tene.
7Ndia iikakwata ũĩ,
na eki ma naĩ maikawona.
8Ũĩ wĩkalaa vaasa na ala mekathĩĩaa,
na akengani maikasũanĩa ĩũlũ waw'o.
9Mwĩki wa naĩ ndaĩlĩte kwina mbathi sya kũkumya Ngai,
nĩkwĩthĩwa Mwĩai ti we ũmũnengete mbathi isu.
10Wathi wa ũkumyo waĩlĩte kwinwa na ũĩ,
na Mwĩai nĩwe ũtumaa wathi ũsu winwa nesa.
Mũndũ e na Ũthasyo wa Kũnyuva ũndũ Ũkwenda
11 #
Sil 17.1-12
Ndũkaneene wasye, “Mwĩai nĩ we ũtumie nĩvalũka naĩnĩ,”
nĩkwĩthĩwa ndatonya kũtuma wĩka kĩla Mwĩai ũmenete.
12Ndũkaneene wasye, “Mwĩai nĩwe ũtumie nĩluluutĩka”,
nĩkwĩthĩwa we nde na vata wa mwĩki wa naĩ.
13Mwĩai nũmenete mothatyo onthe,
o na ala mamũkĩaa nĩmamenete mothatyo.
14Mwĩai nĩwe woombie mũndũ mwambĩlĩĩlyonĩ,
na amũnenga ũtonyi wa kũnyuva ũndũ ũkwenda.
15Ethĩwa nũkwenda, nũtonya kwĩanĩsya mĩao,
kwĩkala wĩ mũĩkĩĩku kana ũte mũĩkĩĩku nĩ ũnyuvi waku.
16Mwĩai aiĩte mwaki na kĩw'ũ mbee waku;
tambũũkya kw'oko kwaku wose kĩla ũkwenda.
17Mũndũ aiĩwe mbee wake thayũ na kĩkw'ũ,
na kĩla wanyuva nĩkyo ũnengawe.
18Ũĩ wa Mwĩai nĩ mũnene;
e ũtonyi mũnene na nĩwonaa maũndũ onthe.
19Mwĩai nũmasiasya ala mamũkĩaa,
na nĩwĩsĩ meko onthe ma mũndũ.
20Mwĩai ndaaĩaĩa mũndũ ethĩwe e mũthũku,
o na ndaanenga mũndũ mwanya eke naĩ.
Currently Selected:
Sil 15: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011