Sil 14
14
1Nĩ mũathime ũla ũtavĩtasya ũneeninĩ wake;
mũndũ ũsu ndesaa kwĩthĩwa na kyeva kya mũndũ ũvĩtĩtye.
2Nĩ mũathime mũndũ ũla wĩna wasya mũtheu wa ngoo,
na ũtakw'ĩte ngoo.
Kũtũmĩa Ũthwii nesa
3Ti waĩlu mũndũ mũtoonu kwĩthĩwa e mũthwii;
ũthwii nĩ wa vata mwaũ kwa mũndũ wĩ kĩwĩu?
4Mũndũ ũla ũleaa kũtũmĩa syĩndũ syake nĩ kana ombany'e ũthwii,
ethĩawa ayũmbanĩsya andũ angĩ ũthwii ũsu;
andũ asu angĩ makeetanĩthya na ũthwii wake.
5Ethĩwa mũndũ o na ndeyĩka nesa,
akeethĩwa e mũlau kũla kwĩ ũũ?
Ndakatanĩa ũthwii wake mwene.
6Vai mũndũ mũthũku mbee wa mũndũ ũla wĩtooneaa;
ũsu nĩw'o ũkany'o wa kwĩthĩwa we mwene ate mũlau.
7O na eeka ũndũ ũseo, awĩkaa atesĩ,
na mũminũkĩlyonĩ esaa kwonany'a ũtoonu wake.
8Mũndũ mũtoonu nĩ mũthũku,
asiasya ũtee na kũvũthya andũ.
9Mũndũ wĩ ĩtomo ndeanĩawa nĩ kĩla wĩ nakyo,
na kwa kwosa syĩndũ sya andũ angĩ,
ĩtomo nĩyĩtumaa thayũ wake wĩthĩwa ũte mũseo.
10Mũndũ mũtoonu nũvatanaa lĩu,
na mesanĩ yake vayĩthĩawa lĩu.
11Mwana wakwa, ĩyĩkae nesa na syĩndũ syaku,
na kũmumĩasya Mwĩai nthembo ĩla yaĩlĩte.
12Lilikana kana kĩkw'ũ kĩilea kũka,
na ndũtavĩtw'e ũkakw'a ĩndĩĩ.
13Ĩkaa mũnyanyau nesa ũtanamba kũkw'a;
ĩthĩawa wĩ mũlau na ũimũnenga kwĩanana na ũtonyi waku.
14Ndũkeyĩime mũthenya ũmwe wa ũtanu,
ethĩwa ve ũndũ mũseo ũkwenda kwĩka, ndũkalee kũwĩka!
15Mũthenya ũmwe ũkatiĩa andũ angĩ ũsyao wa yuutĩa yaku;
syonthe ila wakwatie kwa kũnoa mũno ikaanw'a kwa kũkũnĩwa kula.
16Nenga andũ ala angĩ na ũyosa kĩla makũnenga ũtanĩthye ngoo,
nĩkwĩthĩwa mũndũ ndeteelete kũthi kũtanĩa vala maveva ma ala akw'ũ mekalaa.
17Syĩndũ syonthe ila syĩ thayũ nikũaa ta ngũa,
nũndũ mwĩao kuma tene waasya atĩĩ, “Vate ndĩi mũkakw'a!”
18O tondũ matũ maingĩ ma mũtĩ ũnyaĩĩkĩtye mbonge,
metĩkaa na angĩ mayĩana,
now'o andũ mailyĩ:
Mũndũ nũkusaa na ũngĩ aisyawa.
19Kyonthe kĩla kĩseũvaw'a nĩkyanangĩkaa na kĩithela,
o nake mũndũ ũla wakĩseũvisye nũthelaa nakyo.
Ũtanu wa Kwĩthĩwa na Ũĩ
20Nĩ mũathime mũndũ ũla ũsũanĩaa ĩũlũ wa ũĩ,
mũndũ ũla ũsũanĩaa na ũmanyi.
21Nĩ mũathime mũndũ ũla ũsũanĩa ĩũlũ wa nzĩa sya ũĩ,
na kũvindĩĩsya ĩũlũ wa syĩmbithĩ syaw'o.
22Atĩĩa ũĩ ũndũ mũsyĩmi ũatĩĩaa nyamũ,
na ũyĩkala nzĩanĩ syaw'o ũwoveesye.
23Ũla ũsyaĩlasya ndĩlĩsyanĩ sya ũĩ,
akeethukĩĩsya e mĩomonĩ yaw'o.
24Ũla wĩkalaa vakuvĩ na nyũmba ya ũĩ,
akenzĩla kyambo kya ĩeema yake ũkũtanĩ wa ũĩ;
25akamba ĩeema yake vakuvĩ na ũĩ,
na kwĩkala wĩkalonĩ mũseo mũno.
26Akaia syana syake ungu wa kyuu kya ũĩ,
na kwĩkala ungu wa mbonge sya ũĩ.
27Akasiĩĩwa ũvyũvu nĩ muunyĩ wa ũĩ,
na kwĩkala ndaĩanĩ ya ũĩ.
Currently Selected:
Sil 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011