Sav 94
94
Ngai Mũsili wa Andũ Onthe
1We Mwĩai Ngai wĩ Ngai ũla ũĩvanĩasya,
we Ngai ũla ũĩvanĩasya ĩyonany'e.
2Ũkĩla we mũsili wa andũ onthe;
nenga ala mekathĩĩaa kĩla kĩmaĩlĩte!
3We Mwĩai Ngai, ala athũku meendeea kũtana nginya ĩndĩĩ?
Meendeea nginya ĩndĩĩ?
4Maneenaa ndeto syoo sya mĩtũlyo;
eki ma naĩ onthe mausũĩtwe nĩ kwĩkathĩĩa.
5Nĩmaminaa andũ maku we Mwĩai Ngai,
nĩmathĩnasya ala maku.
6Nĩmoaa aka ndiwa na aeni ala mekalaa nthĩ yaitũ,
na kũaa syana ndiwa.
7Maneenaa makasya atĩĩ, “Mwĩai Ngai ndekwona;
Ngai wa Yakovo ndekũmanya.”
8Sũanĩai inyw'ĩ andũ atumanu mũno!
Ndia ii, mũkooĩva ĩndĩĩ?
9Ngai ũla woombie matũ maitũ atonya kũlea kwĩw'a ata?
Ũla woombie metho maitũ atonya kũlea kwona ata?
10Ũla ũkanasya mbaĩ sya andũ nũlea kũkany'a?
Ũla ũmanyĩasya andũ ethĩwa ate na ũmanyi?
11 #
1Ako 3.20
Mwĩai Ngai nĩwĩsĩ mosũanĩo ma andũ,
nĩwĩsĩ kana mosũanĩo moo nĩ ma mana.
12We Mwĩai Ngai mũndũ ũla ũkanasya nĩ mũathime,
mũndũ ũla ũmanyĩasya kuma mĩaonĩ yaku!
13Nũmũthũmũasya kuma mĩthenyanĩ ya mathĩna,
nginya andũ athũku makenzĩwa ĩima.
14Nũndũ Mwĩai Ngai ndakaekana na andũ make;
ndakatia ala make.
15Nũndũ ũsilĩlo ũkaumw'a na sila wa katĩ,
na onthe ala alũngalu makaatĩĩa sila wa katĩ.
16Nũũ ũla wandetheeisye kũleana na ala athũku?
Nũũ ũla waĩ ngalĩkonĩ yakwa kũleana na eki ma naĩ?
17Kethĩwa Mwĩai Ngai ndaandetheesya,
nĩthĩwa naendie nthĩ ya ala akw'ũ.
18Yĩla naisye, “Kũũ kwakwa nĩkwatiũũka,”
Mwĩai Ngai wendo waku ũtaolekaa nĩwangwatĩĩie.
19Yĩla nĩ na kĩũũyũ kingĩ ngoonĩ,
nũngiakiasya na kũtuma nĩw'a mũyo.
20Ndwĩ mũnyanyae wa asili ala mataumasya ũsili wa katĩ,
ala metĩkĩlaa sila ũte wa katĩ ũtw'ĩke mwĩao.
21Nĩmaseũvĩasya andũ aseo mĩvango mĩthũku,
na mayumya ũtw'ĩo ala mate ĩvĩtyo moawe.
22Ĩndĩ Mwĩai Ngai nĩwe wĩvitho wakwa;
Ngai wakwa nĩwe ũnzũvĩaa.
23Akamaĩvanĩsya nũndũ wa mavĩtyo moo,
na aimamina nũndũ wa ũthũku woo;
Mwĩai Ngai, Ngai waitũ akamamina.
Currently Selected:
Sav 94: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
