Sav 55
55
Mboya ya Mũndũ Ũkũthĩnw'a
Kwa mwinĩthya: Aitũmĩa mĩio ya Mbathi yĩ ndii. Savulĩ ĩno yaandĩkiwe nĩ Ndeviti
1Ame Ngai ĩthukĩĩsye mboya yakwa,
na ndũkalee kwĩthukĩĩsya kwĩsũvana kwakwa!
2Mbĩthukĩĩsye na ũinzũngĩa;
mathĩna makwa nĩmambingĩvĩe.
Nĩndelemete,
3nũndũ wa kĩneene kya mũmaitha,
nũndũ wa kũthĩnw'a nĩ ala athũku,
mandeteae thĩna;
mathatĩte nũndũ wakwa na nĩmamenete.
4Nĩna thĩna mũno ngoonĩ,
na nĩngwatĩtwe nĩ w'ĩa wa kĩkw'ũ.
5Nĩna w'ĩa na nĩngũtetema,
na nusũĩtwe nĩ w'ĩa mũnene.
6Nĩnaisye, “Kethĩwa nĩ na nthwau ta ĩvũĩ,
nĩũlũka ngathi vaasa na ngĩthũmũa.
7Nĩũlũka ngathi vaasa,
na ngĩtũa weũnĩ.
Sela
8Nĩkalaata ngamantha vandũ nĩvithe,
vaasa na kĩuutani na itulumo.”
9Ame Mwĩai Ngai vũavũany'a ala athũku,
vũavũany'a ũneeni woo,
nũndũ nĩngwona ũng'endu na kaũ ndũanĩ.
10Ũtukũ na mũthenya nĩmathyũlũlũkaa ngũta sya ndũa ĩsu,
na kũmyusũsya na maũndũ mathũku na thĩna.
11Kĩla vandũ ndũanĩ ve wanangĩko;
nzĩa syayo syusũĩte ũnyamao na ũkengani.
12Kethĩwa nĩ mũmaitha ũkũnumanga no nĩyũmĩĩsye;
kethĩwa nĩ mũmaitha ũkwĩkathĩĩa mbee wakwa no nĩmwĩvithĩle.
13Ĩndĩ nue, we mũndũ takwa,
mũtindany'a wakwa na mũnyanyawa ũla twĩsene mũno.
14Nĩtwaeanĩaa ngewa syĩ mũyo,
na twathaithĩaa Ĩkalũnĩ twĩ vamwe.
15Amaitha makwa nĩmakw'e ĩvinda yoo yĩte ĩviku;
nĩmalike me thayũ nthĩ ya ala akw'ũ!
Nũndũ ũthũku wĩ mĩsyĩnĩ yoo na ngoonĩ syoo.
16Ĩndĩ nĩngwĩkaĩla Ngai,
na Mwĩai Ngai nũkũndangĩĩa.
17Kwakya, mũthenya katĩ na ũtukũ,
nĩnĩwetaa mathĩna makwa na kũluma,
nake nĩwĩw'aa wasya wakwa.
18Nũndũngaa nĩ ũsũvĩonĩ,
kuma kaũnĩ ũla nũkĩtaa,
nũndũ andũ aingĩ nĩmambũkitaa.
19Ngai ũla ũsumbĩkaa tene na tene,
akamew'a na kũmathĩny'a,
nũndũ nĩmaleaa kũalyũka,
na mai kĩkĩo kya Ngai.
Sela
20Ũla tũtindanasya nũvithũkĩaa anyanyae;
ndeanĩasya ũtianĩo wake.
21Ndeto syake nĩ ndendeu ta mauta ma ng'ombe,
ĩndĩ mosũanĩo make nĩ ma kũete kaũ.
Ndeto syake nĩ mbololo ta mauta,
ĩndĩ itemaa ta ũvyũ mũĩ.
22Nenga Mwĩai Ngai mathĩna maku onthe,
nake akakũtw'ĩĩka;
ndaketĩkĩla ala alũngalu masindwe.
23Ĩndĩ we Ngai ũkekya andũ asu ĩimanĩ ya wanangĩko,
oaani na akengani makakw'a mataminĩte nyusu ya matukũ ma thayũ woo,
ĩndĩ nyie ngakũĩkĩĩa.
Currently Selected:
Sav 55: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
