Sav 22
22
Mathĩna na Wĩkwatyo wa Mũndũ Mũlũngalu
Kwa mwinĩthya: Savulĩ ĩno yaandĩkiwe nĩ Ndeviti
1 #
Mat 27.46; Mk 15.34 Ngai wakwa, Ngai wakwa ũndekee kĩ?
Nĩkĩ wĩ kũasa ũu ũkethĩa ndũndethya,
na ndwĩthukĩĩsya ndeto sya kĩĩo kyakwa?
2Ngai wakwa nĩngwĩkaĩlaa kĩla mũthenya,
ĩndĩ ndũnzũngĩaa;
nĩngwĩkaĩlaa ũtukũ, ĩndĩ ndikwataa ũthũmũo.
3Ĩndĩ nue ũla mũtheu,
we nũsumbĩkaa na kũtaĩwa nĩ Ĩsilaeli.
4Aaũmae maitũ nue meekwatisye;
nĩmakwĩkwatisye naku wamatangĩĩa.
5Nĩmakwĩkaĩlile na mavonoka;
nĩmakwĩkwatisye na mayaasonoka.
6Ĩndĩ nyie nĩ o kĩinyũ, ndi mũndũ;
nĩmbũthĩtw'e na kũlewa nĩ andũ onthe!
7 #
Mat 27.39; Mk 15.29; Lk 23.35 Nthe ala mambonaa nĩmambũthasya;
nĩmanumangaa na kũvyũlya mĩtwe mayasya,
8 #
Mat 27.43
Mũndũ ũũ eekwatisye Mwĩai Ngai;
“Mwĩai Ngai nĩamũtangĩĩe;
ethĩwa Ngai nĩwendeeaw'a nĩwe nĩamũtangĩĩe!”
9Ĩndĩ nue wambumisye ĩvunĩ ya inyia wakwa;
yĩla naĩ kana kanini nĩwanzũvĩie.
10Nĩnakwĩkwatisye kuma mũthenyanĩ wa kũsyawa,
na kuma yĩla nasyaiwe wĩthĩĩtwe wĩ Ngai wakwa.
11Ndũkethĩwe wĩ vaasa nakwa,
nũndũ thĩna wĩ vakuvĩ,
na vai mũndũ wa kũndetheesya.
12Amaitha aingĩ nĩmambĩlingĩlĩte ta nzaũ;
onthe nĩmambĩlingĩlĩte ta nzaũ syĩ vinya kuma nthĩ ya Mbasani.
13Amaitha makwa mailyĩ ta mĩnyambũ ĩkũluluma,
na kũvithũkĩa yathamĩtye.
14Vinya wakwa nĩ mũthelu,
ũthelete ta kĩw'ũ kyetĩka nthĩ.
Mavĩndĩ makwa onthe nĩmalekanĩtye,
na ngoo yakwa nĩtwekete ta ĩsoso nĩ w'ĩa.
15Vinya wakwa nũthelete ũkanyiaa ta kĩlĩo,
na ũĩmĩ wakwa nũũlũma kaakaanĩ wakwa,
na nũndekete kĩtoonĩ nĩkw'e.
16Nguthu ya eki ma naĩ nĩmbĩlingĩlĩte,
mambĩlingĩlĩte ta kĩkundi kya ngitĩ;
nĩmandonyete#22.16 nĩmandonyete: Maandĩko amwe ma tene ma Ndeto ya Ngai maĩtye nĩmambovaa. Maandĩko ma Kĩevelania maĩtye ta mũnyambũ moko na maũũ.
17Nĩndonya kũtala mavĩndĩ makwa onthe,
andũ nĩmeũnzisya na kũngeteea.
18 #
Mat 27.35; Mk 15.24; Lk 23.34; Yoa 19.24 Nĩmekũaana ngũa syakwa,
na kũkũnĩa ngũa yakwa ndaasa kula.
19Ĩndĩ we Mwĩai Ngai ndũkekale vaasa nakwa;
we ũtethyo wakwa ũka mĩtũkĩ ũndethye.
20Ndangĩĩe kuma ũvyũnĩ wa mũmaitha;
tangĩĩa thayũ wakwa kuma ngitĩnĩ isu.
21Mbonokye kuma kanyw'anĩ wa mĩnyambũ ĩsu;
ndangĩĩe#22.21 ndangĩĩe: Maandĩko amwe ma tene ma Ndeto ya Ngai nĩmo maĩtye ũu. Maandĩko ma Kĩevelania maĩtye nĩwanzũngĩie kuma mbyanĩ sya mboo.
22 #
Aevl 2.12
Ngatavany'a ĩsyĩtwa yaku kwa ana-a-asa makwa,
na ngakũkathaa kũla mombanĩe.
23Inyw'ĩ ala mũkĩaa Mwĩai Ngai mũtaĩei;
mũkumyei inyw'ĩ nzyawa syonthe sya Yakovo!
Mũnengei ndaĩa inyw'ĩ nzyawa syonthe sya Ĩsilaeli!
24Nĩkwĩthĩwa ndaekanaa na mũndũ ngya,
kana akavũthya thĩna wake,
ndamũtiaa, ĩndĩ nũmũsũngĩaa yĩla wamwĩkaĩla.
25Nĩngũũtaĩa nĩ wũmbanonĩ wa andũ onthe,
nũndũ wa maũndũ ala wĩkĩte;
ngeanĩsya mawĩvĩto makwa,
nĩ mbee wa ala maũkĩaa.
26Ngya ikaya ivũne;
ala mamanthaa Mwĩai Ngai makamũtaĩa.
Mathayũ menyu nĩmekale tene na tene!
27Andũ onthe ĩũlũ wa nthĩ,
makalilikana Mwĩai Ngai na kũmũsyokea,
na andũ ma mbaĩ syonthe makamũthaitha.
28Mwĩai Ngai nĩ Mũsumbĩ,
na nĩwe ũsumbĩkĩte mbaĩ syonthe.
29Athwii onthe ĩũlũ wa nthĩ makatana na kũmũthaitha;
onthe ala makusaa makatulya ndu mbee wake;
onthe ala matatonya kũendeea kwĩkala thayũ.
30Nzyawa ila ikoka ikamũthũkũmaa;
ikatavya nzyawa ingĩ syũkĩte ũvoo wa Mwĩai Ngai.
31Makatavya andũ mate asyae ũlũngalu wake,
kana nĩwe weekie ũu.
Currently Selected:
Sav 22: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
