Sav 106
106
Ũseo wa Mwĩai Ngai kwa Andũ make
1 #
1Mav 16.34; 2Mav 5.13; 7.3; Esa 3.11; Sav 100.5; 107.1; 118.1; 136.1; Yel 33.11 Taĩai Mwĩai Ngai!
Tũngĩai Mwĩai Ngai mũvea nũndũ nĩ mũseo,
nũndũ wendo wake ũtaolekaa nĩwĩkalaa tene na tene.
2Nũũ ũla ũtonya kũweta maũndũ manene ala Mwĩai Ngai wĩkĩte,
kana akaweta ũndũ ndaĩa yake yĩana?
3Nĩ aathime ala maatĩĩaa ũsili wa katĩ,
ala mavinda onthe mekaa ũlũngalu.
4Ame Mwĩai Ngai, yĩla ũkwĩka andũ maku nesa ndilikanae,
na ũindethya yĩla ũũmatangĩĩa.
5Nĩ kana none kũendeea nesa kwa anyuve maku,
nĩ kana nĩtanĩe ũtanu wa andũ maku,
na kũtaĩa vamwe na ala maku.
6Ithyĩ nĩtũvĩtĩtye ũndũ aaũmae maitũ meekie;
twĩthĩĩtwe twĩ andũ athũku na avuku.
7 #
Kuma 14.10-12
Yĩla aaũmae maitũ maĩ Misili,
mayaasũanĩa ĩũlũ wa syama syaku.
O ta ũu mayaalilikana wingĩ wa wendo waku ũtaolekaa,
ĩndĩ nĩmang'endeie Ũla wĩ Ĩũlũ Mũno me ũtee wa Ũkanga Mũtune.
8Ĩndĩ ũu wĩ o vo Ngai nĩwamatangĩĩie o tondũ wathanĩte,
nĩ kana onany'e vinya wake mũnene.
9 #
Kuma 14.21-31
Nĩweeaĩie Ũkanga Mũtune naw'o wang'ala,
na atongoesya andũ make maingĩla vo ta mesĩlĩte weũnĩ.
10Nĩwamatangĩĩie kuma ũtonyinĩ wa ala mamamenete;
nĩwamovoisye kuma ũtonyinĩ wa amaitha.
11Kĩw'ũ nĩkyavw'ĩkie amaitha moo,
o na vai ũmwe woo waatiala.
12 #
Kuma 15.1-21
Nĩvo ĩndĩ andũ make maĩkĩĩie ndeto syake,
na maina mbathi sya kũmũtaĩa.
13Ĩndĩ nĩmoolilwe mĩtũkĩ nĩ maũndũ ala Ngai weekĩte,
mayaaeteela mamanye ũndũ Ngai wendaa meke.
14 #
Mot 11.4-34
Nĩmakwatiwe nĩ ĩtomo yingĩ me weũnĩ,
na kwoou matata Ngai me kũu weũnĩ.
15Kwoou Ngai nĩwamanengie kĩla mavoyie,
ĩndĩ amaetee ũwau mũthũku.
16 #
Mot 16.1-35
Me maeemanĩ nĩmeew'ĩie Mwose na Alũni mũthũkũmi mũtheu wa Mwĩai Ngai kĩwĩu.
17Nĩvo ĩndĩ nthĩ yaathamisye yamelya Ndathani,
na yathika Avilamu na andũ make onthe.
18Mwaki nĩwatheeie kũla kwĩ aatĩĩi moo,
na wavĩvya andũ asu athũku.
19 #
Kuma 32.1-14
Nĩmaseũvisye kasaũ ka thaavu me Kĩĩmanĩ kya Sinaĩ,#106.19 Sinaĩ: Ĩsyĩtwa yĩngĩ ya kĩĩma kĩĩ nĩ Olevu
na mathaitha mũvw'anano ũseũvĩtw'e na kyũma.
20Nĩmakũanisye ũkumyo wa Ngai na mũvw'anano wa kasalũ kala kaĩsaa nyeki.
21Nĩmoolilwe nĩ Ngai Mũtangĩĩi woo,
ũla weekie maũndũ manene Misili.
22Maũndũ ala weekie kũu kote ma kũseng'ya!
Maũndũ ma kũkĩwa ala weekie Ũkanganĩ Mũtune.
23Yĩla Ngai waisye nũkũmina andũ make,
Mwose mũthũkũmi wake mũnyuve nĩwaũngamie,
akũlye Ngai ndakamamine ũthatunĩ wake.
24 #
Mot 14.1-35
Nĩvo ĩndĩ mavũthisye nthĩ ya kwendeesya,
nĩkwĩthĩwa mayaaĩkĩĩa ũndũ Ngai wamathĩte.
25Nĩmanyungunyĩisye me maeemanĩ moo,
na mayaamwĩw'a Mwĩai Ngai.
26Kwoou nĩwookĩlilye kw'oko amevĩtĩa,
kana akatuma makw'ĩĩa weũnĩ,
27 #
Ali 26.33
na akaminĩa nzyawa syoo andũnĩ ma mbaĩ ingĩ,
kwa kũmanyaĩĩkya ĩũlũ wa nthĩ yonthe.
28 #
Mot 25.1-13
Nĩvo ĩndĩ mambĩĩie kũthaitha ngai ya Mbaali me Veoli,
na maya nthembo ithembewe ngai ite thayũ.
29Nĩmatumie Mwĩai Ngai athata,
nũndũ wa maũndũ mathũku ala meekaa,
na ũwau mũthũku wooka katĩ woo.
30Ĩndĩ Vineasi nĩwaũngamie na akany'a ala maĩ na ĩvĩtyo,
na ũwau ũsu wathela.
31Ũndũ ũsu weekie watalilwe kwĩthĩwa wa ũlũngalu,
na ũkalilikanawa kuma nzyawa ĩmwe kũthi ĩla ĩngĩ tene na tene.
32 #
Mot 20.2-13
Andũ ma Ngai me ithimanĩ sya Meliva nĩmamũthatisye Mwĩai Ngai,
na ũndũ ũsu meekie watuma Mwose alika thĩnanĩ.
33Nĩkwĩthĩwa nĩmatumie Mwose ew'a woo thayũnĩ,
na aneena ate kũsũanĩa.
34 #
Asi 2.1-3; 3.5-6 Mayaamina andũ ma nthĩ ingĩ,
o tondũ Mwĩai Ngai wameaĩĩte meke.
35Ĩndĩ nĩmavulanile namo,
na mambĩĩa kwĩka maũndũ ala andũ asu meekaa.
36Nĩmathaithie ngai syoo sya mĩvw'anano,
ila syatw'ĩkie mũteo kwoo.
37 #
2Asu 17.17
Nĩmathembeie maimũ ana na eĩtu moo.
38 #
Mot 35.33
Nĩmooaie andũ mate ĩvĩtyo, ana na eĩtu moo,
ala mathembeiwe ngai sya mũvw'anano sya nthĩ ya Kanaani,
na kwoou nthĩ ĩsu yavukw'a na nthakame.
39Nĩmeevukisye na meko moo,
na meethĩwa mate aĩkĩĩku kũla kwĩ Ngai.
40 #
Asi 2.14-18
Kwoou Mwĩai Ngai nĩwathatiw'e nĩ andũ make,
na amalea ala nĩmo ũtiĩwa wake.
41Nĩwamanenganie ũtonyinĩ wa andũ ma mbaĩ ingĩ,
na masumbĩkwa nĩ amaitha moo.
42Nĩmathĩniw'e nĩ amaitha moo,
na meethĩwa me ungu wa ũtonyi wa amaitha asu.
43Mavinda maingĩ Mwĩai Ngai nĩwatangĩĩaa andũ make,
ĩndĩ nĩmaendeeaa kũleana nake,
na kũendeea kũlika naĩnĩ.
44Ĩndĩ o na ũu wĩ o vo Mwĩai Ngai nĩweew'aa yĩla mamwĩkaĩla,
na nĩwoonaa thĩna ũla maĩ naw'o.
45Nĩwalilikanaa ũtianĩo wake kwondũ woo,
na nũndũ wa wingĩ wa wendo wake ũtaolekaa aimew'ĩa tei.
46Nĩwatumie mew'ĩwa tei nĩ onthe ala mamatavĩte.
47 #
1Mav 16.35-36
Ame Mwĩai Ngai, Ngai waitũ tũtangĩĩe,
na ũitumya andũnĩ ma mbaĩ ingĩ,
nĩ kana tũkũtũngĩe mũvea na kũtaĩa ĩsyĩtwa yaku ĩtheu.
48Nĩataĩwe Mwĩai Ngai, Ngai wa Ĩsilaeli,
kuma yu kũvika tene na tene!
Andũ onthe nĩmasye, “Ameni!”
Mũtaĩei Mwĩai Ngai.
Currently Selected:
Sav 106: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
