Sav 104
104
Wathi wa Kũtaĩa Mũmbi
1We thayũ wakwa taĩa Mwĩai Ngai!
We Mwĩai Ngai, Ngai wakwa wĩ mũnene mũno!
Ũvw'ĩkĩtwe nĩ ndaĩa na ũnene.
2Wĩvw'ĩkĩte kyeni ta ngũa,
na ũkatambũũkya matu ta ĩeema.
3Wakĩte wĩkalo waku ĩũlũ wa kĩw'ũ kĩla kĩ yayayanĩ;
ũtw'ĩkĩthasya matu ĩkasya yaku,
na wĩsĩlaa nthwaunĩ sya kĩseve.
4 #
Aevl 1.7
Ũtw'ĩkĩthasya iseve atũmwa maku,
na itw'ĩki sya mwaki athũkũmi maku.
5Nĩwaiie nthĩ myambĩlĩĩlyonĩ ya yo,
nĩ kana ndĩkaathingithĩke o na ĩndĩĩ.
6Nĩwamĩvw'ĩkie na ũkanga ta ngũa,
na kĩw'ũ kyavw'ĩka iĩma.
7Yĩla wakanisye kĩw'ũ nĩkyaendie,
yĩla kyeewie wasya waku wa kĩtundumo nĩkyasembie kyathi.
8Nĩkyesĩlile iĩmanĩ ĩũlũ,
na kyatheea kyalika myandanĩ,
kũla wakĩseũvĩsye kĩlike.
9Nĩweekĩie mũvaka kĩtakĩla,
nĩ kana kĩikaakĩle kĩvw'ĩke nthĩ ĩngĩ.
10Nũtumaa nthongo sya kĩw'ũ syumĩlĩĩla myandanĩ,
na kwĩsĩla katĩ wa iĩma.
11Nĩkĩnyusawa nĩ nyamũ syonthe sya kĩthekanĩ;
mang'oi ma kĩthekanĩ malaũkĩlaa vo.
12Nyũnyi nĩsyakaa ndala vakuvĩ na kĩw'ũ kĩu,
na kwina syĩ mbongenĩ sya mĩtĩ.
13Nĩwuĩasya iĩma mbua kuma wĩkalonĩ waku,
na nthĩ nĩyusũĩte moathimo maku.
14Nũtumaa nyeki ĩmea kwondũ wa indo,
na kũmesya mĩmea nĩ kana mũndũ aĩme,
na aikwata lĩu kuma nthĩ,
15na ndivai ĩtanĩthye ngoo yake,
mauta ma kũtuma ũthyũ wake ũtisatisa,
na lĩu wa kũmũnenga vinya.
16Mĩtĩ ya Mwĩai Ngai nĩnyithaw'a ĩkakola;
mĩkũũ ya Levanoni ĩla wavandie.
17Vau nyũnyi nĩsyakaa ndala;
ĩsaũ nĩyakĩte ndala ya yo mĩtĩnĩ ya mĩsonovali.
18Mbũi sya kĩthekanĩ syĩkalaa iĩmanĩ ila ndũlu,
nasyo inyowe syĩvithaa myalĩkanĩ ya mavia.
19Nĩwoombie mwei nĩ kana ũtũmanyĩthasye mavinda,
nayo syũa nĩyĩsĩ ĩvinda ya kũthũa.
20Nũetae kĩvindu kũkatuka,
na nyamũ sya kĩthekanĩ syonthe iyumĩla.
21Mĩnyambũ ya mũika nĩlulumaa ĩisyĩma,
ĩimantha lĩu ũla Ngai ũmĩnengete.
22Syũa yamina kuma nĩsyokaa,
na kũtindia isumonĩ syayo.
23Nĩvo ĩndĩ andũ maumaalaa makathi kũthũkũma,
na maitethya wĩa nginya ĩa mawĩoo.
24We Mwĩai Ngai nĩwĩkĩte maũndũ maingĩ mũno!
Wĩkĩte maũndũ asu onthe na ũĩ!
Nthĩ yusũĩte syũmbe syaku.
25Ũkanga nũya, mũnene na mũthanthau,
vala vekalaa syũmbe itatalĩka,
syũmbe syĩ thayũ nene na nini.
26 #
Yovu 41.1; Sav 74.14; Ĩsa 27.1 Meli syĩsĩlaa ũkanganĩ ũsu,
na Leviathani#104.26 Leviathani: Sisya 74.14 nĩthaũkaa vo.
27Nyamũ isu syonthe nue isyaĩĩsye,
ũinenge lĩu wasyo ĩvinda yĩla yaĩlĩte.
28Yĩla wainenga lĩu ũsu niwũĩsaa,
yĩla wainenga na ũlau waku,
nĩsyĩanĩawa nĩ syĩndũ nzeo.
29Yĩla waitia nitelemaa,
na yĩla woosa veva wasyo nikusaa na iisyoka kĩtoonĩ.
30Ĩndĩ yĩla wainenga veva waku,
nĩsyĩkalaa thayũ ĩngĩ,
na kũete thayũ mweũ ĩũlũ wa nthĩ.
31Ũkumyo wa Mwĩai Ngai nĩwĩkale tene na tene;
Mwĩai Ngai nĩatane nũndũ wa mawĩa make.
32Asiasya nthĩ ĩkatetema,
akiitaa iĩma ikatoa syũki.
33Ngainĩaa Mwĩai Ngai ĩvindanĩ yonthe ya thayũ wakwa;
ngainaa ngĩtaĩa Ngai wakwa ĩvindanĩ yonthe yĩla nĩ thayũ.
34Mosũanĩo makwa methĩawe maimwendeesya,
nũndũ nĩtanaa nthĩnĩ wa Mwĩai Ngai.
35Ĩndĩ ala mekaa naĩ nĩmathele kuma ĩũlũ wa nthĩ,
na ala avuku maithela vyũ.
Nĩngũtaĩa Mwĩai Ngai na thayũ wakwa.
We thayũ wakwa taĩa Mwĩai Ngai!
Taĩai Mwĩai Ngai!
Currently Selected:
Sav 104: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
