Nee 2

Neemia Aitũmwa Yelũsalemu nĩ Mũsumbĩ

1Mũthenya ũmwe mweinĩ wa mbee ũla wĩtawa Nisani#2.1 Nisani: Mwei ũũ no w'o wĩtawa Avivu mwakanĩ wa mĩongo ĩlĩ wa kũsumbĩka kwa Alitasasita, yĩla mũsumbĩ ũsu waeteiwe ndivai, nĩnoosie ndivai namwĩkĩa. Nyie ndyaĩ naatukya ũthyũ nĩ mbee wake ĩngĩ. 2Kwoou mũsumbĩ Alitasasita nĩwangũlilye atĩĩ, “Ũtukĩtye ũthyũ waku nĩkĩ na ndwĩ mũwau? No nginya wĩthĩwe wĩ na thĩna ngoonĩ.”

Nĩnakwatiwe nĩ w'ĩa mũno, 3#2Asu 25.8-10; 2Mav 36.19; Yel 52.12-14 na namũsũngĩa namwĩa atĩĩ, “Mũsumbĩ nĩekale thayũ tene na tene! Ndonya ata kwĩsiĩĩa kwĩthĩwa nĩ na ũthyũ mũtuku yĩla ndũa ĩla aaũmae makwa mathikĩtwe yĩthĩĩtwe yĩ mbanange na mĩvĩa ya yo ĩkavĩvw'a?”

4Mũsumbĩ nĩwangũlilye atĩĩ, “Wĩenda ata?”

Nĩnavoyie Ngai wa ĩtunĩ, 5na ĩndĩ neea mũsumbĩ atĩĩ, “Ethĩwa we mũsumbĩ nĩwendeeaw'a ninyie, na nũkwĩanĩsya ũndũ ngũũkũlya, nĩenda ũndũme kĩsionĩ kya nthĩ ya Yuta ndũanĩ ĩla aaũmae makwa mathikĩtwe, nĩ kana ngake ndũa ĩsu ĩngĩ.”

6Nĩvo ĩndĩ mũsumbĩ ailyĩ nthĩ vamwe na mũka wangũlilye atĩĩ, “Wĩenda kũthi vandũ va ĩvinda yĩana ata? Ũkasyoka ĩndĩĩ?” Mũsumbĩ nĩwendeeiw'e nĩ kũndũma na kwoou namũtavya yĩla ngasyoka.

7Nĩnasũngĩie mũsumbĩ namwĩa atĩĩ, “Ethĩwa we mũsumbĩ nũkwona wĩ waĩlu, nenge valũa ndwaĩe makavana ma kĩsio kya ngalĩko ya ũthũĩlonĩ wa syũa ya Ũsĩ wa Euvalati, ũmakũlĩtye manenge mwanya nĩvĩte nĩthi Yuta. 8O ta ũu nĩnengwe valũa ũngĩ ndwaĩe Asavu, mũsuvĩi wa kĩtheka kya mũsumbĩ, akũlĩtw'e andetheesye na mĩtĩ ya kũseũvya mĩvĩa ya vandũ vala valũmu Ĩkalũnĩ, mĩvĩa ya ũkũta wa ndũa, na ya nyũmba ĩla ngũthi kwĩkala.” Mũsumbĩ nĩwanengie syĩndũ syonthe ila namwĩtisye nũndũ Ngai aĩ vamwe nakwa.

9Mũsumbĩ nĩwanengie atongoi amwe ma asikalĩ na asikalĩ angĩ ma kũlĩsa mbalasinĩ tũendany'e. Nĩnambĩĩie kyalo kya kũthi ngalĩko ya ũthũĩlonĩ wa syũa ya Ũsĩ wa Euvalati, na navika nanenga makavana ma kĩsio kĩu valũa kuma kwa mũsumbĩ. 10Yĩla Sanavalati kuma ndũanĩ ya Mbethi-oloni, na Tovia ũmwe wa athũkumi ma kĩsio kya Aamimoni meewie kana ve mũndũ wũkie kũthũkũma nĩ kana andũ ma Ĩsilaeli mone nesa, nĩmathatie mũno.

Neemia Aisisya Ngũta sya Yelũsalemu

11Kwoou nĩnaendie Yelũsalemu, na nekala vo mĩthenya ĩtatũ. 12Nĩvo ĩndĩ naamũkie ũtukũ na naumaala nĩ na andũ avũthũ ala twaĩ ĩmwe. Ndyaatavya mũndũ o na ũmwe maũndũ ala Ngai wakwa weekĩĩte ngoonĩ yakwa, nĩke kwondũ wa ndũa ya Yelũsalemu. Ndyaathi na nyamũ ĩngĩ ate o ĩng'oi yĩla yanguĩte. 13Nĩnaendie ũtukũ nesĩla Mũvĩanĩ wa Mwandanĩ, nelekele kĩthimanĩ kya Mũkũnga, kwĩsĩla Mũvĩanĩ wa Kumĩlya Vũũ. Nĩvĩtĩte nĩnasyaisye ngũta mbomboku sya ndũa na mĩvĩa ĩla yaanangĩtwe nĩ mwaki. 14Nĩnaendeeie navika Mũvĩanĩ wa Nthongo na Ndianĩ ya Mũsumbĩ, na weethĩa vai vandũ nyamũ ĩla yanguĩte yĩsĩla. 15Kwoou nĩnambatie na ũtukũ nĩsĩle nzĩanĩ ĩla yĩ Mwandanĩ na nasisya mokũta. Nĩnavĩndũkie nasyoka nĩsĩlĩte Mũvĩanĩ wa Mwandanĩ.

16Vai ũmwe wa atongoi ma ndũa waamanya vala naĩ kana ũndũ neekaa; ndyaĩ nĩnatavya Ayuti, athembi, andũ me ndaĩa, atongoi kana andũ angĩ ala maaĩlĩte kũtethya wĩa. 17Nĩvo ĩndĩ naneenie namo namea atĩĩ, “Kwa sisyai ũndũ twĩ thĩnanĩ wĩana nũndũ ndũa ya Yelũsalemu nĩ mbomboku, na mĩvĩa ya yo ĩkavĩvw'a! Ũkai twake ĩngĩ ngũta sya ndũa ĩno, na kwa nzĩa ĩsu tũimina kĩvũthya kĩĩ.” 18Nĩnamatavisye ũndũ Ngai waĩ vamwe nakwa na andetheesya, na ũndũ mũsumbĩ wandavĩtye.

Nĩmasũngĩie masya atĩĩ, “Ũkĩlai twambĩĩe kwaka ĩngĩ ndũa ĩno!” Kwoou nĩmeeyũmbanisye mambĩĩe wĩa ũsu mũseo.

19Yĩla Sanavalati, Tovia na Mũalavu weetawa Ngesemu meewie ũndũ tũvangĩte kwĩka, nĩmatũthekeeie na kũtũvũthya mayasya atĩĩ, “Mwĩĩka ũndũ mwaũ? Mwĩenda kũng'endea mũsumbĩ?”

20Nĩvo ĩndĩ namasũngĩie namea atĩĩ, “Ngai wa Ĩtunĩ nĩwe ũkũtuma tũsinda. Ithyĩ athũkũmi make nĩtũkũkĩla na kwaka ndũa ĩno. Inyw'ĩ mũi na kĩanda Yelũsalemu, kana ũndũ mũkũlya kana kwĩthĩwa mwĩ na ngwatanĩo naitũ maũndũnĩ ma ũthaithi.”

Currently Selected:

Nee 2: KAMBA

Highlight

Copy

Compare