Nee 1
1
Mboya ya Neemia kwondũ wa Yelũsalemu
1Ũũ nĩw'o ũelesyo wa maũndũ ala Neemia mwana wa Akalia weekie.
Mweinĩ wa kenda ũla nĩw'o wĩtawa Kĩsilevu, mwakanĩ wa mĩongo ĩlĩ wa kũsumbĩka kwa Alitasasita mũsumbĩ wa Velisia, yĩla naĩ ndũanĩ nene ya Susa, 2Aanani, ũmwe wa ana-a-asa makwa nĩwookie kuma Yuta e na andũ angĩ. Nĩnamakũlilye ũvoo wa Ayuti ala matialile, na mavonoka malea kũtavwa,#1.2 mavonoka malea kũtavwa: Kana ala masyokie kuma kũla matwaĩtwe me atave. na o ta ũu namakũlya ĩũlũ wa Yelũsalemu. 3Nĩmanzũngĩie mambĩa atĩĩ, “Andũ ala mavonokie malea kũtavwa, na me kũu nthĩ ya Yuta me thĩnanĩ mũnene. Ũkũta wa ndũa ya Yelũsalemu nĩ mũomboku, na mĩvĩa ya yo nĩ mĩvĩvye.” 4Yĩla neewie maũndũ asu, nĩnekalile nthĩ na naĩa. Vandũ va mĩthenya yĩana ũndũ mũna, nĩneethĩiwe na kyeva na natĩĩa kũya. Nĩnavoyie Ngai wa ĩtunĩ. 5Nĩnavoyie nasya atĩĩ, “Ame Mwĩai Ngai, Ngai wa Ĩtu, wĩ Ngai mũnene na wa ũkĩwa. Nĩwĩanĩasya ũtianĩo na wendo waku ũtaolekaa kwa ala makwendete na meanĩasya mĩao yaku. 6Mbĩthukĩĩsye na ũinzisya nĩ kana wĩw'e mboya ya mũthũkũmi waku, ĩla ngũvoyaa ũtukũ na mũthenya kwondũ wa athũkũmi maku andũ ma Ĩsilaeli. Nĩngumbũla naĩ ila ithyĩ andũ ma Ĩsilaeli tũkũvĩtĩsye. Nyie vamwe na andũ ma mũsyĩ wa ĩthe wakwa nĩtũkũvĩtĩsye. 7Nĩtwĩkĩte ũndũ mũthũku mũno kwa kũlea kwĩanĩsya mĩao, motw'ĩo na myamũlo ĩla weeaĩie mũthũkũmi waku Mwose. 8#Ali 26.33 Lilikana ndeto ila weeyĩaĩie mũthũkũmi waku Mwose ũyasya, ‘Mweethĩwa mũte aĩkĩĩku ngamũnyaĩĩkĩsya andũnĩ ma mbaĩ ingĩ, 9#Kũt 30.1-5 ĩndĩ mwanzyokea na kwĩanĩasya mĩao yakwa na kwĩkaa ũndũ ĩkwasya, nĩvo ĩndĩ o na ethĩwa andũ menyu ala atave me kũasa vyũ, ngamombany'a kuma kũu na ngĩmatũnga vala nyie nanyuvie nĩthaithĩawe.’
10“We Mwĩai, aa nĩ athũkũmi maku na andũ maku, ala woovoisye na vinya na ũtonyi waku mũnene. 11Ame Mwĩai Ngai nĩngũkwĩsũva ĩw'a mboya yakwa, na mboya sya athũkũmi ala angĩ maku, ala mendaa ũkũnenga ndaĩa. Ũmũnthĩ nenga nyie mũthũkũmi waku ũsindi, na ũituma mũsumbĩ ambĩw'ĩa tei.”
Ĩvindanĩ yĩu ninyie nanengae mũsumbĩ ndivai.
Currently Selected:
Nee 1: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
