Nee 12

Masyĩtwa ma Athembi na Alivai

1Aa nĩmo athembi na Alivai ala masyokie kuma Mbavilonĩ me na Nzelũvaveli mwana wa Sealitieli, na Yesua ũla waĩ Mũthembi Mũnene:

Athembi maĩ: Selaia, Yelemia, Esala, 2Amalia, Maluku, Atusi, 3Sekania, Leumu, Melemothi, 4Ito, Nginethoi, Aviya, 5Miyamini, Maatia, Mbilika, 6Semaia, Yoialivu, Yetaia, 7Salũ, Amoki, Ilikia na Yetaia.

Asu nĩmo maĩ atongoi ma athembi, na ma ana-a-ĩthe moo ĩvindanĩ ya Yesua.

8Alivai maĩ: Yesua, Mbinui, Katimieli, Selevia, Yuta, Matania ũla e vamwe na ana-a-asa make waũngamĩe mbathi sya kũtũnga mũvea. 9Namo aini ala meetĩkĩĩasya maĩ Mbakivukia, Uni, na ana-a-ĩthe moo Alivai.

Nzyawa sya Mũthembi Mũnene Yesua

10Yesua aĩ ĩthe wa Yoiakimu; Yoiakimu aĩ ĩthe wa Eliasivu; Eliasivu aĩ ĩthe wa Yoiata; 11Yoiata aĩ ĩthe wa Yonathani, na Yonathani aĩ ĩthe wa Yatua.

Atongoi ma Mĩsyĩ ya Kĩ-ũthembi

12Ĩvindanĩ yĩla Yoiakimu waĩ Mũthembi Mũnene, athembi aa nĩmo maĩ atongoi ma mĩsyĩ ya kĩ-ũthembi:

Mũsyĩ wa Selaia watongoew'e nĩ Melaia; mũsyĩ wa Yelemia watongoew'e nĩ Aanania; 13mũsyĩ wa Esala watongoew'e nĩ Mesulamu; mũsyĩ wa Amalia watongoew'e nĩ Yeoanani; 14mũsyĩ wa Maluki watongoew'e nĩ Yonathani; mũsyĩ wa Sevania watongoew'e nĩ Yosevu; 15mũsyĩ wa Alimu watongoew'e nĩ Atena; mũsyĩ wa Melaiothi watongoew'e nĩ Elikai; 16mũsyĩ wa Ito watongoew'e nĩ Nzekalia; mũsyĩ wa Nginethoni watongoew'e nĩ Mesulamu; 17mũsyĩ wa Aviya watongoew'e nĩ Nzikili, mĩsyĩ ya Miniamini na Moatia yatongoew'e nĩ Vilitai; 18mũsyĩ wa Mbilika watongoew'e nĩ Samua; mũsyĩ wa Semaia watongoew'e nĩ Yonathani; 19mũsyĩ wa Yoialivu watongoew'e nĩ Matenai; mũsyĩ wa Yetaia watongoew'e nĩ Ũsisi; 20mũsyĩ wa Salai watongoew'e nĩ Kalai; mũsyĩ wa Amoki watongoew'e nĩ Eveli; 21mũsyĩ wa Ilikia watongoew'e nĩ Asavia; mũsyĩ wa Yetaia watongoew'e nĩ Nethaneli.

Mĩsyĩ ya Athembi na ya Alivai

22Masyĩtwa ma atongoi ma mĩsyĩ ya Alivai na ya athembi nĩmaandĩkiwe ĩvindanĩ ya athembi aa: Eliasivu, Yoiata, Yoanani, na Yatua. Masyĩtwa asu maminie kũandĩkwa yĩla Ndalio waĩ mũsumbĩ wa Velisia.

23Masyĩtwa ma atongoi ma mĩsyĩ ya Alivai maandĩkiwe Ĩvukunĩ ya Maũndũ ma Mavinda nginya ĩvinda ya Yonathani mwana wa Eliasivu.

Ũndũ wĩa Ĩkalũnĩ Waaniw'e

24Atongoi ma Alivai maĩ Asavia, Selevia, Yesua mwana wa Katimieli na ana-a-ĩthe moo. Atongoi asu maũngamaa ngalĩko ĩla ĩngĩ ya Alivai nĩ kana maketĩkĩĩasya yĩla meũtaĩa na kũtũnga mũvea. Kĩkundi kĩmwe kyeetĩkĩanĩasya na kĩla kĩngĩ kwĩanana na ũndũ Mũsumbĩ Ndeviti, mũndũ wa Ngai waandĩkie.

25Asikalĩ aa nĩmo matethasya wĩa wa kũsunga tũsũmba tũla tweekĩawa syĩndũ Ĩkalũnĩ, tũla twaĩ vakuvĩ na mĩvĩa ya Ĩkalũ: Matania, Mbakivukia, Ovatia, Mesulamu, Talimoni na Akuvu.

26Mathũkũmaa ĩvinda ya Yoiakimu mwana wa Yesua, na mwĩsũkũũe wa Yosataki, na ĩvinda ya Neemia ũla waĩ ngavana na ya Esala ũla waĩ mũthembi na mũmanyĩsya wa mĩao.

Neemia Aivatha Ũkũta wa Yelũsalemu Wĩthĩwe Mũtheu

27Yĩla ũkũta wa ndũa ya Yelũsalemu wavathiwe, Alivai nĩmaetiwe Yelũsalemu kuma kũla matwĩe, nĩ kana methĩwe mbokanĩ ya kũtanĩa kũvathwa kwa Ĩkalũ, mayina mbathi sya kũtũnga mũvea makũnĩte tũmasaya, ngitaa nene na ngitaa nini. 28Aini ma mĩsyĩ ya Alivai nĩmoombanie kuma vala matwĩe vakuvĩ na Yelũsalemu, kuma motũinĩ ala mathyũlũlũkĩte Netova, 29kuma Mbethi-ngilikali, kuma kĩsionĩ kya Ngeva na kuma Asimavethi. Aini nĩmeeyakĩĩte motũi vakuvĩ na Yelũsalemu. 30Athembi na Alivai nĩmeethĩiwe na ĩvinda ya kwĩthesya, na mathesya andũ, mĩvĩa, na ũkũta wa ndũa.

31Nĩvo ĩndĩ noombanĩisye atongoi ma Yuta ũkũtanĩ ĩũlũ.#12.31 ũkũtanĩ ĩũlũ: Kana ũtee wa ũkũta Nĩnamanengie wĩa wa kũũngamĩa ikundi ilĩ sya andũ, nĩ kana syĩlingĩle ndũa iendee na kũtũngĩa Ngai mũvea.

Kĩkundi kĩmwe kyaendie ngalĩko ya kw'oko kwa aũme, ũkũtanĩ ĩũlũ kwelekela Mũvĩanĩ wa Kumĩlya Vũũ. 32Osaia na nyusu ya atongoi ma Yuta nĩmamaatĩĩie, 33me vamwe na Asalia, Esala, Mesulamu, 34Yuta, Mbengyameni, Semaia na Yelemia. 35O ta ũu nĩmaendanisye na athembi me na masoo, na Nzekalia mwana wa Yonathani, na mwĩsũkũũe wa Semaia. Aaũmae ala angĩ ma Yonathani maĩ: Matania, Mikaia na Nzakuli kuma mũsyĩnĩ wa Asavu. 36Nzekalia nĩwaatĩĩiwe nĩ andũ angĩ ma mũsyĩ wake ala nĩ: Semaia, Asaleli, Milalai, Ngilalai, Maai, Nethaneli, Yuta, na Aanani. Onthe makuĩte mĩio ya mbathi ya mũthemba ũla wakũnawa nĩ Mũsumbĩ Ndeviti, mũndũ wa Ngai. Esala ũla mũmanyĩsya wa mĩao nĩwatongoeisye kĩkundi kĩu. 37Me vakuvĩ na Mũvĩa wa Nthongo ya Kĩw'ũ, nĩmambatĩile ngasinĩ ila syaendete Ndũanĩ ya Ndeviti, kwĩsĩla nyũmbanĩ ya Ndeviti ya kĩ-ũsumbĩ, na masyokela ũkũtanĩ wa Mũvĩa wa Kĩw'ũ, ngalĩko ya wumĩlonĩ wa syũa wa ndũa.

38Aini ala angĩ nĩmaendie kwelekela ngalĩko ĩla ĩngĩ. Nĩnamaatĩĩie nĩ vamwe na nyusu ya andũ, na twesĩla vakuvĩ na ũkũta ũla wĩ ngalĩko ya ĩũlũ ya Mwako Mũtũlu wa Maiko Manene, kũvika Ũkũtanĩ Mũthanthau. 39Kuma vau nĩtwaendie twesĩla Mũvĩanĩ wa Evalaimu, Mũvĩanĩ wa Tene, Mũvĩanĩ wa Makũyũ, Mwakonĩ Mũtũlu wa Ananeli, Mwakonĩ Mũtũlu wa Ĩana, kũthi kũvika Mũvĩanĩ wa Malondu. Twaũngamĩile vakuvĩ na Mũvĩa wa Ĩkalũ.

40Ikundi syelĩ sya aini ala matũngĩaa Ngai mũvea nĩsyavikie Ĩkalũnĩ. O ta ũu nĩnavikie nĩ na atongoi ala naĩ namo, 41na athembi ala maĩ: Eliakimu, Maaseia, Miniamini, Mikaia, Elioenai, Nzekalia, na Aanania. Onthe mavuvĩte masoo. 42Maatĩĩwe nĩ Maaseia, Semaia, Eleasali, Ũsisi, Yeoanani, Malikiya, Elamu, na Eseli. Aini matongoew'e nĩ Yesilaia nĩmainie na wasya mũnene.

43Mũthenyanĩ ũsu nĩmaumisye nthembo mbingĩ, na andũ maĩ na ũtanu mwingĩ nũndũ Ngai nĩwatumĩte methĩwa na ũtanu mwingĩ. O ta ũu iveti na syana syaĩ ũtanunĩ ũsu. Wasya wa ũtanu ũla waĩ Yelũsalemu waĩ ũtonya kwĩw'ĩka kũvika vaasa.

Syĩndũ ila Syaumaw'a Kwondũ wa Ũthaithi Ĩkalũnĩ

44Ĩvindanĩ yĩu andũ nĩmanengiwe wĩa wa kũũngamĩa tũsũmba tũla twaiawa syĩndũ ila syaetawe Ĩkalũnĩ, vamwe na ilungu sya ĩkũmi na ũsyao wa mbee wa mbaa mbeke na matunda ma kĩla mwaka. Andũ asu matethasya wĩa wa kũmbany'a syĩndũ isu kuma mĩũndanĩ vakuvĩ na ndũa syĩ kĩvathũkany'o kwĩanana na ũndũ mĩao yaĩtye. Andũ onthe ma Yuta nĩmendeeaw'a nĩ athembi na Alivai, 45#1Mav 25.1-8; 26.12 nũndũ nĩmatethasya wĩa ĩvinda ya mboka sya ũthesyo, na maũndũ angĩ ala Ngai woo weeaĩte. Aini ma Ĩkalũ na asikalĩ ala masungaa Ĩkalũ, nĩmatethisye wĩa woo kwĩanana na ũndũ Mũsumbĩ Ndeviti na mwana wake Solomoni meeaĩte. 46Kuma ĩvindanĩ ya Mũsumbĩ Ndeviti, na ya Asavu ũla waĩ mwini, yĩla nĩ ĩvinda ya tene, aini nĩmatongoeasya mbathi sya kũtaĩa na kũtũngĩa Ngai mũvea. 47Kwoou ĩvindanĩ ya Nzelũvaveli na ya Neemia, andũ onthe ma Ĩsilaeli nĩmaumisye ilungu syoo sya kĩla mũthenya kwondũ wa aini na asikalĩ ala masungaa Ĩkalũ. O ta ũu nĩmavathie kĩlungu kwondũ wa Alivai, namo Alivai mavatha kĩlungu kwondũ wa nzyawa sya Alũni.

Currently Selected:

Nee 12: KAMBA

Highlight

Copy

Compare