Nee 11

Andũ ala Matwĩe Yelũsalemu

1Atongoi ma andũ ma Ĩsilaeli nĩmatũie Yelũsalemu, na andũ ala angĩ makũna kula nĩ kana manyuve andũ ma mũsyĩ ũmwe kuma kĩla mĩsyĩ ĩkũmi, mathi makatũe mũsyĩnĩ mũtheu wa Yelũsalemu. Andũ ala angĩ maaĩlĩte kũtũa ndũanĩ, na mĩsyĩnĩ ĩla ĩngĩ. 2Andũ nĩmanengie ala onthe meeyumisye kũtũa Yelũsalemu ndaĩa. 3#Nee 7.73 Ndũanĩ, na mĩsyĩnĩ ĩla ĩngĩ, andũ ma Ĩsilaeli, Athembi, Alivai, athũkũmi ma Ĩkalũ, na nzyawa sya athũkũmi ma Solomoni, matũaa isionĩ syoo ila syaĩ ndũanĩ syoo. Aa nĩmo masyĩtwa ma andũ ala matũie Yelũsalemu: 4Ndũanĩ ya Yelũsalemu kwatũie andũ amwe kuma mbaĩnĩ ya Yuta na ya Mbengyameni.

Andũ ma Kuma mbaĩnĩ ya Yuta maĩ:

Athaia mwana wa Usia, mwĩsũkũũe wa Nzekalia. Aaũmae make ala angĩ maĩ: Amalia, Sevatia, na Maalaleli, ala maĩ nzyawa sya Velesi mwana wa Yuta.

5Maaseia mwana wa Mbaluku, mwĩsũkũũe wa Koli-ose. Aaũmae make ala angĩ maĩ: Asaia, Ataia, Yoialivu, Nzekalia, ala maĩ nzyawa sya Mũsilo mwana wa Yuta.

6Nzyawa sya Velesi ila syatwĩe Yelũsalemu syaĩ andũ ngũmbaũ maana ana na mĩongo thanthatũ na nyanya.

7Andũ ma kuma mbaĩnĩ ya Mbengyameni maĩ:

Salũ mwana wa Mesulamu, mwĩsũkũũe wa Yoeti. Aaũmae ala angĩ make maĩ: Vetaia, Kolaia, Maaseia, Ithieli, na Yesaia.

8Ngavai, na Salai nĩmaileny'e ũndũ na Salũ.

Andũ ma Mbengyameni ala matwĩe Yelũsalemu onthe maĩ maana kenda na mĩongo ĩlĩ na nyanya. 9Yoeli mwana wa Nzikili nĩwe waĩ mũtongoi woo, na Yuta mwana wa Asenua nĩwe waatĩĩe Yoeli wĩanĩ wa kũtongoesya ndũa.

10Athembi maĩ:

Yetaia mwana wa Yoialivu, na Yakini. 11Selaia mwana Ilikia mwĩsũkũũe wa Mesulamu. Aaũmae ala angĩ make maĩ: Nzatoki, Melaiothi, na Aituvu ũla waũngamĩe Ĩkalũ. 12Andũ onthe ma mũsyĩ ũsu ala mathũkũmaa Ĩkalũnĩ maĩ maana nyanya na mĩongo ĩlĩ na elĩ.

Ataia mwana wa Yeloamu, na mwĩsũkũũe wa Velalia. Aaũmae ala angĩ make maĩ Amisi, Nzekalia, Vasuli na Malikiya.

13Andũ onthe ala maĩ atongoi ma nyũmba sya mũsyĩ ũsu maĩ maana elĩ na mĩongo ĩna na elĩ.

Amasai mwana wa Asaleli na mwĩsũkũũe wa Aasai. Aaũmae ala angĩ make maĩ: Mesilemothi na Imeli.

14Vaĩ andũ ĩana na mĩongo ĩlĩ na nyanya ma mũsyĩ ũsu ala maĩ asikalĩ ngũmbaũ. Mũtongoi woo aĩ Nzavutieli mwana wa Aketolimu.

15Alivai maĩ:

Semaia mwana wa Asuvu na mwĩsũkũũe wa Asilikamu. Aaũmae ala angĩ make maĩ: Asavia na Mbuni. 16Savethai na Yosavati maĩ atongoi ma Alivai ala mathũkũmaa nza wa Ĩkalũ.

17Matania mwana wa Mika na mwĩsũkũũe wa Nzaveti, nzyawa ya Asavu nĩwatongoeisye aini ma Ĩkalũ kwina mboya ya kũtũnga mũvea. Mbakivukia ũla waĩ mũtetheesya wa Matania, Avata, mwana wa Samua na mwĩsũkũũe wa Ngalali nzyawa ya Yetuthuni.

18Alivai onthe ala matwĩe mũsyĩnĩ mũtheu wa Yelũsalemu maĩ maana elĩ na mĩongo nyanya na ana.

19Asikalĩ ala masungaa Ĩkalũ maĩ: Akuvu, Talimoni na ana-a-ĩthe moo. Onthe maĩ ĩana na mĩongo mũonza na elĩ.

20Andũ ala angĩ ma Ĩsilaeli, athembi, na Alivai ala matialile nĩmatũie isionĩ syoo sya ng'ũndũ, ila syaĩ ndũanĩ na mĩsyĩnĩ ĩngĩ ya Yuta. 21Andũ ala mathũkũmaa Ĩkalũnĩ nĩmatũie kĩsionĩ kya Yelũsalemu kĩla kĩtawa Oveli, na nĩmathũkũmaa matongoew'e nĩ Nziia, na Ngisiva.

22Mũtongoi wa Alivai ala mekalaa Yelũsalemu aĩ Ũsisi mwana wa Mbani na mwĩsũkũũe wa Asavia. Aaũmae ala angĩ make maĩ: Matania, na Mika. Ũsisi aĩ wa mũsyĩ wa Asavu. Mũsyĩ ũsu nĩw'o wakwete maũndũ ma mbathi Ĩkalũnĩ. 23Aini asu maĩ ungu wa mĩao ya mũsumbĩ ĩla yamonasya ũndũ maaĩlĩte kũendeesya wini Ĩkalũnĩ kĩla mũthenya. 24Vethaia mwana wa Mesesaveli, kuma mũsyĩnĩ wa Nzela Mbaĩnĩ ya Yuta nĩwe wanyuvĩtwe ethĩwe mũtai wa mũsumbĩ, ĩũlũ wa mavata ma andũ ma Ĩsilaeli ũsumbĩnĩ wa Velisia.

Andũ ala Matwĩe Ndũanĩ na Mĩsyĩnĩ ĩngĩ

25Andũ aingĩ matwĩe ndũanĩ ila syaĩ vakuvĩ na mĩũnda yoo. Andũ ma mbaĩ ya Yuta matwĩe Kiliathi-aliva, Ndivoni na Yekaviseeli na motũinĩ ala maĩ vakuvĩ na ndũa isu. 26O ta ũu matũĩte ndũanĩ sya Yesua, Molata, Mbeethi-veleti, 27Asali-suali, Mbeeli-sieva na motũi ala mamĩthyũlũlũkĩte, 28Nzikilaki, na Mekona na motũi ala mamĩthyũlũlũkĩte, 29Eni-limoni, Nzola, Yalimuthi, 30Nzanoa, na Atulamu, na motũi ala maithyũlũlũkĩte, Lakisi, na mĩũnda ĩla yaĩ vakuvĩ nayo, Aseka na motũi ala mamĩthyũlũlũkĩte. Kwoou matwĩe kuma Mbeeli-sieva kũvika Mwandanĩ wa Inomu.

31Andũ ma mbaĩ ya Mbengyameni matwĩe Ngeva, Mikimasi, Aiya, Mbethi-eli, na motũinĩ ala mamĩthyũlũlũkĩte, 32Anathothi, Novu, Anania, 33Asoli, Lama, Ngitaimu, 34Atiti, Nzevoiimu, Nevalati, 35Loti, Ono na Mwandanĩ wa Aseũvya ma syĩndũ. 36Ikundi imwe sya Alivai ila syatwĩe kĩsionĩ kya Yuta nĩsyatũie syĩ vamwe na andũ ma mbaĩ ya Mbengyameni.

Currently Selected:

Nee 11: KAMBA

Highlight

Copy

Compare