Mat 16

Atongoi ma Ayuti Maimwĩa Yesũ Nĩeke Kyama

(Mk 8.11-13; Lk 12.54-56)

1 # Mat 12.38; Lk 11.16 Amwe ma Avalisi na Asatũkai nĩmaendie vala ve Yesũ, na maimantha nzĩa ya kũmũkwatya mamwĩa nĩeke kyama kuma kwa Ngai. 2Ĩndĩ Yesũ amasũngĩa amea atĩĩ, “Yĩla syũa yathũa, ĩtu yeethĩwa yĩ ĩtune, inyw'ĩ nĩmwaasya, ‘Ũnĩ kũkeethĩwa kwĩ kũkenũku.’ 3Na kũitheatheana, ĩtu yeethĩwa yĩ ĩtune na kwĩ matu maiũ, mũyasya, ‘Ũmũnthĩ nĩkũkua.’ Inyw'ĩ nĩmũtonya kũmanya ũndũ nzeve ĩkwĩthĩwa ĩilyĩ o kwa kũsisya matu, ĩndĩ mũitonya kũmanya maũndũ ala yu maendee ũndũ makaumya mũthya!#16.3 Maandĩko amwe ma tene ma Ndeto ya Ngai mai na ndeto ii sya Yesũ syĩ mĩsoanĩ ĩno 4#Mat 12.39; Lk 11.29 Andũ ma ĩvinda yĩĩ mwĩ athũku mũno na mũi na kĩkĩo kya Ngai. Mwĩkũlya mwĩkĩwe kyama, ĩndĩ vai kyama mwĩonw'a ate o kĩla kyeekĩkie kwa Yona.”

Nĩvo ĩndĩ Yesũ wamatiie vau athi.

Yesũ Aikany'a Amanyĩw'a make Mesũvĩane na Momanyĩsyo ma Avalisi na ma Asatũkai

(Mk 8.14-21)

5Yĩla amanyĩw'a mainganĩisye ngalĩko ĩla ĩngĩ ya ĩia nĩmeethĩie moolwa nĩ kũkua mĩkate. 6#Lk 12.1 Yesũ nĩwameie atĩĩ, “Ĩsũvĩei na mũyĩsianĩa na mbota#16.6 mbota: Sisya ũelesyo ũla wĩ 13.33 ya Avalisi na ya Asatũkai.”

7Namo mambĩĩa kwĩana mo ene atĩĩ, “Eneena ũu nũndũ tũtanakua mĩkate.”

8Yesũ nĩwamanyie ũndũ mekwasya na kwoou amakũlya atĩĩ, “Nĩkĩ mũũneenany'a ĩũlũ wa kwĩthĩwa mũte na mĩkate? Ko mwĩ na mũĩkĩĩo ũnyivĩte ata? 9#Mat 14.17-21 O nayu mũikũelewa? Mũililikene ĩla mĩkate ĩtano natilangile yaĩwa nĩ andũ mbee wa ngili itano, na ũtalo wa ikavũ ila mwoombanisye syusũĩte ilungu ila syatialile? 10#Mat 15.34-38 O na mũililikene ĩla mĩkate mũonza nĩnatilangile yaĩwa nĩ andũ ngili inya, na ũtalo wa ikavũ ila mũnoombanisye syusĩe ilungu ila inatialile? 11Mũtonya ata kwĩthĩwa mũtesĩ kana ndiũneenaa ĩũlũ wa mĩkate? Ĩsũvĩanei na mbota ya Avalisi na ya Asatũkai.”

12Nĩvo ĩndĩ amanyĩw'a maeleiwe kana Yesũ ndeũmakanasya mesũvĩane na mbota ĩla yĩkĩawa mũtunĩ wa mĩkate nĩ kana wimbe. Emakanasya mesũvĩane na momanyĩsyo ma Avalisi na ma Asatũkai.

Vetelo Aikũsĩĩa kana Yesũ nĩwe Klĩsto

(Mk 8.27-30; Lk 9.18-21)

13Yesũ na amanyĩw'a make nĩmaendie kĩsionĩ kĩla kĩthyũlũlũkĩte ndũa yĩtawa Kaisalea Vilivi. Me kũu nĩwamakũlilye amanyĩw'a make atĩĩ, “Kwa ndavyei, mo andũ maasya nyie Mwana wa Mũndũ ninyie ũũ?”

14 # Mat 14.1-2; Mk 6.14-15; Lk 9.7-8 Namo mamwĩa atĩĩ, “Andũ amwe maasya nue Yoana Mũvatisi na angĩ mayasya nue Eliya. O na angĩ maasya nue Yelemia kana o ũmwe wa athani.”

15Yesũ amakũlya atĩĩ, “Inyw'ĩ nenyu mwĩasya ninyie ũũ?”

16 # Yoa 6.68-69 Simioni Vetelo amũsũngĩa, “We nue Klĩsto, Mwana wa Ngai ũla wĩ thayũ.”

17Yesũ amwĩa atĩĩ, “Wĩ mũathime we Simioni mwana wa Yona. Ũvuany'o ũsu wĩ naw'o ndumĩte mũndũnĩ, ĩndĩ ũnengetwe nĩ Ĩthe wakwa ũla wĩ ĩtunĩ. 18Nakwa nĩngũkwĩa nue Vetelo,#16.18 Vetelo: Ũalyũlo wa ĩsyĩtwa yĩĩ nĩ ĩvia na ĩũlũ wa ĩvia yĩĩ ngaaka ĩkanisa yakwa, na o na mavinya ma kĩkw'ũ maikethĩwa matonya kũyananga. 19#Mat 18.18; Yoa 20.23 Ngakũnenga mbungũo sya ũsumbĩ wa ĩtu: Ũndũ o na wĩva ũla ũkova kũũ ĩũlũ wa nthĩ, ũkoovwa ĩtunĩ. Na ũndũ o na wĩva ũla ũkathasya kũũ ĩũlũ wa nthĩ, ũkathaw'a ĩtunĩ.” 20Nĩvo ĩndĩ Yesũ weeaĩie amanyĩw'a make amea atĩĩ, “Mũikatate kũtavya mũndũ o na ũmwe kana ninyie Klĩsto.”

Yesũ Aineena Ĩũlũ wa Kũthĩna, Kũkw'a na Kũthayũũka Kwake

(Mk 8.31—9.1; Lk 9.22-27)

21Kuma ĩvindanĩ yĩu, Yesũ nĩwambĩĩie kũmatavya amanyĩw'a make ateũvithany'a kĩndũ amea atĩĩ, “No nginya nĩthi Yelũsalemu, na vau atumĩa, athembi anene, na amanyĩsya ma Mĩao makanthĩny'a mũno. Ngooawa, ĩndĩ ĩtina wa mĩthenya ĩtatũ ngathayũũka.”

22Nĩvo ĩndĩ Vetelo wamwĩtie Yesũ mathi nzama na amũkany'a aimwĩa atĩĩ, “Ũu ndũtonyeka! Ngai ndaketĩkĩle ũndũ ũsu wĩkĩke kwaku.” 23Yesũ nĩweethyũũie amũsisya na amwĩa atĩĩ, “Uma vaa nĩĩ we Satani! Wĩnziĩĩa kwĩka kwenda kwa Ngai. Mosũanĩo maku nĩ ma kĩ-mũndũ na ti mosũanĩo ma Ngai.”

24 # Mat 10.38; Lk 14.27 Nĩvo ĩndĩ Yesũ weeie amanyĩw'a make atĩĩ, “Ethĩwa mũndũ nũkwenda kũtw'ĩka mũatĩĩi wakwa, no nginya elee mwene, akue ngelany'o yake na aingatĩĩa. 25#Mat 10.39; Lk 17.33; Yoa 12.25 Nũndũ ũla wendaa kũsũvĩa thayũ wake akawasya, ĩndĩ ũla waasya thayũ wake nũndũ wakwa akawona ĩngĩ. 26Ve ũtethyo mwaũ, mũndũ akamesya nthĩ yonthe na ayasya thayũ wake? Kana mũndũ atonya kũnengane kyaũ akakũany'a na thayũ wake?

27 # Mat 25.31; Sav 62.12; Alo 2.6 “Mwana wa Mũndũ akooka ĩngĩ kũũ nthĩ e na alaĩka na ũtonyi mũnene wa Ĩthe wake. Nĩvo ĩndĩ ũkatuva kĩla mũndũ kwĩanana na meko make. 28Nĩmũtavya w'o, andũ amwe maũngyĩ o vaa maikakw'a matanamba kwona Mwana wa Mũndũ ayũka nthĩnĩ wa ũsumbĩ wake.”

Currently Selected:

Mat 16: KAMBA

Highlight

Copy