Mat 15

Momanyĩsyo ĩũlũ wa Syĩndũ Ntheu na ila Mbuku

(Mk 7.1-13)

1Ĩvindanĩ yĩu, Avalisi amwe na amanyĩsya ma Mĩao nĩmookie vala ve Yesũ maumĩte Yelũsalemu na mamũkũlya atĩĩ, 2“Nĩkĩ amanyĩw'a maku mataatĩĩaa mokũũ ma aaũmae maitũ? Mbona maithambaa moko mbee wa kũya!”

3Yesũ nake amakũlya atĩĩ, “Nĩkĩ nenyu mũtũlaa Mĩao ya Ngai mũatĩĩe mokũũ menyu? 4#Kuma 20.12; 21.17; Kũt 5.16; Ali 20.9 Ngai eeaie asya, ‘Nenga ĩthe waku na inyia waku ndaĩa,’ na o ta ũu, ‘Ũla wĩuma ĩthe kana nyinyia nĩoawe.’ 5Ĩndĩ inyw'ĩ mũmanyĩasya kana ethĩwa mũndũ akeea ĩthe kana nyinyia, ‘Kĩla wĩĩ ũkwata kuma vala nĩĩ nĩnĩkĩnengete Ngai,’ atĩ vai vata wa mũndũ ũsu kũtethya ĩthe wake. 6Kwoou mũtusaa mĩao ya Ngai kwĩthĩwa ya mana nĩ kana mũatĩĩe mokũũ menyu! 7Inyw'ĩ andũ ma mĩseũvyo! Mwathani Ĩsaia athanie w'o ĩũlũ wenyu yĩla waisye atĩĩ,

8 # Ĩsa 29.13 ‘Andũ aa mandaĩĩaa o vaa ilomonĩ,

ĩndĩ ngoo syoo syĩ vaasa nakwa.

9Vai vata woo kũnthaitha,

nũndũ mamanyĩasya mĩao ĩseũvĩtw'e nĩ andũ ta yo mĩao yakwa!’ ”

Maũndũ Ala Mavukasya Mũndũ

(Mk 7.14-23)

10Nĩvo ĩndĩ Yesũ weetie andũ mathengee vala ũĩ na amea atĩĩ, “Mbĩthukĩĩsyei na mũitata kũelewa nĩ kĩla ngũneena. 11Mũndũ ndavukaw'a nĩ kĩla waya, ĩndĩ ndeto ila ũneenaa nĩsyo imũvukasya.”

12Amanyĩw'a make nĩmaendie vala ũĩ na mamũkũlya atĩĩ, “We nĩwĩsĩ kana Avalisi mainew'ĩthw'a mũyo nĩ kĩla ũneenie?”

13Nake amea atĩĩ, “Kĩla mũtĩ ũtavandĩtwe nĩ Ĩthe wakwa ũla wĩ ĩtunĩ ũkakũanĩw'a vamwe na mĩi yaw'o. 14#Lk 6.39 Maikamũmakye! Asu nĩ atongoi ilalinda matongoesye ilalinda ingĩ, na kĩlalinda kyatongoesya kĩngĩ, syelĩ ivalũkaa ĩimanĩ.”

15Vetelo amwĩa atĩĩ, “Tũelesye ĩla ngelekany'o ya kĩla kĩvukasya mũndũ.”

16Yesũ amakũlya atĩĩ, “Nũndũ o nayu inyw'ĩ mũtanamba kwĩthĩwa na ũmanyi ũthonokete wa andũ ala angĩ? 17Mũyĩsĩ kana kyonthe kĩla mũndũ ũĩsaa kĩendaa ĩvunĩ na ĩtina kĩyuma mwĩĩnĩ? 18#Mat 12.34 Ĩndĩ ndeto ila mũndũ ũneenaa syumaa ngoonĩ yake na nĩsyo imũvukasya. 19Nũndũ ngoonĩ ya mũndũ nĩvo vaumaa mosũanĩo mathũku ma wũaani, ũlaalai, mawendi ma kũmanyana kĩ-mwĩĩ kwa andũ matatwaanĩte, ũkengani na nzukũ. 20Maũndũ asu nĩmo mavukasya mũndũ, ĩndĩ ti kũya lĩu mũndũ atathambĩte moko.”

Kĩveti Kyoonanisye Mũĩkĩĩo Mũnene

(Mk 7.24-30)

21Yesũ nĩwaumie Ngenesaleti athi kĩsionĩ kĩla kĩ vakuvĩ na ndũa sya Tile na Sitoni. 22Kĩveti kĩmwe Kĩmũkanaani kyatwĩe kĩsionĩ kĩu, nĩkyookie vala ũĩ kyamwĩkaĩla kĩimwĩa atĩĩ, “Mwĩai, Mwana wa Ndeviti, mbĩw'ĩe tei! Mwĩĩtu wakwa alikĩtwe nĩ ĩimũ na e vathũku mũno?”

23Ĩndĩ Yesũ ndaakĩtumũsya. Nĩvo ĩndĩ amanyĩw'a make mamũthengeeie na mamwĩsũva makĩmwĩa atĩĩ, “Lũngya kĩveti kĩĩ kĩtũatĩĩe, nĩkĩũtwalĩkya matũ!”

24Yesũ asũngĩa atĩĩ, “Ndũmĩtwe kwondũ wa andũ ma Ĩsilaeli me oka, namo mailyĩ ta malondu mau.”

25Ĩndĩ kĩveti kĩu kyathi kyatulya ndu mbee wake na kyamwĩa atĩĩ, “Ame Mwĩai, ndetheesye!”

26Yesũ akĩsũngĩa atĩĩ, “Ti ũseo mũndũ kwosa lĩu wa syana akekĩsya ngitĩ.”

27Kĩveti kĩu kyamwĩa atĩĩ, “Ĩĩ, ũu now'o Mwĩai, ĩndĩ o nasyo ngitĩ tyo iĩsaa tũlungu twa lĩu ũla ũvalũkangaa kuma mesanĩ ya mwene wasyo!”

28Vau Yesũ akĩsũngĩa atĩĩ, “Kĩveti kĩĩ kwa w'o mũĩkĩĩo waku nĩ mũlũmu, na kwoou kwenda kwaku nĩkũkwĩanĩw'a.” Kavindanĩ o kau mwĩĩtu wakyo nĩwavoie.

Yesũ Aivosya Andũ Aingĩ

29Yesũ nĩwaumie vau athi esĩlĩte ũtee wa ĩia ya Kalilii. Nĩwambatie kĩĩmanĩ na ekala nthĩ vo. 30Andũ aingĩ nĩmookie vala ũĩ maetete andũ maĩ na maũũ mathũku, maĩ au mamutha, ilalinda, andũ matatonya kũneena na andũ angĩ aingĩ maĩ awau. Onthe nĩmaiiwe mbee wake, nake amavosya. 31Andũ nĩmaseng'ie mũno moona andũ mataĩ maneena maineena; ala maĩ au mamutha me avosye; andũ maĩ na maũũ mathũku maitambya nesa, na ala maĩ ilalinda mayona nthĩ, na onthe mamũkatha Ngai wa Ĩsilaeli.

Yesũ Aivũnĩthya Ĩkomano yĩngĩ ya Andũ

(Mk 8.1-10)

32Nĩvo ĩndĩ Yesũ weetie amanyĩw'a make amea atĩĩ, “Nĩngwĩw'ĩa andũ aa tei, nũndũ methĩĩtwe nakwa vandũ va mĩthenya ĩtatũ yu na mai na kĩndũ maya. Nyie ndikwenda kũmalekya mathi na nzaa, nũndũ nĩmatonya kũvalũkĩla nzĩanĩ.”

33Amanyĩw'a mamũkũlya atĩĩ, “Twĩumya lĩu va weũnĩ ũũ, ũtonya kũvũnĩthya andũ maingĩvĩte ũũ?”

34Yesũ amakũlya atĩĩ, “Inyw'ĩ mwĩ na mĩkate yĩana ata?”

Namo mamũsũngĩa mamwĩa, “Twĩ na mĩkate mũonza na tũkũyũ tũte twingĩ.”

35Nĩvo ĩndĩ weeaĩie andũ onthe mekale nthĩ. 36Nĩwoosie ĩla mĩkate mũonza na tũla tũkũyũ, na atũngĩa Ngai mũvea. Nĩwaitilangile na anenga amanyĩw'a, namo maaĩa andũ. 37Andũ asu onthe nĩmaĩe mavũna, na amanyĩw'a moombany'a ikavũ mũonza syusĩe ilungu ila syatialilw'e. 38Ũtalo wa aũme ala maĩe waĩ ngili inya, ũtalo wa aka na syana ũte vo.

39Ĩtina wa ũu Yesũ nĩweeie andũ nĩmenũke, na alika ĩsiwanĩ athi ndũanĩ ya Makatani.

Currently Selected:

Mat 15: KAMBA

Highlight

Copy