Yovu 6
6
Yovu Aisũngĩa Elivasi
1Nĩvo ĩndĩ Yovu wasũngĩie asya atĩĩ,
2“Kethĩwa mathĩna makwa nĩmathimwa,
na kyeva kyakwa kwilĩĩlwa kĩthiminĩ,
3ũito wasyo wĩthĩwa wĩ mwingĩ mbee wa ũito wa kĩthangathĩ kya ũkanga,
kwoou ndũkaseng'we nĩ ndeto syakwa ite nzeo.
4Mwene Ũtonyi W'onthe nũmbathĩte na maangi,
na sumu wamo nũvikĩte kĩla vandũ mwĩĩnĩ wakwa.
Motĩsyo ma Ngai nĩmanthyũlũlũkĩte.
5Nĩkũlya, ĩng'oi ya kĩthekanĩ nĩyanasya yĩiya nyeki,
na ng'ombe nĩyanasya yĩla ĩkũya ũĩthyo?
6Kĩndũ kĩte mũsamo nĩkĩĩka kĩte mũnyũ,
kana mũuu mweũ wa ĩtumbĩ wĩ mũsamo?
7Ngoo yakwa ndyendaa lĩu ũilyĩ ũu,
na lĩu wa mũthemba ũsu nũtumaa nĩwaa.”
8“Kethĩwa Ngai nũnenga kĩla neetya,
kethĩwa nũnzũngĩa mboya syakwa!
9Kethĩwa Ngai nũkĩta kũmbũaa!
Kethĩwa nũtambũũkya kw'oko kwake akandilany'a!
10Ũsu wĩthĩwa ũkiakisyo kwakwa,
nĩthĩwa na ũtanu o na nĩ na woo mwingĩ,
nĩkwĩthĩwa ndyaaleana na ndeto sya Ũla Mũtheu.
11Ndi na vinya wa kũendeea kwĩkala thayũ.
Ndonya kwĩkala thayũ nde na wĩkwatyo ata?
12Vinya wakwa ti ũndũ ũmwe na wa ĩvia,
na mwĩĩ wakwa ti wa kyũma kĩtawa mbulonzi.
13Ndi na vinya ndonya kwĩtethya naw'o,
nĩkwĩthĩwa nĩmbenetwe syĩndũ syonthe.
14“Mũndũ ũkw'ĩte ngoo aĩlĩte kwĩthĩwa na anyanyae meyumĩtye,
o na vala nũtonya kwĩthĩwa aekete kũkĩa Mwene Ũtonyi W'onthe.
15Ĩndĩ inyw'ĩ anyanyawa,
nĩmũngengaa ta tũlũsĩ tũla tũng'alaa kwalea kua.
16Twĩthĩawa na kĩw'ũ kĩtw'ĩkĩte mbalavu ĩũlũ,
na ungu tũyĩthĩwa na ĩa,
17ĩndĩ kwavyũva nithelaa,
yĩla kwavyũva nithelaa vyũ.
18Aendi ma kyalo mesĩlĩte weũnĩ na nyamũ syoo sya kũkua mĩio nĩmaasya nzĩa,
nĩmambataa weũnĩ kũndũ kũte kĩndũ na maikw'ĩĩa kw'o.
19Aendi ma kyalo kuma Tema nĩmamanthaa kĩw'ũ,
na atandĩthya kuma Sieva methĩawa na wĩkwatyo.
20Nĩmakusaa ngoo nũndũ meĩ na wĩkwatyo,
mavikaa vo na maisonoka.
21Mũtw'ĩkĩte ta tũlũsĩ tũu kũla nĩĩ,
nĩmwonaa mathĩna makwa na mũikwatwa nĩ w'ĩa.
22Naamũkũlya mũnenge mũthĩnzĩo,
kana mũnenge mũndũ ũngĩ ĩtuvi ya wendeesyo kwondũ wakwa,
23kana mũndangĩĩe kuma kwa mũmaitha wakwa,
kana mũmbovosye kuma ũtonyinĩ wa amaitha makwa?
24“Manyĩsyei, nĩngwĩthukĩĩsya ngilĩtye,
ndonyethyei kũmanya mavĩtyo makwa ala nĩkĩte.
25Ndeto syaw'o syĩ vinya mwingĩ,
ĩndĩ ũkany'o wenyu wĩndethya ũndũnĩ mwaũ?
26Nĩmũkũlya, mwĩona ta mũtonya kũlũnga ndeto ila ngũneena?
Ndeto sya mũndũ ũte na wĩkwatyo no ta kĩseve!
27Inyw'ĩ o na nĩmũtonya kũkũna kula kwondũ wa syana ndiwa,
na kũthoosya anyanyae menyu!
28Ĩndĩ yu kwa nzisyei,
nyie ndimũkenga.
29Ekai, nĩngũmwĩsũva mũikeke mothũku;
ekai yu, nyie nĩ o mũlũngalu.
30Ve ũndũ naneena ũtaĩlĩte?
Mwĩsũanĩa kana nditonya kũvathũkany'a ũseo na ũthũku?”
Currently Selected:
Yovu 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
