Yovu 40
40
1Mwĩai Ngai nĩwaendeeie kũneena na Yovu amũkũlya atĩĩ,
2“Mũndũ wĩ ngananĩo akakananĩa na Mwene Ũtonyi W'onthe?
Ethĩwa mũndũ akakananĩa na Ngai, no nginya mũndũ ũsu asũngĩe.”
Yovu Aisũngĩa Mwĩai Ngai
3Nĩvo ĩndĩ Yovu wasũngĩie Mwĩai Ngai asya atĩĩ,
4“Nyie ndyaĩlĩte o na vanini; ndonya ata ũkũsũngĩa?
Nĩnakunĩka kanyw'a na kw'oko kwakwa ndikaneene.
5Nĩnĩnaneenie, ĩndĩ ndisũngĩa;
nĩnĩnaendeeie kũneena, ĩndĩ ndineena ĩngĩ.”
Mwĩai Ngai Aisũngĩa Yovu.
6Nĩvo ĩndĩ Mwĩai Ngai e nthĩnĩ wa kĩuutani wasũngĩie Yovu amwĩa atĩĩ,
7“Yu ĩlũmye, nĩngũũkũlya makũlyo,
naku nũũnzũngĩa.
8Nĩũkũlya, wĩenda kwonany'a kana nyie ndi mũlũngalu,
wĩenda kũndala kwĩthĩwa na mavĩtyo naku ũyĩthĩwa wĩ mũlũngalu?
9Wĩ vinya takwa,
na nũtonya kumya wasya wa kĩtundumo takwa?
10“Ethĩwa nũu, ĩyanakavye na ũnene na nguma,
ĩvw'ĩke ndaĩa na ũkumyo.
11Tulũĩla andũ ũthatu waku mwingĩ,
sisya ala mekathĩĩaa na ũimanyivya.
12Sisya ala mekathĩĩaa na ũimatheesya,
ananga ala avuku me vala maĩ.
13Mathike nthĩ onthe vamwe,
na ũimovanĩsya vala maveva ma ala akw'ũ mekalaa.
14Nĩvo ĩndĩ nĩĩthĩwa mũndũ wa mbee kũkũtaĩa,
na ndyĩtĩkĩla kana we mwene nũsindĩte.
15“Yu sisya nguũ,#40.15 nguũ: Maandĩko amwe ma Ndeto ya Ngai metĩte nyamũ ĩno mbeemothi. ĩla namyũmbie ũndũ nakũmbie,
ĩĩsaa nyeki ta ng'ombe.
16Ĩndĩ vinya wayo wĩ inyunyunĩ syayo,
na ũtonyi wayo wĩ nyamanĩ sya ĩvu ya yo.
17Kĩsithe kyayo kĩũngamaa ta mũtĩ wa mũkũũ,
na malangũ ma maũũ mayo nĩ malũmu.
18Mavĩndĩ mayo nĩ ta mĩveleki ya kyũma kya mbulonzi,
mamutha mayo nĩ ta ilungu sya kyũma.
19“Nĩyo ya mbee mawĩanĩ ma Ngai,
Mũmbi wayo nowe ũtonya kũmĩsinda.
20Nĩkwĩthĩwa lĩu wayo wumaa iĩmanĩ,
vala nyamũ sya kĩthekanĩ syonthe ithaũkĩaa.
21Nĩtindiaa ungu wa mĩtĩ yĩ mĩw'a,
nĩyĩvithaa makangaanĩ kũla kwĩ kĩsoo.
22Ikuthu syĩ mĩw'a nimĩkĩĩaa muunyĩ,
na mĩtĩ mĩnene ĩla ĩmeaa ũtee wa ũsĩ ĩimĩthyũlũlũka.
23Ndĩtelemaw'a nĩ ũsĩ yĩla ũvingĩte,
yĩthĩawa ĩte na thĩna o na yĩla Ũsĩ wa Yolotani wausũa kĩw'ũ kyesĩla ĩũlũ wayo.
24Ũla ũtonya kũmĩlinda metho na kũmĩkwata nũũ?
Ũla ũtonya kũmĩkwatya na kũmĩtonya ĩnyiũũ nũũ?”
Currently Selected:
Yovu 40: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
