Yel 23
23
Mwĩai Ngai Akatangĩĩa Andũ Make
1Mwĩai Ngai easya atĩĩ, “Kyeva nĩ kwa aĩthi ala moaaa na kũnyaĩĩkya malondu ma ndĩthya yakwa! 2Kwoou ũũ nĩw'o nyie Mwĩai Ngai, Ngai wa Ĩsilaeli, ngũtavya atongoi ala maĩlĩte kũsũvĩaa andũ makwa: Nĩmũnyaĩĩkĩtye malondu makwa, mũkamalũngya, na mũyaamasũvĩa. Kwoou nakwa ngamũkany'a nũndũ wa maũndũ mathũku ala mwĩkaa. 3Ĩtina wa ũu ngoombany'a malondu makwa ala matialĩte, nĩmaumye nthĩ syonthe kũla namanyaĩĩkĩsye, na ngamatũnga mawĩkalonĩ moo, na makasyaana ĩngĩ na kwingĩva. 4Ngamanenga aĩthi ma kũmasũvĩa na maikethĩwa na w'ĩa ĩngĩ, o na maikatelemw'a, na o na vai yĩmwe yĩkaa. Nĩasya ũu nyie Mwĩai Ngai.
5 #
Yel 33.14-16
“Nyie Mwĩai Ngai nĩasya kana ĩvinda nĩyũkĩte yĩla nĩũkĩlĩlya Ndeviti Nzyawa ndũngalu, nake akatw'ĩka mũsumbĩ na akaaĩlya ũsumbĩ wake. Akasilanasya andũ ma nthĩ ĩno na sila wa katĩ na ũlũngalu. 6Ĩvindanĩ ya kũsumbĩka kwake andũ ma Yuta makatangĩĩwa, namo andũ ma Ĩsilaeli makekalaa me ũsũvĩonĩ. Ĩsyĩtwa yĩla wĩĩtawa nĩ: ‘Mwĩai Ngai nĩ we Ũlũngalu Witũ.’ ”
7Mwĩai Ngai easya atĩĩ, “Ĩvinda nĩyũkĩte yĩla andũ matakaendeea kwĩvĩta mayasya, ‘O tondũ Mwĩai Ngai wĩ thayũ, ũla waumisye andũ ma Ĩsilaeli nthĩ ya Misili.’ 8Ĩndĩ makeevĩtaa mayasya, ‘O tondũ Mwĩai Ngai wĩ thayũ, ũla watongoeisye andũ ma Ĩsilaeli na amaumya nthĩ ya ngalĩko ya ĩũlũ, na kuma nthĩ syonthe kũla wamanyaĩĩkĩsye.’ Nĩvo ĩndĩ makatũa nthĩ yoo ene.”
Ngai Akakany'a Athani Athũku
9Ndeto ii nĩ ĩũlũ wa athani:
Nyie nĩngw'ĩte ngoo,
mavĩndĩ makwa nĩmeũthingithanga.
Nĩilyĩ ta mũndũ ũnyw'ĩte,
ta mũndũ ũmilĩtwe nĩ ndivai,
nũndũ wa Mwĩai Ngai,
na nũndũ wa ndeto syake ntheu.
10Nthĩ yusũĩte andũ mate aĩkĩĩku vala ve Ngai;
nũndũ wa kĩumo nthĩ yĩna kĩĩo,
na isesi sya kũĩthya ila syĩ weũnĩ nĩsyũmĩte.
Mwĩkalĩle wa andũ nĩ mũthũku,
na matũmĩaa ũtonyi woo kwĩka maũndũ mataĩlĩte.
11Mwĩai Ngai easya atĩĩ,
“Athani na athembi mai na kĩkĩo kya Ngai,
o na nĩmekĩte maũndũ mathũku Ĩkalũnĩ yakwa.
12Kwoou ngatuma nzĩa syoo syĩthĩwa iilyĩ ta tũsĩla tũtendeu twĩ kĩvindunĩ,
makasembanĩlw'a kw'o na makavalũkanga,
nũndũ ngamaetee ũthũku,
mwakanĩ ũla nĩvangĩte kũmakany'a.
Nĩasya ũu nyie Mwĩai Ngai.
13“Nĩnoonie athani ala maĩ ndũanĩ ya Samalia,
mayĩka ũndũ ũũ wa ũtumanu:
Nĩmathanie ĩsyĩtwanĩ ya Mbaali,
na maasya andũ makwa Ĩsilaeli.
14 #
Mwa 18.20; Esek 16.49 Ĩndĩ o namo athani ma ndũa ya Yelũsalemu,
nĩmekĩte ũndũ ũũ mũthũku mũno:
Nĩmekaa ũlaalai na kũneena ũvũngũ;
nĩmathangaasya eki ma naĩ,
ũkethĩa vai mũndũ ũtia meko make mathũku.
Andũ asu onthe kwakwa nĩ athũku ta andũ ma Sondomu,
andũ ma Yelũsalemu mailyĩ ta ma Ngomola.”
15Kwoou ũũ nĩw'o Mwĩai Ngai Mwene Ũtonyi W'onthe ũkwasya ĩũlũ wa athani asu:
“Ngamanenga lĩu wĩ wũũ maye,
na ngĩmanenga kĩw'ũ kĩ sumu manyw'e;
nũndũ athani ma Yelũsalemu,
nĩmatumĩte andũ onthe ma nthĩ ĩno mekala thayũ ũte na kĩkĩo kya Ngai.”
16Mwĩai Ngai Mwene Ũtonyi W'onthe eĩa andũ ma Yelũsalemu atĩĩ, “Mũikethukĩĩsye athani ala mamwathanĩaa, ala mamũnengae wĩkwatyo wa mana. Maneenaa maũndũ ala meũsũanĩa mo ene, ĩndĩ ti kĩla nyie Mwĩai Ngai nĩneenete. 17Kĩla ĩvinda matavasya ala mambũthasya makamea atĩĩ, ‘Mũkaendeea nesa;’ na maitavya ala maatĩĩaa mawendi ma ngoo syoo mbũmũ maimea atĩĩ, ‘Vai ũndũ mũthũku o na ũmwe ũkamũkwata!’ ”
18Ve ũmwe katĩ wa athani aa,
waaũngama nzamanĩ ya Mwĩai Ngai,
nĩ kana ethukĩĩsye na kwĩw'a ndeto yake,
kana akatea kũtũ amĩthukĩĩsye?
19Kwoou ũthatu mwai wa Mwĩai Ngai wũkĩte ta kĩuutani!
Ũthilĩku wake wũkĩte ũilyĩ ta kĩlingi;
kĩkatolekela mĩtwenĩ ya andũ ala athũku.
20Ũthatu wa Mwĩai Ngai ndwĩusya,
kũvika eke na kwĩanĩsya ũndũ ũvangĩte;
ĩvindanĩ yũkĩte mũkamanya maũndũ asu nesa.
21Nyie ndyaatũma athani aa,
ĩndĩ nĩmasembie mathi me na ũtũmani woo ene.
Nyie ndyaaneena namo,
ĩndĩ nĩmaendie kwathana.
22Ĩndĩ kethĩwa nĩmaũngamie nzamanĩ yakwa,
nĩvo ĩndĩ methĩwa maĩ matonya kũtavya andũ makwa ndeto syakwa,
na methĩwa mamaalyũlĩte makatia mĩendele yoo mĩthũku,
na makatia meko moo mathũku.
23“Nyie Mwĩai Ngai nĩasya kana nĩ Ngai ũla wĩ kĩla vandũ na ti Ngai wĩ o vandũ vamwe. 24Nĩkũlya, ve vandũ mũndũ ũtonya kwĩvitha ũkethĩa nditonya kũmwona? Mũyĩsĩ kana nyie Mwĩai Ngai nĩ kĩla vandũ ĩtunĩ na nthĩ? 25Nĩnĩw'ĩte ũndũ athani ala mathanaa ũvũngũ ĩsyĩtwanĩ yakwa maĩtye. Mathanaa mayasya, ‘Nĩnĩotie ndoto, nĩnĩotie ndoto!’ 26Athani ala mathanaa ũvũngũ meendeea kwĩthĩwa na ũvũngũ ngoonĩ syoo, na kwathana ũkengani ũla wĩ ngoonĩ syoo nginya ĩndĩĩ? 27Masũanĩaa kana ndoto ila matavanasya ene kwa ene nikũtuma andũ makwa molwa ninyie, o tondũ aaũmae moo moolilwe ninyie na mathaitha Mbaali. 28Mwathani ũla ũotie ndoto nĩatavany'e ndoto yake, ĩndĩ mwathani ũla wĩ na ndeto yakwa amĩtavany'e kwa ũĩkĩĩku. Nyie Mwĩai Ngai nĩkũlya atĩĩ: Mavuti nĩmesa kwĩthĩwa ũndũ ũmwe na nganũ? 29Ndeto yakwa nyie Mwĩai Ngai ĩilyĩ ta mwaki, na ta kĩiva kĩla kyatũangaa ĩvia yĩkatw'ĩka ilungu. 30Kwoou nyie Mwĩai Ngai nĩ na ũndũ na athani ala moyaa ndeto syakwa kuma vala ve athani angĩ na maisyĩta syakwa. 31O ĩngĩ nĩ na ũndũ na athani ala maneenaa ndeto syoo ene na mayĩa andũ, ‘Ũũ nĩw'o Mwĩai Ngai ũkwasya.’ 32O ta ũu nĩ na ũndũ na ala matavanasya ndoto sya ũvũngũ, na maituma andũ makwa maa nũndũ wa ũvũngũ woo, na kwĩkathĩĩa kwoo kwa mana. Ndyaamatũma kana kũmeaĩa mathi, na kwoou nyie Mwĩai Ngai nĩnĩsĩ kana ndeto syoo iitethasya andũ aa o na vanini.
33“Yĩla ũmwe wa andũ aa, kana mwathani, kana mũthembi wĩkũkũlya atĩĩ, ‘Nĩ mũio mwaũ Mwĩai Ngai ũtwaĩkĩtye?’ Wĩmasũngĩa ũmee nyie Mwĩai Ngai nĩmea atĩĩ, ‘Inyw'ĩ ninyw'ĩ mũio na ngamwĩkya ĩtheka.’ 34Kwoou mwathani, mũthembi, kana ũmwe wa andũ, ũla wĩneena asye, ‘Mũio wa Mwĩai Ngai,’ ngamũkany'a we, vamwe na mũsyĩ wake. 35Kwoou yĩla mũndũ ũkũneena na mũtũi wake kana na mwana-a-ĩthe, aĩlĩte kũmũkũlya atĩĩ, ‘Mwĩai Ngai asũngĩie ata?’ Kana akamũkũlya, ‘Mwĩai Ngai aisye ata?’ 36Ĩndĩ vai mũndũ waĩlĩte kwasya, ‘Mũio wa Mwĩai Ngai,’ nũndũ mũio wa mũndũ nĩ ndeto syake mwene, na inyw'ĩ nĩmwelelũkasya ndeto sya Ngai ũla wĩ thayũ, Mwĩai Ngai Mwene Ũtonyi W'onthe, Ngai waitũ. 37Kwoou mwaĩlĩte kũkũlasya mwathani atĩĩ, ‘Mwĩai Ngai akũsũngĩie ata?’ Kana mũkamũkũlya, ‘Mwĩai Ngai aisye ata?’ 38Ũũ nĩ w'o Mwĩai Ngai ũkũtavya andũ ala maneenaa mayasya, ‘Mũio wa Mwĩai Ngai:’ ‘Nĩkwĩthĩwa nĩmwaneena ndeto ii, ila namũvatie kũneena, 39vate ndĩi ngamwosa nĩmwĩkye kũasa mume vala nĩĩ, inyw'ĩ vamwe na ndũa ĩla namũnengie na aaũmae menyu. 40Vamwe na ũu, ngatuma mũvũthw'a tene na tene, na mũyĩthĩwa na nthoni itakathela na itakola.’ ”
Currently Selected:
Yel 23: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
