Yel 21
21
Ngai Ailea Wĩsũvano wa Mũsumbĩ Nzetekia
1Nzetekia mũsumbĩ wa Yuta nĩwatũmie Vasuli mwana wa Malikiya, na mũthembi Nzevania mwana wa Maaseia, mathi vala ve mwathani Yelemia makamwĩe atĩĩ, 2#2Asu 25.1-11; 2Mav 36.17-21 “Twĩsũvanĩe vala ve Mwĩai Ngai, nũndũ Nevukatinesa#21.2 Nevukatinesa: Ĩvukunĩ yĩĩ ya Yelemia Maandĩko ma Kĩevelania mamwĩtĩte Nevukatilesa mũsumbĩ wa Mbavilonĩ nĩwũkie kũkita naitũ; nokwĩthĩwa Mwĩai Ngai nũkũtwĩkĩa syama sya kũseng'ya o tondũ weekie mbeenĩ, na kũtuma Nevukatinesa asyoka aeke kũkita naitũ.” 3Nĩvo ĩndĩ Mwĩai Ngai waneenie na Yelemia, nake asũngĩa asu matũmĩtwe amea atĩĩ, 4“Endai mũkamũsũngĩe Nzetekia mũmwĩe atĩĩ, ‘Ũũ nĩw'o Mwĩai Ngai, Ngai wa Ĩsilaeli ũkwasya: Nĩngũthyũũa mĩio ya kaũ ĩla mũkwete mũkite na mũsumbĩ wa Mbavilonĩ na andũ make, ala mathyũlũlũkĩte ndũa yenyu, na ngĩmyũmbanĩsya katĩkatĩ wa ndũa ĩno. 5Nĩvo ĩndĩ nyie mwene nĩũkita nenyu na vinya wakwa w'onthe, nĩ mũthatu, nĩ mũthilĩku na nĩ na woo mwingĩ. 6Ngooaa andũ onthe na indo syonthe ila syĩ ndũanĩ ĩno; makooawa nĩ ũwau mũthũku. 7Nyie Mwĩai Ngai nĩasya kana ĩtina wa ũu, ngamũnengane Nzetekia mũsumbĩ wa Yuta, anini make na onthe ala me ndũanĩ ĩno ala mateũawa nĩ ũwau mũthũku, kaũ kana yũa ũtonyinĩ wa Nevukatinesa mũsumbĩ wa Mbavilonĩ, na ũtonyinĩ wa amaitha moo ala mendaa kũmoaa. Nevukatinesa akamoaa kwa kũmatemanga na ũvyũ ateũmew'ĩa tei kana ĩnee, kana kũmaeka mekale thayũ.’ ”
8Mwĩai Ngai nĩweeie Yelemia atavye andũ atĩĩ, “Ũũ nĩw'o Mwĩai Ngai ũkwasya, ‘Sisyai nĩniĩte mbee wenyu nzĩa ĩla ĩendete thayũnĩ na nzĩa ĩla ĩendete kĩkw'ũnĩ. 9Ala mekwĩkala ndũanĩ ĩno amwe nĩmekũaĩwa kaũnĩ, angĩ moawe nĩ yũa, na angĩ mayũawa nĩ ũwau mũthũku. Ĩndĩ ala mekumaala na kwĩnengane vala ve Akalitei ala mamũthyũlũlũkĩte, nĩmekwĩkala thayũ na kũtangĩĩa mathayũ moo. 10Nyie Mwĩai Ngai nĩnĩtw'ĩte kũmĩka ndũa ĩno ũndũ mũthũku na ti ũseo. Nĩngũmĩnengane mokonĩ ma mũsumbĩ wa Mbavilonĩ na nũkũmĩvĩvya na mwaki.’
11“Namo andũ ma mũsyĩ wa mũsumbĩ wa Yuta matavye ũmee nyie Mwĩai Ngai nĩmea atĩĩ,
12‘Inyw'ĩ andũ ma mũsyĩ wa Ndeviti,
umasyai sila wa katĩ kĩla kĩoko,
mũvonokyei ũla ũkũvenwa syĩndũ syake,
ndakaendee kũthĩnw'a nĩ ũla ũkũmũvena.
Mwalea kwĩka ũũ, ũthatu wakwa ũkamwakanĩa ta mwaki;
ũkakana vate mũndũ ũtonya kũũvosya,
nũndũ nĩmwĩkĩte maũndũ mathũku.’ ”
13Mwĩai Ngai easya atĩĩ,
“Nĩna ũndũ nenyu inyw'ĩ ala mũtwĩe mwandanĩ,
inyw'ĩ ala mũtwĩe ĩvianĩ yĩ nthĩ ndindimalu,
inyw'ĩ ala mũneenaa mũkasya,
‘Nũũ wĩtheea okite naitũ,
kana nũũ ũtonya kũlika mawĩkalonĩ maitũ?’
14Nyie ngamũkany'a kwĩanana na meko menyu;
ngakwatya kĩtheka kyenyu mwaki,
naw'o ũkavĩvya syĩndũ syonthe ila ikĩthyũlũlũkĩte.”
Currently Selected:
Yel 21: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
