Ĩsa 54
54
Wendo wa Ngai kwa Ĩsilaeli
1 #
Aka 4.27
Mwĩai Ngai easya atĩĩ,
“Ina we Yelũsalemu ũla ũilyĩ ta mũndũ mũka ngũngũ ũtaasyaa,
ina wathi na ũyũkĩlya wasya wa ũtanu,
o na kau ndwaaĩthĩwa na woo wa kũsyaa.
Nĩkwĩthĩwa syana syaku ikeethĩwa syĩ mbingĩ,
kwĩ sya mũndũ mũka ũla wĩ na mũũme.
2Nenevya vala wambĩte ĩeema yaku,
na ũitambũũkya itambaa sya mawĩkalo maku;
ndũkalee kwĩka ũu.
Asavya ndii sya ĩeema yaku,
na ũilũlũmĩĩlya syambo syayo!
3Nĩkwĩthĩwa ũkathanthasya mĩvaka yaku ngalĩko syonthe,
na nzyawa syaku ikamesya nthĩ ingĩ,
na kũtũa ndũanĩ ila itiĩtwe syĩ nthei.
4“Ndũkakĩe nũndũ ndũkekĩĩthw'a nthoni;
ndũkavũavũane nũndũ ndũkasonokw'a.
Ũkoolwa nĩ nthoni sya ũika waku,
na ndũkalilikana ũndũ wavũthiw'e nũndũ wa kwĩthĩwa waĩ ndiwa.
5Ũla ũkũtwaĩte nĩwe Mũmbi waku,
etawa Mwĩai Ngai Mwene Ũtonyi W'onthe;
ũla ũkwovoetye nĩwe Ũla Mũtheu wa Ĩsilaeli,
etawa Ngai wa nthĩ yonthe.
6Mwĩai Ngai nũkwĩtĩte ũsyoke,
ta kĩveti kyatiiwe nĩ mũũme na kyakwatwa nĩ thĩna thayũnĩ,
na ta kĩveti kya mũika kyamina kũlũngw'a.
Nĩasya ũu nyie Ngai waku.
7“Nĩkwĩthĩwa vandũ va ĩvinda ĩnini nĩnakũtiie,
ĩndĩ kwa tei wakwa mwingĩ ngakũtũnga.
8Nĩnakwatiwe nĩ ũthatu mwingĩ vandũ va kavinda kanini,
na nauma vala ũĩ;
ĩndĩ kwa wendo wakwa ũla wĩkalaa tene na tene ngakwĩw'ĩa tei.
Nĩasya ũu nyie Mwĩai Ngai Mwovosya waku.
9 #
Mwa 9.8-17
“Kwakwa yĩĩ yĩilyĩ ĩvinda ya Noa:
O tondũ neevĩtie kana kĩw'ũ kya ĩvinda ya Noa kĩikavw'ĩka nthĩ ĩngĩ,
now'o yu ngwĩvĩta kana ndikakũthatĩa,
na ndikakũkany'a ĩngĩ.
10Iĩma nitonya kwĩveta,
na tũlĩma tũivetwa,
ĩndĩ ndikaeka ũkwenda na wendo wakwa ũtaolekaa,
na ũtianĩo wakwa wa mũuo ndũkavetwa.
Nĩasya ũu nyie Mwĩai Ngai ũla ũkwĩw'ĩaa tei.”
Yelũsalemu Nzaũ
11 #
Ũvu 21.18-21
Mwĩai Ngai easya atĩĩ,
“We ndũa ĩthĩnaw'a, ĩla yĩthĩawa na mathĩna, na ĩtakiakiaw'a,
nĩngũkwaka na mavia ma thooa mũnene;
na kwaka mĩsingi yaku na mavia ma thooa mũnene metawa Savaya.
12Ngaaka myako yaku mĩtũlu na tũvila tũseo twa ũkanganĩ,
na mĩvĩa yaku na mavia matisatisaa.
Ngaaka ngũta syaku syonthe na mavia me thooa mũnene.
13 #
Yoa 6.45
Nyie Mwĩai Ngai ngamanyĩsya andũ maku onthe,
na makaendeea nesa mũno me na mũuo.
14Ũkalũma nthĩnĩ wa ũlũngalu;
ndũkathĩnw'a na ndũkakĩa kĩndũ.
Ndũkatelema nĩkwĩthĩwa vai kĩndũ kĩkaũtelemya.
15Mũmaitha o na wĩva akũvithũkĩa,
ti inyie ngethĩwa natuma eka ũu.
Ũkasinda mũmaitha o na wĩva ũla wĩkũvithũkĩa.
16“Ninyie noombie mũtwii wa syũma,
ũla ũvuvaa mwaki wa makaa,
na kũseũvya mũio waĩlĩte wa kaũ.
O ta ũu ninyie noombie mwanangi anangae.
17Mũio o na wĩva ũla ũseũvĩtw'e ũkũkite ndũkakwĩka ũndũ,
na mũndũ o na wĩva ũla wakũsikata ũkamũsindaa.
Ũsu nĩw'o ũtiĩwa wa athũkũmi makwa nyie Mwĩai Ngai,
na nĩw'o ũlũngalu woo kuma kwakwa.”
Currently Selected:
Ĩsa 54: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
