Popular Bible Verses from Ĩsa 54

Share

Mũio o na wĩva ũla ũseũvĩtw'e ũkũkite ndũkakwĩka ũndũ, na mũndũ o na wĩva ũla wakũsikata ũkamũsindaa. Ũsu nĩw'o ũtiĩwa wa athũkũmi makwa nyie Mwĩai Ngai, na nĩw'o ũlũngalu woo kuma kwakwa.”

Iĩma nitonya kwĩveta, na tũlĩma tũivetwa, ĩndĩ ndikaeka ũkwenda na wendo wakwa ũtaolekaa, na ũtianĩo wakwa wa mũuo ndũkavetwa. Nĩasya ũu nyie Mwĩai Ngai ũla ũkwĩw'ĩaa tei.”

“Ndũkakĩe nũndũ ndũkekĩĩthw'a nthoni; ndũkavũavũane nũndũ ndũkasonokw'a. Ũkoolwa nĩ nthoni sya ũika waku, na ndũkalilikana ũndũ wavũthiw'e nũndũ wa kwĩthĩwa waĩ ndiwa.

Ũla ũkũtwaĩte nĩwe Mũmbi waku, etawa Mwĩai Ngai Mwene Ũtonyi W'onthe; ũla ũkwovoetye nĩwe Ũla Mũtheu wa Ĩsilaeli, etawa Ngai wa nthĩ yonthe.

Nenevya vala wambĩte ĩeema yaku, na ũitambũũkya itambaa sya mawĩkalo maku; ndũkalee kwĩka ũu. Asavya ndii sya ĩeema yaku, na ũilũlũmĩĩlya syambo syayo!

Nyie Mwĩai Ngai ngamanyĩsya andũ maku onthe, na makaendeea nesa mũno me na mũuo.

Nĩnakwatiwe nĩ ũthatu mwingĩ vandũ va kavinda kanini, na nauma vala ũĩ; ĩndĩ kwa wendo wakwa ũla wĩkalaa tene na tene ngakwĩw'ĩa tei. Nĩasya ũu nyie Mwĩai Ngai Mwovosya waku.

“Nĩkwĩthĩwa vandũ va ĩvinda ĩnini nĩnakũtiie, ĩndĩ kwa tei wakwa mwingĩ ngakũtũnga.

“Kwakwa yĩĩ yĩilyĩ ĩvinda ya Noa: O tondũ neevĩtie kana kĩw'ũ kya ĩvinda ya Noa kĩikavw'ĩka nthĩ ĩngĩ, now'o yu ngwĩvĩta kana ndikakũthatĩa, na ndikakũkany'a ĩngĩ.

Ngaaka myako yaku mĩtũlu na tũvila tũseo twa ũkanganĩ, na mĩvĩa yaku na mavia matisatisaa. Ngaaka ngũta syaku syonthe na mavia me thooa mũnene.