Ĩsa 5
5
Ngelekany'o ya Mũũnda wa Mĩsavivũ
1 #
Mat 21.33; Mk 12.1; Lk 20.9 Nĩngũmwinĩa mwendwa wakwa,
wathi wa wendo ĩũlũ wa mũũnda wake wa mĩsavivũ:
Mwendwa wakwa aĩ na mũũnda wa mĩsavivũ,
mũũnda ũsu waĩ kĩĩmanĩ kĩnou mũno.
2Nĩwaũĩmie nesa na aũvetanga mavia onthe,
nĩwaũvandie mĩsavivũ mĩseo mũno.
Nĩwaakie kĩtaa kya kũsyaĩĩsya mũũndanĩ ũsu katĩ,
na enza ĩima ya kũvivĩa nzavivũ.
Nĩweeteelile ũsyae nzavivũ,
ĩndĩ wasyaa nzavivũ syĩ ngaati.
3“Yu inyw'ĩ ala mũtwĩe Yelũsalemu na andũ ma Yuta,
nĩngũmwĩsũva, tũsilany'ei nyie na mũũnda wakwa wa mĩsavivũ.
4Nĩ ũndũ ũngĩ mwaũ naĩ ndonya kwĩkana na mũũnda ũsu wakwa wa mĩsavivũ ndaawĩka?
Yĩla neeteelile ũsyae nzavivũ nzeo, wasyaie nzavivũ syĩ ngaati nĩkĩ?
5“Yu nĩngũmũtavya ũndũ nĩĩkana na mũũnda ũsu wakwa wa mĩsavivũ.
Ngavetanga wiio waw'o,
naw'o mũũnda ũsu ũkaanangwa,
ngaomboa ũkũta waw'o,
naw'o mũũnda ũsu ũkakinyangwa.
6Ngaũeka wanangĩke;
ndũkasewa kana kũĩmĩwa,
ĩndĩ ngaeka ũmesye mĩtae na mĩw'a.
O ta ũu ngeeaĩa matu,
maikausye mbua ĩũlũ waw'o.”
7Mũũnda wa mĩsavivũ wa Mwĩai Ngai Mwene Ũtonyi W'onthe nĩ mbaĩ ya Ĩsilaeli,
na andũ ma Yuta nĩmo mĩsavivũ ĩla mĩseo wavandie.
Endaa maatĩĩe sila wa katĩ,
ĩndĩ vandũ va ũu mooaana;
endaa meke ũla ũlũngalu,
ĩndĩ vandũ va ũu maete kĩĩo!
Mothũku ala Andũ Mekaa
8Kyeva nĩ kwa ala mathooaa nyũmba mongeleele ila menasyo,
ala mathooaa mĩũnda mongeleele ĩla menayo,
nginya ũkethĩa isio syonthe nĩsyatw'ĩka ũthwii woo,
na vai vandũ andũ ala angĩ matonya kwĩkala.
9Mwĩai Ngai Mwene Ũtonyi W'onthe nĩwĩvĩtĩte ndyĩw'a akasya atĩĩ,
“Kwa w'o, nyũmba mbingĩ ikatiwa syĩ nthei,
nyũmba nene na mbanake ikatiwa ite mũndũ ũkwĩkala vo.
10Mũũnda wa mĩsavivũ wa eka ĩkũmi,
ũkaumya lita nyanya sya ndivai,
na ũla wĩvanda kĩlo ĩana sya mbeũ,
akaketha kĩlo ĩkũmi sya ngetha ya mbaa mbeke.”
11Kyeva nĩ kwa ala maamũkaa kĩoko tene,
makamanthe kĩla kĩmilaa,
ala mekalaa kũkatuka mũno,
nginya makamilwa nĩ ũkĩ!
12Mbokanĩ syoo kwĩthĩawa ngitaa nene na nini,
ndambulĩnĩ, mĩtũlilũ na ũkĩ.
Ĩndĩ maikũlasya maũndũ ala Mwĩai Ngai wĩkĩte,
kana kwona mawĩa make.
13Kwoou andũ makwa makatwawa nthĩ ya ũeninĩ,
nũndũ wa kwĩthĩwa mate na ũmanyi;
andũ moo me ndaĩa makooawa nĩ nzaa,
na andũ moo aingĩ makooawa nĩ waũni.
14Kwoou vala maveva ma ala akw'ũ mekalaa vameteelete ve na wendi mũnene,
na vakathamya kanyw'a wavo mũno;
andũ me ndaĩa vamwe na andũ ala angĩ onthe ma Yelũsalemu,
melika vo nguthu nene, o vamwe na ala matanaa nũndũ wa Yelũsalemu.
15Kwoou mũndũ akatheew'a,
na kĩla mũndũ ainyivw'a,
na ala mekwĩng'athĩlĩĩlya makanyivw'a.
16Ĩndĩ Mwĩai Ngai Mwene Ũtonyi W'onthe onanasya ũnene wake silanĩ wa katĩ,
Ngai Mũtheu nĩwonanasya ũtheu wake ũlũngalunĩ.
17Nĩvo ĩndĩ tũtena twa malondu tũkaya ta twĩ kĩsesinĩ kyatw'o,
na tũsalũ na tũtena twa mbũi tũkaya kũndũnĩ kwanange.
18Kyeva nĩ kwa ala maendaa makusĩtye ũthũku na ndii sya ũvũngũ,
ala makusasya naĩ ta makusĩtye na makanda ma ĩkasya.
19Maneenaa makasya atĩĩ,
“Mwĩai Ngai nĩakalaate,
nĩatethye wĩa wake na mĩtũkĩ nĩ kana tũwone.
Kĩeleelo kya Ũla Mũtheu wa Ĩsilaeli nĩkĩanĩe na mĩtũkĩ,
nĩkĩanĩe nĩ kana tũkĩmanye!”
20Kyeva nĩ kwa ala metaa ũthũku ũseo,
na kwĩta ũseo ũthũku;
ala metaa kĩvindu kyeni,
na kwĩta kyeni kĩvindu;
ala maasya kĩla kĩ wũũ kĩ mũyo,
na kĩla kĩ mũyo kĩ wũũ!
21Kyeva nĩ kwa ala monaa me oĩ,
ala monaa me na ũmanyi!
22Kyeva nĩ kwa ala mew'aa me ngũmbaũ sya kũnyw'a ũkĩ,
andũ mesĩ mũno kũvulany'a syĩndũ ila imilaa,
23ala mosaa ĩtuvi ya wendeesyo nĩ kana maeke ala me na ĩvĩtyo,
na kũvena ala mate na ĩvĩtyo kĩla kĩmaĩlĩte!
24Kwoou o tondũ ũmũĩ wa mwaki ũvĩvasya mavuti,
na o tondũ nyeki mbũmũ ĩvĩvaw'a nĩ mwaki,
now'o mĩi ya andũ asu yĩoa,
na malaa moo mainyaĩĩkw'a nĩ kĩseve ta kĩtoo;
nĩkwĩthĩwa nĩmaleete mwĩao wa Mwĩai Ngai Mwene Ũtonyi W'onthe,
na makavũthya ndeto sya Ũla Mũtheu wa Ĩsilaeli.
25Kwoou Mwĩai Ngai nĩwathatiw'e nĩ andũ make,
na atambũũkya kw'oko kwake amakũna nginya iĩma syathingitha;
simba syoo syailyĩ ta mavuti me nzĩanĩ nene sya ndũa,
ĩndĩ o na ũu wĩ o vo ũthatu wake ti mũthelu,
na no ũtambũũkĩtye kw'oko kwake amakany'e.
26Mwĩai Ngai eũkĩlĩlya mbaĩ syĩ kũasa kĩvevelo kĩthĩwe wonany'o,
na kũsyuĩsya kĩlũli syĩ kũla nthĩ ĩthelele,
nasyo syũkĩte syĩkalaatĩte mĩtũkĩ!
27Vai o na ĩmwe yasyo ĩnoete kana ĩkũluluutĩka,
vai ĩmwe ĩkwombosya kana ĩkũkoma,
vai ngũa ya kĩnyunyunĩ ndeelu,
kana mũkwa wa kĩatũ mũtw'ĩku.
28Maangi moo nĩ moĩ,
na mbũta syoo syonthe nĩ ngoote,
mavũngũ ma mbalasi syoo nĩ momũ ta ĩvia,
na ndĩa sya makasya moo ithyũũkaa mĩtũkĩ ta kĩlingi.
29Malulumaa ta mũnyambũ,
malulumaa ta mĩnyambũ ya mũika yakwata nyamũ ya kũya,
ĩla ĩkuaa nyamũ ĩsu vate mũndũ ũtonya kũmĩtaany'a.
30Mũthenya ũsu, makaluluma matelemye Ĩsilaeli,
ta kĩlulumo kya ũkanga.
Yĩla mũndũ wĩsisya nthĩ,
akoona kĩvindu kĩthei na thĩna;
kyeni kĩkavw'ĩkwa nĩ matu.
Currently Selected:
Ĩsa 5: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011
