Ĩsa 25

Wathi wa Kũmũtaĩa Mwĩai Ngai

1Ame Mwĩai Ngai, nue Ngai wakwa;

ngakũkumya na ngataĩa ĩsyĩtwa yaku,

nĩkwĩthĩwa nĩwĩkĩte maũndũ ma kũseng'ya,

maũndũ ala wavangie tene ma kũĩkĩĩwa na maw'o.

2Nũtw'ĩkĩthĩtye ndũa kĩvumbu,

na ũkaomboanga ndũa mbiĩĩe;

nyũmba nene mbanakavye ya aeni nĩekete kwĩthĩwa ndũa,

na ndĩkasyoka kwakwa ĩngĩ.

3Kwoou andũ ma mbaĩ syĩ vinya makakũtaĩa;

ndũa sya mbaĩ ite tei ikaũkĩa.

4Nũndũ we wĩthĩĩtwe wĩvitho wa ala ngya,

wĩvitho wa mũndũ mũthĩni e thĩnanĩ;

wĩthĩĩtwe vandũ va kwĩvitha yĩla kwĩ na kĩuutani,

na muunyĩ wa kwĩseseea ũvyũvu,

nũndũ kũvevũũka kwa ala mate tei,

kũilyĩ ta kĩuutani kĩũkima ũkũta,

5na ta ũvyũvu wa nthĩ nyũmũ.

Nũvindĩthasya kĩlonzo kya aeni,

o tondũ ũvyũvu ũolawa nĩ muunyĩ wa ĩtu,

na ũu now'o wathi wa andũ ala mate tei ũvindĩthaw'a.

6Kĩĩmanĩ kĩĩ kya Saioni Mwĩai Ngai Mwene Ũtonyi W'onthe,

akaseũvĩsya andũ ma mbaĩ syonthe mboka ya lĩu ũla mũseo mũno na ndivai ĩla nzeo mũno;

mboka yĩ nyama nou syĩ mũthungo na ndivai nzeũvye nesa.

7Kĩĩmanĩ kĩĩ akavetanga ngũa ya kyeva ĩla ĩvw'ĩkĩte andũ ma mbaĩ syonthe,

suka mũvũthũ ũla ũvw'ĩkĩte andũ ma nthĩ syonthe.

8 # 1Ako 15.54; Ũvu 7.17; 21.4 Mwĩai Ngai Mũsumbĩ akamina kĩkw'ũ tene na tene,

na akavangũla andũ onthe methoi kuma methonĩ moo;

akavetanga kĩvũthya kĩla andũ make mavũthĩtw'e nakyo,

nũndũ Mwĩai Ngai nũneenete ũu.

9Mũthenya ũsu andũ nĩmakaneena masye atĩĩ,

“Kwa w'o, ũũ nĩwe Ngai waitũ;

twĩkalĩte tũmweteelete nĩ kana atũtangĩĩe.

Ũũ nĩ Mwĩai Ngai, ũla twĩkwatasya,

nĩtwĩw'ei mũyo na kũtanĩa ũtangĩĩo wake.”

Ngai Akakany'a Andũ ma Moavi

10 # Ĩsa 15.1—16.14; Yel 48.1-47; Esek 25.8-11; Amo 2.1-3; Nzev 2.8-11 Mwĩai Ngai akasũvĩa Kĩĩma kya Saioni, ĩndĩ akakinyangĩa andũ ma Moavi nthĩ, o tondũ mavuti makinyangĩawa ĩimanĩ yĩla mekaw'a matw'ĩke vũũ. 11Makatambũũkya moko moo me vau, o tondũ mũndũ ũtambũũkasya moko make aithambĩa, ĩndĩ Mwĩai Ngai akaveta ngathĩĩo syoo na ũĩ wa moko moo. 12Mwĩai Ngai akaomboanga mokũta moo malũmu na matũlu; akamaomboanga amavalũkye nthĩ kĩtoonĩ.

Currently Selected:

Ĩsa 25: KAMBA

Highlight

Copy

Compare